Sapta 14

“Mi Givim Kingdom Long Yupela”

LONG apinun, paslain long taim ol i kilim Jisas i dai, em i tokim ol gutpela aposel bilong em: “Long haus bilong Papa bilong mi i gat planti rum. Sapos i no olsem, orait bipo mi inap tokim yupela. Mi go bilong redim ples bilong yupela. Na sapos mi go redim ples bilong yupela, bai mi kam bek na mi kisim yupela i go i stap wantaim mi.” Na em i tok: “Papa bilong mi em i givim kingdom long mi, olsem tasol mi givim kingdom long yupela.” (Jon 14:2, 3; Luk 22:29) Em gutpela samting tru Jisas i laik givim long ol!

² Tasol i no olsem Jisas i tok ol dispela aposel tasol bai mekim wok king wantaim em long kingdom bilong heven. Nogat. Bihain ol i save, i gat 144,000 manmeri God i kisim ol long graun na ol bai mekim dispela gutpela wok wantaim Krais long heven. (Re. 5:9, 10; 14:1, 4) Olsem wanem? I gat sampela ol i stap nau long graun na ol i wok long kisim dispela prais?

Bungim Lain Bilong Kisim Kingdom

³ Herot Antipas i putim Jon Bilong Baptais long kalabus, na bihain Jisas i kirap mekim bikpela wok bilong autim tok long “kingdom bilong heven.” (Mt. 4:12, 17) Long dispela rot ol man i save ol inap i go insait long dispela Kingdom. Ol disaipel bilong em i wok strong long kisim dispela prais.—Mt. 5:3, 10, 20; 7:21; 11:12.

⁴ Long Pentikos, long 33 C.E., spirit holi i kirap makim sampela bilong dispela lain bilong kisim Kingdom. (Ap. 2:1-4; 2 Ko. 1:21, 22) Ol i kirap tokim ol man long ol samting God i bin mekim bilong kisim bek ol man bilong i stap oltaim long heven na ol i no inap i dai. Pita i mekim wok long “ol ki bilong kingdom bilong heven” bilong opim tingting bilong ol na givim dispela save long ol—em i opim dua long ol Juda pastaim, na bihain ol Sameria, na bihain ol manmeri bilong ol narapela lain. (Mt. 16:19) God i wok long kisim ol man ol bai kamap gavman bilong em long heven na bosim graun inap 1,000 yia. Planti pas bilong Nupela Testamen i mekim bikpela tok long ol manmeri bilong dispela lain bilong Kingdom—em “olgeta manmeri bilong God,” olsem ol manmeri ‘God i singautim ol long dispela wok bilong Jisas.’a

⁵ God i singautim ol bilong kisim laip long heven, tasol i no olsem ol i gutpela moa na ol i winim olgeta wokboi bilong God ol i dai paslain long Pentikos, 33 C.E. Nogat. (Mt. 11:11) Tasol nau Jehova i kirap long bungim ol manmeri ol bai mekim wok king wantaim Krais Jisas. Bihain long dispela taim, inap 1,900 yia, God i wok long singautim ol manmeri bilong dispela lain tasol. God i marimari long dispela “liklik lain” bambai em i ken kamapim ol gutpela laik bilong em.—Ef. 2:8-10.

⁶ God i makim namba bilong dispela lain ol i liklik lain tasol olsem 144,000, na bai em inapim dispela namba. Dispela samting i kamap pinis, orait taim bilong God i putim mak long ol dispela Isrel bilong spirit em i klostu. (Re. 7:1-8) Na long rot bilong spirit holi na save bilong Baibel Jehova i givim long oganaisesen bilong em, bai Jehova i stiaim ol samting i go na mekim narapela samting em i tok pinis long mekim long Revelesen 7:9-17. Bai em i bungim ‘planti manmeri’ bilong olgeta lain na bai ol inap winim taim bilong bikpela hevi tru na i stap gutpela olgeta long Paradais long graun inap oltaim oltaim. Taim yumi tingim ol samting tru i bin kamap, i olsem bikpela wok bilong singautim ol manmeri bilong lain bilong heven i pinis long 1935 C.E. samting, em long dispela taim ol i save klia dispela ‘bikpela lain’ ol i bilong kisim laip oltaim long graun. Bihain long dispela taim sampela milion manmeri ol i bilip tru na wet long kisim laip oltaim hia long graun ol i bin i kam bung wantaim liklik hap lain bilong heven ol i stap yet long graun, em ol inap sampela tausen tasol.

⁷ Tasol olsem wanem? Nau God i no ken singautim sampela man bilong kisim laip long heven? Ating nogat. Em i no putim yet mak long olgeta. Olsem na sapos wanpela i pundaun, orait God i mas makim senis bilong em. Tasol ating dispela samting i no ken kamap planti taim.

Olsem Wanem Ol i Save Ol i Pikinini Bilong God?

⁸ Spirit bilong God i givim tingting long sampela Kristen i dediket na baptais pinis, em God i bin singautim ol bilong kisim laip long heven na ol i save God bai kisim ol i stap pikinini spirit bilong em. Aposel Pol i kamapim gut dispela samting. Em i raitim pas i go long ‘ol manmeri bilong God’ ol i stap long Rom na em i stori long samting i bin painim olgeta Kristen tru long dispela taim bipo. Em i tok: “Olgeta man i bihainim Spirit bilong God na i wokabaut, dispela ol man i stap pikinini bilong God. Yupela i no bin kisim spirit i pasim yupela long wok kalabus, bai yupela i pret gen. Nogat. Yupela i bin kisim Spirit i mekim yupela i kamap pikinini bilong God. Long strong bilong Holi Spirit yumi save singaut, ‘Papa! Papa! Holi Spirit yet i save helpim spirit bilong yumi na i tokaut ples klia long yumi stap pikinini bilong God. Orait yumi stap pikinini bilong God, na bihain bai yumi kisim samting bilong Papa tu. Yes, bai yumi kisim samting bilong God. Bai yumi kisim dispela wantaim Krais. Sapos yumi karim pen wantaim em nau, bai yumi kisim gutpela sindaun tru long heven wantaim em bihain.”—Rom 1:7; 8:14-17.

⁹ Long dispela ves Pol i stori long “Spirit bilong God,” na “spirit bilong yumi.” Spirit bilong God em strong bilong God bilong mekim wok. Dispela spirit i givim tingting long ol Kristen bilong lain bilong heven na ol i save tru, ol i kamap pikinini bilong God na ol i stap fri. Spirit bilong God “i tokaut ples klia” long tingting bilong ol na long rot bilong Baibel tu, long wanem spirit bilong God i as bilong olgeta tok bilong Baibel. Baibel i olsem wanpela pas God i raitim long ol dispela manmeri spirit holi i bin mekim ol i kamap pikinini bilong Em. (1 Pi. 1:10-12) Ol dispela manmeri, taim ol i kaunim tok bilong Baibel i stori long ol manmeri i kamap pikinini bilong God, ol i save dispela tok i makim ol. Olsem na long kain kain rot spirit bilong God yet i helpim spirit bilong ol, em dispela strong i kirapim tingting long bel bilong ol. Long dispela rot spirit bilong God i tokaut ples klia long ol i pikinini bilong God. Ol dispela samting spirit bilong God i tokaut long en i kirapim ol long tingting strong na givim bel long kisim wok king wantaim Krais, na ol i redi long mekim ol wok em ol pikinini spirit bilong God i mas mekim.—Fl. 3:13, 14.

¹⁰ Olsem wanem long yu? Dispela samting i bin painim yu? Sapos olsem, yu kisim gutpela wok! Tasol nogut yumi lukim wanpela brata o sista i save pilim tru ol strongpela tok bilong spirit, o em i save wok strong long autim tok, o em i save laikim tru ol brata, na yumi ting spirit bilong God i makim em bilong heven. Nogat. Long wanem planti “arapela sipsip” tu ol i gat ol gutpela pasin olsem. Taim ol i kaunim tok bilong Baibel i stori long sampela manmeri bai mekim wok king wantaim Krais, bel bilong ol tu i pilim, tasol ol i no hambak na ting long kisim samting God i no makim ol bilong kisim. (Lukim Nambas 16:1-40.) Ol i save long ol samting God i laik mekim long graun na ol i amamas long mekim ol wok long nau bambai ol i ken insait long dispela.

No Ken ‘Kaikai na Dring Nating’

¹¹ Long olgeta yia long Naisan 14, taim san i go daun pinis, long olgeta hap ol disaipel bilong Krais em spirit i bin makim ol, ol i bung bilong tingim i dai bilong em, olsem em i bin tokim ol aposel bilong em long mekim. (Luk 22:19, 20) Ol “arapela sipsip” tu i save bung, tasol ol i no save kisim bret na wain. Ol i kam bilong lukluk tasol; ol i save em bikpela samting.

¹² Ol i no bung bilong mekim nating sampela pasin bilong lotu. Nogat. Ol samting ol i mekim long dispela bung i gat as tru bilong en na i bikpela samting. Tasol sampela Kristen bilong pastaim, ol i stap long Korin, long ples Grik, ol i no tingim gut dispela bung. Olsem na aposel Pol i raitim strongpela tok long ol na em i tok: “Sapos wanpela man i no tingting gut pastaim na i kaikai nating dispela bret bilong Bikpela, na i dring nating long dispela kap bilong Bikpela, em i olsem i mekim nogut bodi na blut bilong Bikpela, na em i gat asua long dispela.” Olsem wanem na ol i “kaikai nating” dispela bret na “dring nating” dispela wain? Long wanem, ol i “no tingting gut pastaim.” Ol i no redim gut bel na tingting bilong ol. Kongrigesen i bruk nabaut. Na sampela ol i kisim bikpela kaikai na ol i dring planti na i spak na bihain ol i go long dispela bung. Ol i no tingim gut Kaikai Bilong Bikpela. Ol i no inap pilim bikpela samting bret na wain i makim.—1 Ko. 11:17-34.

¹³ Orait, dispela bret na wain i makim wanem samting? Dispela bret na wain i no tanim i kamap bodi tru na blut tru bilong Krais, olsem mirakel, na bai Krais i mas givim bodi bilong em gen olsem ofa. Nogat. Baibel i tok: “Krais i givim em yet long God wanpela taim tasol, bilong tekewe sin bilong planti man.” (Hi. 9:28; 10:10; Rom 6:9) Dispela bret i no gat yis, na retpela wain, i makim tasol bodi na blut tru bilong Jisas em i givim olsem ofa. Tasol dispela samting bret na wain i makim em i bikpela samting tru! Jisas i givim bodi bilong em i no gat sin long en bambai ol man i ken kisim laip i stap oltaim. (Jon 6:51) Na blut bilong em i mekim tupela wok, bilong tekewe sin bilong ol man i bilip long en, na kamapim nupela kontrak namel long God na lain Isrel bilong spirit, em ol Kristen spirit holi i bin makim ol. (1 Jon 1:7; 1 Ko. 11:25; Ga. 6:14-16) Dispela gutpela bodi na blut bilong Krais i helpim “liklik lain” na God inap kolim ol stretpela man na tingim ol i olsem gutpela man olgeta. (Luk 12:32) God i mekim olsem bambai spirit i ken mekim ol i kamap pikinini bilong God na bai ol inap mekim wok king wantaim Krais long Kingdom bilong em long heven. Long olgeta yia, taim ol i kisim bret na wain bilong Memorial, i olsem ol i tokaut long prais ol i wet long kisim, em laip long heven. Na amamas bilong ol long i stap insait long “nupela kontrak,” em Krais i namelman bilong en, dispela amamas i kamap strong moa long bel bilong ol.—Hi. 8:6-12.

“Bai Mipela i Go Wantaim Yupela”

¹⁴ Ol “arapela sipsip” i lukim ol samting Jehova i mekim long ol dispela manmeri bilong em na ol i go bung wantaim ol. Ol i tok: “Mipela bai go wantaim yupela, long wanem, mipela harim ol i tok God i stap wantaim yupela.” (Sek. 8:20-23, NW) Ol i save bung wantaim na ol i save wok wantaim long autim gutpela tok bilong Kingdom long olgeta hap. Tasol ol “arapela sipsip” i no insait long dispela “nupela kontrak” wantaim ol Isrel bilong spirit, na ol i no insait long kontrak bilong Kingdom, em Jisas i tokim lain bilong heven long en olsem: “Mi givim kingdom long yupela.” Olsem na i stret ol “arapela sipsip” i no kisim bret na wain long taim bilong Memorial. (Luk 22:20, 29) Tasol taim wok bilong “nupela kontrak” i laik pinis, em wok bilong bungim ol laspela sipsip bilong “liklik lain” bilong Kingdom, bai ol “arapela sipsip” i save ol gutpela samting ol bai kisim long graun aninit long dispela Kingdom, ol dispela samting i klostu pinis. Nau long “las taim” ol i amamas long wok wantaim liklik hap lain bilong Kingdom em ol i stap yet long graun.

[Ol Futnot]

Stori Gen Long Ol Dispela Tok

● Bilong wanem Nupela Testamen i mekim bikpela tok long ol manmeri ol bai kisim laip long heven?

● Ol manmeri spirit bilong God i mekim ol i kamap pikinini bilong God, olsem wanem ol i save ol i kamap pikinini bilong God? Bret na wain ol i kisim long Memorial i makim wanem samting?

● Ol “arapela sipsip” i mekim wanem na ol i soim olsem ol i wanbel tru wantaim “liklik lain”?

[Askim Bilong Stadi]

 1. Paslain liklik long taim ol i kilim Jisas i dai, em i mekim wanem tok promis long ol aposel?

 2. Hamas manmeri bai mekim wok king wantaim Krais long Kingdom bilong heven?

 3. Jisas i autim tok long ol man na long dispela rot ol i save ol inap mekim wanem?

 4. (a) Wanem taim spirit holi i kirap makim sampela disaipel bilong kisim Kingdom? (b) Olsem wanem yumi save, bihain God i wok long singautim ol manmeri bilong kisim Kingdom?

 5. Ol i gutpela wokboi moa winim ol wokboi bilong bipo na God i singautim ol bilong kisim laip long heven o olsem wanem?

 6. (a) Olsem wanem na bihain God i no ken singautim sampela moa bilong Kingdom bilong heven? (b) Husat bai stiaim ol samting bilong truim tok profet bilong dispela ‘bikpela lain’? Wanem samting tru i bin kamap?

 7. God inap singautim sampela man long nau bilong kisim laip long heven? Bilong wanem yu bekim tok olsem?

 8. Olsem Pol i tok, ol manmeri spirit holi i mekim ol i kamap pikinini bilong God, olsem wanem ol i save ol i kamap pikinini bilong God?

 9. Ol manmeri i kamap pikinini tru bilong God, olsem wanem “Holi Spirit” i helpim spirit bilong ol na i tokaut long ol i pikinini bilong God?

10. (a) I gat wanem ol samting na ol dispela samting yet i no makim wanpela man em i bilong lain bilong Kingdom? (b) Ol “arapela sipsip” i ting olsem wanem long samting God i laik givim long ol?

11. Husat ol i save go long dispela bung i kamap long olgeta yia bilong tingim i dai bilong Jisas? Bilong wanem ol i go?

12. Sampela Kristen long Korin i mekim wanem na ol i no tingim gut Kaikai Bilong Bikpela?

13. Bret na wain bilong Memorial i makim wanem samting?

14. (a) Bilong wanem ol “arapela sipsip” i no kisim bret na wain bilong Memorial? Ol i wetim wanem samting? (b) Ol i ting olsem wanem long bung wantaim hap lain bilong Kingdom ol i stap yet long graun?