Sapta 77

Husat Bai Kisim Ol Samting Bilong Papa?

OL MANMERI i save Jisas i bin i go kaikai long haus bilong dispela Farisi. Olsem na planti tausen i kam bung ausait long haus na nau Jisas i kam ausait. Ol Farisi i birua long Jisas na ol i laik trikim em bambai em i mekim wanpela tok kranki, tasol ol manmeri i amamas long harim tok bilong em.

Pastaim Jisas i givim tok long ol disaipel, olsem: “Yupela lukaut gut long yis bilong ol Farisi. Mi tok long giaman pasin bilong ol.” Ol samting i kamap taim Jisas i kaikai wantaim dispela Farisi i makim olsem pasin giaman i pulap long lotu bilong ol. Ol Farisi i giaman long mekim gutpela pasin, tasol bihain pasin nogut bilong ol bai kamap ples klia. Jisas i tok: “Olgeta samting i karamap i stap bai i kamap long ples klia.”

Nau Jisas i mekim sampela tok bilong strongim ol disaipel, olsem em i bin mekim taim em i salim ol 12-pela i go autim tok long Galili. Em i tok: “Yupela i no ken pret long ol man i save kilim i dai bodi tasol, na bihain ol i no inap mekim wanpela samting moa.” God i no save lusim tingting long wanpela liklik pisin, olsem na Jisas i tok, God i no inap lusim tingting long ol. Em i tok: “Taim ol i bringim yupela i go long ol haus lotu na long ai bilong ol gavman na ol man i gat namba, . . . Holi Spirit bai i soim yupela long tok yupela i mas mekim long ol.”

Wanpela man i tokim Jisas, olsem: “Tisa, papa bilong mi i dai pinis, na mi laik bai yu tokim brata bilong mi long em i mas tilim ol samting papa i lusim, na givim hap long mi.” Lo bilong Moses i tok, taim man i dai, namba wan pikinini man i mas kisim tupela hap bilong olgeta samting bilong papa, olsem na i no gat as bilong dispela askim. Tasol ating dispela man i kros long brata bilong em, long wanem em i laik bai brata i givim hap moa long em.

Jisas i no laik insait long dispela kros. Em i tok: “Husat i makim mi long kamap jas bilong yutupela, na mi mas tilim ol samting bilong yutupela?” Na nau em i tokim ol manmeri: “Yupela lukaut na was gut. Nogut yupela i mangal long kisim ol kain kain samting. Maski yu yet yu gat planti samting moa, tasol yu no inap kisim laip long ol dispela samting bilong yu.” Maski man i gat planti samting, tasol taim em i dai em i no inap kisim ol dispela samting i go. Nau Jisas i mekim tok piksa bilong kamapim gut dispela samting, na bilong helpim ol long save, man i no kisim gutpela nem long ai bilong God em bai lus tru. Em i tok:

“Gaden bilong wanpela maniman em i karim planti kaikai. Orait dispela man i ting olsem, ‘Bai mi mekim wanem nau? Mi no gat haus inap long bungim olgeta kaikai bilong mi.’ Na em i tok, ‘Ating bai mi . . . brukim olgeta haus kaikai bilong mi, na wokim ol bikpela bikpela haus. Na bai mi bungim olgeta wit . . . samting bilong mi long ol dispela haus. Na bai mi tok long mi yet olsem, Man mi win tru ya. Mi gat planti gutpela samting i stap inap long planti yia. . . . Bai mi sindaun na mekim bikpela kaikai oltaim na amamas i stap.’ Tasol God i tokim em olsem, ‘Yu longlong man tru. Nau long dispela nait tasol bai yu dai. Na olgeta dispela samting yu bin redim i stap, em husat bai i kisim?’ ”

Na Jisas i tok: “Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.” Ating ol disaipel i no tingting long kisim planti samting, tasol ol i mas was gut, nogut ol hevi bilong olgeta de i mekim na ol i no givim bel moa long mekim wok bilong Jehova. Olsem na Jisas i kolim gen gutpela tok em i bin mekim long maunten inap wanpela yia hap bipo. Em i tokim ol disaipel:

“Yupela i mas tingim dispela tok piksa na yupela i no ken tingting planti long laip bilong yupela, na tok, ‘Bai yumi kaikai wanem?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ . . . Yupela tingim ol kotkot. Ol i no save planim kaikai na ol i no save bungim kaikai. . . . Tasol God i save givim kaikai long ol. . . . Yupela lukim gut ol plaua, ol i kamap olsem wanem. Ol i no save hatwok. Ol i no save wokim laplap. Tasol mi tokim yupela, . . . gutpela bilas bilong ol dispela plaua i winim tru bilas bilong Solomon. . . .

“Olsem na yupela i no ken wari na tingting planti long yupela bai i kaikai wanem samting, na yupela bai i dring wanem samting. . . . Papa bilong yupela em i save pinis, yupela i mas kisim ol dispela samting. Olsem na mobeta yupela i [painim kingdom bilong God, na] bai em i givim ol dispela samting tu long yupela.”

Taim hevi i painim yumi o yumi sot long samting bilong skin, yumi mas tingim gut dispela tok. Sapos man i tingting planti long kisim ol samting bilong skin na em i kirap long lusim ol wok bilong God, dispela i kamapim bel bilong em, em i no bilip olsem God inap lukautim ol wokboi bilong em. Luk 12:​1-31; Lo 21:17.

▪ Dispela man i gat wanem tingting na em i askim Jisas long tokim brata bilong em long givim samting long em? Jisas i tok wanem?

▪ Jisas i mekim wanem tok piksa? Wanem as bilong dispela tok piksa?

▪ Jisas i kolim gen wanem gutpela tok? Bilong wanem i stret em i kolim gen dispela tok?