Yusim Buklet “Tok i Go Pas Long Tok Bilong God”—Long Kirapim Tok
1. Yumi bin kisim wanem nupela tul bilong mekim wok autim tok?
1 Long kibung rijinel “Wok Yet Long Painim Kingdom Bilong God Pastaim” yumi bin kisim nupela buklet Tok i Go Pas Long Tok Bilong God. Hau bai yumi inap yusim dispela nupela tul taim yumi redim ol tok yumi laik mekim long wok autim tok? Ol i putim sampela topik na aninit long en i gat sampela skripsa i sapotim dispela topik, wankain olsem buk Toktok Gut, olsem na em i gutpela buklet bilong kirapim tok wantaim ol man.
2. Hau yumi inap yusim buklet Tok i Go Pas Long Tok Bilong God long wok autim tok?
2 Ating yu laik yusim askim 8 na tok: “Mipela i wok long toktok wantaim ol man long dispela askim, ‘Yu ting em asua bilong God na pen na hevi i painim ol man?,’ long wanem, planti man i laik save long dispela. [Long sampela teritori i gutpela moa long soim ol askim long man bilong haus.] Yu gat wanem tingting? [Larim man i bekim tok.] Baibel i bekim gut dispela askim.” Ritim na stori long wanpela o tupela skripsa long Baibel stret. Sapos man i amamas, yu ken soim em 20 askim i stap long lista long kirap bilong dispela buk na askim em long makim wanpela na yupela i ken stori long en long narapela taim. O yu ken givim wanpela buk bilong stadi we i gat ol tok long samting yutupela i stori long en.
3. Hau bai yumi yusim buklet Tok i Go Pas Long Tok Bilong God bilong kirapim tok long ol teritori we yumi bungim ol man i no bilong lotu Kristen?
3 Ating askim 4 na 13-17 inap helpim yumi taim yumi bungim ol man i no bilong lotu Kristen. Olsem: Yu ken kamapim askim 17 na tok: “Mipela i raun na stori long sampela gutpela tok bilong helpim ol famili. Olsem wanem? Yu lukim olsem planti famili i karim kain kain hevi long nau? [Larim man i bekim tok.] Planti marit i luksave olsem dispela tok i helpim ol, olsem: ‘Maritmeri i mas i gat bikpela rispek long man bilong en.’ [No gat wok long tok olsem dispela tok i kam long Efesus 5:33. Sapos yu toktok wantaim maritmeri, yu ken kolim tasol tok bilong Efesus 5:28.] Yu ting taim ol marit i bihainim dispela skultok em inap helpim ol?”
4. Taim yu stori pinis wantaim man i no bilong lotu Kristen, bai yu tok wanem?
4 Taim yupela i stori pinis, stretim rot na bai yu ken stori moa wantaim em long narapela taim. O yu ken stori long narapela skripsa long askim em yu bin kamapim. I stret long tokim em olsem, ol tok yu stori wantaim em long en i kam long Baibel. Givim em wanpela buk samting yu ting em bai amamas long en, na i stret long samting yutupela i stori long en na long tingting bilong em long Baibel.—Lukim namel pepa long Wok Kingdom bilong Disemba 2013.