Ol Yangpela i Laik Save . . .

Olsem Wanem Mi Ken Stretim Wokabaut Bilong Mi?

JOHN i sanap ausait long wanpela Haus Kingdom bilong ol Witnes Bilong Jehova na em i tok: “Mi no inap i go insait.” Taim em i yangpela em i lusim pasin Kristen na em i kirap bihainim pasin raskol​—em i stil, na kisim ol drak, na mekim pasin pamuk. Inap planti yia em i bihainim pasin olsem, tasol em i no inap lusim tingting long ol tok bilong Baibel em i bin lainim. Olsem na em i go long wanpela Haus Kingdom​—tasol em i pret long go insait. Wanpela Witnes i wok long strongim em long go insait, tasol John i tok: “Yu no save. Mi mekim planti rong tumas. Mi ting Jehova i no inap lusim ol rong mi bin mekim.”

Planti yangpela i save bikhet na sakim ol lo, na lotu, na stretpela pasin papamama i bihainim. Em samting nogut tru sapos yangpela i bikhet long papamama i save aninit long God. Planti liklik ol i bikhet na ol i go mekim kain kain pasin na ol i laik painim amamas, tasol sampela i no i stap amamas; ol i pilim olsem i stap bilong ol i no gat as bilong en. (Sindaun 14:13) Sampela i kisim bikpela pen na hevi long pasin nogut bilong dispela graun, na ol i laik stretim wokabaut bilong ol na bihainim gen ol tok i tru bilong Baibel em papamama i skulim ol long en taim ol i liklik yet. Tasol yu ting ol inap mekim?

Wanpela Yangpela i Bikhet na Lusim Papa

Tok piksa bilong Jisas long Luk 15:​11-32 inap helpim yumi long save long bekim bilong dispela askim. Jisas i tok piksa long wanpela yangpela man em i lusim papa na em i go pinisim nating olgeta mani bilong em. Jisas i tok: “Wanpela man i gat tupela pikinini man. Na namba 2 pikinini i tokim papa olsem, ‘Papa, mi ting long olgeta samting yu laik tilim long mi wantaim brata bilong mi. Hap bilong mi, mi laik bai yu givim long mi nau.’ Orait papa i tilim olgeta samting bilong en i go long tupela. I no longtaim, na dispela namba 2 pikinini i bungim olgeta samting bilong en na i salim long ol man. Na em i kisim mani na i go i stap long wanpela longwe ples.”

I no olsem papa i mekim pasin nogut na dispela yangpela man i bikhet! Papa i no hatpela man i mekim nogut long pikinini na putim planti lo tumas long em, a? Lo Bilong Moses i tok, pikinini man i ken kisim sampela samting bilong papa, tasol papa i mas dai pastaim. (Lo 21:​15-17) Dispela yangpela man i no sori liklik​—em i tokim papa em i laik kisim hap bilong em taim papa i stap yet! Papa i mekim gut long em na givim ol dispela samting long em. (Skelim wantaim Stat 25:​5, 6.) Pasin bilong yangpela man i kranki, i no pasin bilong papa. Wanpela saveman (Alfred Edersheim) i tok, ating dispela yangpela man i les “long i stap aninit long papa na bihainim tok bilong em”; em i “laik i stap fri na painim amamas.”

Taim papa o mama i strong tumas long pikinini, sapos pikinini i ranawe, dispela i no inap stretim hevi. Long dispela rot pikinini i bagarapim em yet. Tingim gen tok piksa bilong Jisas. Dispela yangpela man i lusim papa na em i go i stap long wanpela longwe ples. “Em i mekim ol kain kain hambak pasin, na olgeta mani bilong en i pinis.” Na nau “taim bilong bikpela hangre i kamap long dispela ples. Na em i no gat wanpela samting.” Maski em i stap nogut olsem, em i no kisim stretpela tingting. Em i hambak yet na ting save bilong em yet inap helpim em. “Olsem na em i go kisim wok long wanpela man bilong dispela ples. Na dispela man i salim em i go long banis pik bilong en bilong lukautim ol pik. Em i lukim ol pik i kaikai ol skin bilong bin, na em i gat bikpela laik tru long kisim sampela na pulapim bel bilong en. Tasol i no gat wanpela man i givim kaikai long em.”

Wanpela saveman bilong Baibel (Herbert Lockyer) em i tok: “Ol Juda i mas pilim nogut tru taim ol i harim Jisas i tok yangpela man hia i ‘lukautim ol pik,’ long wanem, ol Juda bai sem nogut tru long mekim kain wok olsem.” Long nau tu ol yangpela i lusim ol tok i tru bilong Baibel, planti ol i stap nogut tru na ol i mekim sampela samting ol i sem long en. Wanpela yangpela meri Kristen em i ranawe lusim papamama na em i tok: “Olgeta mani bilong mi i pinis long ol drak, na mi no gat mani bilong baim narapela samting. Olsem na mi kirap stilim ol samting long ol stua bambai mi gat mani bilong baim drak.”

“Em i Kisim Stretpela Tingting”

Tasol olsem wanem long yangpela man long tok piksa bilong Jisas? Taim em i stap nogut tru, em i mekim wanem? Jisas i tok, “nau em i kisim stretpela tingting.” Hap tok Grik ol i kisim dispela tok long en i olsem “em i kam bek long em yet.” Dispela i makim olsem pastaim tingting bilong em i longlong nabaut​—em i laik bagarap, tasol em i no pilim​—tasol nau tingting bilong em i kamap klia gen.​—Skelim wantaim 2 Timoti 2:​24-26.

Kain samting olsem i painim sampela yangpela long nau em ol i bikhet. Samting nogut tru i painim ol na dispela i mekim tingting bilong ol i kirap nogut na ol i kisim bek stretpela tingting. Sampela samting nogut i save painim ol em olsem: ol i go kalabus, o kisim bikpela bagarap, o kisim wanpela sik nogut bilong pamuk. Kain samting olsem inap kirapim tru tingting bilong ol na mekim ol i tingting gut. Ol i pilim pinis tok bilong Sindaun 1:32: “Ol manmeri i no gat gutpela tingting, ol i save givim baksait long mi, na dispela pasin bilong ol i save kilim ol yet i dai.”

Tingim yangpela meri Elizabeth, em i lusim papamama na em i kirap kisim ol drak. Em i tok: “Mi lusim tingting olgeta long Jehova.” Tasol wanpela taim em i go long Nu Yok na em i wokabaut abrusim nambawan ofis bilong ol Witnes Bilong Jehova. Dispela i mekim wanem long em? Em i tok: “Mi bel hevi stret. Mi tingting olsem: Mi longlong. Bilong wanem mi kirap bihainim ol dispela pasin i bagarapim mi?”

Taim yangpela man long tok piksa bilong Jisas i kisim bek stretpela tingting, em i tingim gut samting em i mas mekim​—em i mas go bek long papa na stretim wokabaut bilong em! Em i strongim bel na em i go. Tasol papa bai mekim wanem? Yangpela man hia i bin giamanim papa na bagarapim tru bel bilong papa. Stori i tok: “Taim em i stap longwe yet, na papa i lukim em i wokabaut i kam. Na bel bilong papa i sori tumas long em. Na papa i ran i go, na i holimpas pikinini na i givim kis long em.” Yes, taim yangpela i no kamapim yet ol tok em i redim bilong autim rong bilong em long papa, papa i kirap mekim pasin sori na lusim rong bilong em!

Stretim Tok Wantaim God

Tasol yangpela i tok: “Papa, mi bin mekim sin long God na long yu.” Dispela i givim wanem save long yumi? Ol yangpela i bin lusim ol pasin bilong God, ol i mas “stretim tok” wantaim God pastaim bambai ol i ken stretim wokabaut bilong ol! (Aisaia 1:18) Yumi mas tenkyu long Jehova, long wanem, em yet i wokim rot bilong kamap wanbel gen wantaim em. Tru tumas, dispela papa long tok piksa bilong Jisas em i makim God Jehova. God tu i save lusim rong bilong ol man i tanim bel. Em i tokim ol: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.” (Malakai 3:7; skelim wantaim Song 103:​13, 14.) Tasol ol i mas mekim pasin olsem bilong ol Juda long taim bilong Baibel, em ol i bin mekim rong, tasol ol i tok: “Yumi mas skelim gut olgeta pasin na wokabaut bilong yumi. Na yumi mas lusim ol pasin nogut na yumi kam bek long Bikpela.”​—Krai 3:40.

Yes, ol i mas skelim gut ol pasin nogut ol i bin mekim. Yangpela i bin lusim rot, taim em i skelim ol pasin nogut em i bin mekim, dispela i mas kirapim em long autim ol rong bilong em long God Jehova. Man bilong raitim Song i tok: “Taim mi no autim sin bilong mi yet, mi krai nogut long san na long nait. . . . Bihain mi bin autim sin bilong mi long yu. Mi no haitim pasin nogut bilong mi. . . . Na yu tekewe asua bilong mi na sin bilong mi tu.”​—Song 32:​3-5.

Olsem wanem sapos yangpela i bin mekim bikpela rong, olsem em i bin rausim bel, o pamuk nabaut, o kisim ol drak, o stil samting? Yumi save, sapos yangpela i bin mekim kain rong olsem, em inap pilim olsem em i nogut na Jehova i no inap lusim rong bilong em. John, em yumi bin stori long em pastaim, em i pilim olsem. Olsem na em i sanap ausait long Haus Kingdom na em i pilim olsem em i no inap i go insait. Tasol wanpela gutpela elda bilong kongrigesen i helpim John. Elda i stori long King Manase bilong Israel long bipo, em i bin mekim ol bikpela rong tru​—na em i gat asua long kilim man i dai tu! Tasol Jehova i lusim ol rong bilong em. (2 Stori 33:​1-13) John i tok: “Dispela elda i kisim bek mi long rot bilong bagarap.” Taim John i save, Jehova inap lusim ol rong bilong em, em i strongim bel na go insait long Haus Kingdom na askim ol long helpim em.a

Planti yangpela olsem, i mas i gat man bilong helpim ol long stretim tok wantaim God na kamap gutpela gen long ai bilong em. Ol elda bilong kongrigesen inap mekim gutpela wok bilong helpim kain yangpela olsem. Taim yangpela ‘i autim ol rong bilong em,’ ol i ken harim gut na pilim tingting bilong em na mekim pasin sori long em. Na ol i ken stretim em na helpim em. Olsem: Ol i ken stretim rot bambai wanpela i ken stadi wantaim em na ‘skulim em gen long ol namba wan hap tru bilong tok bilong God.’ Na sapos em i gat hatwok long beten, wanpela elda i ken beten wantaim em bilong helpim em. Baibel i tok: “Sapos stretpela man i prea, orait prea bilong en i gat bikpela strong, na em inap tru long helpim ol arapela.”​—Jems 5:​14-16; Hibru 5:12.

Yu Mas Wokabaut Long Ol Stretpela Rot

Ol yangpela i laik stretim wokabaut bilong ol, pastaim ol i mas stretim tok wantaim God. Tasol ol i mas stretim tok wantaim papamama tu na tok sori long ol, olsem yangpela man long tok piksa bilong Jisas i bin mekim. Ol i bin givim bikpela pen na hevi long papamama, na sapos ol i tok sori, dispela inap mekim gut bel bilong papamama na kirapim papamama long helpim ol. Wanpela yangpela meri i ranawe na taim em i kam bek long papamama, em i gat pikinini em i bin kamapim nating. Em i tok: “Mama na papa i mekim bikpela pasin sori tru long mi.”

Yangpela i laik mekim pasin God i laikim, em i mas “wokabaut long ol stretpela rot.” (Hibru 12:13) Em i mas stretim wokabaut bilong em, na senisim ol pasin na ol poroman bilong em. (Song 25:9; Sindaun 9:6) Em bikpela samting long em yet i mas stadi oltaim. Wanpela yangpela meri bipo em i bikhet, na em i tok: “Mi save kaunim Baibel long olgeta de, na mi save kaunim ol buk na nius bilong ol Witnes Bilong Jehova, em Baibel i as bilong en. Mi tenkyu long God i givim rot long mi gen.”

John i kamapim gut hevi, em i tok: “Mi tingting bek long bikpela hap taim mi bin lusim nating, na ol samting mi inap mekim insait long dispela hap taim. Tasol mi no inap senisim ol samting mi bin mekim bipo.” Tasol gutpela tru, God bilong yumi em i save mekim pasin marimari; em i save mekim pasin sori na singautim ol man i bin lusim em long kam bek long em. Gutpela yu harim singaut bilong em na yu kam bek, a?

[Ol Futnot]

[Piksa long pes 26]

Ol strongpela Kristen inap helpim yu long stretim wokabaut bilong yu