Sapta 5
Ol Man i Lotuim Jehova Ol i Stap Fri
TAIM Jehova i wokim namba wan man na meri, tupela i stap gutpela tru. Tupela i stap fri tru, i no olsem ol man bilong nau em ol i ting ol i stap fri. Tupela i stap long gutpela ples Paradais. No gat sik. Tupela i stap amamas. Tupela i no ken i dai. Tasol tupela i mas bihainim ol lo bilong God bambai tupela i ken i stap gutpela olsem inap oltaim.
2 Sampela lo, God i no tokim tupela long en. Em i putim ol dispela lo long skin bilong tupela na tupela i mas bihainim. Olsem: Tupela i save pilim hangre, olsem na tupela i mas kaikai. Na nek i save drai, olsem na tupela i save ol i mas dring. Taim san i go daun, tupela i laik slip. Na God i toktok wantaim tupela na givim wok long tupela. Dispela wok God i givim long tupela em i wanpela lo, long wanem dispela wok i bosim ol samting tupela i mas mekim. Em gutpela lo bilong helpim tupela! Dispela lo i makim gutpela wok tupela i ken mekim na bai ol i stap amamas. Tupela i mas kamapim ol pikinini, na bosim ol animal, na skruim Paradais i go kamap long olgeta hap bilong graun. (Jen. 1:28; 2:15) God i no givim planti tumas liklik liklik lo long tupela. Nogat. Tupela yet inap tingim sampela samting ol i laik mekim. Olsem na tupela i stap gutpela tru, a?
3 Tru Adam inap tingim ol samting em i laik mekim, tasol i no olsem olgeta samting em i mekim bai kamapim gutpela wok. Nogat. Em i fri long tingim ol samting em i laik mekim, tasol em i gat bikpela wok long dispela na em i mas karim hevi bilong en, olsem na em i mas tingim gut ol samting em i laik mekim. Sapos em i harim tok bilong Papa bilong em long heven, na lukim ol samting Papa i bin wokim, em inap lain na kisim save. Na God i givim tingting long Adam, olsem na em inap bihainim dispela save em i kisim. God i wokim Adam ‘i kamap olsem em yet.’ Olsem na taim Adam i tingim ol samting em i laik mekim, em inap tingting long bihainim ol pasin bilong God. Sapos em i pilim tru ol samting God i bin mekim bilong helpim em na em i laik bai God i amamas long ol samting em i mekim, orait em i mas was gut na bihainim ol pasin bilong God.—Jen. 1:26, 27; lukim tu Jon 8:29.
4 Bilong helpim Adam long tingim God i bin wokim em na givim laip long em, God i putim lo long Adam, em i tok: “Yu inap kaikai pikinini bilong olgeta diwai long dispela gaden. Tasol yu no ken kaikai pikinini bilong dispela diwai bilong mekim man i ken save long wanem samting i gutpela na wanem samting i nogut. . . . Sapos yu kaikai bambai yu dai.” (Jen. 2:16, 17) Olsem wanem? Dispela lo i kalabusim Adam? Nogat. Adam i stap fri—em i ken bihainim dispela lo o nogat—laik bilong em. Dispela tambu i no putim hevi long Adam. I gat planti diwai em i ken kisim kaikai long en; wanpela tasol i tambu. Tasol Adam i mas save, dispela graun em i bilong God na God i bin wokim olgeta samting, olsem na i stret God i mas i stap Bos bilong en.—Sam 24:1, 10.
5 Tasol wanem samting i kamap? Wanpela ensel i hambak na i laik kisim biknem bilong em yet, olsem na em i giamanim Iv. Em i mekim olsem em i soim gutpela rot long Iv, tasol em i kirapim Iv long sakim laik bilong God. Adam i no bihainim tok bilong Papa bilong em; nogat. Em i bihainim Iv, na em tu i mekim rong. Tupela i kisim samting i no bilong tupela. Olsem na tupela i no i stap fri moa. Sin i kamap bos bilong tupela. Na olsem God i toksave pinis, tupela i mas i dai. Orait, nau tupela inap givim wanem samting long ol pikinini bilong tupela? Sin tasol. Olsem na taim mama i karim yumi, sin i stap pinis long skin bilong yumi na i kirapim yumi long mekim rong, na sik i save kisim yumi na yumi save go lapun na i dai. Dispela sin yumi kisim long Adam, na ol samting Seten i save mekim bilong kirapim yumi moa yet long mekim rong, dispela i mekim na nau yumi no i stap gutpela. God i givim gutpela sindaun long ol man long pastaim na ol i stap fri, tasol nau yumi no stap olsem. Nogat tru!—Rom 5:12; Jop 14:1; Re. 12:9.
Rot Bilong i Stap Fri
6 Nau ol manmeri i stap nogut, na i gat planti samting i olsem i kalabusim ol. Ol i laik lusim ol dispela samting na i stap fri. Tasol olsem wanem ol inap i stap fri tru? Jisas i tok: “Sapos yupela i holim tok bilong mi, orait bai yupela i disaipel tru bilong mi. Na yupela bai i save long tok tru. Na tok tru em bai i mekim yupela i kamap fri.” (Jon 8:31, 32) Ol man i stap fri olsem, ol i stap fri tru. Ol i no olsem ol man i laik i stap fri liklik na ol i daunim narapela kain gavman na kamapim narapela kain gavman. Dispela kain fri Jisas i tok long en i kamapim long ples klia as bilong hevi bilong ol man. Long Jon sapta 8 Jisas i tok long i stap fri long sin. Ol man i stap fri olsem, orait sin i no kalabusim ol moa. (Lukim Jon 8:24, 34-36.) Olsem na taim man i kamap disaipel tru bilong Jisas, bikpela senis i painim em; nau em i stap fri.
7 Tasol i no olsem sin i no inap putim hevi moa long ol Kristen tru nau long dispela taim. Nogat. Sin i stap yet long skin bilong ol na ol i gat pait bilong daunim. (Rom 7:21-25) Tasol man i bihainim tru ol tok bilong Jisas, em i no kalabus moa long sin. Sin i no bosim em moa olsem wanpela bosman i givim tok long em na em i bihainim tasol. Nogat. Em i no kalabus moa long ol pasin i no gat as bilong en na i mekim bel i gat tok. Em i gat klinpela bel long ai bilong God, long wanem em i bilip long ofa bilong Krais na ol rong em i bin mekim bipo i tekewe pinis. Ating sampela taim ol laik nogut i laik kamap long bel, tasol em i sakim. Em i tingim klinpela tok bilong Krais na em i no laik bai sin i bosim em.—Rom 6:12-17.
8 Yumi ol Kristen yumi stap fri tru. Tok giaman na bilip giaman na sin i no kalabusim yumi moa. Yumi save long tok i tru, olsem na yumi save ol man i dai pinis ol i stap olsem wanem. Yumi save ol man i dai pinis bai ol i kirap bek, olsem na yumi no pret moa long man i laik bagarapim yumi na kilim yumi i dai. Sampela man i pret long dispela samting na ol i sakim tok bilong maus bilong bel. Yumi save stretpela gavman o Kingdom bilong God bai senisim ol gavman ol man i bin kamapim. Olsem na yumi no kalabus moa long pasin bilong bel hevi na tingting planti long ol samting bai kamap bihain. Yumi stap fri olsem, tasol nogut yumi ting liklik taim bai ol gavman i pinis na yumi ken sakim lo bilong gavman o bikhet long ol bikman bilong gavman. I no stret yumi mekim olsem.—1 Pi. 2:16, 17; Ta. 3:1, 2.
9 Jehova i no lusim yumi na larim yumi yet i painim gutpela rot yumi mas bihainim. Nogat. Em i save em i bin wokim yumi olsem wanem, na em i save long ol samting yumi mas mekim bambai yumi ken i stap belgut na amamas. Em i save long ol samting bilong helpim yumi inap long olgeta taim bihain. Na em i save long taim em i bin makim bilong mekim ol samting em i laik mekim. Olsem na em i save long ol samting nau yumi mas mekim. Em i save tu long ol tingting na pasin inap bagarapim man na bai man i no i stap gut wantaim ol narapela man, na bai em i lus long kisim ol blesing bilong Kingdom bilong God. Tasol God i sori long yumi na em i toksave long yumi long ol dispela samting long rot bilong Baibel na oganaisesen bilong em long graun. (Ga. 5:19-23; Mak 13:10 skelim wantaim 1 Timoti 1:12, 13.) Tru yumi fri long tingim wanem wanem samting yumi laik mekim; God i wokim yumi olsem. Tasol sapos yumi tingim gut ol samting Baibel i tok Adam i bin mekim na em i no stap fri moa, bai yumi tingim gut ol samting yumi laik mekim. Nambawan tingting bilong yumi bai olsem: Yumi laik i stap gut long ai bilong Jehova.
Ol i Laikim Narapela Kain Pasin Bilong i Stap Fri
10 Sampela yangpela manmeri ol i go bikpela insait long lain bilong Jehova, na sampela ol i no yangpela tumas, ol i kirap laikim narapela kain pasin bilong i stap fri. Ol i kirap laikim ol samting bilong dispela graun. Dispela samting i pulim ol na ol i laik bihainim pasin bilong ol manmeri bilong dispela graun. Ating ol i no tingting long spak long drak, o dring tumas, o mekim pasin pamuk. Tasol taim ol i pinis wok o skul long apinun ol i poromanim ol manmeri bilong ausait. Ol i laik bai ol dispela nupela pren bilong ol i ken laikim ol, olsem na ol i kirap bihainim pasin na toktok bilong ol.—3 Jon 11.
11 Sampela taim wanpela man o meri em i tok em i lotuim Jehova, em i pulim ol long bihainim pasin bilong dispela graun. Kain samting olsem i bin kamap long Iden. Seten i pulim Iv na Iv i pulim Adam. Sampela namel long ol Kristen bilong pastaim na long nau tu, ol i mekim olsem. Bel bilong ol dispela manmeri i skirap long painim ol kain kain amamas na ol i grisim ol narapela long painim dispela kain amamas. Ol i tok, ‘I no gat wanpela samting inap daunim laik bilong yumi,’ tasol “ol yet ol i stap wokboi bilong pasin bilong bagarap.”—2 Pi. 2:18, 19.
12 Ol samting nogut i save kamap long dispela rot. Pasin pamuk i save bagarapim bel na tingting bilong ol manmeri i mekim dispela pasin. Na ating bai sik bilong pamuk i kisim ol, o ol i kamapim nating pikinini, o marit bilong ol i bagarap. (Pro. 6:32-35; 1 Ko. 6:18; 1 Te. 4:3-8) Ol manmeri i mekim nabaut long drak, ol i save kros kwik, ol i no inap toktok gut o lukluk gut, ai bilong ol i raun, ol i save sotwin, tingting bilong ol i paul na ol i ting ol i lukim kain kain samting, na sampela i save dai. (Lukim Provep 23:29-35.) Na ating bai drak i kalabusim ol na ol i no inap lusim, na bai ol i kirap mekim pasin nogut, olsem stil na pamuk samting, bambai ol inap kisim mani bilong baim drak. Ol manmeri i mekim ol dispela pasin, ol i save long ol hevi inap painim ol. Tasol bel bilong ol i skirap tumas long painim ol amamas bilong skin, olsem na ol i no tingim ol dispela hevi. Ol i ting ol i stap fri, tasol sori! Sin i kalabusim ol, na sin em i hatpela bos! Sapos nau yumi tingting gut, ol dispela hevi i no ken painim yumi.—Ga. 6:7, 8.
Wanem Samting i Kirapim Ol Long Mekim
13 Wanem samting i kirapim man o meri long mekim ol dispela pasin? Baibel i tok: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi, na giamanim yumi bilong kirapim yumi long mekim sin. . . . Bihain sin i kamap bikpela na em i save kamapim dai.” (Jems 1:14, 15) Tasol wanem samting i kirapim laik nogut long bel? Em ol samting i save go insait long tingting. Sapos yumi poroman wantaim ol manmeri i no save bihainim tok bilong Baibel, bai yumi kisim ol tingting nogut. Tru yumi save yumi no ken wokabaut wantaim “ol man nogut.” Tasol husat ol i olsem “ol man nogut”? Jehova i ting olsem wanem? Sapos yumi skelim ol askim na skripsa i stap hia, bai yumi inap save long dispela samting.
Long ai bilong ol man sampela manmeri i olsem gutpela man, tasol yu ting ol i gutpela poroman? (Lukim Jenesis 34:1, 2, 18, 19.)
Ating tok o tok pilai bilong ol inap soim yumi i gutpela yumi poroman wantaim ol o nogat? (Ef. 5:3, 4)
Sapos ol i no gat wankain bilip olsem yumi long ol samting God i laik mekim, ating yumi mas tingim dispela samting o nogat? (Lukim 1 Korin 15:12, 32, 33.)
Sapos yumi amamas long poroman wantaim ol man ol i no laikim Jehova, bai Jehova i ting olsem wanem? (Lukim 2 Kronikel 19:1, 2.)
Yumi save wok wantaim ol man i no bilip o yumi skul wantaim ol, tasol yumi ken mekim wanem na bai yumi soim olsem yumi no laik poromanim ol? (1 Pi. 4:3, 4)
Taim yumi lukim piksa wokabaut, o video o televisen, o yumi kaunim buk o nius, i olsem yumi poroman wantaim ol manmeri ol dispela piksa o buk i stori long ol. Bilong wanem yumi mas was gut long ol piksa wokabaut na nius na buk samting bilong nau? (Pro. 3:31; Ais. 8:19; Ef. 4:17-19)
Jehova i lukim ol man yumi save poroman wantaim ol na em inap save yumi wanem kain man? (Sam 26:1, 4, 5; 97:10)
14 Liklik taim tasol na bai God i kamapim Nupela Taim. Long rot bilong Kingdom bilong Em bai em i tekewe ol manmeri long kalabus bilong Seten na long pasin nogut Seten i bin kamapim long graun. Olgeta hevi sin i bin kamapim, isi isi bai tekewe long ol man. Bai yumi inap i stap oltaim long Paradais. Olgeta samting Jehova i bin wokim bai ol i stap fri—stret tru olsem spirit bilong Jehova i save kamapim. (2 Ko. 3:17) Nogut nau yumi sakim tok bilong God na yumi lus long kisim ol dispela gutpela samting bilong bihain, a? Pasin fri bilong Kristen nau yumi bihainim i mas kamapim long ples klia laik bilong yumi, olsem yumi laik i stap fri tru long bihain, olsem ol “pikinini bilong God.”—Rom 8:21.
Stori Gen Long Ol Dispela Tok
● Namba wan man na meri i stap fri olsem wanem? Ol manmeri bilong nau, ol i stap fri olsem?
● Ol Kristen i stap fri olsem wanem na ol manmeri bilong dispela graun, nogat? Dispela samting i kamap olsem wanem?
● Ol manmeri i laikim pasin bilong dispela graun long i stap fri, wanem ol hevi i save painim ol?
● Bilong wanem yumi mas klia long ol poroman nogut? Yumi no bihainim pasin bilong Adam, yumi bihainim tingting bilong husat long wanem wanem pasin i no stret?
[Askim Bilong Stadi]
1, 2. (a) Taim God i wokim namba wan man na meri tupela i stap fri olsem wanem? (b) Kolim sampela lo i bosim ol samting tupela i mekim.
3. Wanem samting inap helpim Adam long tingim gut ol samting em i laik mekim?
4. (a) Dispela tambu God i putim long Adam i kalabusim Adam o nogat? (b) Olsem wanem na i stret God i putim dispela tambu?
5. (a) Adam tupela Iv i mekim wanem na tupela i no i stap fri moa? (b) Wanem senis i painim tupela? Na dispela i mekim wanem long yumi?
6. (a) Olsem wanem yumi ken i stap fri tru? (b) Long Jon 8:31, 32 Jisas i tok long i stap fri long wanem samting?
7. (a) Olsem wanem yumi inap i stap fri long sin long nau? (b) Bilong i stap fri olsem, yumi mas mekim wanem?
8. (a) Taim yumi kamap Kristen tru, yumi stap fri long wanem narapela samting tu? (b) Olsem na yumi mas ting olsem wanem long ol gavman bilong graun?
9. (a) Jehova i mekim wanem gutpela pasin bilong helpim yumi long i stap fri long nau? (b) Adam i stap fri, tasol em i mekim nabaut long dispela samting; yumi ken mekim wanem bilong soim olsem yumi save long ol hevi i bin kamap long dispela rot?
10. Sampela manmeri ol i tok ol i Kristen, ol i laik i stap fri olsem wanem?
11. Sampela taim husat i pulim ol long mekim pasin i no stret?
12. (a) Wanem wanem hevi i save painim ol manmeri i bihainim pasin bilong dispela graun? (b) Ol manmeri i mekim ol dispela kain pasin, sapos ol i save long ol hevi inap painim ol, bilong wanem ol i mekim?
13. (a) Wanem samting i save kirapim laik nogut long bel bilong yumi na kirapim yumi long mekim ol dispela pasin i no stret? (b) Yumi mas save long tingting bilong husat bambai yumi ken save long ol man ol i olsem “man nogut” na yumi no ken poroman wantaim ol? (c) Taim yu bekim ol askim long dispela paragraf, kamapim tingting bilong Jehova long ol dispela samting. Stori long wanpela askim, pinis, na stori long narapela askim.
14. Ol manmeri nau ol i givim bel long bihainim tok bilong God, bihain bai ol inap i stap fri olsem wanem?