Ol Miting i Save Helpim Ol Yangpela

¹ Wanpela yangpela meri i tok: “Sampela taim mi save ting i stap bilong ol yangpela i hatwok tru, winim i stap bilong ol narapela. Mipela i save stap wantaim ol manmeri i save pamuk, kisim ol drak, na dring.” Olsem wanem? Yu save pilim olsem? Sapos olsem, yu ting wanem samting inap helpim yu long abrusim ol dispela pasin nogut? Yu mas i gat bilip, yu mas bilip strong olsem pasin bilong Jehova i stret, long wanem, sapos yu no gat bilip yu “no inap bihainim laik bilong God.” (Hi 11:⁠6) Pasin bilong kam long ol miting bilong kongrigesen bai strongim bilip Kristen bilong yu, na pasin bilong yu long tingting strong long abrusim ol pasin nogut.

² Yu Inap Kisim Planti Samting Long Ol Miting: I gat wanem as na yumi save amamas long kaikai wantaim ol gutpela pren? Ating em pasin bilong kisim gutpela kaikai wantaim ol pren em yumi inap i stap bel isi wantaim ol, a? Long ol miting yumi inap kisim wankain amamas, tasol em amamas bilong ol samting bilong spirit.

³ Ol samting yumi toktok long en long ol miting i save strongim yumi. Na yumi save stori long kain kain samting, olsem long ol hevi bilong olgeta de, na long ol tok profet bilong Baibel. Ol i mekim ol gutpela tok bilong skulim yumi long olsem wanem yumi inap bihainim nambawan gutpela rot long laip bilong yumi, na bilong winim ol traim i save kamap. Ol poroman yumi inap painim long ol miting ol i gutpela tru, winim ol poroman yumi inap painim long ol narapela hap, na ol gutpela pasin bilong spirit i mekim na yumi inap i stap gut na amamas. (Sng 133:⁠1) Olsem na yumi no kirap nogut long wanpela yangpela i tok olsem: “Mi save go long skul long de olgeta, na dispela i save pinisim strong bilong mi. Tasol ol miting i olsem wanpela hulwara long ples wesan nating, em mi inap kisim nupela strong long en bilong helpim mi long winim ol hevi bilong skul long de bihain.” Narapela yangpela i tok: “Mi kisim save olsem taim mi stap klostu long ol narapela ol i laikim tru Jehova, dispela i save helpim mi long stap klostu long em.”

⁴ Taim yu insait long Skul Bilong Wok Autim Tok, yu lain long bungim sampela tok em Baibel i as bilong en, na redim wanpela tok, na bihain mekim dispela tok long ai bilong ol man i stap long Haus Kingdom long pasin bilong toktok wantaim man. Tingim ol gutpela samting yu inap kisim taim yu kisim skul long pasin bilong lainim gut ol man long tok i tru i stap long Baibel! Ol yangpela i no inap kisim dispela kain gutpela skul long narapela hap.

⁵ Olsem Wanem Ol Miting Inap Helpim Yu Moa Yet: Bilong ol miting inap helpim yu tru, i gat 3-pela bikpela samting yu mas mekim. Olsem: Redim gut ol tok bilong miting, na bekim sampela tok, na bihainim tok yu kisim save long en.

⁶ Redim Ol Miting: Makim taim bilong redim ol tok bilong ol miting long olgeta taim. Yu no ken larim wok bilong skul, o wok haptaim, o ol samting bilong painim amamas i stilim taim bilong yu long redim ol tok bai kamap long olgeta wan wan miting. Pasin bilong bihainim gutpela sedyul inap helpim yu. Nambawan bikpela samting bilong mekim em i olsem: Kaunim hap bilong Baibel em sedyul bilong Skul Bilong Wok Autim Tok i makim bilong olgeta wik. Bai yu lusim sampela minit tasol long olgeta wan wan de bilong kaunim na tingim tingim ol sapta sedyul i makim. Makim taim bilong redim Buk-Stadi na Stadi Wastaua. Sampela ol i redim dispela tupela miting wanpela o tupela de paslain long ol i kamap. Na inap long skel bilong yu, mekim wankain pasin bilong redim ol hap bilong Miting Bilong Wok bilong olgeta wik.

⁷ Bekim Sampela Tok: Baibel i tok, taim Jisas i gat 12-pela krismas ol i painim em long tempel, na em i wok long harim tok, na givim ol askim na bekim. (Lu 2:​46, 47) Yumi ken tok, em i givim bel olgeta. Ol miting bai helpim yu moa yet sapos yu bekim sampela tok.​—⁠Snd 15:⁠23.

⁸ Yu mas putim tingting long ol tok ol miting i laik lainim yumi long en. Sampela taim i hatwok moa long putim yau long wanpela tok, winim hatwok bilong mekim wanpela tok. Bilong wanem? Long wanem, tingting bilong yumi inap wokabaut taim narapela man i toktok. Olsem wanem yumi inap winim dispela hevi? Raitim sampela tok long notbuk. Raitim ol bikpela tok yu laik skelim gen long bihain. Pasin bilong raitim sampela tok long notbuk bai helpim yu long putim gut tingting long ol tok i kamap long miting. Na tu, taim ol i kolim ol skripsa, painim skripsa long Baibel bilong yu yet na lukluk long en taim brata i kaunim.

⁹ Na tu, putim mak olsem yu laik insait long ol hap bilong miting i gat ol askim na bekim. Em bai helpim yu moa yet sapos yu tingting gut long ol tok yu laik bekim. Sindaun 15:28 i tok: “Stretpela man i save tingting gut pastaim, na bihain em i bekim tok long arapela man.”

¹⁰ Bihainim Tok Yu Lainim: Laspela samting yu mas mekim i olsem: Ol samting yu lainim i mas “wok strong long bel bilong [yu].” (1 Te 2:13) Taim yu mekim wok long ol gutpela tok yu lainim long ol wan wan miting, bai yu go klostu moa long God Jehova. Yu bai pilim olsem Jehova em i wanpela man tru, na bai yu kisim bikpela amamas na stap belgut taim yu wok long “bihainim tok tru,” na bai yu pilim gut tok i tru.​—⁠3 Jon 4.

¹¹ Yes ol yangpela brata na sista, taim yupela i wok long redim ol miting long olgeta taim, na bekim sampela tok, na bihainim tok yupela i lainim, bai yupela i kisim bikpela amamas long ol miting. Na long wankain taim, bai yupela i kisim olgeta gutpela samting yupela inap kisim long ol miting. Bilip bilong yu bai kamap strong, na yu bai tingting strong long stap gut long Papa bilong yu long heven, em Jehova.​—⁠Sng 145:⁠18.