Baibel i Save Senisim i Stap Bilong Man

Bilong wanem wanpela meri husat i no bilip moa long lotu i lusim bikpela hap taim nau bilong helpim ol narapela long kisim save long God? Wanem samting i bin kirapim wanpela man husat i bin laikim tru karate long kamap man bilong laikim tru bel isi? Olsem wanem wanpela man bilong kisim drak, dring tumas, na pait long rot i bin senisim pasin bilong em maski em i hatwok tru? Ritim tok ol i mekim.

DISPELA MERI

NEM: PENELOPE TOPLICESCU

KRISMAS: 40

KANTRI: AUSTRALIA

BIPO: I NO BILIP MOA LONG LOTU

LAIP BILONG MI LONG BIPO: Mama i karim mi long Sydney, Australia, tasol taim mi gat 2-pela krismas mipela famili i go sindaun long Papua Niugini. Mipela i stap olsem 2-pela yia samting long Rabaul na bihain mipela i go stap long Bougainville inap 8-pela yia. Long dispela taim, i no gat TV long Papua Niugini, olsem na mitupela brata bilong mi i bin lusim bikpela haptaim long swim na glas long solwara, na kem long bikbus samting.

Taim mi gat 10-pela krismas samting, laik bilong mi long lotu i kirap. Mama em wanpela Katolik, olsem na em i tokim mi long i go wantaim wanpela sister long wanpela skul bilong lainim Baibel. Mi kirap bihainim lotu Katolik na mi baptais taim mi gat 10-pela krismas.

Tasol bihain taim mipela i go bek long Australia na mi gat 13 krismas samting, mi kirap kisim tupela tingting long ol samting lotu i bin lainim mi long en. Taim mi bin stap long haiskul, mi bin stadi long histori. Mitupela papa i save stori long olsem wanem ol lotu i bin kirap na long mipela i tingim wanem ol stori bilong Baibel em ol stori nating tasol. Bihain, mi lusim lotu Katolik.

Marit bilong papamama i bruk taim mi gat 16 krismas. Mama i bin hatwok tru, olsem na bihain mi go stap wantaim papa na meri em i laik maritim. Brata bilong mi i stap bek wantaim mama, na ol i go sindaun long narapela hap bilong Australia. Long dispela taim mi pilim olsem mi stap wanpis tru. Inap olsem 2-pela yia i lus na mi pas gut gen wantaim mama. Mi kirap long dring planti, kisim drak, na go long ol pati. Mi lusim skul, kisim wok mani, na taim mi gat 22 krismas samting, mi westim laip bilong mi long bihainim pasin nogut.

Taim mi gat 25 krismas, mi kirap tingting gen long Baibel. Mi bungim Liene long nupela ples wok bilong mi. Em wanpela naispela meri na em i save rispek long bos bilong em maski bos i mekim hatpela pasin long em. Mi laik save long as na em i no bekim maus bilong bos, na em i tok em i stadi long Baibel wantaim ol Witnes Bilong Jehova, na em i laik bihainim ol stiatok bilong Baibel long i stap bilong em. Liene i tok em i laik stadi long Baibel wantaim mi. Mi no bin klia long tok bilong em, mi ting em i tok mi inap lainim olgeta samting em i save long en long Baibel insait long 1-pela aua tasol. Long dispela nait, Liene i lusim 3-pela aua bilong bekim ol askim mi gat long Baibel. Mi kirap nogut olsem long olgeta bekim em i kamapim, em i mekim wok long ol skripsa bilong Baibel.

Mi tingim taim mi draiv i go bek long haus long dispela nait bihain long mitupela Liene i toktok, na mi bin belhat long God olsem em i no bin larim mi lainim tok i tru bilong em long bipo. Mi save olsem ol Witnes i bihainim ol stretpela pasin long laip bilong ol na mi ting em leit tumas long mi senisim ol pasin bilong mi. Na tu, mi ting mi no inap tru long i go long haus bilong ol man na autim tok olsem ol Witnes i save mekim. Mi no lusim stadi bilong mi wantaim ol Witnes, tasol tingting bilong mi em bilong painim popaia long ol tok ol i skulim ol man long en bambai mi ken lusim ol na bel i no gat tok. Tasol bihain mi luksave olsem mi no inap painim wanpela popaia bilong ol.

BAIBEL I SENISIM I STAP BILONG MI: Taim mi wok long lain moa long ol lo bilong Baibel long stretpela pasin, bel bilong mi i wok long kotim mi moa yet. Bilong daunim dispela, mi lusim pasin bilong kisim drak. Tasol bihain mi go stap long narapela kantri inap sampela hap taim na mi kirap insait gen long ol pati na dring tumas. I luk olsem long taim mi traim long mekim sampela senis long i stap bilong mi we i stret wantaim ol stiatok bilong Baibel, mi save go bek gen long olpela pasin bilong mi. Mi sem na beten long Jehova, tasol bel i kotim mi yet.

Taim mi kisim save long stori bilong King Devit na ol samting em i bin mekim wantaim Batseba na long pasin marimari Jehova i bin mekim long ol, dispela i helpim mi. Devit i bin i gat strongpela bel long tokaut long rong bilong em taim em i kisim tok kaunsel, na em i no painim ol eskius long pasin em i bin mekim. Na long pasin daun em i kisim ol tok bilong stretim em. (2 Samuel 12:​1-​13) Taim mi brukim lo bilong Baibel, mi save tingim dispela stori na dispela i helpim mi long tokim Jehova olsem mi sori long ol rong mi mekim. Mi pasim tok long bel olsem mi mas beten paslain long traim i kamap, na i no bihain long traim i kamap, na dispela i bin helpim mi tru.

GUTPELA SAMTING I PAINIM MI: Mi wanpela meri bilong kros. Tasol skripsa long Efesus 4:​29-​31 i helpim mi long luksave olsem mi mas sakim “pasin bilong bel nogut na kros na belhat.” Taim mi wok long lain long bosim pasin bilong mi long kros, mi lain long bosim maus bilong mi. Na tu, olsem tok bilong Jisas long tok “ ‘Yes’ na ‘Nogat’ tasol,” dispela i bin helpim mi long kamap meri bilong tingting strong long mekim samting.​​—Matyu 5:​37.

Mama bilong mi, em pastaim em i bin birua long mi bung wantaim ol Witnes, bihain em i tokim mi olsem em i amamas long mi. Em i tok tu olsem, “Mi save olsem mi na papa i no mekim na yu kamap kain meri olsem, nogat. Yu kamap olsem, long wanem, yu kisim save long Jehova.” Mi amamas tru taim mi harim dispela tok.

Nau mi pilim olsem laip bilong mi i gat as tru bilong en. Inap 9-pela yia pinis, mi na man bilong mi i mekim wok fultaim long lainim ol man long tok bilong Baibel. Yes, nau mi save go autim tok long ol haus, na mi pilim olsem dispela em i nambawan gutpela wok, winim olgeta narapela wok mi bin mekim.

DISPELA MAN

NEM: DENIS BUSIGIN

KRISMAS: 30

KANTRI: RASIA

BIPO: MAN I LAIKIM KARATE

LAIP BILONG MI LONG BIPO: Mama i karim mi long taun Perm’ na mi kamap bikpela long Furmanov, em wanpela taun i gat olsem 40,000 manmeri long en long hap bilong Ivanovo, Rasia. Furmanov em wanpela naispela taun i gat planti naispela diwai i save senisim kala i go yelo na ret long Septemba samting. Namel long 1980 na 1999, pasin raskol i go bikpela long dispela taun. Famili bilong mi i no save kisim bikpela pe long wok. Mi stap wantaim papamama na yangpela brata bilong mi long flet i gat wanpela rum, olsem na ples i pas nogut tru.

Taim mi gat 7-pela krismas, mi kirap lain long pait karate. Mi laikim tru dispela spot; pait karate i bosim laip bilong mi. Mi lusim bikpela hap taim bilong mi long jim, olsem na ol poroman bilong mi em ol man bilong spot. Taim mi gat 15 krismas, mi winim mak bilong kisim red belt bilong pait karate, na wanpela yia bihain mi kisim brown belt. Mi bin insait long wanpela lain karate i bin insait long bikpela resis bilong karate we ol Rasia i resis wantaim na long resis we ol man bilong Esia na Yurop i resis wantaim. I luk olsem sindaun bilong mi long bihain bai kamap gutpela, tasol taim mi gat 17 krismas laip bilong mi i senis.

Mi na sampela poroman bilong mi i bin mekim wanpela rong na ol i arestim mipela, na putim mi long kalabus inap 2-pela yia. Sindaun bilong ples kalabus em hatwok. Tasol long ples kalabus mi bin lukim Baibel long namba wan taim. Mi ritim Buk Stat, Buk Song na Nupela Testamen. Na mi putim long tingting beten Papa Bilong Mipela. Mi save kolim dispela beten long olgeta nait paslain long mi slip, mi ting olsem dispela bai helpim mi long sampela kain rot.

Long yia 2000, mi lusim kalabus, tasol laip bilong mi i no gat as bilong en na mi no save bai mi mekim wanem. Mi kirap kisim ol drak. Long dispela taim mama bilong mi em i dai. Mi laikim em tumas, olsem na i hatwok long mi karim dispela hevi. Mi lusim pasin bilong kisim ol drak na mi kirap long go gen long jim. Mi go stap long taun Ivanovo. Long dispela hap mi painim wanpela wok long wanpela stua. Namba 2 bos bilong stua em wanpela Witnes Bilong Jehova. Em i stori long mi long sampela bikpela tok bilong Baibel na i stretim rot bilong narapela Witnes long kam stadi wantaim mi olgeta wik.

BAIBEL I SENISIM I STAP BILONG MI: Taim mi stadi long Baibel, mi pilim tru tok mi lainim olsem God i laik mekim graun i kamap wanpela paradais, na mi laik inapim mak bilong insait long en. I no longtaim na mi luksave olsem God Jehova i gat ol lo em ol man i mas bihainim. Mi bin lusim bikpela hap taim long laip bilong mi long tingim mi yet tasol. Tasol mi lainim olsem Jehova i laik bai mi tingim ol arapela na kisim ol pasin em mi no bin i gat long dispela taim​​—ol pasin olsem pasin bilong helpim ol man na laikim pasin bilong i stap bel isi.

Taim mi wok long tingim tingim ol samting Jehova i bin mekim bilong helpim mi​​—olsem givim Pikinini bilong em olsem ofa bilong baim sin bilong mi​​—amamas bilong mi long pasin laikim bilong God i kirapim mi long mekim ol senis long laip bilong mi. Olsem, mi lainim long Buk Song 11:​5, (NW), olsem Jehova i nolaik tru long pasin pait. Olsem na mi no lukim moa ol TV program i litimapim pasin bilong pait na pasin birua. Na mi bin hatwok tru long lusim ol spot bilong pait. Stiatok long 1 Korin 15:33 i helpim mi long save olsem poroman mi makim bilong pren wantaim inap mekim bikpela samting long mi. Mi bin kalabus, na dispela i kamapim klia olsem tok bilong dispela stiatok i stret. Olsem na mi lusim ol poroman em ol i laikim ol spot bilong pait.

GUTPELA SAMTING I PAINIM MI: Pasin bilong bung wantaim ol Witnes Bilong Jehova na stadi long Baibel i bin helpim mi long kamap man i gat stretpela pasin. Olsem, mi lainim long Hibru 13:5 olsem mi mas amamas long ol samting mi gat pinis na no ken laikim tumas mani. Pasin bilong bihainim dispela tok i bin helpim mi long stap longwe long pasin bilong tok giaman na stil.

Ol pren i bikpela samting long mi. Long bipo, mi lukim pasin pren bilong sampela i bagarap, long wanem, ol i gat pasin mangal o pasin bilong pret long ol narapela. Tru, ol Witnes Bilong Jehova i gat sin, tasol mi lukim olsem ol i rispek long ol lo bilong God na ol i traim long bihainim ol tok bilong em long pasin ol i mekim long ol narapela. Nau mi gat ol trupela poroman.

Mi no save laip bilong mi bai i olsem wanem sapos mi no bin lain long bihainim ol lo bilong Baibel. Ating mi bai stap long kalabus o givim hevi long ol narapela man. Tasol nau mi gat naispela meri na 2-pela pikinini man, na olsem famili, mipela i kisim amamas tru long rot bilong helpim ol narapela long kisim save long God.

DISPELA MAN

NEM: JOSÉ CARLOS PEREIRA DA SILVA

KRISMAS: 31

KANTRI: BRASIL

BIPO: MAN BILONG PAIT LONG ROT

LAIP BILONG MI LONG BIPO: Mi kamap bikpela long wanpela setelmen bilong Americana, São Paulo. Mipela i no gat gutpela wara bilong dring o gutpela toilet samting. Dispela setelmen i gat nem olsem ples bilong pait na pasin raskol.

Mi kamap man bilong pait na kros. Planti taim mi insait long ol pait long rot, olsem na ol man bilong dispela hap i save pret long mi. Ol klos na bilas na pasin bilong mi i soim olsem mi man nogut. Mi save dring planti, na planti taim mi dring inap mi hap i dai. Na wankain olsem ol brata bilong mi, mi save kisim ol drak. Wanpela brata bilong mi i bin dai, long wanem, em i bin kisim planti drak tumas.

BAIBEL I SENISIM I STAP BILONG MI: Taim mi bungim ol Witnes Bilong Jehova, ol i soim long Baibel olsem God bai mekim graun i kamap wanpela paradais. (KTH 21:​3, 4) Mi lainim tu olsem ol man i dai pinis ol i no save long wanpela samting, olsem na God i no save givim strafe long ol man nogut long helpaia. (Saveman 9:​4- 6) Dispela i bin mekim gut bel bilong mi. Samting mi lainim long God i givim mi strongpela laik long senisim ol pasin bilong mi. Tasol mi hatwok tru long mekim ol dispela senis, olsem lusim pasin bilong kisim ol drak, dring planti, pait, na mekim tok nogut.

Tasol tok bilong aposel Pol long 1 Korin 6:​9-​11 i bin strongim mi tru. Dispela skripsa i soim olsem sampela Kristen long pastaim i bin i gat sampela pasin nogut olsem bilong mi. Tasol dispela skripsa i tok tu olsem: “Bipo sampela bilong yupela i stap kain man olsem. Tasol God i wasim yupela pinis na mekim yupela i kamap lain manmeri bilong em stret. Yupela i kisim nem stretpela man pinis. Na long nem bilong Bikpela Jisas Krais na long strong bilong Spirit bilong God yet, God i mekim yupela i kamap stretpela manmeri long ai bilong en.” Ol dispela tok i strongim mi long bilip olsem mi tu inap mekim ol senis long laip bilong mi bilong amamasim God.

Taim mi kirap bung wantaim ol Witnes Bilong Jehova, mi bilip olsem ol i bihainim lotu i tru. Ol i save long ol pasin nogut bilong mi long bipo, tasol ol i soim pasin laikim long mi na amamas long mi bung wantaim ol.

GUTPELA SAMTING I PAINIM MI: Sapos mi no bin stadi long Baibel na senisim ol pasin bilong mi, ating bai mi no stap laip nau. Mi bin helpim wanpela brata bilong mi long lainim tok bilong Baibel na lusim pasin bilong em long kisim drak. Na tu, mi bin strongim ol narapela wanblut long kirap stadi long Baibel. Mi amamas tru olsem mi bin dediketim laip bilong mi long mekim wok bilong God, em Man husat i save tingim tru yumi!

[Rait long pes 24]

“Mi pasim tok long bel olsem mi mas beten paslain long traim i kamap, na i no bihain long traim i kamap, na dispela i bin helpim mi tru”