Graun

“God  . . i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en.”—Aisaia 45:18.

OL MAN I TOK

Planti man i tok graun i bin kamap nating. Sampela lotu i skulim ol man olsem graun em ples we God i save skelim ol man bilong luksave sapos ol i winim mak long go long heven o go long helpaia.

BAIBEL I TOK

Baibel i tok: “God i mekim kamap skai na graun na olgeta samting i stap long en.” (Stat 1:1) Em i bin tokim namba 1 man na meri olsem: “Yupela i mas kamap planti na i go sindaun long olgeta hap bilong graun na bosim . . . olkain animal bilong graun.” (Stat 1:28) God i tokim Adam na Iv olsem sapos ol i sakim tok bilong em, orait ol bai i dai. (Stat 2:17) Dispela i kamapim klia olsem God i wokim dispela graun bilong ol man husat i bihainim tok bilong em i ken stap oltaim long en.

“Yu bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.”—Song 104:5.

OL MAN I TOK

Ol saientis i stori long kain kain samting we inap mekim na graun bai bagarap olgeta na i no gat wanpela samting i gat laip bai stap long graun. Ol i ting ol planet na ol bikpela sta bai pundaun na bagarapim graun. Na tu, ol bikpela volkeno bai pairap, san bai bagarap na pinis olgeta, graun bai i go hat tru, ol pait nuklia samting bai kamap, o lain teroris bai tromoi bom i gat ol sik na ol vairas samting bilong bagarapim ol man na olgeta samting i gat laip.

BAIBEL I TOK

Laik bilong God long dispela graun i no pinis. Baibel i tok: “Graun i no save senis. Oltaim em i stap olsem tasol.” (Saveman 1:4) Na tu, ol manmeri bai stap long graun inap oltaim bihain. “Ol stretpela man bai i kisim graun God i givim ol, na bai ol i stap oltaim long en.”—Song 37:29.

BILONG WANEM EM I BIKPELA SAMTING?

Dispela bilip olsem graun bai bagarap i mekim na sampela i no laik long lukautim ol samting long graun. Na sampela man i pilim olsem i no gat gutpela samting bai kamap long bihain, olsem na ol i tingim i stap bilong ol long nau tasol. Kain tingting olsem bai mekim na ol man i pilim olsem laip bilong ol i nogat as bilong en . Tasol sapos yumi bilip olsem yumi inap i stap oltaim long graun, orait bai yumi mekim ol disisen we bai helpim gut yumi na famili bilong yumi long nau na long bihain.

“Heven em i ples bilong God tasol, na em i givim graun long yumi manmeri.”—Song 115:16.

OL MAN I TOK

Planti man i bilip olsem ol gutpela man bai go long heven.

BAIBEL I TOK

Heven em i ples bilong God yet, na graun i ples bilong ol man. Baibel i stori long “dispela graun bai kamap bihain.” (Hibru 2:5) Jisas em i namba wan man long go long heven. Na tu, Baibel i tok i gat sampela lain em God i bin makim, ol tasol bai go long heven bilong mekim wanpela wok. Ol dispela lain bai stap wantaim Jisas na mekim wok “king na bosim graun.”—Revelesen 5:9, 10; Luk 12:32; Jon 3:13.

BILONG WANEM EM I BIKPELA SAMTING?

Dispela bilip long ol gutpela man bai go long heven i no stret wantaim tok bilong Baibel. Sapos God i kisim olgeta gutpela man i go long heven, orait laik bilong em long ol man bai stap oltaim long graun bai i no kamap tru. Tasol Baibel i tok promis olsem: “Yu mas bilip long Bikpela . . . na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu.”—Song 37:34.