Pasin Bilong Tok Sori

Yu na poroman marit i tok pait. Yu tokim yu yet olsem, ‘Mi no kirapim dispela kros, olsem na mi no inap tok sori!’

Yupela i no tok pait moa, tasol yu pilim olsem hevi i stap yet. Yu laik tok sori, tasol i hatwok long tok, “Mi sori tru long ol tok mi mekim.”

Pasin antap. Charlesa em wanpela man marit i tok: “Mi gat pasin antap, olsem na sampela taim i hatwok long mi tok sori.” Sapos yu gat pasin antap, bai i hatwok long yu tokaut olsem yu tu i gat asua.

Tingting bilong yu. Ating yu pilim olsem sapos yu gat asua, orait i stret long yu mas tok sori. Jill em wanpela meri marit i tok: “Sapos mi save olsem em asua bilong mi na hevi i kamap, orait mi bai tok sori. Tasol taim mi na man bilong mi i mekim ol tok bilong bagarapim bel bilong narapela narapela, mi no inap tok sori. Mitupela wantaim i gat asua, olsem na wai bai mi tok sori?”

Narapela risen em yu ting olsem em asua bilong poroman marit, olsem na i nogat wok long yu tok sori. Joseph em wanpela man marit i tok: “Taim hevi i kamap na yu save olsem yu nogat asua, bai yu no laik tok sori bilong soim olsem yu no kamapim dispela hevi.”

Pasin bilong papamama long mekim bikpela long yu. Ating yu go bikpela long famili we yupela i save tok sori wan wan taim tasol. Olsem na yu no save long pasin bilong tok sori taim yu rongim narapela. Dispela i soim olsem taim yu liklik yet, yu no save long pasin bilong tok sori, olsem na i hatwok long mekim olsem.

Tingim poroman marit. Tingim amamas yu kisim taim wanpela i tok sori long yu. Olsem wanem? Yu inap long mekim wankain pasin long poroman marit bilong yu? Maski yu no mekim rong, yu inap tok sori long sampela pasin bilong yu i mekim na poroman i bel hevi o em i bel hevi long ol samting i kamap. Taim yu mekim olsem, poroman marit bai i no bel hevi moa.—Stiatok bilong Baibel: Luk 6:31.

Tingim marit bilong yu. Taim yu tok sori dispela bai strongim marit bilong yutupela. Em i bikpela samting long mekim olsem, long wanem, Baibel i tok long Sindaun 18:19 olsem, man husat i bel hevi long narapela “i pasim tingting bilong en . . . olsem ol manmeri i pasim dua bilong banis bilong taun.” Taim wanpela i bel hevi long narapela, bai i hatwok tru long stap bel isi. Tasol taim yu tok sori long narapela, bai yupela inap stretim hevi bilong yupela. Taim yu mekim olsem, dispela i soim olsem yu tingim marit bilong yu i bikpela samting.—Stiatok bilong Baibel: Filipai 2:3.

Hariap long tok sori. Em tru olsem i hatwok long tok sori taim yu save olsem yu nogat asua. Tasol i no stret long holim kain tingting olsem. I gutpela long tok sori hariap, na no ken larim dispela hevi i go bikpela. Taim yu mekim olsem, poroman marit bilong yu tu bai tok sori. Sapos yu save tok sori, dispela bai kamap olsem pasin bilong yu.—Stiatok bilong Baibel: Matyu 5:25.

Pasin bilong yu i mas soim olsem yu sori long rong yu mekim. Taim yu tok sori, pasin bilong yu i mas kamapim klia dispela samting. Abrusim pasin bilong mekim kain tok olsem, “Mi sori olsem yu bel hevi long dispela liklik hevi!” Kain tok olsem i soim olsem yu no amamas long tok sori! I gutpela long pilim tingting bilong poroman marit na tok sori, maski yu yet i no gat asua long hevi i kamap.

Tingim olsem yumi olgeta i save popaia. Sapos yu gat pasin daun, bai yu luksave olsem olgeta man i save popaia! Maski yu ting yu nogat asua, yu mas luksave olsem poroman marit i gat narapela tingting long olsem wanem dispela hevi i kamap. Baibel i tok: “Taim wanpela man i sanap long kot na toktok, i luk olsem tok bilong en bai i win. Tasol taim arapela man i askim em long kliaim dispela tok, ol man i no save husat tru bai i win.” (Sindaun 18:17) Yu bai redi long tok sori sapos yu luksave olsem yumi olgeta i save popaia.