Ston Long Kidni—Stretim Sik Bilong Bipo yet
ATING yu save long wanpela i bin kisim sik bilong ston long kidni. Long olgeta yia long Amerika, inap 300,000 manmeri i save kisim dispela sik na ol i mas go slip long haus sik. Pen bilong dispela sik i nogut tru, wankain olsem pen bilong meri i karim pikinini.
Sampela i ting ston long kidni em wanpela sik bilong nau tasol, na ol i ting em i kamap long rot bilong kaikai o sindaun bilong man long nau. Tasol ston i stap long rot bilong pispis em wanpela sik i bin painim man inap planti handet yia. Ol i bin painim ol ston tu long bodi bilong ol daiman long Isip, em ol i bin dai inap planti tausen yia bipo, na ol man i bin putim marasin long skin bilong ol na karamapim bambai ol i no ken sting.
Ston i save kamap taim sampela marasin long pispis i pas wantaim na wok long i go bikpela, na dispela marasin i no lusim skin taim man i pispis. Ol ston i kain kain na i gat narapela narapela marasin long en. Wanpela buk (Clinical Symposia) i tok: ‘Long Amerika, bikpela hap bilong ol ston long kidni em marasin kalsium.’
As Bilong Sik
Wanpela ripot i tok, inap 10 pesen bilong ol man na 5 pesen bilong ol meri long Not Amerika, ol bai kisim ston long kidni. Planti i save kisim tupela taim. Ol i tok wanpela long olgeta 5-pela 5-pela man i gat ston ol bai kisim gen insait long 5-pela yia.
Inap planti yia ol dokta i tingting planti—i gat wanem as na sampela i save kisim ston long kidni na sampela nogat. I gat kain kain as na ol ston i save kamap, olsem: Skin i no save mekim gut wok bilong en, o binatang jem, o sampela sik i kamap long rot bilong papamama, o inap longtaim skin i sot tru long wara, o kaikai, o sampela samting moa.
Inap 80 pesen bilong ol ston long kidni i save lusim bodi taim man i pispis. Bilong helpim ston long lusim skin dokta i kirapim sikman long dring planti wara. Maski ol ston i liklik na i hatwok long lukim sampela, ol inap givim bikpela pen tru long man. Sapos ston i pasim rot bilong pispis o i bikpela tumas (sampela i bikpela olsem bal golf) na i no inap raus wantaim pispis, dokta i mas stretim, nogut skin bilong man i bagarap.
Nupela Rot Bilong Stretim
Inap long 1980 samting, ol dokta i save katim man bikpela bilong rausim ston i no save lusim bodi. Bilong ol i ken kisim dispela ston i pas long kidni o long rot bilong pispis, ol i mas katim man long hapsait aninit long banis i go daun inap 30 sentimita. Taim ol i katim man pinis em i save slip 2-pela wik long haus sik, na bihain em i save go long haus na malolo inap 2-pela mun samting. Tasol wanpela buk bilong ol dokta (Conn’s Current Therapy—1989) i tok: ‘Nau i gat ol nupela masin samting, olsem na pasin bilong katim man bilong rausim ston i save kamap wan wan taim tasol.’
Long nau ol i painim pinis nupela rot bilong rausim ol ston i pas tru, na long dispela rot ol i save katim man liklik tasol. Tasol i gat narapela rot ol i save bihainim planti taim moa, na ol i no save katim man. Ol i kolim dispela rot extracorporeal shock wave lithotripsy (ESWL). Wanpela buk (Conn’s Current Therapy) i stori long ol dispela nupela rot na i tok, ‘long ol wan handet wan handet man i gat ston long kidni ol dokta i save katim wanpela tasol.’
Wanpela Rot
I gat wanpela rot bilong katim man liklik tasol, em ol i kolim percutaneous ultrasonic lithotripsy. Insait bilong dispela tok percutaneous i olsem ‘long rot bilong skin,’ na tok lithotripsy i olsem ‘brukbrukim.’ Bilong mekim olsem, dokta i save katim man liklik olsem wanpela sentimita tasol long hapsait aninit long banis, na bihain dokta i putim wanpela tul i go insait; ol i kolim dispela tul nefroskop. Nau dokta inap lukluk i go insait long kidni bilong sikman na lukim ston.
Sapos ston i bikpela tumas long raus long dispela rot, dokta i save subim wanpela kain paip i go insait long tul nefroskop bilong i go insait long kidni. Nau ol i skruim dispela paip long wanpela kain jenareta. Jenareta i mekim na paip i save meknais na spit tru. Insait long wanpela sekon tasol em i save meknais 23,000 i go inap 25,000 taim, na olsem wanpela kain hama i wok long paua, em i paitim paitim na brukbrukim ol ston i no strong tumas.
Bihain paip i wok long pulim pulim ol liklik pipia ston i kam ausait na klinim insait bilong kidni. Ol dokta i wok long brukbrukim na klinim i go i go inap long ol i lukim olgeta pipia ston i pinis.
Tasol sampela taim i gat ol hap ston i pas yet insait long kidni. Sapos olsem, dokta i mas subim wanpela liklik paip i gat samting olsem tupela liklik pinga long en i go insait long tul nefroskop. Nau dokta i ken opim tupela pinga bilong liklik paip na holim ston na pulim i kam ausait long kidni.
Taim ol i wok long kamapim dispela nupela kain pasin bilong rausim ston, ol i bin traim kain kain rot. Sampela yia i go pinis wanpela nius (Urologic Clinics of North America) i tok: ‘Long olgeta mun ol nupela nius bilong ol dokta i stori long narapela narapela rot bilong rausim ston taim ol i katim man liklik.’ Nius i tok moa, ‘sampela rot bilong rausim ston i gutpela sapos ston i no bikpela tumas na em i stap long ples i no hatwok long kisim.’ Tasol bikpela samting tru em ‘save na gutpela wok bilong dokta.’
Maski jenareta i gat strong inap long brukbrukim ol ston, em i no save bagarapim man tumas. Wanpela buk bilong ol dokta (Clinical Symposia) i tok: ‘Wan wan man tasol i kisim hevi—em blut i wok long lus.’ Tasol wanpela ripot i tok, long olgeta wan handet wan handet sikman, inap 4-pela i bin lusim bikpela hap blut.
Gutpela samting bilong dispela nupela pasin bilong rausim ston, em man i no save pilim bikpela pen tumas na kwiktaim em i save orait bek. Planti sikman i save slip 5-pela o 6-pela de tasol long haus sik, na sampela i lusim haus sik bihain long 3-pela de tasol. Dispela i bikpela samting long ol man i save wok mani, long wanem, taim ol i lusim haus sik, kwiktaim ol inap i go bek long wok.
Ol i No Katim Man
Long yia 1980 long Munik, Jemani, ol i kamapim wanpela nambawan nupela pasin bilong stretim dispela sik ol i kolim extracorporeal shock wave lithotripsy. Dispela pasin em i olsem: Long rot bilong paua na wara ol i mekim sampela samting na dispela i gat strong long brukbrukim ol ston. No gat wok long katim man.
Pastaim ol i slipim sikman long wanpela tang ain i gat wara long en, na wara i no hat tumas. Ol i slipim em gut na taim paua i kirapim wara, wara i sut stret i go long kidni i gat ston—mekim i go i go inap long strong bilong wara i brukbrukim ston olgeta. Em nau, long planti sikman ol pipia ston i save raus wantaim pispis.
Inap long 1990 ol i bin rausim 80 pesen bilong ol ston long rot bilong dispela pasin (ESWL). Long 1992 wanpela nius (Australian Family Physician) i tok, kirap long taim ol i bin kamapim pasin ESWL ‘ol i bin helpim 3 milion sikman long olgeta hap. Ol dokta i bin mekim wok long 1100 masin bilong brukbrukim ol ston.’
Pasin ESWL i nogutim liklik sampela hap skin klostu long kidni, tasol ‘em i no save bagarapim ol narapela hap bodi i stap klostu, olsem splin, lewa, pankrias. Liklik hevi tasol i save painim ol sikman inap liklik hap taim. Sampela i tok, 24 i go inap 48 aua bihain, ol i pilim liklik pen long banis na liklik blut i kamap long pispis bilong ol.’ (Nius Australian Family Physician) Ol i bin stretim ol pikinini tu long dispela rot na wok bilong ol i kamap gutpela. Na nius i tok moa: ‘Mipela i wok long skelim ESWL inap 10-pela yia pinis, na mipela i bilip olsem dispela em i wanpela gutpela rot tru bilong helpim man; em i no gat bikpela hevi bilong en.’
Dispela pasin bilong stretim sikman i wok gut tru, olsem na long 1992 buk Conn’s Current Therapy i tok: ‘ESWL i mekim na ol inap rausim ston na i no gat hatwok o bikpela pen. Olsem na ol dokta na sikman tu i no strong tumas long klia long ol samting bilong kamapim dispela sik bilong ston long kidni.’
Tasol ating yu no laik kisim bikpela pen bilong ol ston long kidni, a? Orait, yu ken mekim wanem bilong abrusim dispela sik?
Pasim Sik
Sapos yu bin kisim ston long kidni, i gutpela long bihainim tok bilong dokta na dring planti wara, long wanem, ston inap kamap gen. Ol i tok long olgeta de yu mas pispis planti, inap olsem 2-pela lita samting. Olsem na yu mas dring planti wara tru!
Na tu, i gutpela sapos yu senisim kaikai bilong yu. Ol dokta i tok, no ken kaikai planti abus bilong bulmakau na pik na sipsip. No ken kaikai planti sol na ol kaikai i gat bikpela hap marasin oxalate long en, long wanem, ol i ting dispela i helpim kidni long kamapim ol ston. Ol dispela kain kaikai i olsem: Pinat, galip, sokolat, wanpela kain kari ol i kolim pepa, na sampela kain kumu olsem spinis. Bipo ol dokta i bin tok no ken kaikai planti samting i gat marasin kalsium long en, tasol nau ol i save taim man i kaikai planti samting i gat marasin kalsium long en, i hatwok moa long ston i ken kamap.
Tasol maski yu wok strong long mekim ol samting bilong pasim ston long kamap, sapos narapela i kamap gen, bel bilong yu i ken i stap isi liklik, long wanem, nau yu save i gat ol gutpela nupela rot bilong stretim.
[Piksa Kredit Lain long pes 20]
Leonardo On The Human Body/Dover Publications, Inc.
[Piksa long pes 21]
Ol i rausim ston long kidni long rot bilong masin “lithotripter”—ol i no katim man
[Kredit Lain]
S.I.U./Science Source/PR