Stadi 6

Wokim Wanpela Autlain

¹ Autlain em olsem bun bilong tok. Bilong wokim autlain yu mas kisim ol tok i stret long as tok na stretim gut bambai ol man i harim dispela tok ol i ken save gut long ol samting yu laik tokim ol long en.

² Ol bikpela tok. Pastaim yu mas stretim gut ol bikpela tok long tingting bilong yu yet. Yu laik bai ol man i tingim wanem bikpela tok? Orait, raitim dispela tok long wanpela hap pepa. Em olsem as tok bilong tok. Taim yu wok long redim tok, yu ken lukim dispela as tok yu bin raitim.

³ Nau tingim ol bikpela tok bilong helpim dispela as tok. Bihain yu ken tingim ol liklik tok bilong helpim ol bikpela tok. Stretim gut ol dispela tok. Sapos sampela tok i no stret long as tok, lusim.

⁴ Ol dispela bikpela tok i olsem namel o bikpela hap bilong tok. Tasol yu mas i gat kirap bilong tok na pinis bilong tok tu. Tingim liklik hap tok bilong kirapim dispela tok. Na tingim sampela gutpela tok bilong pinisim dispela tok. Pinis bilong tok i mas kirapim ol man long bihainim ol dispela tok yu bin kamapim.

⁵ Tupela kain autlain. Nau yumi ken toktok long tupela kain autlain. (1) Raitim as tok antap long wanpela hap pepa, na aninit long en, long arere long han kais, raitim olgeta wan wan bikpela hap bilong tok. Orait, nau raitim ol liklik namba tu tok aninit long ol dispela wan wan bikpela tok, tasol no ken raitim long arere tru; kam long namel liklik; olsem bai yu inap lukim gut ol bikpela tok.

⁶ (2) Raitim ol sentens. Olgeta wanpela wanpela sentens i mas kamapim wanpela bikpela tok. Sapos yu mas mekim tok planti taim, dispela kain autlain i gutpela.

⁷ Taim yu kirap long redim tok, yu ken wokim autlain (1) o autlain (2). Laik bilong yu. Tasol taim yu mekim tok, gutpela sapos yu gat liklik autlain tasol.

⁸ Kirap bilong tok. Ol tok yu mekim pastaim em bilong kirapim ol man na bai ol i ken givim bel long tok bilong yu, na ol i ken laikim.

⁹ I gat kain kain tok yu ken mekim bilong kirapim tok. Yu ken kamapim wanpela tok piksa; o tingim as tok na kolim wanpela hevi; o givim sampela askim long ol man long dispela tok yu laik mekim; o kolim ol bikpela tok bai yu kamapim long namel bilong tok.

¹⁰ Kirap bilong tok i mas stret long as tok bilong dispela tok. Taim yu kirapim tok yu mas tok klia na tok strong.

¹¹ Namel bilong tok. Pastaim kolim ol samting i no bikpela tumas, na bihain kolim ol bikpela samting. O stori long wanpela bikpela tok, pinis, na stori long narapela bikpela tok, pinis, na stori long narapela bikpela tok​—olsem.

¹² O yu ken kolim wanpela hevi, na olsem wanem long stretim; o stori long wanpela rong na as bilong en.

¹³ Pinis bilong tok. Wok bilong pinis bilong tok em i bilong tokim ol man long ol samting nau ol i mas mekim long dispela save ol i kisim pinis, na bilong kirapim ol long mekim. Mekim sotpela tok tasol.

¹⁴ Sampela pasin bilong pinisim tok: Yu ken kolim gen sampela hap bikpela tok; o tokim ol man long ol samting ol i mas mekim bambai ol i ken bihainim ol tok yu bin kamapim long namel bilong tok. Taim yu autim tok na toktok wantaim wanpela man, yu ken pinisim tok olsem.

¹⁵ O long pinis bilong tok yu ken kolim tasol wanpela bikpela tok yu laik bai ol man i tingim. O yu ken kamapim gen wanpela tok yu bin kamapim long kirap bilong tok, o kaunim wanpela ves. Pinis bilong tok i mas kirapim ol man long bihainim ol tok bilong Baibel yu bin kamapim insait long tok.