Ol Guria, Tok Profet Bilong Baibel, na Yu

PASLAIN long Jisas i dai, em i tok profet long ol samting bai kamap na makim olsem pasin bilong dispela graun “i laik pinis.” Em i tok, long dispela hap taim bai i gat ol bikpela sik, hangre, na woa long planti hap. Em i tok tu olsem “ol bikpela bikpela guria bai i kamap long graun.” (Matyu 24:​3, 7; Luk 21:​10, 11) Yu ting Jisas i tok long taim bilong yumi?

Planti ol i tok nogat. Ol i tok namba bilong ol guria i no bin i go antap tumas long taim bilong yumi. Lain U.S. National Earthquake Information Center i tok, ol guria em strong bilong ol i 7.0 na antap moa, namba bilong ol i bin “stap wankain” long ol yia bilong 1900.a

Tasol tingim, i no olsem namba o strong bilong ol guria i mas i go bikpela na bai tok profet bilong Jisas i gat truim bilong en, nogat. Jisas i tok tasol olsem ol bikpela guria bai kamap long planti hap. Na tu, em i tok ol dispela samting bai kamap “olsem pen i save kamap pastaim long meri i laik karim pikinini.” (Matyu 24:⁠8) Namba bilong ol guria o strong bilong en long skel Rikta i no rot bilong makim pen na hevi i bikpela olsem wanem. Tasol ol samting guria i mekim long ol manmeri, dispela i makim pen na hevi i bikpela olsem wanem.

Ol guria i bin kamapim bikpela pen tru long taim bilong yumi. Long ol yia bilong 1900, ol guria i mekim na planti milion manmeri i dai o ol i no gat haus moa. Ol saveman i tok, planti bilong ol dispela man inap abrusim bagarap na stap laip. Lain BBC News i tok: “Long ol kantri i no gat planti mani, ol i ting ol lo bilong wokim gut haus i no bikpela samting, ol i ting em i bikpela samting moa long wokim hariap ol haus i no gutpela tumas, long wanem, planti man i laik kam sindaun long ol biktaun.” Wanpela saveman bilong ol bagarap bilong ol biktaun, Ben Wisner, em i stori long tupela bagarap i bin kamap long nau na em i tok: “I no ol guria i kilim i dai ol dispela manmeri, nogat. Samting i kilim ol i dai em popaia bilong ol man, pasin bilong i no tingim ol narapela, korapsen, na pasin mangal.”

Yes, sampela taim pasin bilong ol man long tingim ol yet tasol na ol i no mekim gut wok bilong ol i as na ol man i dai long guria. Narapela tok profet bilong Baibel i kamapim klia ol dispela pasin taim em i tok long “taim bilong las de” bilong dispela graun. Baibel i tok, long dispela taim ol manmeri “bai i laikim ol yet tasol, na ol bai i laikim tumas long kisim mani,” na “ol bai i no save long pasin bilong i stap pren bilong ol arapela.” (2 Timoti 3:​1-5) Dispela tok profet na tok Jisas i mekim long pinis bilong pasin bilong dispela graun, i kamapim klia olsem klostu nau God bai helpim ol manmeri i bel hevi na em bai pinisim ol samting i save givim pen na hevi long ol​—⁠ol guria tu.​—⁠Song 37:⁠11.

Yu laik kisim sampela save moa long dispela gutpela samting em Baibel i as bilong en? Toksave long ol Witnes Bilong Jehova long hap bilong yu o raitim pas long atres i stret long yu i stap long pes 5.

[Futnot]