Rot 6: Lusim Rong Bilong Narapela

“Yupela . . . i mas lusim sin bilong ol arapela.”​​—⁠Kolosi 3:⁠13.

Mining bilong dispela. Ol marit i stap gut wantaim ol i kisim skul long ol samting ol i bin mekim bipo, tasol ol i no holim long tingting ol liklik kros bilong bipo na sutim tok gen long poroman, olsem “Oltaim yu save leit,” o “I no gat wanpela taim yu save putim yau.” Man na meri wantaim i bilip olsem “man i gat gutpela tingting, em i . . . no save tingim rong narapela man i mekim long em.”​—⁠Sindaun 19:⁠11.

As na em i bikpela samting. God i “save rausim sin” bilong man, tasol sampela taim ol man i no save mekim olsem. (Song 86:⁠5) Ol rong samting ol marit i no bin stretim long bipo, ol inap mekim na bel hevi bai i go bikpela moa, na bihain narapela i no inap lusim rong bilong narapela. Tupela bai pasim maus i stap na i no kamapim bel hevi bilong ol, na narapela i no pilim tingting i stap long bel bilong narapela. Tupela wantaim i pilim olsem ol i stap kalabus insait long marit i no gat pasin laikim.

Traim mekim olsem. Lukim sampela olpela poto bilong yu na poroman bilong yu taim yupela i bin marit nupela o long taim yupela i bin pren wantaim. Traim long kirapim gen pasin bilong yupela long laikim tru narapela narapela, olsem long taim ol hevi i no bin kamap yet. Orait nau tingim ol pasin bilong poroman yu bin laikim taim yu bungim em long namba wan taim.

◼ Wanem ol pasin bilong poroman yu save laikim tru long nau?

◼ Tingim sampela gutpela samting bai kamap bilong helpim ol pikinini sapos yu wok strong moa long lusim rong bilong narapela.

Pasim tok long bel. Tingim wanpela o tupela rot we yu no ken pulim sampela kros bilong bipo i kam insait long ol kros i kamap namel long yutupela long nau.

Gutpela sapos yu litimapim nem bilong poroman long ol pasin bilong em yu save laikim.​​—⁠Sindaun 31:​28, 29.

Tingim sampela rot we yu bai soim olsem yu lusim ol popaia bilong ol pikinini bilong yu.

Toktok wantaim ol pikinini long pasin bilong lusim rong bilong narapela, na olsem wanem pasin bilong lusim rong i save helpim olgeta wan wan long famili.

[Piksa long pes 8]

Taim yu lusim rong bilong narapela, em i no gat dinau moa. Yu no ken singaut long em i mas bekim gen dispela dinau