Bilong Wanem Yumi Save Pret Long Dai?

“Indai em i samting nogut tru, winim olgeta narapela samting, long wanem, em i pinis tru bilong man.”​—⁠Aristotal.

OL WANLAIN bilong em i tingim em olsem meri bilong lotu, na wanpela bilipmeri tru. Na sampela i kolim em olsem “meri bilong strongim tru lotu bilong em.” Lotu i bin skulim em olsem taim man i dai em i no pinis tru tru​—⁠indai i olsem rot i go long narapela laip bihain long man i dai. Tasol klostu long taim em yet i laik i dai, em i pret nogut tru. Nau em i gat tupela tingting long bilip bilong em na em i askim gopas bilong lotu bilong em: “I gat kain kain [bilip long samting i painim yumi taim yumi dai]; olsem wanem yumi ken save wanem bilip i stret?”

Klostu olgeta lotu na lain i bilip olsem taim man i dai em i save stap laip yet, o bihain em bai i stap laip gen. Orait namel long ol dispela kain kain bilip, wanem bilip i stret? Planti man i no bilip tumas olsem i gat laip bihain long taim man i dai. Olsem wanem long yu? Ol i bin skulim yu olsem taim man i dai em i stap laip yet? Yu bilip long dispela samting? Yu save pret long indai?

Pret Long Ting Olsem Yumi No Stap Moa

Long nau i gat planti buk na ripot bilong ol saientis i stori long pasin bilong pret long i dai. Tasol planti man i no laik tingting long indai. Tasol dai em i samting tru na i save painim yumi olgeta, olsem na yumi mas tingting long dispela samting long sampela taim. Laip bilong yumi man i save pinis wantu​—⁠winim 160,000 manmeri i save dai long olgeta de! Yumi olgeta manmeri bilong graun inap i dai, na planti manmeri i pret tru long dispela samting.

Pasin bilong pret long indai i gat planti samting insait long en. Olsem, man i pret long pen, pret long samting em i no save long en, pret long wanpela long famili i dai, na pret long indai bilong em bai kamapim sampela bikpela hevi long famili bilong em.

Wanpela bikpela samting planti man i pret long en, em ol i ting taim ol i dai ol i pinis olgeta na i no stap moa. Maski ol i gat wanem kain bilip bilong lotu, planti man i pret long ting olsem taim ol i dai, ol i pinis olgeta. Na tok bilong ol saientis i strongim dispela tingting, long wanem, ol saientis i bin kisim planti save long ol hap bilong bodi bilong yumi ol man i wok olsem wanem. Na i no gat wanpela saveman o saientis o dokta samting i bin painim wanpela samting insait long bodi bilong yumi i makim olsem yumi gat wanpela spirit yumi no inap lukim na inap stap laip yet taim yumi dai. Olsem na planti saientis i tok, indai em samting i save pinisim laip bilong man.

Olsem na planti man em ol i tok ol i bilip long laip bihain long taim yumi dai, tasol tru tru ol i pret long ting taim ol i dai ol bai pinis olgeta na i no stap moa. Na yumi tingim ol tok King Solomon i bin raitim long indai bilong man na ating sampela i pret taim ol i ritim ol dispela tok.

Bai Yumi Kamap “Graun” Gen na Stap Olsem Oltaim?

Long Buk Saveman i bin stap 3,000 yia, Solomon i raitim tok olsem: “Ol [man] i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol. Taim ol manmeri i dai, laik na kros na mangal bilong ol i pinis olgeta.” Na em i tok moa: “Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”​—⁠Saveman 9:​4-5, 6, 10.

Holi spirit i kirapim Solomon long tok olsem “pinis bilong yumi man i wankain olsem ol abus. Ol abus i save dai, na yumi man tu i save dai. . . . Laip bilong man i no winim laip bilong abus. . . . God i bin kisim graun na wokim tupela, olsem na taim tupela i dai bai tupela i kamap olsem graun gen.”​—⁠Saveman 3:​19, 20.

Tru, King Solomon i bin raitim dispela tok, tasol spirit bilong God i kirapim em long raitim na dispela tok em i hap bilong Baibel, em Tok Bilong God. Ol dispela skripsa wantaim planti skripsa moa bilong Baibel, i no helpim bilip bilong planti man olsem i gat wanpela samting insait long yumi na taim yumi dai dispela samting i stap laip yet na i kisim narapela kain bodi samting. (Stat 2:7; 3:19; Esekiel 18:⁠4) Orait yu ting God i tok taim yumi dai yumi olgeta manmeri bai kamap “graun” gen na yumi pinis olgeta na i no stap moa? Nogat tru!

Baibel i no tok i gat wanpela hap bilong yumi i stap laip yet taim yumi dai. Tasol Baibel i tokaut klia long gutpela samting ol man i dai pinis ol inap wet long en. Stori i kamap bihain long dispela bai kamapim as na yu no ken pret na ting taim man i dai em i pinis olgeta.

[Blok long pes 3]

WANPELA BIRUA YUMI NO INAP ABRUSIM

Ol i bin kolim dai olsem birua bilong man. Em i wanpela birua tru, na yumi save lukim mak bilong en long olgeta hap. Wanpela lain bilong skelim dispela samting i tok, inap olsem 59 milion manmeri i save dai long olgeta yia​—⁠em olsem tupela man long olgeta wanpela wanpela seken. Ol man i save dai long wanem samting?

◼ Long olgeta 102 seken, wanpela i save dai long bikpela pait.

◼ Ol kilman i kilim i dai wanpela man long olgeta 61 seken.

◼ Wanpela i save kilim i dai em yet long olgeta 39 seken.

◼ Wanpela i save dai long eksiden i kamap long rot long olgeta 26 seken.

◼ Wanpela i save dai long hangre long olgeta 3-pela seken.

◼ Wanpela pikinini i no winim yet 5-pela krismas i save dai long olgeta 3-pela seken.

[Blok long pes 4]

HATWOK NATING LONG PAINIM

Long Novemba 9, 1949, James Kidd, husat i gat 70 krismas na i bin wok long kopa main, em i lus long ol maunten bilong Arizona, Amerika. Sampela yia bihain, kot i tokaut olsem ol i mas tingim olsem em i dai pinis. Bihain ol i painim pepa em i bin raitim na i kolim ol lain bai kisim mani bilong em, na ol pepa i makim mani em i bin putim long ol bisnis em inap planti handet tausen dola. Long pepa, Kidd i tok ol i mas mekim wok long mani hia bilong painim “sampela samting long wok bilong ol saientis i kamapim klia olsem man i gat wanpela spirit i save lusim bodi taim man i dai.”

Bihain liklik, inap olsem 100 man em ol i tok ol i saveman na saientis, ol i putim nem bilong kisim dispela mani. Inap planti mun kot i harim tok bilong planti tausen man olsem yumi man i gat wanpela spirit yumi no inap lukim. Bihain jas i givim dispela mani long tupela oganaisesen i gat gutpela nem. Orait winim 50 yia bihain, ol dispela saveman i no painim yet “sampela samting long wok bilong ol saientis i kamapim klia olsem man i gat wanpela spirit i save lusim bodi taim man i dai.”