Kalabus Long Saibiria!
EM STORI BILONG VASILY KALIN
Sapos yu lukim wanpela man i sindaun isi na kaunim Baibel maski i gat bikpela pairap bilong ol bom, ating yu laik save bilong wanem em inap stap isi olsem, a? Papa bilong mi em i bin lukim kain samting olsem winim 56 yia i go pinis.
EM JULAI 1942, taim Namba Tu Pait i bikpela tru. Taim ami bilong Jemani i pait long ples bilong papa bilong mi, em Vilsanitsa, long Yukren, papa i bin go lukim sampela lapun long haus bilong ol. Maski ol bom i pairap long olgeta hap klostu, lapun man i sindaun klostu long stov na hatim hap kon na kaunim Baibel.
Mama i karim mi 5-pela yia bihain, klostu long naispela biktaun Ivano-Frankivsk long hap wes bilong Yukren na long dispela taim biktaun i insait long Soviet Yunion. Bihain papa i tokim mi long dispela taim em i bin bungim dispela man, em wanpela Witnes Bilong Jehova, na em i stori tu long ol samting nogut i bin kamap long ol yia bilong pait. Ol manmeri i les pinis na ol i tingting planti long ol samting i kamap, olsem na planti ol i tingting olsem: ‘Bilong wanem i gat planti pasin i no stret? Bilong wanem planti tausen manmeri i no gat asua ol i wok long i dai? Bilong wanem God i larim dispela samting i kamap? Bilong wanem? Bilong wanem? Bilong wanem?’
Papa i stap longpela taim liklik wantaim lapun man na ol i stori gut long ol kain askim olsem. Lapun i opim Baibel bilong em na em i soim papa planti tok bilong en bilong bekim ol askim em longtaim pinis papa i bin tingting planti long en. Lapun man i tok olsem, em laik bilong God long pinisim ol pait long taim em i bin makim, na graun bai kamap wanpela naispela ples paradais.—Song 46:9; Aisaia 2:4; KTH 21:3, 4.
Papa i siksti stret i go long haus na em i tok: “Olsem wanem? Yupela inap bilip? Mi toktok wanpela taim tasol wantaim ol Witnes Bilong Jehova, na nau ai bilong mi i op! Mi painim pinis tok i tru!” Papa i tok, maski em i bin go long Misin Katolik long olgeta taim, ol pris i no inap bekim ol askim bilong em. Olsem na papa i kirap stadi long Baibel na mama i bung wantaim em bilong mekim olsem. Na tu, ol i kirap na skulim 3-pela pikinini bilong ol—susa bilong mi i gat tupela krismas tasol, na ol brata bilong mi, em wanpela i gat 7-pela krismas na narapela i gat 11-pela krismas. Bihain liklik, wanpela bom i bagarapim bikpela hap bilong haus na ol i gat wanpela rum tasol bilong sindaun long en.
Mama i bin go bikpela insait long wanpela bikpela famili. Em i gat 6-pela susa na wanpela brata. Papa bilong em, em i wanpela maniman bilong dispela hap ol i sindaun long en, na em i ting strong na namba bilong em i bikpela samting. Olsem na pastaim ol wanblut i birua long nupela bilip bilong famili bilong mi. Tasol bihain, planti bilong ol dispela birua ol i lusim ol pasin bilong lotu i no stret long tok bilong Baibel, olsem pasin bilong mekim wok long ol imis, na ol i bung wantaim papamama bilong mi long lotu i tru.
Long ai bilong ol man, ol pris i kirapim ol man long birua long ol Witnes. Olsem na ol asples i brukim ol windo bilong haus na mekim ol strongpela tok bilong pretim papamama. Tasol maski ol i mekim olsem, papamama bilong mi ol i stadi yet long Baibel. Olsem na taim mama i karim mi long 1947, famili bilong mipela i lotuim Jehova long spirit na long pasin i tru.—Jon 4:24.
Kisim Mipela i Go Kalabus
Mi no inap tru long lusim tingting long ol samting i bin kamap long bikmoning bilong Epril 8, 1951, maski mi gat 4-pela krismas tasol long dispela taim. Sampela soldia wantaim ol dok ol i kam insait long haus bilong mipela. Ol i kamautim wanpela pepa bilong rausim mipela long kantri, na ol i sekim gut ol samting long haus. Ol soldia i holim masin-gan ol i sanap long dua wantaim ol dok, na ol man i pasim yunifom bilong ami ol i sindaun long tebol na wetim mipela taim mipela i hariap hariap bilong redi long lusim ples insait long tupela aua ol i makim. Mi no inap save wanem samting i wok long kamap long mipela, na mi krai.
Ol i tokim papamama long sainim wanpela pepa i tokaut olsem ol i no stap moa olsem Witnes Bilong Jehova na ol i no ken bung moa wantaim ol. Sapos ol i sainim dispela pepa, ol bai larim ol i stap yet long haus na kantri bilong ol. Tasol papa i strong long tok: “Mi bilip olsem maski yupela i kisim mipela i go we, God bilong mipela, Jehova, em bai stap wantaim mipela.”
Ofisa i tok: “Tingim famili bilong yu, tingim ol pikinini bilong yu. Mipela i no kisim yupela i go sindaun long wanpela gutpela ples malolo. Mipela bai kisim yupela i go longwe tru long hap not—long hap i gat ais long olgeta taim na ol pola-bea i wokabaut long rot.”
Long dispela taim, “Saibiria” em i narapela kain tok long ol man na ol i no save liklik long dispela ples. Tasol bilip na pasin bilong laikim tru Jehova i strong moa, winim strong bilong pret long wanpela ples mipela i no save long en. Ol i putim ol kago bilong mipela long wanpela wilka, na ol i kisim mipela i go long biktaun na putim mipela wantaim 20 i go inap 30 famili moa long tren bilong karim kago. Em nau, raun bilong mipela i kirap bilong i go long ples nating bilong Saibiria.
Taim tren bilong mipela i kamap long ol tren-stesin, mipela bungim ol narapela tren i bringim ol manmeri i go long narapela kantri olsem lain kalabus, na mipela i lukim ol toksave i hangamap long ol tren, olsem: “Ol Witnes Bilong Jehova i Stap.” Dispela em narapela kain rot bilong autim tok, long wanem, ol manmeri i kisim save olsem planti tausen Witnes na famili bilong ol, ol i salim i go nabaut long ol hap bilong not na longwe long hap bilong is.
Planti buk na nius i stori long dispela pasin i bin kamap long Epril 1951 bilong bungim ol Witnes Bilong Jehova na bringim ol i go long narapela kantri olsem lain kalabus. Wanpela man bilong raitim stori bilong ol samting i bin kamap bipo, em Walter Kolarz, em i stori long dispela samting long buk bilong em, olsem: “Dispela samting i no pasim wok bilong ol ‘Witnes’ long Rasia; bikpela wok moa bilong autim tok i kirap nau. Ol i traim autim bilip bilong ol taim tren bilong ol i sanap long ol stesin long rot bilong i go kalabus. Gavman Soviet i salim ol i go long narapela kantri na dispela i opim rot bilong ol long kamapim bilip bilong ol long ol narapela hap. Ol ‘Witnes’ i lusim ples bilong ol i stap longwe long ol man na ol i kamap long hap i gat planti man long en, maski em banis kalabus nogut na ol kem nogut bilong wok kalabus.”—Buk Religion in the Soviet Union.
Gutpela samting i painim famili bilong mi, long wanem, ol i larim mipela i kisim sampela kaikai i go wantaim mipela, olsem plaua, kon, na bin. Na ol i larim bubu man i kilim wanpela pik, na dispela em kaikai bilong mipela na sampela Witnes moa. Taim tren i ran i go, ol gutpela singsing i kamap long ol hap bilong tren. Jehova i givim strong long mipela long karim ol hevi.—Sindaun 18:10.
Inap 3-pela wik mipela brukim Rasia na bihain mipela i kamap long Saibiria, em ples i kol nogut na longwe tru. Tren i bringim mipela i kamap long Toreya stesin long provins Sunsk long distrik bilong Irkutsk. Kirap long dispela hap ol i kisim mipela i go insait tru long dispela ples nating bilong kamap long wanpela liklik ples ol pepa bilong mipela i kolim olsem ‘setelmen bilong i stap oltaim long en.’ Wanpela liklik kain karis em inap long putim kago bilong 15 famili long en, na wanpela trakta i pulim karis i go long graun malumalum. Inap olsem 20 famili i sindaun wantaim long ol longpela longpela haus kalabus—ol famili i no gat rum bilong ol yet. Taim mipela i no kamap yet, ol lain i bosim dispela hap ol i tokim ol asples olsem ol Witnes Bilong Jehova ol i man nogut. Olsem na pastaim, ol manmeri i pret long mipela na ol i no laik save liklik long mipela.
Wok Long Ples Kalabus
Ol Witnes Bilong Jehova i mekim wok bilong katim ol diwai, na ol i gat bikpela hevi long mekim olsem. Ol i mas mekim olgeta wok long han—katim ol diwai long so na akis na putim long karis em hos i pulim. Na bihain ol i mas putim ol dispela diwai long ol tren. Ol i no gat rot long hait long ol bikpela lain natnat, olsem na dispela i givim bikpela hevi moa long ol. Papa bilong mi i kisim bikpela hevi tru. Skin bilong em olgeta i solap, na em i beten strong long Jehova long helpim em long karim hevi. Tasol maski ol dispela hevi i painim ol Witnes Bilong Jehova, klostu olgeta i sanap strong na holimpas bilip bilong ol.
I no longtaim na ol i kisim mipela i go long biktaun Irkutsk, na famili bilong mipela i sindaun long wanpela kem bilong ol kalabusman long bipo, na mipela i wok long faktori bilong wokim ol brik. Mipela i mekim wok long han bilong rausim ol brik long ol bikpela aven i hat, na long olgeta taim ol bosman i apim namba bilong ol brik mipela i mas wokim, olsem na ol pikinini i mas helpim papamama bambai ol i ken inapim namba bilong ol brik ol i mas wokim. Dispela i mekim na mipela i tingim wok leba ol Israel i bin mekim taim ol i stap kalabus long Isip bilong bipo.—Kisim Bek 5:9-16.
Ol man i lukim olsem ol Witnes i man bilong wok strong na man bilong bihainim stretpela pasin; ol i no “birua bilong ol manmeri” olsem sampela i tok. Ol i lukim olsem i no gat wanpela Witnes i tok bilas long ol lain i bosim ol, na ol Witnes i no bikhet long tok bilong ol bosman. Na bihain planti i laikim bilip bilong ol.
Sindaun Bilong Mipela Long Spirit
Maski ol i sekim ol Witnes planti taim—taim ol i no bringim ol yet i go long narapela kantri olsem lain kalabus, na taim ol i wokabaut long rot, na long ples kalabus—planti bilong ol inap haitim ol nius Wastaua na ol Baibel tu. Bihain ol i wokim kopi bilong ol dispela samting long han na long ol narapela rot. Long olgeta taim ol i wokim ol miting Kristen insait long ol haus kalabus. Taim kepten bilong ol haus kalabus em i kam insait long haus na lukim mipela liklik lain i singsing, em i tokim mipela long lusim singsing. Mipela i mekim olsem. Tasol taim em i go long narapela haus kalabus, mipela i kirap na singsing gen. Em i no inap pasim mipela long singsing.
Na wok autim tok bilong mipela tu i no pinis. Ol Witnes i autim tok long olgeta man long olgeta hap. Planti taim ol bikbrata bilong mi na papamama tu, ol i tokim mi long olsem wanem ol inap tokim ol narapela long ol tok i tru bilong Baibel. Gutpela tru ol i mekim olsem, na isi isi tok i tru bilong Baibel em i pulim ol manmeri i gat gutpela bel. Olsem na long 1952 samting, ol manmeri long Irkutsk na long ol hap klostu long en, ol i kisim save long Kingdom bilong Jehova.
Pastaim ol man i ting ol Witnes ol i birua bilong gavman, tasol bihain gavman i save oganaisesen bilong mipela em i samting bilong lotu tasol. Tasol maski ol i save olsem, ol bikman i traim long pasim wok bilong mipela. Olsem na bilong stadi long Baibel, mipela i bung long ol liklik lain olsem tupela o 3-pela famili, na ol i no ken luksave long samting mipela i mekim. Long Februeri 1952, long bikmoning, ol i sekim gut haus kalabus bilong mipela. Bihain ol i holim 10-pela Witnes, na ol i salim mipela ol narapela i go long ol narapela hap. Ol i salim famili bilong mipela i go long liklik ples Iskra, em 100 manmeri i sindaun long en na em i stap longwe long biktaun Irkutsk inap 30 kilomita.
Karim Ol Hevi Taim Ol Samting i Senis
Taim mipela i kamap, mipela i kirap nogut long ol bikman bilong ples i mekim gut long mipela. Ol manmeri bilong dispela hap ol i gat pasin daun na ol i mekim pasin pren long mipela, na sampela bilong ol i lusim haus na ol i kam helpim mipela. Ol i putim famili bilong mipela wantaim tupela famili moa long wanpela liklik rum em bikpela bilong en i olsem 17 skwe mita. Mipela i kisim lait long ol lam kerasin tasol.
Long moningtaim bilong de bihain, ol i wokim eleksen. Papamama bilong mi i tok, ol i vot pinis long Kingdom bilong God, tasol ol manmeri i no klia gut long dispela tok. Olsem na long dispela de olgeta, ol i holim ol man i bikpela pinis long famili bilong mi. Bihain sampela manmeri i askim ol long bilip bilong ol, na dispela i opim rot bilong famili bilong mi ol i ken toktok gut long Kingdom bilong God olsem dispela tasol inap pinisim hevi bilong ol man.
Long 4-pela yia mipela i sindaun long liklik ples Iskra, i no gat narapela Witnes i stap klostu na mipela i ken bung wantaim em. Bilong lusim ples, mipela i mas kisim tok orait long kepten, na wan wan taim tasol em i larim mipela i mekim olsem, long wanem, nambawan as na ol i bringim mipela i kam long dispela kantri, em ol i laik bai mipela i stap longwe long ol narapela manmeri. Tasol ol Witnes i traim long painim ol narapela Witnes bambai ol i ken helpim ol long kisim ol nupela kaikai bilong spirit ol i bin kisim.
Stalin i dai long 1953, na bihain ol i katim hap taim bilong kalabus bilong ol Witnes long 25 yia na makim 10-pela yia ol i mas kalabus. Ol lain i stap long Saibiria, ol i no gat wok moa long kisim pepa bilong larim ol i raun. Tasol i no longtaim na ol bikman i kirap na sekim ol samting na holim ol Witnes sapos ol i gat Baibel o ol buk bilong Baibel. Ol i wokim ol kem bilong ol Witnes tasol, na ol i putim inap olsem 400 brata na 200 sista long ol dispela kem long hap i klostu long Irkutsk.
Toksave olsem ol i mekim nogut long mipela long Soviet Yunion, em i kamap long ol Witnes Bilong Jehova long olgeta hap. Olsem na long 199 kibung distrik i bin kamap long olgeta hap namel long Jun 1956 na Februeri 1957, ol Witnes i kamapim wanpela tokaut bilong helpim mipela. Inap 462,936 manmeri i bung na ol i orait long dispela tokaut ol i raitim i go long premia bilong Soviet Yunion long dispela taim, em Nikolay A. Bulganin. Wanpela samting dispela tokaut i toktok long en, em ol i mas larim mipela i kamap fri na ol i mas “orait long mipela i ken kisim na wokim nius Wastaua long tok Rasia, Yukren, na ol narapela tok ples mipela i ting mipela i gat wok long en, na ol i mas larim mipela i mekim olsem long ol narapela buk bilong Baibel ol Witnes Bilong Jehova i save mekim wok long en long olgeta hap.”
Long dispela taim, ol i bin salim famili bilong mipela long liklik ples Kudyakovo, em ples i stap longwe long Irkutsk olsem 20 kilomita. Mipela i sindaun long dispela ples inap 7-pela yia. Long 1960, brata bilong mi, Fyodor, em i lusim mipela bilong i go long Irkutsk, na long yia bihain bikbrata bilong mi em i marit, na susa bilong mi em i go sindaun long narapela hap. Orait, long 1962, ol i holim Fyodor na putim em long kalabus, long wanem, em i autim tok.
Mi Kamap Strong Long Ol Samting Bilong Spirit
Kirap long Kudyakovo, em ples bilong mipela long dispela taim, mipela i mas wokabaut long lek o wilwil inap 20 kilomita bilong bung wantaim ol narapela bilong stadi long Baibel. Olsem na mipela i traim long i go sindaun long Irkutsk bambai mipela i ken stap klostu liklik long ol narapela Witnes. Tasol bikman bilong ples mipela i sindaun long en em i no laik, na em i wok strong tru long mekim kain kain samting bambai mipela i no inap lusim ples. Tasol bihain dispela man i orait long mipela na mipela inap i go sindaun long Pivovarika, em wanpela ples longwe long Irkutsk olsem 10-pela kilomita. Wanpela kongrigesen bilong ol Witnes Bilong Jehova i stap long dispela ples, na nau mi kisim narapela kain sindaun. Long Pivovarika ol i stretim rot na i gat ol Buk-Stadi Bilong Kongrigesen, na ol brata i save lukautim ol wok bilong spirit. Mi amamas tru!
Long dispela taim mi laikim tru tok i tru bilong Baibel, na mi laik kisim baptais. Long Ogas 1965, mi inapim laik bilong mi taim mi kisim baptais long liklik wara Olke, em wanpela wara planti nupela Witnes i bin kisim baptais long en long dispela taim. Long ol man i lukim mipela, dispela samting mipela i mekim i luk olsem mipela i amamas long mekim piknik na waswas long wara. Bihain liklik mi kisim namba wan wok bilong mi olsem wasman bilong Skul Bilong Wok Autim Tok. Orait, long Novemba 1965, mipela i kisim narapela samting bilong amamas long en—Fyodor i lusim kalabus na em i kam bek long ples.
Wok i Go Bikpela
Long 1965 ol i bungim mipela ol man ol i bin bringim i go long dispela kantri olsem lain kalabus, na ol i tokaut olsem i stret mipela i ken i go sindaun long wanem wanem hap mipela i laik sindaun long en, olsem na “setelmen bilong i stap oltaim long en” em i pinis. Olsem wanem? Yu inap pilim bikpela amamas bilong mipela? Planti bilong mipela i lusim dispela hap bilong i go sindaun long ol narapela hap bilong kantri, tasol ol narapela i stap long dispela hap Jehova i bin mekim gut long mipela na sambai long mipela taim mipela i kamap strong long spirit na long wok. Long Saibiria, planti bilong ol i bin mekim bikpela long pikinini bilong ol, long ol tumbuna pikinini, na long pikinini bilong ol tumbuna pikinini bilong ol, na bihain Saibiria i no stap moa olsem wanpela ples bilong pret long en.
Long 1967 mi bungim Maria. Ol i bin rausim famili bilong dispela yangpela meri long Yukren na bringim ol tu i go long Saibiria olsem lain kalabus. Taim mipela i yangpela yet, mipela i bin stap long wanpela liklik ples bilong Yukren, em Vilsanitsa. Mipela i marit long 1968, na bihain mipela i kamapim wanpela pikinini man, em Yaroslav, na bihain moa mipela i kamapim wanpela pikinini meri, em Oksana.
Mipela i bin mekim wok yet long taim bilong planim man na long taim bilong marit bilong bung olsem bikpela lain na bai mipela i ken toktok wantaim long ol samting bilong spirit. Na tu, mipela i bin mekim wok long ol dispela kain taim bilong autim ol tok i tru bilong Baibel long ol wanblut na ol pren i no Witnes na ol i kam long ol dispela bung. Planti taim ol sekyuriti i kam long ol dispela bung, na long ai bilong ol mipela i autim tok bilong Baibel olsem bihain ol man i dai pinis bai kirap bek, o mipela i toktok long marit olsem em i wanpela samting Jehova i givim long yumi, na mipela i toktok long ol gutpela samting bai kamap bihain long nupela taim em bai kamapim.
Wanpela taim, mi wok long pinisim tok bilong mi long taim bilong planim man na nau wanpela ka i kam sanap. Ol dua bilong ka i op, na wanpela man i sindaun insait long ka em i lusim ka na tokim mi long kalap long ka. Mi no pret. Mipela i no ol man nogut, mipela ol man bilong bilip long God. Tasol long poket bilong mi, mi gat ol ripot bilong autim tok bilong ol brata sista insait long kongrigesen. Dispela inap mekim na ol bai holim mi. Olsem na mi askim ol, sapos i orait mi laik givim hap mani long meri bilong mi pastaim na bai mi go wantaim ol. Em nau, long ai bilong ol na long pasin bilong bel isi, mi givim paus mani bilong mi wantaim ol ripot bilong kongrigesen long Maria.
Kirap long 1974, long pasin hait mitupela Maria i kirap redim sampela buk bilong Baibel long haus bilong mipela yet. Mipela i gat wanpela liklik pikinini man, olsem na mipela i mekim dispela wok long biknait na em i no inap save long dispela samting. Tasol em i laik save long ol samting, na em i giaman olsem em i slip na em i lukstil long mipela bilong save mipela i mekim wanem. Bihain em i tok: “Mi save husat i wokim ol nius i toktok long God.” Mipela i pret liklik, tasol long olgeta taim mipela askim Jehova long lukautim mipela famili taim mipela i mekim dispela bikpela wok.
Bihain gavman i orait liklik long ol Witnes Bilong Jehova, olsem na mipela i stretim rot bilong wokim wanpela bikpela bung long wanpela bikpela haus (Mir arts and leisure center) long biktaun Usolye-Sibirskoye. Mipela tokim ol lain i bosim biktaun olsem ol bung bilong mipela em bilong stadi long Baibel tasol na long bung wantaim ol narapela Kristen. Winim 700 i bung long Janueri 1990 na haus i pulap, olsem na planti manmeri i save long dispela bung.
Bihain long dispela bung, wanpela niusman i kamapim askim olsem: “Olsem wanem yupela i bin painim hap taim bilong skulim ol pikinini bilong yupela?” Em na ol narapela man i kam long bung, ol i kirap nogut long ol pikinini i bin sindaun gut inap 4-pela aua long namba wan bung bilong ol long ai bilong ol man. I no longtaim na wanpela gutpela stori long ol Witnes Bilong Jehova i kamap long niuspepa long ples bilong mipela. Niuspepa i tok: “[Ol Witnes Bilong Jehova] inap skulim tru yumi.”
Amamas Long Wok i Go Bikpela
Long 1991, mipela i mekim 7-pela kibung long Soviet Yunion, na 74,252 manmeri ol i bung. Bihain taim sampela ripablik bilong Soviet Yunion ol i kisim independens, Lain Bilong Bosim Ol Witnes Bilong Jehova ol i makim mi long i go long Mosko. Long Mosko ol i askim mi olsem mi gat rot long mekim bikpela wok moa long wok bilong Kingdom o nogat. Long dispela taim Yaroslav i marit pinis na em i gat pikinini bilong em yet, na Oksana em i yangpela meri pinis. Olsem na long 1993, mitupela Maria i kirap long mekim wok bilong God long olgeta de long Mosko. Long dispela yia stret, ol i makim mi olsem kodineta bilong hetkota bilong ol Witnes Bilong Jehova long Rasia.
Long nau mitupela Maria i sindaun na wok long nupela haus brens bilong mipela ausait long Sen Pitasbek. Mi ting em i wanpela bikpela samting tru long mi inap wok wantaim ol narapela gutpela brata long lukautim ol manmeri i autim tok bilong Kingdom long Rasia, em lain bilong ol i go bikpela hariap. Long nau, winim 260,000 Witnes ol i stap long ol ripablik em bipo Soviet Yunion i bosim, na 100,000 bilong ol i stap long Rasia yet!
Planti taim mitupela Maria i tingting long ol gutpela wanblut na pren bilong mitupela, em ol i mekim gutpela wok yet long autim tok bilong Kingdom long Saibiria, na bipo dispela ples i bin kamap olsem ples bilong mipela yet na wanpela ples mipela i laikim tumas. Long nau, ol bikpela kibung i save kamap long olgeta taim long Saibiria, na inap olsem 2,000 Witnes i save mekim wok autim tok bilong ol long Irkutsk na long ol hap klostu. Tru tumas, truim bilong tok profet i stap long Aisaia 60:22, em i kamap tu long dispela hap bilong graun: “Ol lain i liklik tru bai ol i kamap planti moa olsem ol manmeri bilong ol bikpela na strongpela kantri.”
[Piksa long pes 20]
Mi wantaim papa bilong mi, famili bilong mipela, na sampela man moa i stap olsem lain kalabus long Irkutsk long 1959
[Piksa long pes 23]
Ol pikinini i stap olsem lain kalabus long Iskra
[Piksa long pes 25]
Long yia mitupela i marit
[Piksa long pes 25]
Mi wantaim Maria long nau