Yu Ting Ol Kristen Bilong Pastaim i Bin Insait Long Politik?

▪ Paslain long Jisas i go long heven, em i tokaut klia long ol disaipel long olsem wanem ol i mas autim tok, tasol em i no givim sampela tok long ol long samting bilong wok politik. (Matyu 28:18-20) Olsem na ol disaipel i bihainim yet stiatok Jisas i bin givim long ol paslain long dispela, olsem: “Ol samting bilong Sisar, givim long Sisar, na ol samting bilong God, givim long God.”—Mak 12:17.

Olsem wanem dispela stiatok i helpim ol disaipel bilong Jisas na ol i no insait long ol samting bilong graun, maski ol i stap long dispela graun? Olsem wanem ol i makim wanem samting ol i mas givim long Gavman, olsem Sisar, na wanem samting ol i mas givim long God?

Aposel Pol i tingim olsem sapos ol i insait long wok politik, ol i no bihainim dispela stiatok. Buk Beyond Good Intentions—A Biblical View of Politics, i tok: “Pol i tokaut olsem em i sitisen bilong Rom bambai kot i ken sambai long em, tasol em i no sapotim ol wok bilong gavman.”

Pol i givim wanem ol stiatok long ol wanbilip Kristen? Dispela buk i tok moa: “Ol pas em i bin raitim long ol bilipman long ol biktaun olsem Korin, Efesus, na Rom, i no soim olsem em i tingim ol tok kros bilong ol lain politik.” Na buk i tok moa olsem Pol “i tokim ol Kristen long ol i mas daun long gavman, tasol long ol pas bilong em i no gat tru wanpela taim we em i tokim sios long kirapim gavman long mekim sampela wok.”—Rom 12:18; 13:1, 5-7.

Ol Kristen husat i stap planti yia bihain long indai bilong Pol, ol i strong yet long bihainim stiatok long wok ol i mas mekim bilong lotuim God na wok ol i mas mekim bilong helpim gavman. Ol i soim rispek long gavman, tasol ol i no insait liklik long ol wok politik. Buk Beyond Good Intentions i tok long ol dispela bilipman olsem: “Ol Kristen bilong pastaim i save olsem ol i mas rispektim gavman, tasol ol i no tingting long insait long wok politik.”

Inap olsem 300 yia bihain long indai bilong Krais, ol samting i senis. Wanpela tisa bilong lotu, Charles Villa-Vicencio, i tok: “Taim ol samting bilong politik i senis long taim bilong Konstantin, planti Kristen i kirap mekim wok bilong gavman na ol i insait long ami.” (Buk Between Christ and Caesar) Wanem samting i kamap long dispela? Klostu long yia 400 C.E., ol i miksim lotu na politik wantaim na dispela i kamap olsem lotu bilong Bikpela Gavman Rom.

Long nau, planti lotu em ol i tok ol i bihainim Krais, ol i wok yet long kirapim lain bilong ol long insait long ol wok politik. Tasol ol dispela lotu i no bihainim pasin bilong Krais, na tu, ol i no bihainim pasin bilong ol Kristen bilong pastaim.