Pas Bilong Ol Man
Toktok Gut Wantaim Tenkyu tru long ol gutpela stori “Tupela Marit i Mas Toktok Gut Wantaim.” (Septemba 8, 1994) Mi marit inap 26 yia. Long sampela yia i go pinis mi gat hevi long marit bilong mi na klostu marit i bruk. As bilong dispela hevi—mipela i no toktok gut wantaim. Mi bin skelim ol buk bilong Sosaiti Was Taua na mekim traim long bihainim ol tok mi kaunim. Man bilong mi tu i kirap na stadi long Baibel. Tasol ol dispela stori i givim sampela tok moa bilong helpim mi. Ol i wok long helpim mi long tingting gut na kirapim mi long bihainim ol tok bilong en.
Y. K., long Japan
Gutpela Papa Tenkyu long gutpela stori “Papa Bilong Mi i Stap Olsem Gutpela Piksa.” (Ogas 8, 1994) Papa bilong mi i bin stap gut long God na em i dai klostu 2-pela yia nau. Wanpela mun paslain long em i dai, lek bilong em i solap nogut tru na em i no inap wokabaut. Tasol inap long de stret em i dai, em i bin autim tok long olgeta man i kam lukim em. Long dispela mun em i dai, em i bin tromoi klostu 20 aua long tokim ol man long bilip bilong em. Dispela stori i helpim mi long tingim “ol arapela manmeri bilong God, ol i stap long olgeta hap bilong graun, ol tu i save karim wankain pen.”—1 Pita 5:9.
D. P., long Amerika
Ol Piksa Komik Mi laikim stori “Ol Piksa Komik Bilong Pait Inap Bagarapim Yumi?” (Oktoba 8, 1994) Mi amamas long kaunim, long wanem, planti liklik pikinini i bihainim pasin ol i lukim long ol piksa komik nogut. Mi gat 13 krismas.
D. L., long Amerika
Olgeta Lain Inap Stap Wanbel Mi kirap nogut tru taim mi kaunim ol stori “Olsem Wanem Olgeta Lain Inap Stap Wanbel?” (Ogas 8, 1994) Mi bel hevi stret long ol tok mi bin harim long Bosnia na Hetsagovina na Somalia—ol man i mas sindaun long ples i gat pait na hangre na indai, ol i no gat rot long lusim kain ples olsem. Tasol ol dispela stori i kamapim rot tru bilong stretim ol hevi, na olsem wanem long nau dispela samting i save helpim planti man long i stap wanbel. Mi bin go long kibung intenesenel bilong ol Witnes Bilong Jehova long Polan long 1989 na mi save, pasin bilong ol Witnes Bilong Jehova long stap olsem brata brata na stap wanbel na narapela i laikim tru narapela, em i olsem wanpela mirakel long dispela taim.
H. K., long Japan
Sampela Tok i Kam Long Olgeta Hap Mi laik raitim pas na tokim yupela long gutpela wok yupela i mekim. Hap bilong Kirap! “Sampela Tok i Kam Long Olgeta Hap” i bin helpim mi gut taim tisa i tok mi mas raitim ol liklik stori long ol samting i kamap long graun.
J. W., long Amerika
Mi gat 14 krismas na olgeta taim mi save kaunim Kirap! Mi amamas long kaunim olgeta stori bilong en. Wanpela hap mi amamas tru long en na mi laik tok tenkyu long yupela, em hap “Sampela Tok i Kam Long Olgeta Hap.” Mi save lain long planti kain kain samting taim mi kaunim dispela hap. Ol i save kamapim stori long ol samting i kamap nau. Na planti samting dispela hap i stori long en, tisa i save toktok long en long skul. Na mi amamas, long wanem, yupela i no kamapim tingting bilong yupela yet, olsem na i no hatwok long kamapim ol dispela tok long ol man—ol i gat laik long harim.
T. M., long Amerika