Sapta 13
Taim Olgeta Samting i Kamap Nupela Gen
ABRUSIM BAGARAP taim pasin nogut bilong nau i pinis—em gutpela samting tru yumi ken wetim! Yumi laik tru bai ol pasin i no stret na pasin bilong mangal na pait na bagarapim man i ken pinis. Tasol i gat narapela samting tu na yumi laik tumas long abrusim bagarap. Em wanem samting? Em olsem: Olgeta man i stap long “nupela graun” ol i gat rot bambai olgeta samting nogut i ken tekewe long skin bilong ol, olsem pasin kranki bilong ol yet na sik na pen na i dai tu. (Revelesen 21:1-5) Tasol pastaim sin yet i mas tekewe long ol. Dispela samting inap kamap olsem wanem? Em i mas kamap long “taim olgeta samting i kamap nupela” gen, olsem Jisas i stori long en.
2 Jisas i tokim ol aposel: “Long taim olgeta samting i kamap nupela [gen], Pikinini Bilong Man i gat biknem na i sindaun long sia king, long dispela taim yupela ol man i bin bihainim mi bai yupela tu i sindaun long 12-pela sia na i wok long bosim ol 12-pela lain bilong Isrel.” (Matyu 19:28) Dispela taim em taim bilong “olgeta samting i kamap nupela gen,” olsem sampela Baibel i kolim. (Baibel New World Translation; The Emphasised Bible bilong Rotherham; The Jerusalem Bible) Taim olgeta samting i kamap nupela gen, long dispela taim bai ol man i kamap gutpela olgeta olsem namba wan man na meri taim God i bin wokim ol.
3 Olgeta pikinini bilong Adam i kisim sin long em, olsem na olgeta i mas i dai, na planti ol i bin karim bikpela pen long ol sik nogut na bihain ol i dai. (Rom 5:12) No gat wanpela man inap baim laip bilong em bambai em i no ken i dai. Nogat. No gat wanpela wok ol sinman inap mekim bilong tekewe dai long skin bilong ol yet o long narapela man. Stretpela lo bilong God i makim olsem wanpela man i gutpela olgeta wankain olsem Adam long pastaim, em i mas givim laip bilong em olsem ofa bilong baim bek ol man bambai ol i ken kisim gen laip i stap oltaim. I no gat wanpela man long lain bilong Adam i gat dispela kain laip na em i ken givim olsem ofa.—Sam 49:7-9; Eklisiastis 7:20.
4 Tasol Jehova i marimari long ol man na em yet i wokim rot bilong helpim ol—em i salim Pikinini bilong em, Jisas, i kam long graun na em i kamap wanpela man i gutpela olgeta na em i lusim laip bilong em yet “bilong baim bek olgeta man.” (1 Timoti 2:5, 6) Dispela samting i kamapim long ples klia tru gutpela pasin bilong God—em i gat bikpela marimari na sori long yumi ol man! Laip yumi inap kisim long dispela rot, i no olsem pe God i mas givim long yumi bilong sampela wok yumi bin mekim. Nogat. Dispela laip i olsem presen God i givim nating long yumi. Tasol God i no ken givim dispela presen long olgeta man. Nogat. God bai givim long ol man ol i pilim tru olsem God yet i mas helpim ol long kisim laip, na ol i bilip long dispela rot God i wokim bilong helpim ol na ol i mas kamapim long ples klia dispela bilip bilong ol—ol i mas bihainim tok bilong Pikinini Bilong God. (Rom 6:23; Jon 3:16, 36) Tasol wanem taim ol man inap kisim ol gutpela samting i kamap long rot bilong dispela ofa?
OFA BILONG KRAIS INAP HELPIM YUMI NAU
5 Taim Krais Jisas (olsem Hetpris God i makim) i go long heven na givim pe bilong ofa bilong em long God, orait long dispela taim stret dispela ofa i kirap helpim ol man. Pastaim, kirap long Pentikos long yia 33 C.E., dispela ofa i helpim ol man God i singautim ol bilong kamap king na pris wantaim Krais long heven. (Aposel 2:32, 33; Kolosi 1:13, 14) Na bihain, long yia 1935, narapela lain i kamap ples klia, em ol man i kisim tingting long i stap laip oltaim long graun. Ofa bilong Krais i helpim dispela lain tu na ol inap tingting long kisim laip. (1 Jon 2:1, 2) Wanpela bikpela de bilong ol Isrel bipo, em De Bilong Tekewe Sin, em i makim ol dispela wok ofa bilong Krais i mekim, kirap long Pentikos long yia 33 C.E. na i kam inap nau.
6 Long lain Isrel bipo, i gat wanpela hetpris em i bosim lotu long haus lotu bilong ol. Dispela hetpris em i bilong famili bilong Eron long lain Livai, na ol nambatu pris ol tu i bilong famili bilong Eron. Ol man i helpim ol pris long haus lotu, ol i bilong lain Livai. Bilong lusim sin, hetpris i kilim tupela animal na kisim blut bilong wanpela i go insait long Rum Holi Tru, olsem ofa, na bihain em i mekim olsem tasol long blut bilong namba tu animal, olsem Jehova i tok ol i mas mekim. Pastaim hetpris long famili bilong Eron em i givim wanpela yangpela bulmakau man olsem ofa bilong lusim sin bilong “em yet wantaim lain bilong em,” em lain Livai olgeta. (Levitikas 16:11, 14, NW) Orait, bihain hetpris i givim wanpela meme olsem ofa bilong lusim sin “bilong ol manmeri,” em ol narapela 12-pela lain bilong Isrel. (Levitikas 16:15, NW) Na tu hetpris i putim han long het bilong wanpela meme i stap laip, na hetpris i autim sin bilong olgeta Isrel, na ol i kisim dispela meme i go lusim em long bus. (Levitikas 16:21, 22) Dispela olgeta samting i olsem piksa na i makim wanem samting?
7 Aposel Pol i tok dispela olgeta samting i makim ofa bilong Krais Jisas, em i givim wanpela ofa tasol. “Krais i no bin i go insait long haus holi ol man i wokim long han na em i piksa tasol bilong haus tru bilong God. Nogat. Em i go insait long heven stret. Na nau em i kamap ples klia long ai bilong God, na em i wok long helpim yumi. . . . bilong givim em yet long God, bilong tekewe sin.” (Hibru 9:24-26) Orait, bilong wanem hetpris i no kisim blut bilong wanpela animal tasol i go insait long Rum Holi Tru long De Bilong Tekewe Sin? Em bilong makim ol narapela narapela wok nambawan gutpela ofa bilong Jisas i mekim. Na taim hetpris i putim han long het bilong meme na autim sin bilong ol Isrel na ol i lusim meme long bus, dispela i makim narapela samting.
8 Pastaim hetpris i kisim blut bilong bulmakau i go insait long Rum Holi Tru bilong helpim famili bilong Eron. Orait, olsem tasol pastaim ofa bilong Krais i helpim ol man ol i bilong kamap pris wantaim em long heven. Ofa bilong Krais i kirap mekim dispela wok long Pentikos long yia 33 C.E. Krais Jisas i no gat sin na bai em i mas mekim ofa bilong tekewe sin bilong em yet, olsem Eron i mas mekim. Nogat. Tasol ol man ol bai stap nambatu pris wantaim Krais, ol i gat sin. Lain Livai i makim dispela lain. (1 Pita 2:4, 5) Hetpris i givim namba tu ofa, em blut bilong meme, bilong lusim sin “bilong ol manmeri,” na dispela i makim olsem i gat narapela lain em ofa bilong Krais bai helpim ol tu. Ol dispela man bai kisim laip long Paradais i kamap bek long graun. “Ol 12-pela lain bilong Isrel” (ol i no bilong lain pris) long De Bilong Tekewe Sin, ol i makim ol dispela man. (Matyu 19:28; Sam 37:29) Jisas i dai bilong helpim olgeta dispela man, tasol em i mekim narapela samting tu bilong helpim ol—em i karim sin bilong ol i go. Samting i makim dispela em olsem: Hetpris i putim han long het bilong meme na autim sin bilong ol Isrel na bihain ol i kisim dispela meme i go lusim em long bus na em i go olgeta na ol i no lukim em moa.—Sam 103:12; Aisaia 53:4-6.
9 Nau God inap lusim tingting tru long sin bilong olgeta man i bilip long ol samting em i mekim bilong helpim ol long rot bilong Krais, na bel bilong ol i ken i stap klin long ai bilong Em, maski bipo ol i bin mekim wanem kain pasin. Ol i kisim bikpela blesing tru—bel bilong ol i stap klin na ol inap holim wok bilong God. (1 Korin 6:9-11; Hibru 9:13, 14) Tasol i no olsem nau long dispela taim ol samting nogut sin i mekim long ol i tekewe olgeta. Nogat. (1 Jon 1:8-10; Rom 7:21-25) Ol man bilong mekim wok king wantaim Krais long heven, taim ol i dai na kirap bek na kisim laip long heven na ol i no i dai moa, long dispela taim bai ol samting nogut bilong sin i tekewe olgeta long ol. Na em bai tekewe olgeta long ol narapela man long taim olgeta samting i kamap nupela gen.
‘LONG TAIM OLGETA SAMTING I KAMAP NUPELA GEN’
10 Olsem Jisas i tok, taim olgeta samting i kamap nupela gen em taim bilong “Pikinini Bilong Man [Krais Jisas] i gat biknem na i sindaun long sia king.” (Matyu 19:28) Tru, i no olsem olgeta samting i kamap wantu tasol taim em i kamap king. Nogat. Taim Jisas i kamap king pinis long yia 1914 C.E. pastaim em i rausim Seten wantaim ol spirit nogut bilong em long heven. Na bihain em i kirapim bek long matmat lain bilong em, em spirit holi i makim ol, na ol i go antap long heven. (Revelesen 12:5, 7-12; 1 Tesalonaika 4:15-17) Krais i givim “12-pela sia” king long ol gutpela aposel bilong em, olsem em i tok promis pinis, na em i givim sia king long ol narapela tu bilong lain 144,000 taim ol i kirap bek.—Revelesen 3:21.
11 Wok bilong makim ol man bilong kamap king long heven, taim dispela wok i laik pinis ol i kirap bungim bikpela lain “arapela sipsip.” Dispela narapela wok i bin kirap long yia 1935 samting na i stap yet. Dispela lain tu ol i kirap long kisim gutpela samting long ofa bilong Krais—ol i “wasim klos bilong ol long blut bilong Pikinini Sipsip, na klos i kamap waitpela.” Ol i wok long “kamap nupela man. God i wokim dispela nupela man, na em i kamap olsem God yet. Pasin bilong dispela nupela man em i stret na holi tru.” (Revelesen 7:9, 10, 14; Efesas 4:20-24) Lain bilong ol i wok long i go bikpela na ol samting God i mekim long rot bilong Krais, dispela i helpim ol na em inap bringim ol i go bilong kisim laip i stap oltaim long Paradais bihain bai kamap bek long graun.—Revelesen 7:17; 22:17.
12 Taim i klostu nau na bai pasin nogut bilong dispela graun i pinis. Seten wantaim ol spirit nogut bai ol i kalabus long hul. De Bilong Kot bilong ol man bai kirap, em bilong 1,000 yia. Krais Jisas bai stap Jas, na em bai givim rot long ol man na helpim gut ol bambai olgeta inap kisim save long ol stretpela pasin na lo bilong Jehova na ol i ken bihainim. Lain bilong Krais, em spirit holi i makim ol na ol i stap gut long God inap long taim ol i dai, ol bai wok wantaim em long “i stap jas bilong ol 12-pela lain manmeri bilong Isrel.” (Luk 22:28-30; Revelesen 20:4, 6) I no olsem ol bai stap jas bilong ol Isrel bilong skin tasol. Nogat. Bai ol i stap jas bilong olgeta man em “12-pela lain manmeri bilong Isrel [ol i no bilong lain pris]” i makim ol long De Bilong Tekewe Sin. Bai ol i skelim long kot olgeta manmeri em ofa bilong Krais i bin baim bek ol. (1 Korin 6:2) Dispela wok bilong helpim ol man long kamap gutpela gen, pastaim em bai helpim ol manmeri ol i bin abrusim bagarap long taim bilong bikpela hevi tru. Tasol em bai helpim tu planti milion milion manmeri moa, long wanem dispela kot i mas painim “olgeta man i stap laip na ol daiman tu.” (2 Timoti 4:1; Aposel 24:15) Ol man i dai pinis na ofa bilong Krais inap helpim ol, ol dispela man bai ol i kirap bek; long dispela taim bai olgeta man i amamas tru! Taim ol i lukim gen ol dispela famili na gutpela pren bilong ol, bai ol i amamas moa yet na bai aiwara i kapsait!
13 Em nau, long dispela taim bai olgeta samting nogut sin i bin mekim long skin na tingting bilong ol man, dispela bai tekewe olgeta. Taim Jisas i stap long graun, em i oraitim wantu tasol ol aipas na yaupas na mauspas na ol man em bun bilong ol i dai o skin bilong ol i nogut o sik i bin pinisim strong bilong ol. Ol dispela strongpela wok Jisas i mekim ol i olsem piksa bilong ol samting em bai mekim bilong helpim olgeta manmeri taim em i bosim graun long dispela 1,000 yia. Ol man i lukim na kisim ol gutpela gutpela samting i kamap long marimari bilong Jehova long dispela 1,000 yia, sapos sampela i bikhet na ol i no laik i stap aninit long em, orait i gat gutpela as na ol dispela man i mas bagarap na lus olgeta. Tasol ol man i bilip tru na bihainim tok, ol bai skul long stretpela pasin bilong Jehova na isi isi bai tingting na bel bilong ol i kamap gutpela na bai ol i kamap nambawan olgeta. Ol dispela man i laikim tumas Jehova bai ol i kamap nupela gen. Bai i olsem ol i kisim nupela laip long wanpela nupela Papa, em Krais Jisas, em Papa Bilong Oltaim.—Aisaia 26:9; 9:6.
14 Sapos ol i winim laspela traim i kamap long pinis bilong dispela 1,000 yia, orait long rot bilong Krais Jisas God Jehova bai kisim ol olsem pikinini tru bilong em na bai ol i insait long bikpela famili bilong em i stap long heven na long graun, em ol i gutpela olgeta. Em gutpela samting tru bai painim ol man i abrusim bagarap long taim bilong bikpela hevi tru wantaim olgeta man i kirap bek long matmat na ol i amamas long i stap laip long Paradais long graun!—Rom 8:20, 21.
[Askim Bilong Stadi]
1. (a) Ol man i abrusim bagarap na ol i stap long “nupela graun,” wanem gutpela samting bai painim ol? (b) Tasol wanem samting i mas kamap pastaim?
2. Wanem dispela “taim olgeta samting i kamap nupela” em Matyu 19:28 i stori long en?
3. (a) Sin bilong Adam i kamapim wanem samting? (b) Bilong wanem i no gat wanpela man long lain bilong Adam em inap tekewe ol samting nogut sin bilong Adam i bin kamapim long skin bilong ol?
4. (a) God i mekim wanem na em i wokim rot bilong baim bek ol man? (b) Yumi mas mekim wanem na bai dispela ofa inap helpim yumi?
5. (a) Ofa bilong Krais i helpim husat pastaim? (b) Em i helpim wanem narapela lain tu? Kirap long wanem taim?
6. Stori liklik long ol samting i bin kamap long De Bilong Tekewe Sin.
7. (a) Dispela olgeta samting i makim wanem wanpela ofa tasol? (b) Bilong wanem hetpris i no kisim blut bilong wanpela animal tasol olsem ofa?
8. (a) Ol samting ol i mekim long De Bilong Tekewe Sin, olsem wanem dispela i helpim yumi long save long dispela lain em ofa bilong Krais i helpim ol pastaim? (b) Taim ol i mekim ofa bilong lusim sin “bilong ol manmeri,” dispela i makim wanem narapela wok ofa bilong Krais i mekim? (c) Taim ol i kisim meme i go lusim long bus, dispela i makim wanem samting?
9. (a) Ol man i bilip long ofa bilong Krais, nau ol i kisim wanem blesing? (b) Bihain dispela ofa bai helpim ol olsem wanem?
10. (a) Taim bilong olgeta samting i kamap nupela gen, dispela taim i kirap long wanem taim? (b) Sampela i kisim pinis sia king olsem Jisas i tok promis long en?
11. Olsem wanem ol “arapela sipsip” i kirap pinis long kisim sampela blesing bilong ‘taim olgeta samting i kamap nupela gen’?
12. (a) Dispela “12-pela lain manmeri bilong Isrel” em Jisas i tok long ol long Luk 22:28-30, ol i makim husat? (b) Taim olgeta samting i kamap nupela gen, dispela bai helpim ol man i bin abrusim bagarap na husat moa?
13. Olsem wanem dispela De Bilong Kot bilong 1,000 yia em taim bilong olgeta samting i kamap nupela gen?
14. Jehova bai mekim wanem long olgeta man i winim laspela traim?