‘Lusim Sin Bilong Narapela’
YU TING God i lusim pinis sin bilong yu? Long Amerika, i luk olsem planti bilong ol manmeri i bikpela pinis ol i ting olsem. Dokta Loren Toussaint, em i go pas long mekim ripot bilong wanpela lain (University of Michigan Institute for Social Research), na em i tok ol i bin givim askim long 1,423 man bilong Amerika, na inap 80 pesen bilong ol manmeri i winim 45 krismas i tok God i lusim pinis sin bilong ol.
Tasol 57 pesen tasol bilong ol lain ol i bin givim askim long ol i tok ol i lusim rong bilong narapela. Dispela namba i helpim yumi long tingim gen bikpela tok Jisas i mekim antap long maunten, em i tok: “Harim. Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela.” (Matyu 6:14, 15) Yes, wanpela as na God bai lusim sin bilong yumi em olsem: Yumi yet i mas redi long lusim sin bilong ol narapela.
Aposel Pol i tokim ol Kristen long Kolosi long dispela samting. Em i tok: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” (Kolosi 3:13) Tru, sampela taim i hatwok long mekim dispela. Olsem: Taim wanpela i mekim sampela tok nogut i bagarapim bel bilong yu, ating i hatwok long lusim tingting long dispela rong.
Tasol pasin bilong lusim rong bilong narapela i save kamapim planti gutpela samting. Dokta David R. Williams, em wanpela saveman tu bilong skelim sindaun bilong ol man, em i tok: “Mipela i painimaut olsem pasin bilong lusim rong bilong narapela i mekim bikpela samting long sik bilong tingting bilong ol manmeri long Amerika i gat 50 krismas samting.” Dispela i stret wantaim tok saveman King Solomon i bin raitim inap 3,000 yia i go pinis: “Sapos man i stap bel isi, orait bodi bilong en bai i stap gut.” (Sindaun 14:30) Pasin bilong lusim rong bilong narapela inap mekim na yumi pas gut wantaim God na ol man i stap klostu long yumi, olsem na i gat as tru na long bel olgeta yumi mas lusim rong bilong narapela.—Matyu 18:35.