Pas i Kam Long Bolivia

Amamas na Wetim Gutpela Samting i Kamap Maski Em i Stap Rabis

MASKI mi mekim wok misineri long kantri i stap rabis, mi no lain yet long lukim ol man i stap rabis na i no gat helpim. Mi laik bai olgeta man i kisim helpim hariap bilong kamap fri long pen na hevi. Tasol mi save olsem Kingdom Bilong God tasol bai stretim ol dispela hevi. Planti taim mi lukim olsem ol manmeri i bihainim Tok Bilong God, ol i save kisim amamas maski ol i stap rabis tru. Sabina em wanpela bilong ol.

Planti yia i go pinis, Sabina i holim tupela bebi gel bilong em na i lukluk i stap taim man bilong em i kalap long wanpela olpela bas na i go bilong painim gutpela wok mani long narapela kantri. Sabina i wetim em long kam bek, tasol ol mun na yia i go pinis, na em i no kam. Kirap long taim man i go, Sabina i wok hat tru long olgeta wan wan de long painim mani na kaikai samting bilong lukautim em yet na tupela pikinini meri bilong em, Milena na Ghelian.

Mi bungim Sabina namba wan taim long wanpela apinun long stua bilong susa bilong em taim em i wok long helpim ol kastama. Mi ken luksave long ai bilong Sabina olsem em i bin wok hat long de olgeta. Mi askim olsem mi laik stadi long Baibel wantaim em na tupela gel bilong em. Em i tok: “Mi gat laik long mekim olsem, tasol mi bisi tru. Tasol mi laik yu ken stadi wantaim tupela gel bilong mi.” Mi orait long mekim olsem. Taim mi stadi wantaim tupela, mi kisim save long Sabina, na mi pilim tru hatwok bilong em.

Sabina i save kirap wok long 4 klok moning. Taim ol pikinini meri bilong em i slip i stap long dispela liklik haus i no gat rum long en, Sabina i save laitim paia aninit long wanpela traipela sospen. Em i save kukim mit bilong wokim ol empanada we em i save salim bilong kisim mani bilong lukautim em yet na tupela pikinini. Long nait paslain long dispela, Sabina i save redim plaua bilong kukim wantaim ol dispela mit.

Sabina i kisim wanpela kain wilbaro i gat boks long en na em i save putim olgeta samting em bai nidim long dispela de​—ambrela, wanpela liklik stov, ges botol, tebol, ol sia, ol sospen na oil, na mit na plaua na sampela lita dring em i wokim long wara bilong ol prut.

Long 6 klok moningtaim, Sabina na tupela pikinini meri bilong em ol i redi long i go. Ol i pasim na lokim dua bilong haus. Pes bilong ol i drai; i no gat wanpela i toktok o lap. Ol i givim bel olgeta long wok ol bai mekim long dispela de. Planti moning taim mi lukluk i go ausait long windo bilong haus misineri, mi save lukim planti i lusim haus bilong mekim kain wok olsem. Tru tumas, Sabina em wanpela bilong bikpela lain meri em ol i save lusim haus long bikmoning bilong salim kaikai na dring long ol strit bilong Bolivia.

Long 6:30 long moning, taim san i kam antap long maunten, Sabina na tupela pikinini meri i stap pinis long ples bilong ol long maket. Ol i pasim maus tasol na rausim ol samting long wilbaro na sanapim liklik hauskai. Ol i putim namba wan empanada long oil i hat tru na em i wok long pairap isi isi. Switpela smel bilong en i miks wantaim kolwin bilong moningtaim na i pulim ol kastama i kam.

Sabina i askim namba wan kastama: “Yu laikim hamaspela?” Dispela man i no apim het, em i ai slip wantaim na i apim tupela pinga, orait Sabina i givim tupela braunpela empanada i kuk gut na i hot tru. Na em i kisim liklik mani em man i givim. Inap planti handet taim long dispela de em bai mekim dispela pasin bilong givim kaikai na kisim mani. Taim ol i salim pinis olgeta empanada, ol i bungim ol samting na i go bek long haus. Maski lek bilong Sabina i pen long wok em i mekim long moningtaim, em i go bilong mekim namba tu wok bilong em long stua bilong susa bilong em.

Taim mi go kamap long stua bilong stadi long Baibel wantaim tupela gel bilong em long namba wan taim, tupela liklik fom i stap pinis long wanpela kona. Taim mipela i kirap stadi​—Milena i gat 9 krismas na Ghelian i gat 7 krismas​—tupela i amamas long olgeta wan wan stadi na ol i redim gut. Isi isi mipela i toktok gut wantaim na mi kamap pren bilong ol, na ol i no sem moa. Dispela i mekim gut bel bilong Sabina. Bihain, Sabina i laik bai mi stadi long Baibel wantaim em, maski em i save bisi tru.

Taim save bilong Sabina i go bikpela, pasin bilong laikim God Jehova tu i go bikpela. Nau em i amamas​—bipo em i no save pilim olsem! Dispela meri bilong maketim kaikai husat i save luk taiet na pes drai, nau em i luk narapela kain. Em i apim het na sanap stret na pes bilong em i lait. Susa bilong em i tok: “Nau Sabina i save smail long olgeta taim, tasol long bipo i no olsem.” Ol narapela tu i luksave long bikpela senis i kamap long Sabina na tupela pikinini meri bilong em. Sabina i kisim ol samting em i bin lus long en​—stretpela save long God na ol samting Em i tingting pinis long mekim.

Sabina i amamas long stadi bilong em, tasol em i bisi tru na i no gat taim bilong i go long ol miting Kristen. Bihain, em i orait long invatesen bilong mi na em i kam long Haus Kingdom. Kirap long dispela taim em i save kam long olgeta miting. Sabina i kisim ol pren tru insait long kongrigesen. Em i pilim tru olsem Jehova i save lukautim ol man husat i laikim Em na i lusim ol samting bilong ol yet bilong mekim wok bilong Em.​—Luk 12:​22-24; 1 Timoti 6:8.

Sabina i laikim tru ol tok em i lainim na em i gat laik long tokim ol narapela long en. Tasol em i tok: “Mi save pret taim mi tingim olsem mi bai autim tok long ol haus.” Em i tingting olsem, ‘Olsem wanem bai kain meri olsem mi, husat i no save toktok tumas na i no skul gut inap skulim ol narapela man?’ Maski em i pilim olsem, gutpela pasin ol narapela i mekim long em na ol senis em i mekim long i stap bilong em i kirapim em long insait long dispela wok. Em i luksave tu olsem ol pikinini meri bilong em i tingim em olsem gutpela piksa bilong bihainim. Olsem na em i kirap long autim gutnius long ol narapela. Tupela gel bilong em i amamas long bihainim em long mekim dispela wok.

Long nau, Sabina i no stap moa olsem wanpela rabismeri husat i wok hat long olgeta de na i no gat amamas. Tasol dispela i no makim olsem em i kamap manimeri, nogat. Em i gat stretpela tingting long sindaun bilong em. Em i baptais pinis olsem wanpela Kristen, na em i save tokim ol man long gutnius bilong Kingdom Bilong God​—dispela Kingdom tasol i rot bilong pinisim bel hevi na pasin bilong i stap rabis.​—Matyu 6:10.

Em 5 klok moning na Sabina i redi long lusim haus. Tasol long dispela moning em i no inap salim ol empanada, nogat. Em bai go bungim ol bratasista Kristen bilong em na ol bai autim tok. Pasin bilong em long lusim sampela taim bilong em yet long olgeta wik bilong helpim ol narapela, dispela i givim bikpela amamas moa long em. Em i smail gut, na i lokim dua bilong haus, na wokabaut i go daun long rot. Em i no pusim wanpela wilbaro, nogat, em i karim wanpela beg. Insait long beg bilong em i gat Baibel na ol buk na nius bilong Baibel em bai yusim bilong tokim ol narapela long gutpela samting ol i ken wetim i kamap bihain. Sabina i smail na i tok: “Mi no bin ting mi inap toktok wantaim ol narapela long Baibel.” Na em i tok moa: “Mi laikim tru dispela wok!”