Ples Tarangau i Kam Bilong Painim Pis
PLANTI tausen i save kam. Ol i kam bilong painim kaikai. Ol i lusim olgeta hap bilong Alaska na Britis Kalambia na longwe provins Wosington, na flai i kam. Ol i naispela naispela tarangau—het i waitpela na waitpela tel bilong en i op olsem fen bilong pasim em taim em i pundaun. Gras bilong en i olsem blakpela na hevi bilong en i olsem 6-pela kilo. Tarangau meri i bikpela liklik long tarangau man. Taim tarangau i flai em inap spit tru—inap 50 kilomita insait long wanpela aua. Na ol i gat longpela pul—1.8 i go inap 2.4 mita samting. Sapos gutpela ai bilong en i lukim wanpela pis i stap longwe liklik olsem wanpela kilomita samting, em inap sut i go daun olsem 160 kilomita insait long wanpela aua na kisim pis!
Tasol bilong kaikai long wara Silkat, tarangau i no ken hatwok long sut i kam daun na kisim pis. Dispela wara i pulap long planti planti pis samon na ol pis i no inap i go long wanpela hap, i olsem ol i wet i stap bilong tarangau i ken kam na kaikai. Dispela gutpela ples kaikai i stap long wanpela hap ol i kolim Alaska Chilkat Bald Eagle Preserve. Long 1982, Alaska i bin makim dispela hap graun bilong ‘lukautim ol planti planti tarangau Bald Eagle i stap long dispela hap. I no gat narapela kantri i gat planti tarangau olsem na ol inap stap gut na no ken pinis.’
Ol i makim olsem 19,000 hekta graun bilong ol wara Silkat, Klahani na Sirku, na ol hap i gutpela long tarangau i ken stap long en na kamapim pikinini. Inap 8-pela kilomita bilong wara Silkat, klostu long bikrot Hains na namel long taun Hains na taun Kluwan, em ples planti tausen tarangau i save bung long en na ples ol man i save go long en bilong lukim ol tarangau.
Wanpela pepa bilong gavman (Alaska Chilkat Bald Eagle Preserve) i stori long dispela 8-pela kilomita bilong wara Silkat na olsem wanem i gat pis samon long en bilong ol tarangau i ken kaikai.
Pepa i tok: ‘Long taim bilong bikpela kol, ol wara i save tanim i kamap ais, tasol wanpela samting i mekim na dispela 8-pela kilomita bilong wara Silkat i no save kamap ais. Ol i kolim dispela hap olsem “raunwara aluvial fen.” Na wara Sirku tu i gat wanpela raunwara olsem. Wara Sirku, Klahani, na Silkat i bung na ol i bin karim ol liklik ston kain olsem karanas, na ol bikpela ston, na wesan, na pipia bilong ol maunten ais, na ol dispela samting i bin hip hip i stap na kamap wanpela traipela raunwara, mak bilong en i olsem wanpela fen.’
Pasin tru bilong ol wara i olsem: Taim wanpela wara i ran i go bung long narapela wara, em i save ran isi isi na lusim ol pipia graun, na dispela i save kamap olsem wanpela kain ples tais, tasol em i no save kamap olsem wanpela traipela raunwara. Long ples wara Sirku i bungim wara Silkat, wanpela samting i bin mekim na graun i bruk na i go daun, na ol maunten ais i bruk na mekim dispela hap graun i kamap olsem wanpela traipela hul i daun tru winim 230 mita daunbilo long mak bilong solwara. Taim ol maunten ais i surik i go ol i bin lusim sampela pipia. Dispela pipia na wesan na karanas ol wara i save lusim, ol i bung wantaim na hip i go i go inap long wanpela kain samting olsem ston i no gat hevi bilong en i kamap long as bilong raunwara, i kam antap olsem 230 mita.
Long taim bilong san olsem mun Epril i go inap mun Oktoba, ais na ol maunten ais i tanim olsem wara na ran i go long raunwara aluvial fen. Bikpela wara tru i ran i go na em i no inap lusim hariap dispela hap. Dispela i mekim na wanpela traipela raunwara i kamap. Pepa bilong gavman i tok moa olsem: ‘Long taim bilong kol ol wara i save kamap ais, tasol wara long dispela traipela raunwara, nogat. Hat bilong wara i olsem 5-pela i go inap 10-pela digri Selsias antap long hat bilong ol wara klostu long en. Dispela wara i save ran i go long wara Silkat, olsem na wara Silkat i no save kamap ais.
‘Faipela kain kain pis samon i save putim kiau long ol dispela wara na ol liklik wara klostu. Ol pis i save raun insait long wara long mun Julai i go inap long Oktoba samting. Bihain liklik long ol pis samon i putim pinis ol kiau, ol i save dai. Em nau, skin bilong ol pis i dai pinis i kamap bikpela kaikai bilong ol tarangau.’
Long mun Oktoba ol tarangau i kam na kaikai ol pis samon i dai pinis, na ol i kaikai i go i go inap long pinis bilong mun Februeri. Liklik taim bihain, ol planti tausen tarangau i kirap na flai i go nabaut long ol narapela hap. Tasol dispela ples tais i ples tru bilong 200 i go inap 400 samting tarangau—ol i stap tasol—ol i no raun long wanpela hap. Ol i save kaikai pis, na sapos nogat, ol i kaikai welpaul bilong wara, sampela liklik animal, na skin bilong sampela animal i dai pinis.
Pasin Pren na “Marit”
Sampela tarangau i save stap inap 40 yia samting. Taim tarangau man i painim pinis poroman bilong en, tupela i save poroman wantaim i go inap long taim tupela i dai, tasol tupela i stap wantaim long taim bilong kamapim pikinini tasol. Long mun Epril tupela i kirap na pilai bilong poroman wantaim. Wanpela nius (Eagles—The Alaska Chilkat Bald Eagle Preserve) i tok, sampela taim tupela i flai antap tru na “sut i kam daun, na taim tupela i mekim olsem, pinga bilong lek bilong tupela i save pas wantaim, na tupela i tanim tanim pundaun i go.” Man! Gutpela pasin pren bilong ol!
Ol man i bin lukim 94 haus bilong ol tarangau long dispela ples bilong lukautim ol tarangau. Tarangau i save putim wanpela i go inap tripela kiau. Em i save sindaun long ol kiau inap 34 o 35 de samting na ol kiau i save bruk namel long pinis bilong mun Me na kirap bilong mun Jun. Pikinini tarangau i save lusim haus paslain long mun Septemba, tasol ol i no gat naispela gras olsem papamama. Gras bilong pikinini i braunpela na i gat ol waitpela mak mak long en. Gras bilong het na tel bai kamap waitpela taim ol i kisim 4-pela o 5-pela krismas!
Dispela nius i stori tu long sampela hatwok bilong tarangau na em i no ken bagarap, na nius i givim toksave long ol man i kam lukim ol na ol i ken mekim wanem na hevi i no ken painim ol. Nius i tok olsem:
‘Dispela hap graun (Alaska Chilkat Bald Eagle Preserve) i olsem 19,000 hekta, na ol i makim dispela hap bilong lukautim ol tarangau na ol i no ken bagarap. Tasol bipo i no olsem; long laik bilong ol yet, ol man bilong painim abus na kisim mani long en, ol i bin kilim tarangau. Ol man i bin giaman na tok, tarangau i save laikim tru pis samon na ol liklik animal, na ol i save kaikai planti tru. Olsem na wanpela lain bilong Alaska (Alaska Territorial Legislature) i tingim dispela tok giaman bilong ol man, na long 1917 ol i save baim ol man bilong kilim tarangau. Sampela lapun i bin insait long ami long kem Fot Wiliam H. Sewat long taun Hains i tok, ami i givim liklik pe tru long ol, olsem na bilong painim liklik mani moa, ol i bin kilim ol tarangau. Sapos ol i kisim tupela lek bilong tarangau ol i bin kisim wanpela dola, bihain ol i bin kisim tupela dola.
‘Bihain gavman i kisim save olsem tok bilong ol man olsem tarangau i save bagarapim ol pis samon em tok giaman, olsem na long 1953 ol i tambuim ol man long kilim tarangau. Tasol paslain long ol i putim dispela tambu, ol man i bin kilim 128,000 tarangau bilong kisim mani. Ol i ting long 1930 i go inap 1939 long hap bilong Saut-Is Alaska, ol tarangau i no planti, long wanem, ol man i bin kilim ol bilong kisim mani. Tasol long 1970 i go inap 1979 namba bilong ol tarangau i go antap olsem dabol.
‘Taim Alaska i kamap wanpela provins bilong Yunaitet Stets long 1959, gavman i kamapim wanpela lo (Bald Eagle Act of 1940) bilong lukautim ol tarangau. Sapos man i kilim wanpela tarangau em i brukim lo bilong gavman. Na sapos em i holim wanpela tarangau maski em i stap laip yet o em i dai pinis, o em i holim wanpela hap skin bilong en olsem gras samting, na em i no bin kisim orait long gavman bilong mekim olsem, em i brukim lo bilong gavman tu.
‘Long 1972 wanpela lain bilong gavman (Alaska State Legislature) i makim dispela hap graun bilong wara Silkat (Chilkat River Critical Habitat Area) bilong lukautim ol tarangau. Wanpela dipatmen bilong gavman (Alaska Department of Fish and Game) i save lukautim ol hap i gat bikpela lain tarangau i save kam long en na ol man i no ken bagarapim ol. Tasol maski ol i bin mekim olsem, planti hap ol tarangau i save go long en i no gat wanpela man o lain i save lukautim, olsem na inap longtaim ol saveman bilong lukautim ol wara na graun samting i tok pait wantaim ol kampani i laik wokim ol haus samting long ples daun Silkat. Wanpela sosaiti (National Audubon Society) na wanpela lain em gavman i givim mani long ol (Hains/Klukwan Resource Study), i skelim gut dispela samting na bihain ol man bilong katim diwai, painim pis, lukautim ol wara na graun samting, ol bisnisman, na ol man politik, ol i wanbel long wok bilong ol long dispela hap. Long 1982, gavman i tingim tok bilong olgeta na kamapim wanpela lo na makim dispela 19,000 hekta graun (Alaska Chilkat Bald Eagle Preserve) olsem ples bilong lukautim ol tarangau.
‘Long dispela hap ol man i no ken wok bisnis long katim ol diwai o kisim wanpela samting insait long graun, tasol ol pasin bilong bipo olsem kisim prut long ol liklik diwai, painim pis, painim abus, ol inap mekim yet. Lain Alaska Division of Parks i save wok wantaim wanpela liklik lain i gat 12-pela man i insait long en, na ol i lukautim dispela ples bilong ol tarangau. Sampela bilong ol dispela 12-pela man i bilong dispela hap stret, na sampela ol i bilong gavman, na wanpela em saveman bilong skelim bus na ol animal samting.
‘Ol man i toktok yet long olsem wanem ol i ken mekim wok long ol samting long bus na graun na wara long ples daun Silkat tasol ol i no ken bagarapim ples, na sampela taim dispela inap kirapim tok pait. Tasol ol asples i amamas ol i bin stretim rot bilong lukautim ol tarangau.’
Nambawan hap ol man i ken go long en na lukim ol tarangau em long bikrot Hains. Wara Silkat i save ran arere long dispela bikrot na ol i bin makim sampela hap long dispela rot ol man i ken sanap long en na lukim ol tarangau.
[Mep long pes 15]
(Bilong save ol dispela rait i stap we long pes, lukim buk o magasin)
Wara Silkat Wara Silkut
Wara Klahani KLUWAN
Ples Bilong Lukim Tarangau
(aluvial fen)
▴
▴
Bikrot Hains
Wara Sirku ▾ Raunwara Silkut
Raunwara Silkat ▾
Wara Silkat ▾ Pasis Lutak
Wara Takhin ▾
HAINS
[Kredit Lain]
Mountain High Maps™ copyright © 1993 Digital Wisdom, Inc.
[Piksa Kredit Lain long pes 15]
Bald eagles on pages 15-18: Alaska Division of Tourism