Sapta 5
Mama i Karim Jisas We na Long Wanem Taim?
LONG dispela taim Bikman bilong Rom, em Sisar Ogastus, i putim wanpela lo long olgeta manmeri i mas go bek long asples bilong ol bambai gavman i ken kisim nem bilong ol. Olsem na Josep i go bek long Betlehem, em ples mama i karim em.
Planti manmeri tru i go long Betlehem bambai gavman i ken kisim nem bilong ol, olsem na ol haus pasindia i pulap pinis. Josep tupela Maria i painim ples slip long haus bilong ol donki bulmakau samting, na long dispela hap Maria i karim Jisas. Em i karamapim laplap long Jisas na slipim em long bokis kaikai bilong bulmakau.
God yet i bin givim tingting long Sisar Ogastus na em i putim dispela lo, na long dispela rot Maria inap karim Jisas long Betlehem olsem Baibel i tok profet long dispela king em bai kam.
Dispela em i bikpela taim tru! Long dispela nait sampela wasman bilong sipsip ol i stap ausait long taun na ol i was long sipsip bilong ol, na bikpela lait i kamap na i raunim ol. Dispela em strong bilong Jehova! Na ensel bilong Jehova i tokim ol: “Long dispela de long taun bilong Devit, wanpela meri i karim pikinini. Na . . . em i man God i makim bilong kisim bek ol manmeri bilong en. Na yupela i ken luksave long em olsem: Yupela bai i lukim wanpela pikinini ol i pasim em long laplap, na em i slip i stap long bokis kaikai bilong bulmakau.” Orait, wantu tasol planti ensel moa i kamap na ol i tok: ‘Litimapim nem bilong God i save stap antap tru. Na long graun ol manmeri God i belgut long ol, ol i ken i stap bel isi.’
Orait ol ensel i go pinis, na nau ol wasman bilong sipsip i tok: “Goan, yumi go long Betlehem na yumi lukim dispela samting i kamap, em Bikpela i bin tokim yumi long en.” Na ol i go kwiktaim na lukim Jisas i slip long bokis kaikai bilong bulmakau olsem ensel i tok. Na ol i autim tok long ol samting ensel i bin tokim ol long dispela pikinini. Na olgeta man i harim dispela tok, ol i tingting planti long en. Tasol Maria i putim dispela olgeta tok long bel bilong em, na em i tingim i stap.
Planti man long nau i bilip olsem Maria i karim Jisas long Disemba 25. Tasol mun Disemba long Betlehem em i taim bilong ren na bikpela kol. Olsem na ol wasman i no inap i stap ausait na was long sipsip bilong ol long dispela taim. Na ol manmeri i bel nogut long Sisar bilong Rom, olsem na em i no inap singautim ol i kam long taim bilong bikpela kol bambai gavman i ken kisim nem bilong ol. Olsem na yumi save, mama i bin karim Jisas long kirap bilong mun Oktoba samting. Luk 2:1-20; Maika 5:2.
▪ Bilong wanem Josep tupela Maria i go long Betlehem?
▪ Wanem narapela kain samting i bin kamap long taim mama i karim Jisas?
▪ Olsem wanem yumi save mama i no bin karim Jisas long Disemba 25?