Husat i Save Kalabus Long En? Bilong Wanem?

SAPOS yu draivim ka long bikrot na yu harim narapela kain nois long ensin bilong ka, bai yu pasim ka na lukim ensin? O bai yu opim redio bikpela na pairap bilong en i daunim dispela nois?

Yu save pinis wanem samting yu mas mekim, a? Tasol ol man i kalabus long sampela pasin, ol i no bihainim savepasin​—ol i bihainim rot i save bagarapim i stap bilong ol. Ol i kalabus long ol drak o dring o kaikai, na ol i ting ol dispela samting inap helpim ol long daunim hevi bilong ol​—ol i no tingting long stretim hevi.

Olsem wanem man inap save em i kalabus long wanpela pasin? Wanpela dokta i tok: ‘Yu inap save wanpela marasin o wanpela pasin i kalabusim yu sapos em i putim hevi long yu, tasol yu mekim yet.’

Sapos olsem, hevi i no liklik. Man i mas save long as bilong hevi pastaim na bihain em inap stretim pasin bilong em, olsem man i mas skelim ensin bilong ka bilong painim hevi bilong en.

Ol Drak na Dring

Wanem samting i mekim na man i kalabus long drak o dring? Tru, olgeta man i mas was gut long wanlain bilong ol o long pasin bilong laik tumas long save long drak o dring, tasol ol yangpela i mas was gut moa yet. Planti man i kalabus long drak o dring, long wanem, ol i poromanim ol man i save mekim nabaut long ol dispela samting. (1 Korin 15:33) Ating dispela i as na wanpela ripot bilong Amerika i tok, inap 41 pesen bilong ol yangpela i laik pinis long haiskul, ol i save dring spak long olgeta tupela tupela wik.

Tasol pasin bilong mekim nabaut long drak na dring i narapela kain long pasin bilong stap kalabus long en. Ol man i save mekim nabaut long drak o dring samting, planti ol i no kalabus long en na ol inap lusim olgeta.a Tasol ol man i kalabus long en, ol i no inap lusim. Nau bikpela bel hevi ol i kisim i daunim ol kain kain amamas ol i bin kisim pastaim. Buk Addictions i tok: ‘Pasin tru bilong ol man i kalabus long dring o drak samting i olsem: Ol i no amamas liklik long ol yet na ol i bel hevi stret, long wanem, ol i no inap lusim.’

Long nau planti man i gat hevi na ol i dring planti o mekim nabaut long ol drak bilong helpim ol long daunim bel hevi bilong ol. Yumi no kirap nogut long dispela, long wanem, Baibel i tok, nau yumi stap long “taim bilong las de,” na “planti hevi nogut tru bai i kamap.” Baibel i tok, ol man bai “laikim tumas long kisim mani,” na “hambak nabaut,” na “givim baksait long ol pasin bilong God,” na “pait na bagarapim ol man,” na “mekim nogut long ol pren bilong ol,” na “ol bai i tingim ol yet i bikpela man tru.” (2 Timoti 3:​1-4) Ol dispela pasin i mekim na i no hatwok long man i kalabus long sampela samting.

Susan i gat bikpela bel hevi long samting i bin kamap bipo​—sampela i bin mekim nogut long em. Bilong daunim bel hevi bilong em, Susan i bin kisim drak koken. Em i tok: ‘Koken i mekim na mi pilim olsem mi strongpela meri. Mi ting mi bosim skin na mi no meri nating, tasol bel i giamanim mi.’

Wanpela lain i skelim sampela yangpela man ol i kalabus long dring o drak samting na kisim save olsem: Long olgeta 10-pela 10-pela, ol man i bin mekim nogut long 4-pela. Na ol i skelim 178 meri ol i save dring oltaim na ol i kisim save olsem: Inap 88 pesen bilong ol i bin kisim bikpela hevi taim wanpela i bin mekim nogut tru long ol. Baibel i tok: “Taim ol i mekim nogut long wanpela man na daunim em, maski em i gat gutpela tingting, em bai kirap mekim pasin kranki.” (Saveman 7:​7, NW) Ating man i bel hevi, long wanem, em i bin kisim bikpela hevi long i stap bilong em bipo, olsem na em bai dring planti o kisim drak bambai em i ken lusim tingting long ol hevi bilong em.

Tasol ol man i no save kalabus long ol drak o dring tasol.

Pasin Kranki Long Kaikai

Sampela i mekim pasin kranki long kaikai (sampela saveman i tok, i olsem ol i kalabus long dispela pasin). Ol i mekim olsem bilong mekim gut bel bilong ol long taim ol i bel hevi long wanpela samting. Olsem: Sampela i save kirap na kaikai planti na larim skin i kamap patpela na ol i ting em rot bilong daunim ol hevi bilong ol. Jennie i tok: ‘Ating mi larim skin bilong mi i stap patpela, long wanem, maski wanem hevi i kamap mi inap ting patpela skin i mekim na mi gat dispela hevi. Olsem na sapos wanpela man o meri i no laikim mi, olgeta taim mi inap ting, as bilong dispela em patpela skin bilong mi.’

Sampela i ting ol inap bosim gut kaikai bilong ol​—em wanpela samting ol inap tru long bosim. Tasol ol i giamanim bel bilong ol.b Planti i gat pasin kranki long kaikai, na insait tru long bel ol i pilim olsem ol i no inap mekim wanpela gutpela samting. Olsem na bilong kamapim olsem ol inap tru long bosim skin bilong ol, ol i wok long daunim laik bilong skin long kaikai. Wanpela meri i tok: ‘Bodi bilong yu inap kamap olsem wanpela ples yu yet yu bosim, na yu bosim strong dispela ples.’

Ol samting mipela i stori pinis long en i no as bilong olgeta hevi na man i kalabus long drak o dring o kaikai​—i gat kain kain as. Sampela saveman i ting lo bilong skin ol i kisim long papamama i mekim na sampela i save kalabus long dring o drak samting. Jack Henningfield bilong lain National Institute on Drug Abuse i tok: ‘Nogut yumi ting wanpela samting tasol i mekim na man i kalabus long dring o drak samting. I gat planti samting inap mekim, olsem pasin na sindaun na wokabaut bilong man, na ol man i orait long em o nogat.’

Maski i gat wanem as na man o meri i kalabus long wanpela pasin, i no olsem skin na bel bilong em i mas bagarap olgeta, nogat; i gat rot bilong helpim em.

[Ol Futnot]

[Blok long pes 5]

Planti Man i Kalabus Long Dring, Drak, Kaikai

◼ Wanpela lain long Meksiko i skelim hevi bilong dring na ol i tok, long olgeta 8-pela 8-pela man long Meksiko i gat 14 krismas i go inap 65 krismas, wanpela i save dring oltaim.

◼ Sarita Broden i save wok long helpim ol famili i gat hevi na em i tok: ‘Long Japan planti i mekim pasin kranki long kaikai. Namel long 1940 na 1965 isi isi dispela hevi i go bikpela, tasol namel long 1965 na 1981 haus sik i mas helpim planti meri moa i gat dispela hevi. Tasol kirap long 1981 planti meri tru i kisim pasin bilong no inap kaikai, o lusim kaikai inap longtaim, o kaikai hariap na bihain trautim kaikai.’

◼ Nau long Saina planti man moa i kisim drak heroin. Dokta Li Jianhua i save wok long Kunming Drug Abuse Research Center, em i tok: ‘I no ol man i stap long boda bilong Saina tasol i save kisim heroin, nogat; dispela drak i go insait tru long kantri na long hap bilong bus i go inap long ol biktaun. Na ol pikinini tu i kisim.’

◼ Long Surik, Swiselan, wanpela lain i ting sapos ol i larim ol man i kam baim drak long ai bilong ol man, ol inap holim ol man i save maketim drak long pasin hait. Tasol wok bilong ol i popaia. Dokta Albert Weittstein i tok: ‘Mipela ting bai mipela holim ol man i save maketim drak, tasol nogat; dispela wok i pulim ol narapela man bilong maketim o kisim ol drak, em ol i kam long ol longwe ples.’