Ol Imis

“Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em.” —Kisim Bek 20:4, 5.

Ol Skripsa Hibru o Olpela Testamen i tambuim pasin bilong lotuim ol imis.

OL MAN I TOK

Buk New Catholic Encyclopedia i tok, ol Juda i yusim planti imis olsem hap lotu bilong ol, “na ol i save onarim, adorim, na lotuim ol dispela samting.” Bilong strongim dispela tok, buk i stori olsem i gat piksa bilong ol prut, ol plaua, na ol animal samting em ol i putim bilong bilasim tempel long Jerusalem.—1 King 6:18; 7:36.

SAMTING YU MAS SAVE LONG EN

Maski buk New Catholic Encyclopedia i mekim kain tok olsem, ol Juda i stap gut long God ol i no bin lotuim piksa bilong ol samting i stap insait long tempel. Na tu, i no gat wanpela tok long Baibel i stori long wanpela bilong lain Israel i stap gut long God i bin yusim imis long mekim lotu.

BAIBEL I TOK

Long rot bilong profet Aisaia, God i tok: “Yupela i mas givim biknem long mi wanpela tasol. Yupela i no ken litimapim nem bilong ol giaman god, em ol man yet i wokim.” —Aisaia 42:8.

“Olsem wanem? Tempel bilong God i save wanbel wantaim ol imis? . . . No ken tatsim samting i no klin.”—2 Korin 6:16, 17.

“Ol Kristen bilong pastaim bai kirap nogut sapos sampela man i tok long putim ol imis insait long ol haus lotu, na sapos man i brukim skru o beten long ol imis, long tingting bilong ol i olsem man i lotu long imis.”—History of the Christian Church

OL MAN I TOK

Buk New Catholic Encyclopedia i tok: “Long nau yumi no ken i gat tupela tingting olsem ol Kristen bilong pastaim i bin yusim ol imis long lotu o nogat. Ol Kristen bilong pastaim i save penim ol ples matmat bilong ol long ol piksa. . . . Na tu, piksa bilong ol man long ol stori nating bilong ol tumbuna i stap insait long ol rum holi bilong lotu na ples matmat.”a

SAMTING YU MAS SAVE LONG EN

Ol olpela imis em ol i painim insait long ol ples matmat i stap 200 yia bihain long taim Jisas i dai. Olsem na tok bilong buk New Catholic Encyclopedia olsem “lotu Kristen bilong pastaim tru” i no makim lotu Kristen long taim bilong ol aposel, em Ol Skripsa Grik o Nupela Testamen i stori long en. Ol i painim ol dispela imis long ol ples matmat bilong ol Kristen. Na dispela i soim olsem 200 yia samting bihain long Krais i dai, ol Kristen i bihainim pasin bilong ol haiden long yusim ol imis, na ating ol i mekim olsem bilong pulim ol haiden long i kam insait long lotu Kristen.b

BAIBEL I TOK

“Yupela i mas ranawe long pasin bilong lotuim imis.”—1 Korin 10:14.

“Yupela i mas i stap longwe long ol imis.”—1 Jon 5:21.

Baibel i no mekim wanpela tok bilong sapotim pasin bilong lotuim ol imis. Olsem na ol Witnes Bilong Jehova i no save lotuim ol imis, na tu, ol i no gat ol imis long haus lotu na haus bilong ol

OL MAN I TOK

Buk New Catholic Encyclopedia i tok: “Taim man i yusim imis long lotu, i olsem em i lotuim man em imis i makim. Olsem na wankain lotu ol i laik givim long man, ol i ken givim long imis, long wanem, em i piksa bilong dispela man.”

SAMTING YU MAS SAVE LONG EN

Taim Jisas i skulim ol disaipel bilong em long beten, em i no tok long ol i mas yusim ol imis. Yumi no inap painim dispela tok long Ol Skripsa Grik long Baibel olsem yumi mas yusim wanpela imis long lotuim God tru.

BAIBEL I TOK

“Yu mas lotu long Jehova, God bilong yu, na yu mas mekim wok bilong em wanpela tasol.”—Matyu 4:10.