Ol Yangpela i Laik Save . . .

Ol Papa i Ranawe Long Wok Papa Bilong Ol​—⁠Ol Inap Ranawe Tru?

“Mi kirap nogut tru taim em i tok, ‘Mi bai karim pikinini bilong yu.’ Husat bai lukautim dispela bebi? Mi no inap lukautim famili. Mi pilim olsem mi laik ranawe.”​—⁠Em tok bilong Jim.a

RIPOT bilong wanpela lain (Alan Guttmacher Institute) i tok: “Long olgeta yia, klostu wan milion yangpela meri . . . i kisim bel.” Na “ol yangpela i karim pikinini, planti (78 pesen) bilong ol i no marit.”

Long bipo ol man i pilim olsem em wok bilong ol long lukautim pikinini ol i bin kamapim. Tasol olsem wanpela buk (Teenage Fathers) i tok, “long nau pasin bilong ol meri singel long karim pikinini i no samting bilong sem long en olsem long bipo.” Long sampela hap, pasin bilong kamapim pikinini i mekim na man i kisim biknem long ai bilong ol yangpela! Tasol wan wan yangpela man tasol i save lukautim ol pikinini bilong ol i go inap longpela taim. Planti ol i save ranawe lusim wok papa bilong ol.b

Tasol olsem wanem? Yangpela man inap abrusim olgeta samting pasin pamuk bilong em i kamapim? Baibel i tok em i no inap abrusim. Em i tok: “Nogut yupela i giamanim yupela yet na yupela i ting yupela inap long trikim God. Yupela bai i no inap tru. Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.” (Galesia 6:⁠7) Olsem yumi bai lukim, planti taim pasin pamuk i mekim na ol yangpela man na yangpela meri bai karim hevi long dispela samting inap long ol i dai. Ol yangpela inap abrusim ol kain hevi olsem taim ol i bihainim ol lo bilong Baibel i tambuim pasin pamuk.

I Hatwok Long Lusim Pikinini

Bilong lukautim pikinini, man i mas lusim bikpela hap taim, na mani, na em i no stap fri long mekim laik bilong em yet. Buk Young Unwed Fathers i tok: “Sampela yangpela man ol i no laik ‘lukautim narapela,’ sapos dispela i makim olsem ol i mas lusim mani samting bilong ol yet.” Tasol planti ol i kisim pe nogut long pasin bilong ol long tingim ol yet tasol. Olsem: Long planti kantri ol kot na lain bilong kamapim lo ol i no gat gutpela tingting long ol man i no save givim mani bilong lukautim pikinini bilong ol. Taim ol i tokaut long husat em i papa tru bilong pikinini, kot inap makim dispela yangpela papa long givim mani bilong lukautim pikinini inap planti yia​—⁠na i stret ol i mekim olsem. Planti yangpela i mas lusim skul o kisim wok mani ol i no kisim bikpela pe long en bilong ol i ken lukautim pikinini. Wanpela buk (School-Age Pregnancy and Parenthood) i tok: “Taim ol yangpela man i kamap papa, planti ol i no save skul inap planti yia.” Na sapos papa i no givim mani bilong lukautim pikinini, dinau bilong em inap kamap bikpela tru.

Tru, sampela yangpela man ol i save sori long pikinini bilong ol. Taim ol i nupela papa yet, planti ol i gat tingting long mekim ol samting bilong lukautim pikinini. Save wanpela lain i kisim i kamapim olsem planti (75 pesen) yangpela papa i go lukim pikinini bilong ol long haus sik. Tasol i no longtaim na planti ol i pilim olsem wok bilong lukautim pikinini i hatwok tumas.

Planti ol i no gat save o ol i no bin mekim sampela kain wok bambai ol i ken kisim gutpela wok mani. Ol i sem long ol i no inap givim mani bilong lukautim pikinini, na bihain liklik ol i no mekim ol samting bilong helpim pikinini. Tasol yangpela man inap bel hevi long dispela samting inap planti yia bihain. Wanpela yangpela papa i tok: “Sampela taim mi tingting long wanem samting i bin painim pikinini bilong mi. . . . Mi no amamas long mi bin lusim [em], na nau mi no save em i stap we. Ating long wanpela de bihain em bai painim na bungim mi.”

Ol Samting Nogut i Painim Ol Pikinini

Ol papa i ranawe long wok papa bilong ol, ating ol i sem tu​—⁠ol i sem long ol i bin bagarapim sindaun bilong pikinini bilong ol yet. Olsem Baibel i kamapim, pikinini i mas i gat mama na papa bilong em. (Kisim Bek 20:12; Sindaun 1:​8, 9) Taim man i lusim pikinini bilong em, dispela i opim rot long kain kain hevi inap painim pikinini. Ripot bilong wanpela lain (U.S. Department of Health and Human Services) i tok: “Ol yangpela pikinini bilong ol famili i gat mama tasol, ol i no save kisim gutpela mak long ol tes bilong pasin bilong toktok na bilong bungim ol namba. Ol pikinini i gat 7-pela i go inap 10-pela krismas na papa o mama wanpela tasol i mekim bikpela long ol, planti pikinini olsem i no save mekim gutpela pasin, na planti ol i gat sik bilong skin na bilong tingting. Ol yangpela manmeri i go bikpela insait long famili i gat mama tasol, planti bilong ol i no pinisim haiskul, o ol i go long kalabus, o ol i no gat wok mani, o ol i no skul, o ol i karim pikinini taim ol i yangpela yet.”

Wanpela nius (Atlantic Monthly) i tok: “Ol saveman i wok long kisim sampela save moa long dispela samting, na save ol i kisim i kamapim klia olsem ol pikinini bilong ol famili i bruk o mama bilong ol i singel, planti samting long sindaun bilong ol dispela pikinini i no kamap gutpela. Tasol ol pikinini i gat papa na mama, planti bilong ol i stap gut. Ol pikinini bilong ol famili i gat papa o mama tasol, ol i stap rabis winim ol pikinini i gat papa na mama inap 6-pela taim. Na planti bilong ol bai i stap rabis inap longpela taim.”

Tingim dispela: Taim ol i skelim ol dispela samting nogut inap painim ol pikinini, ol i skelim bikpela lain pikinini na ating ol dispela samting i no save painim olgeta wan wan pikinini. Planti pikinini i kamap man na meri i gat gutpela pasin na tingting, maski sindaun bilong famili bilong ol i no bin gutpela tumas. Tasol maski em i olsem, yangpela man i bin lusim pikinini bilong em, bel bilong em inap kotim em tru. Wanpela papa singel i tok: “Mi ting mi bin [bagarapim] tru i stap bilong em i go inap em i dai.”​—⁠Buk Teenage Fathers.

Hatwok Long Helpim Wok Bilong Lukautim Pikinini

I no olgeta yangpela papa i ranawe long wok papa bilong ol. Sampela yangpela man i tingting stret olsem ol i gat wok ol i mas mekim na ol i laik helpim wok bilong mekim bikpela long pikinini. Tasol planti taim dispela i hatwok long mekim. Wanpela as bilong dispela em olsem: Ating kot i no bin givim tok orait long papa singel i ken mekim planti samting bilong lukautim pikinini, olsem na mama bilong pikinini na tupela bubu ol i save makim hamas taim papa inap bung wantaim pikinini bilong em. Jim, em pastaim mipela i kamapim tok bilong em, em i tok: “Long olgeta taim mi mas wok strong long mi ken kamapim tingting bilong mi long wok bilong mekim bikpela long pikinini.” Olsem na ating mama bilong pikinini i pasim tok long mekim ol samting em yangpela papa i nolaik tru long en, olsem givim pikinini long narapela bilong em i ken lukautim​—⁠o rausim bel.c Wanpela yangpela papa i tok: “Mi hatwok long larim ol i givim pikinini long wanpela man mi no save long em, tasol ating i no gat wanpela samting mi inap mekim.”

Sampela yangpela man ol i redi long maritim mama bilong pikinini bilong ol.d Tru, dispela inap mekim na yangpela meri i no kisim bikpela sem long ai bilong ol man, na pikinini i gat papa na mama bilong mekim bikpela long em. Na maski tupela i bin mekim pasin pamuk, ating narapela i laikim tru narapela. Tru, yangpela man inap kamapim pikinini, tasol dispela i no makim olsem bel na tingting bilong em i olsem bilong man i bikpela pinis na em inap stap olsem man marit na papa. Na tu, dispela i no makim olsem yangpela man inap lukautim meri na pikinini long ol samting bilong skin. Save ol man i kisim i kamapim olsem taim meri i gat bel na long dispela as tupela i marit, planti marit olsem i save bruk hariap. Olsem na planti taim em i no savepasin long marit hariap.

Planti yangpela man i tok ol bai givim mani bilong lukautim pikinini. Olsem mipela i stori pinis, yangpela man i mas tingting strong bambai em inap long givim mani bilong lukautim pikinini bilong em inap longpela taim​—⁠ating inap 18 yia samting! Tasol pasin bilong helpim pikinini na mama bilong em long ol samting bilong skin long olgeta taim inap mekim na tupela i no stap rabis.

Olsem wanem long pasin bilong insait long wok bilong mekim bikpela long pikinini? Ating dispela tu em i hatwok. Sampela papamama bilong tupela yangpela ol i ting tupela bai slip gen wantaim, olsem na ol i no laik​—⁠o ol i tambuim​—⁠tupela long bung wantaim. Na ating yangpela meri yet i no laik bai pikinini bilong em i pas wantaim man i no poroman marit bilong em. Tasol sapos ol i larim papa i bung wantaim pikinini bilong em, famili bilong tupela yangpela bai bihainim savepasin sapos ol i stretim rot long narapela i stap wantaim tupela yangpela taim papa i kam lukim pikinini, nogut ol i mekim gen pasin i no stret.

Sampela papa singel i laik pas gut wantaim pikinini bilong ol, olsem na ol i lain long mekim sampela wok bilong papamama, olsem wasim pikinini, givim kaikai long em, o ritim buk long em. Yangpela man i bin kisim save long ol lo bilong Baibel, ating em i gat laik long skulim pikinini bilong em long sampela lo bilong Tok Bilong God. (Efesus 6:⁠4) Tru, em i gutpela sapos papa i mekim sampela gutpela pasin long pikinini, tasol em i gutpela moa sapos pikinini i gat papa i stap wantaim em long olgeta de. Na sapos mama bilong pikinini bai marit, ating yangpela papa i no inap mekim wanpela samting taim narapela man i kisim wok bilong mekim bikpela long pikinini bilong em.

Tru tumas, pasin bilong ol singel long kamapim pikinini i mekim na papamama na pikinini tu bai karim bikpela hevi. Na i no ol hevi tasol ol yangpela i mas tingting long en, nogat; dispela inap mekim na ol i no stap gut moa long ai bilong God Jehova, em dispela Man i tambuim pasin pamuk. (1 Tesalonaika 4:⁠3) Ating yangpela inap i stap amamas maski sindaun bilong em i no gutpela tumas olsem taim em i kisim bel, tasol ating yumi inap save tru olsem em i gutpela moa long abrusim pasin pamuk. Wanpela yangpela papa i tok: “Taim man o meri singel i kamapim pikinini, i stap bilong em bai senis olgeta.” Tru tumas, ating yangpela papa i mas karim hevi bilong pasin bilong em i go inap long em i dai. (Galesia 6:⁠8) Yumi ken save tru olsem tok bilong Baibel i gutpela tru bilong helpim man. Em i tok: “Yupela i mas i stap longwe long pasin pamuk.”​—⁠1 Korin 6:⁠18.

[Ol Futnot]

[Piksa long pes 19]

Bihainim gutpela tingting na abrusim pasin pamuk