Sapta 60
Ol i Lukim Bikpela Namba Krais Bai Holim Long Kingdom
JISAS i stap long hap bilong Sisaria Filipai, na em i wok long skulim bikpela lain manmeri, na ol aposel tu i stap. Em i mekim wanpela tok ol i kirap nogut long en, em i tok: “Mi tok tru long yupela, sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.”
Ating ol disaipel i laik save long insait bilong dispela tok. Wanpela wik bihain, Jisas i kisim Pita na Jems na Jon i go antap long wanpela maunten. Ating em i tudak pinis, long wanem ai bilong ol disaipel i hevi na ol i laik slip. Jisas i beten i stap na bodi bilong em i senis na i kamap narapela kain. Pes bilong em i lait olsem san, na laplap samting bilong em i kamap waitpela olsem lait.
Tupela man i kamap na toktok wantaim em, em “Moses na Elaija.” “Tupela i toktok long ol samting Jisas bai i mekim long Jerusalem, na em bai i lusim dispela graun na i go.” Dispela tok i makim olsem Jisas bai dai na kirap bek. Olsem na dispela dai i laik kamap long Jisas i no samting bilong abrusim, olsem pastaim Pita i laik bai em i mekim.
Ol disaipel i kirap nogut long ol dispela tok ol i harim na ai bilong ol i no hevi moa. Ol i lukim ol dispela samting olsem piksa o driman, tasol Pita i pilim olsem ol dispela samting i kamap tru, olsem na em i tok: “Bikpela, yumi stap hia, em i gutpela. Sapos yu laik, orait mi ken sanapim tripela haus win, wanpela bilong yu na wanpela bilong Moses na wanpela bilong Elaija.”
Pita i toktok yet, na wanpela klaut i lait tumas i karamapim ol na wanpela maus i tok: “Dispela em i Pikinini bilong mi, mi laikim em tumas, . . . Yupela harim tok bilong em.” Ol disaipel i harim dispela tok na ol i brukim skru na pes i go daun long graun. Tasol Jisas i tokim ol: “Yupela kirap. Yupela i no ken pret.” Taim ol i kirap sanap, ol i lukim Jisas wanpela tasol i stap.
Orait tulait pinis na ol i laik lusim maunten i go daun, na Jisas i tokim ol strong olsem: “Samting yupela i bin lukim, yupela i no ken tokim wanpela man long en, i go inap long taim Pikinini Bilong Man i lusim matmat na i kirap bek.” Taim bodi bilong Jisas i kamap narapela kain, ol i bin lukim Elaija i sanap wantaim Jisas, na ol i tingting planti na ol i askim Jisas: “Bilong wanem ol saveman bilong lo i save tok long Elaija i mas i kam pastaim?”
Jisas i tokim ol: “Elaija em i kam pinis, na ol man i no bin save long em.” Jisas i stori long Jon Bilong Baptais, long wanem Jon i mekim wok kain olsem bilong Elaija. Jon i redim rot bilong Jisas, olsem Elaija i bin redim rot bilong Elisa.
Dispela samting ol i lukim olsem piksa i strongim tru Jisas na ol disaipel! Dispela piksa i makim bikpela namba na strong Jisas bai kisim taim em i kamap king. I olsem ol disaipel i lukim “Pikinini Bilong Man i kam olsem king.” Taim Jisas i dai pinis, Pita i tok: ‘Mipela i bin i stap wantaim em long maunten na mipela i bin lukim lait na strong bilong God i kamap long em.’
Ol Farisi i laik bai Jisas i wokim mirakel na bai ol i ken save em i dispela man God i makim bilong kamap King. Tasol Jisas i no wokim wanpela mirakel. Sampela disaipel em Jisas i laikim ol tru, ol i lukim Jisas i kamap narapela kain, na dispela i strongim ol tok profet i stori long Kingdom. Em nau, Pita i tok: “Olsem na mipela i save bilip strong moa long tok bilong ol profet.” Matyu 16:13, Matyu 16:28–17:13; Mak 9:1-13; Luk 9:27-37; 2 Pita 1:16-19.
▪ Paslain long taim Jisas i dai, ol disaipel i lukim wanem samting na i makim olsem Jisas bai kamap king long Kingdom?
▪ Long dispela piksa, Moses na Elaija i toktok wantaim Jisas long wanem samting?
▪ Dispela samting ol disaipel i lukim olsem piksa, olsem wanem dispela i strongim ol?