Kingdom
Stori: Kingdom bilong God em i rot bilong kamapim strong bilong God Jehova long bosim olgeta samting em i bin wokim long heven na long graun. Long rot bilong dispela gavman em Pikinini bilong God, Krais Jisas, i stap King bilong en, God i kamapim klia olsem em i Nambawan Bikpela King. Dispela tok “Kingdom” inap makim wok king bilong man God i makim bilong i stap King, o em inap makim dispela graun em dispela gavman bilong heven i bosim.
Kingdom bilong God em wanpela gavman tru?
O yu ting em i olsem wanpela pasin i stap long bel bilong ol man?
Lu 17:21: “Ol bai i no inap i tok, ‘Lukim, em i stap hia,’ o ‘Em i stap long hap.’ Harim. Kingdom bilong God em i stap pinis namel long yupela.” (Jisas i mekim dispela tok long ol Farisi [lukim Lu 17 ves 20], na em i bin tok ol i man bilong tupela maus, olsem na em i no tok Kingdom i stap long bel bilong ol, a? Tasol Krais em i olsem maus bilong dispela Kingdom na em i stap namel long ol.)
Baibel yet i tok, Kingdom bilong God em i wanpela gavman?
Ais 9:6, 7: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi . . . Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.”
Husat ol bai stap king long Kingdom?
KTH 15:3: “God, Bikpela I Gat Olgeta Strong . . . King bilong olgeta lain manmeri, ol pasin bilong yu ol i stret na i tru olgeta.”
Dan 7:13, 14: “Mi lukim wanpela man i wankain olsem yumi man bilong graun [Krais Jisas; lukim Mak 14:61, 62]. Em i stap namel long ol klaut na i wokabaut i kam . . . Na ol i kisim em i go long dispela Man bilong bipo bipo yet [God Jehova]. Dispela Man . . . i mekim em [Krais Jisas] i kamap king na i givim em strong na biknem. . . . Na olgeta manmeri bilong olgeta kantri na olgeta lain na olgeta tok ples bai i stap aninit long en.”
KTH 5:9, 10: “Ol i bin kilim yu [Krais Jisas] i dai, na long blut bilong yu yu bin baim bek ol manmeri, bilong givim ol long God. Yes, yu baim bek ol manmeri bilong olgeta lain . . . Yu bin mekim ol i kamap ol pris bilong lain bilong king, na . . . bai ol i stap king na bosim ol manmeri bilong graun.” (KTH 14:1-3 i tok, i gat 144,000 manmeri em “God i bin baim bek ol namel long olgeta manmeri bilong graun” bilong i stap king wantaim Pikinini Sipsip long maunten Saion long heven.)
Dispela Kingdom bai mekim wanem long ol gavman bilong graun?
Dan 2:44: “Taim ol dispela king i stap yet, God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”
Sng 2:8, 9: “Askim mi, na bai mi givim olgeta lain manmeri long yu, na bai yu bosim olgeta hap graun. Bai yu bosim ol long strongpela han bilong yu.”
Kingdom bilong God bai mekim wanem ol wok?
Mekim holi nem bilong Jehova na litimapim wok king bilong em
Mt 6:9, 10: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam.’ ” (Dispela i bungim wok bilong mekim nem bilong God i stap holi wantaim taim bilong Kingdom i kam.)
Ese 38:23: “Long dispela pasin bai mi soim olgeta lain manmeri olsem, mi gat bikpela strong na pasin bilong mi i gutpela na stretpela olgeta. . . . Na bai ol i save gut olsem, mi yet mi [“Jehova,” NW].” (Olgeta samting i bin bagarapim nem bilong God bai pinis na ol man bai mekim gut long nem bilong em na daun long en. Na olgeta man i stap laip, long laik bilong ol yet bai ol i litimapim wok king bilong Jehova, na bai ol i amamas long bihainim laik bilong em. Nem bilong em i mas i stap holi bambai olgeta long heven na long graun inap sindaun gut wantaim na i stap gutpela.)
Pinisim wok God i bin larim Satan i mekim long bosim graun
KTH 20:2, 3: “Em [King Krais Jisas long heven] i holimpas dispela bikpela snek, . . . em Satan . . . Na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as . . . Olsem na Satan bai i no inap giamanim moa ol manmeri . . . Em i mas wetim 1,000 yia i pinis pastaim, na bihain ol i mas lusim em, na long sotpela taim tasol em i ken i go nabaut.” (Long dispela rot bai ol man i no kalabus moa aninit long strong bilong Satan i bin putim bikpela hevi long ol man i laik mekim pasin i stret. Ol spirit nogut i bin kirapim ol man long mekim pasin nogut tru na mekim planti man i pret, ol bai pinis.)
Kirapim olgeta long wanbel long lotuim God tru
KTH 5:13; 15:3, 4: “Olgeta samting i stap long olgeta hap, mi harim ol i tok olsem, ‘Dispela Man i save sindaun long sia king bilong en [God Jehova], na Pikinini Sipsip tu [Krais Jisas], tupela i ken kisim olgeta tenkyu na biknem na amamas na strong, inap oltaim oltaim.’ ” “God, Bikpela I Gat Olgeta Strong . . . King bilong olgeta lain manmeri, . . . yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu. Olgeta lain man bai i kam na lotu long yu. Long wanem, stretpela pasin bilong yu i kamap ples klia pinis.”
Helpim ol man long kamap wanbel gen wantaim God
Ro 8:19-21: “Olgeta [manmeri] God i bin wokim, ol i wetim taim God i makim bilong kamapim ples klia yumi ol pikinini bilong en [em taim ol samting i kamap bilong makim klia olsem ol man i bin kisim laip wantaim Krais long heven ol i kirap bek pinis na mekim wok king]. . . . Nau olgeta [manmeri] i stap nogut na i save bagarap. . . . Long taim God i makim, God bai i pinisim dispela kalabus bilong bagarap nau [ol manmeri] i stap long en, na bai [ol] i stap gutpela tru [olsem] ol pikinini bilong God.”
Mekim i dai olgeta pait
Sng 46:8, 9: “Yupela lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun.”
Ais 2:4: “Bai ol i paitim ol bainat bilong ol i kamap olsem ol ain bilong brukim graun, na . . . olgeta lain manmeri bai i no ken pait moa, na bai ol i no skul moa long pait.”
Pinisim long graun ol hetman i save paulim mani na putim hevi long ol man
Sng 110:5: “Taim Bikpela [Jehova] i belhat bai em i pait long ol king nabaut na bai em i winim pait na daunim ol tru.”
Sng 72:12-14: “Em [King Krais Jisas] i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. . . . Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”
Kamapim planti kaikai inap long olgeta manmeri
Sng 72:16: “Planti rais na wit samting i ken kamap long ol gaden bilong ol manmeri.”
Ais 25:6: “Long maunten Saion [long heven, em as ples bilong Kingdom bilong God], Bikpela I Gat Olgeta Strong bai i redim bikpela kaikai tru [em bai redim ol samting bilong helpim ol manmeri i stap long graun aninit long Kingdom]. Bai i gat planti gutpela gutpela abus na nambawan wain tru bilong dring.”
Pinisim sik na olkain bagarap long skin
Lu 7:22; 9:11: “Yutupela go tokim Jon . . . Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok. Ol man i dai pinis, ol i kirap gen, na ol rabisman i harim gutnius.” “Em [Krais Jisas] i autim tok bilong kingdom bilong God long ol, na em i mekim orait ol manmeri i gat sik.” (Long dispela rot Jisas i kamapim klia ol gutpela samting em bai mekim bilong helpim ol man long taim em i stap King long heven.)
Givim gutpela haus long olgeta man
Ais 65:21, 22: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol.”
Givim gutpela wok long olgeta man
Ais 65:23: “Wok ol i mekim bai i no inap lus nating. Na ol pikinini bilong ol bai i no inap painim bagarap, long wanem, ol i pikinini bilong dispela lain mi bin makim bilong mekim gut long ol. Na bai mi mekim gut long ol na long ol pikinini bilong ol.”
Kamapim gutpela sindaun, na bai ol man i no pret moa long bagarap i painim ol yet o samting bilong ol
Mai 4:4: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. [Jehova] i bin promis long mekim ol dispela samting.”
Sng 37:10, 11: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.”
Kamapim stretpela pasin na stretpela kot tasol
2 Pi 3:13: “Tasol God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.”
Ais 11:3-5: “Long taim em [King Krais Jisas] i harim kot, em i no inap skelim man long ol toktok em i harim na long ol samting em i lukim long ai tasol. Nogat. Long stretpela pasin bilong skelim kot, em bai i harim wari bilong ol rabisman na em bai i helpim ol tarangu, ol arapela i daunim ol na mekim nogut long ol.”
Lukautim ol man bambai bikpela win samting i no ken bagarapim ol
Mk 4:37-41: “Traipela win i kirap, na si i kalap i go insait long bot, na wara i laik pulap long bot. . . . Na Jisas i kirap, na i krosim win, na i tokim wara olsem, ‘Inap nau. Yu pinis! Yu dai nau!’ Na win i dai, na wara i no mekim nais liklik. . . . Na ol i pret nogut tru, na ol i toktok namel long ol yet olsem, ‘Dispela man em i husat tru, na win wantaim wara i harim tok bilong em?’ ” (Krais i kamapim klia strong bilong em long bosim win na wara samting long taim em i stap King long heven.)
Kirapim bek ol man i dai pinis
Jo 5:28, 29: “Taim i laik kamap na olgeta manmeri i stap long matmat ol bai i harim maus bilong [King Krais Jisas], na ol bai i lusim matmat na i kam ausait.”
KTH 20:12: “Mi lukim ol manmeri i dai pinis . . . ol i sanap i stap long pes bilong sia king. Na ol ensel i opim ol buk i gat tok long pasin ol dispela manmeri i bin mekim [long taim ol i kirap bek; skelim wantaim Rom 6:7]. . . . Na man i sindaun long sia king i lukim tok i stap long ol dispela buk, na em i skelim pasin bilong ol.”
Pinisim dai i bin kamap long sin bilong Adam
Ais 25:8: “Em bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.”
KTH 21:4: “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”
Kamapim gutpela taim na ol manmeri i stap long en bai laikim tru ol narapela
Jo 13:35: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi [olsem na ol inap kamap wanwok bilong Jisas long Kingdom, o stap aninit long Kingdom long graun].”
Mekim ol animal na ol man i stap gut wantaim
Ais 11:6-9: “Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim, na ol liklik manki bai i was long ol. . . . Na ol laion bai i kaikai gras olsem ol bulmakau. Ol liklik pikinini i dring susu yet, ol bai i pilai klostu long ol hul bilong ol snek nogut. Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela.” (Na Aisaia 65:25)
Hos 2:18: “Long dispela taim bai mi mekim wanpela kontrak wantaim olgeta wel abus na ol snek na ol pisin. Na bai ol i no inap bagarapim ol manmeri bilong mi. . . . Ol manmeri bilong mi bai i stap isi long dispela graun na ol i no ken pret moa.”
Mekim graun i kamap gutpela ples paradais
Lu 23:43, Nupela Testamen na Ol Sam bilong 1978: “Mi tok tru long yu: ‘Tude bai yu stap wantaim mi long Paradais.’ ”
Sng 98:7-9: “Solwara, yu wantaim olgeta pis samting i stap long yu, yupela singaut strong. Na graun yu wantaim olgeta manmeri samting, yupela i mas singim song. Yupela ol bikpela solwara, yupela i mas paitim han. Yupela ol maunten, yupela i mas singim song bilong amamas long ai bilong Bikpela. Long wanem, em i kam bilong bosim olgeta hap graun. Na em bai i stap king na bosim olgeta manmeri long stretpela pasin oltaim.”
Skelim wantaim Stat 1:28; 2:15; Aisaia 55:11.
Wanem taim Kingdom bilong God i mas kirap bosim ol man?
Yu ting long taim bilong ol aposel?
Kl 1:1, 2, 13: “Mi Pol, . . . wantaim brata Timoti mitupela i raitim dispela pas long yupela ol manmeri bilong God [ol i bilong kisim Kingdom long heven] . . . Yumi [ol manmeri bilong lain bilong Krais em God i bin makim ol long spirit holi] bin i stap aninit long strong bilong tudak, na em [God] i bin kisim bek yumi na putim yumi insait long lain [kingdom] bilong Pikinini bilong en.” (Olsem na long taim bilong ol aposel, taim Pol i no raitim yet dispela tok, Krais i bin kirap long bosim lain bilong em; tasol Kingdom bilong bosim olgeta hap bilong graun i no kamap long dispela taim; em i bilong bihain.)
1 Ko 4:8: “Ating yupela i pulap pinis . . . Ating yupela i gat olgeta samting . . . Ating yupela i winim mipela pinis na i kamap olsem ol king. O sori, mi laikim tumas bai yupela i stap king tru, bai mipela tu i ken i stap king wantaim yupela.” (I klia tru, Pol i krosim ol, long wanem, ol i gat tingting kranki.)
KTH 12:10, 12: “Nau God bilong yumi em i . . . stap king. Na dispela man em i makim bilong kisim bek ol manmeri bilong en, em i kisim pinis bikpela namba na strong. Long wanem, dispela man bilong kotim ol brata bilong yumi, em i bin kotim ol long ai bilong God bilong yumi long san na long nait, tasol nau ol ensel i tromoi em i go daun pinis. . . . Bikpela hevi i laik kamap long [graun]. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (Dispela ves i tok, taim Kingdom bilong God i kamap, ol ensel i rausim Satan long heven. Dispela i no bin kamap taim pasin bikhet i kamap long Iden, olsem Jop sapta 1, 2 i kamapim klia. Jon i bin raitim Kamapim Tok Hait long yia 96, na Kamapim Tok Hait 1:1 i makim olsem em i stori long ol samting i mas kamap long bihain.)
Yu ting olgeta man i mas tanim bel pastaim na bai Kingdom bilong God i kamap?
Sng 110:1, 2: “Bikpela [Jehova] i tokim Bikpela bilong mi [Krais Jisas] olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ . . . Na em i tok, ‘Yu bosim ol birua bilong yu.’ ” (Olsem na bai i gat ol birua em i mas daunim; i gat sampela man ol i no laik daun long wok king bilong em.)
Mt 25:31-46: “Taim Pikinini Bilong Man [Krais Jisas] i kam bek olsem king . . . olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. . . . Ol dispela lain [i no bin mekim gut long ol brata bilong em God i bin makim long spirit holi] bai i go bilong kisim pe nogut . . . Tasol ol stretpela manmeri bai i kisim laip i stap oltaim.” (Olsem na yumi save, i no olsem olgeta man i mas tanim bel pastaim na nau Krais i kamap king. Sampela i no ken tanim bel—ol i no stretpela manmeri.)
Baibel i makim taim bilong Kingdom i mas kamap o nogat?
Lukim bikpela het-tok “Ol Yia Ol Samting i Bin Kamap,” pes 314-343, na bikpela het-tok “Taim Bilong Las De,” pes 422-426.
Sapos Man i Tok—
‘I no ken kamap long taim bilong mi’
Yu ken tok: ‘Tasol em i mas kamap long wanpela taim, a? . . . Yu ting man inap save, dispela bai kamap long taim bilong em, o nogat? Ol aposel bilong Jisas i laik save long dispela, na ol tok Jisas i bekim long ol i bikpela samting long yumi long nau. (Mt 24:3-14; Lu 21:29-32)’
O yu ken tok: ‘Planti man i ting olsem. Tasol ol Witnes Bilong Jehova i tingim ol tok bilong Baibel na ol i bilip tru olsem Kingdom bilong God i kamap pinis long heven, na yumi yet i mas mekim ol samting bilong kamapim klia olsem yumi laik i stap oltaim long graun aninit long dispela Kingdom o nogat. Long dispela as mi kam lukim yu nau. Lukim dispela tok long Matyu 25:31-33.’