Stadi 7

Wok Long Kamap Gutpela Tisa

¹ Jehova na Jisas i gutpela tisa bilong yumi. Yumi mas bihainim pasin bilong tupela. Gutpela tisa i save kamapim gut as bilong tok. Yumi mas wok long kamap gutpela tisa.​—Mt 28:​19, 20; 2 Ti 4:2.

² Papamama i ken lainim ol pikinini. Yumi ken lainim ol Baibel-stadi, na ol nupela pablisa. Taim brata i mekim wanpela tok, em i ken lainim ol man. Ol sumatin bilong Skul i mas wok long kamap gutpela tisa.

³ Givim bel long Jehova. Jehova bai helpim yumi long kamap gutpela tisa. (Snd 3:​5, 6; Jo 7:16) Taim Jisas i lainim ol man em i save kamapim ol tok bilong Baibel; yumi ken bihainim pasin bilong em. Sapos yumi givim bel long Jehova, yumi inap mekim wok tisa.​—2 Ko 3:5.

⁴ Redim tok. Sapos yu laik lainim wanpela man long wanpela samting, pastaim yu yet yu mas save gut long dispela samting. (Ro 2:21) Tokim ol man long ol samting yu lain pinis long en. Skul bai helpim yu long kamap gutpela tisa.

⁵ Taim yu laik mekim Baibel-stadi, redi gut pastaim. Tingim gut ol tok yu laik lainim man long en. Kamapim gut ol tok bilong Baibel. Tingim ol askim man bai kamapim, na redim bekim.

⁶ Ol askim. Taim yu laik lainim man, gutpela sapos yu givim planti askim long em, olsem Jisas i bin mekim. (Lu 10:36) Yu ken kolim ol askim i stap long buk na tingim sampela moa bambai man i ken bekim tok long tingting bilong em yet.

⁷ Sampela askim i bilong helpim sumatin long skruim sampela save moa long dispela save em i kisim pinis. (Mt 17:​25, 26; 22:41-46) Nogut yumi yet i bekim askim; gutpela sapos yumi kirapim tingting bilong man na em yet i tingim bekim. Olsem bai em i kisim gut ol dispela tok.

⁸ O yu ken givim askim long sumatin bilong kamapim bel bilong em, em i ting olsem wanem long dispela samting. Taim yu autim tok long ol haus, yu ken givim askim long man bilong haus bambai yu inap save long tingting bilong em. Sapos yumi larim em i toktok na yumi harim tok bilong em, em bai harim tok bilong yumi.

⁹ Taim yu mekim wanpela tok, yu ken givim ol askim long ol man bilong harim na ol i ken bekim tok. Mekim askim bilong kirapim tingting bilong ol.​—Lu 12:​49-51.

¹⁰ Ol tok piksa. Taim Jisas i lainim ol man em i save mekim ol tok piksa; ol tisa Kristen bilong nau i ken mekim olsem. (Mt 13:​34, 35) Jems i bin mekim tok piksa long si, na stia bilong sip, na glas samting. Taim yu mekim tok piksa, stori long ol samting ol man i save gut long en.

¹¹ Rivyu. Yu mas mekim rivyu, olsem kamapim gen ol bikpela tok na ves yu bin lainim man long en, olsem Jisas i bin mekim.​—Mt 13:51.

¹² Mekim gutpela wok tisa taim yu mekim ol tok. Taim gutpela tisa i mekim wanpela tok, em i no toktok hariap; em i givim ol askim long ol man; em i tokim ol long lukim ol bikpela ves bilong tok, na ol i kaunim; em i mekim wok long ol piksa. Taim yu mekim wanpela tok, sapos yu mekim gutpela wok tisa, ol man bilong harim bai tingim as tok na ol bikpela tok na skripsa bilong tok.

¹³ Tingim tupela Bikpela Tisa. Taim yumi lainim ol man yumi mas tingim Jehova na Jisas. Yumi mas bringim ol man long Jehova, em As bilong laip, na long Jisas, em rot bilong yumi kisim laip.

¹⁴ Yumi mas lainim gut ol man long ol gutpela pasin na wok bilong Jehova bambai ol i givim bel long Jehova.