Nem Bilong God i Stap Long Baibel Jeman Bilong Pastaim
NEM bilong God, Jehova, i stap planti tausen taim long Baibel New World Translation of the Holy Scriptures, em ol i bin wokim long tok ples Jeman long 1971.a Tasol dispela Baibel i no namba wan Baibel i yusim nem bilong God. Yumi ken ting olsem namba wan Baibel bilong Jeman em nem Jehova i stap long en, wanpela bikman bilong lotu Katolik, em Johann Eck, i wokim winim 500 yia i go pinis.
Mama i karim Johann Eck long 1486 long hap saut bilong Jemani. Long taim em i gat 24 krismas, em i kamap profesa bilong lotu long yunivesiti bilong Ingolstadt, na em i holim dispela wok inap long taim em i dai long yia 1543. Eck i stap long taim bilong Martin Luther, na tupela i bin i stap gutpela pren inap liklik taim. Bihain Luther i kamap wanpela gopas bilong lain i bruk na lusim Misin Katolik, tasol Eck i sambai yet long lotu Katolik.
Bikman bilong Bavaria i makim Eck long tanim tok bilong Baibel i go long tok Jeman, na long 1537 ol i prinim dispela Baibel. Wanpela buk (Kirchliches Handlexikon) i tok olsem, Eck i kamapim stret ol tok bilong Baibel em i bin tanim tok bilong en, na “i stret ol man i litimapim Baibel em i tanim, tasol ol i no mekim tumas.” Eck i tanim tok bilong Kisim Bek 6:3 olsem: “Mi Bikpela, mi kamap long Abraam, Aisak na Jekop, mi God i Gat Olgeta Strong: na nem bilong mi Adonai, mi no tokim ol.” Eck i raitim liklik toksave long dispela ves olsem: “Dispela nem Adonai Jehoua.” Planti saveman bilong Baibel i ting olsem dispela em namba wan taim Baibel Jeman i gat nem bilong God long en.
Tasol ol man i save long nem bilong God na ol i bin mekim wok long en inap planti tausen yia. Pastaim tru ol i raitim dispela nem long tok Hibru, ol i yusim “Jehova” bilong makim nem bilong trupela God. (Lo 6:4, NW ) Inap 2,000 yia i go pinis, long tok Grik ol i bin raitim tok Jisas i bin mekim long em i bin autim pinis nem bilong God. (Jon 17:6) Kirap long dispela taim na i kam, ol i bin raitim nem bilong God long planti narapela tok ples, na i no longtaim truim bilong Song 83:18 bai kamap, olgeta man bai save long trupela God, nem bilong em Jehova, em i God Antap Tru na i bosim olgeta hap bilong graun.
[Futnot]
a Ol Witnes Bilong Jehova i wokim long tok Inglis long 1961. Nau i gat dispela Baibel olgeta o hap bilong en long winim 50 tok ples.
[Piksa long pes 32]
Wanpela Baibel bilong Eck bilong 1558, i gat toksave long nem bilong Jehova long Kisim Bek 6:3