Askim

Bilong wanem God i larim ol man Israel i maritim ol meri bilong narapela ples ol i bin kisim bilong mekim wok kalabus, maski Lo Bilong Moses i tok ol i no ken maritim ol meri bilong narapela ples?​​—⁠Lo 7:​1-3; 21:​10, 11.

I gat sampela samting i mekim na God i larim ol i mekim olsem. Jehova i bin tokim ol Israel long bagarapim ol taun bilong 7-pela kantri long graun Kenan, na kilim i dai olgeta manmeri i stap long ol dispela taun. (Lo 20:​15-18) Long ol narapela kantri, ating wanpela lain tasol i bin abrusim bagarap em ol meri i no bin slip wantaim man na ol Israel i kisim ol. (Namba 31:​17, 18; Lo 20:14) Wanpela man Israel inap maritim dispela kain meri, sapos meri i mekim sampela samting pastaim.

Long ol samting dispela kain meri i mas mekim, Baibel i tok: “Em i mas rausim olgeta gras long het bilong em, na katim kapa bilong pinga, na senisim klos em i putim long taun bilong kalabus. Em i mas i stap long haus bilong yu na krai long papamama bilong en inap long wanpela mun, na bihain yu ken maritim em.”​​—⁠Lo 21:​12, 13.

Meri ol i bin kisim na i no bin slip wantaim man em man Israel i laik maritim em i mas katim olgeta gras long het bilong em. Pasin bilong katim gras bilong het em i soim olsem man i krai sori o i bel hevi. (Aisaia 3:24) Olsem: Taim olgeta pikinini bilong Jop i dai pinis na olgeta samting bilong em i lus, em i katim olgeta gras long het bilong em bilong soim olsem em i krai sori. (Jop 1:20) Dispela meri i mas “katim kapa bilong pinga,” olsem na maski em i bin penim ol kapa bilong pinga, han bilong em i no inap luk nais. (Lo 21:12) Wanem dispela “klos em i putim long taun bilong kalabus” em i mas rausim? Em kastam bilong ol meri long ol taun bilong ol haiden long werim ol nambawan gutpela klos bilong ol taim ol narapela kantri i kam pait na i laik daunim taun bilong ol. Ol i mekim olsem, long wanem, ol i ting dispela inap pulim ol birua long laikim ol. Meri ol i bin kisim bilong mekim wok kalabus na i krai sori em i no ken werim dispela kain klos.

Meri ol i bin kisim na em bai kamap meri bilong wanpela man Israel, em i mas krai sori inap wanpela mun long ol famili bilong em i dai pinis. Ol Israel i mas bagarapim tru olgeta samting bilong ol dispela taun bilong ol haiden na bai olgeta long famili bilong meri na ol pren na wanblut samting i no stap moa. Ol soldia bilong Israel i bin bagarapim ol imis bilong ol god bilong em, olsem na ol samting em i lotu long en tu i no stap moa. Dispela mun bilong krai sori, em taim tu bilong meri long mekim em yet i kamap klin na bai em i ken stap fri long olgeta samting bilong lotu bilong em long bipo.

Tasol i gat narapela stiatok long pasin bilong maritim nating ol meri bilong narapela ples. Dispela stiatok i olsem: “Yupela i no ken senisim meri wantaim ol.” (Lo 7:⁠3) Wanem as bilong dispela tambu? Lo 7:4 i tok: “Long wanem, ol bai i pulim ol pikinini bilong yupela i go longwe long Bikpela na bai ol i lotu long ol giaman god.” Olsem na dispela tambu em bilong banisim ol Israel na bai ol i no ken kamap doti long ol samting bilong lotu. Tasol meri bilong narapela ples em Lo 21:​10-13 i stori long en i no inap kamapim dispela kain hevi. Olgeta wanblut bilong em i dai pinis, na ol imis i makim ol god bilong em i bagarap pinis. Em i no inap bung na toktok wantaim ol man i save mekim lotu giaman. God i larim ol man Israel long maritim ol dispela kain meri bilong narapela ples.