Sapta 12
Sakim Ol Spirit Nogut
1. Jisas i mekim wanem taim em i bungim ol spirit nogut?
KRAIS JISAS i baptais na bihain liklik em i go long ples nating bilong Judia bilong beten na tingting. Nau Satan i traim em bilong kirapim em long brukim lo bilong God. Tasol Jisas i sakim dispela traim bilong Satan; em i no larim Satan i giamanim em. Taim em i mekim wok bilong em long graun, em i bungim sampela narapela spirit nogut. Em i save krosim ol na sakim ol.—Luk 4:1-13; 8:26-34; 9:37-43.
2. Bai yumi skelim wanem ol askim?
2 Ol stori bilong Baibel long dispela i mas kirapim yumi long bilip tru olsem ol spirit nogut i stap. Ol i wok strong long giamanim ol man, tasol yumi inap sakim ol. Tasol ol spirit nogut i bin kamap olsem wanem? Bilong wanem ol i wok long giamanim ol man? Ol i mekim olsem wanem? Sapos yu save long bekim bilong olkain askim olsem, dispela bai helpim yu long sakim ol spirit nogut.
OL SPIRIT NOGUT—KAMAP OLSEM WANEM NA I LAIK MEKIM WANEM?
3. Satan i kamap olsem wanem?
3 Taim God Jehova i no wokim yet ol manmeri, em i wokim bikpela lain ensel. (Jop 38:4, 7) Olsem Sapta 6 i stori pinis, wanpela bilong ol dispela ensel em i kisim laik olsem ol manmeri i mas lotuim em na ol i no ken lotuim Jehova. Bilong kamapim laik bilong em, dispela ensel nogut i birua long Man bilong wokim olgeta samting na krungutim gutnem bilong Em, na ensel i givim tingting long namba wan meri olsem God em i man bilong giaman. Olsem na i stret ol i kolim dispela ensel i bikhet olsem Satan (birua) na Man bilong krungutim gutnem bilong man.—Stat 3:1-5; Jop 1:6.
4. Sampela ensel i mekim wanem rong long taim bilong Noa?
4 Bihain sampela ensel moa i bikhet na bihainim Satan. Long taim bilong stretpela man Noa, sampela i lusim wok bilong ol long heven na tanim i kamap man bambai ol i ken inapim ol laik nogut bilong ol long mekim maritpasin wantaim ol meri bilong graun. Yumi ken save, Satan i pulim ol dispela ensel na ol i bikhet olsem. Dispela i mekim na ol i kamapim ol pikinini i narapela kain. Ol i “traipela man,” na ol i kamap man bilong pait na bagarapim man. Taim Jehova i mekim Bikpela Tait i kamap long graun, ol man nogut na ol pikinini bilong ol dispela ensel i bikhet ol i bagarap. Ol dispela ensel yet i tanim i kamap spirit gen na ol i no bagarap; ol i go bek long ples bilong ol spirit. Tasol God i pasim ol i stap long tudak bilong spirit na ol i no inap i stap moa insait long lain ensel bilong em. (Stat 6:1-7, 17; Jut 6) Tasol ol ensel nogut wantaim “hetman” bilong ol, em Satan, ol i no lusim pasin bikhet. (Luk 11:15) Ol i laik mekim wanem?
5. Satan na ol spirit nogut i laik mekim wanem? Ol i save mekim wanem bilong pulim ol man i go insait long umben bilong ol?
5 Ol i laik mekim wok nogut. Ol i laik pulim ol manmeri na bai ol i lusim God Jehova. Olsem na kirap long taim bilong namba wan man na meri na i kam inap long nau ol i bin giamanim, na pretim, na mekim nogut long ol man. (KTH 12:9) Sampela samting i kamap i makim olsem ol spirit nogut i mekim nogut moa yet long ol man long nau, winim tru bilong bipo. Bilong giamanim ol man na pulim ol i go insait long umben bilong ol, ol i mekim wok long olkain pasin i olsem wok bilong ol spirit nogut. Ol i mekim wanem bilong pulim ol man? Na yu ken mekim wanem bilong lukautim yu yet na bai yu no kalabus long umben bilong ol?
ROT BILONG OL SPIRIT NOGUT LONG GIAMANIM YU
6. Wok bilong ol spirit nogut em wanem samting? Wanem sampela wok bilong ol spirit nogut?
6 Wok bilong ol spirit nogut em wanem samting? Em olkain pasin bilong toktok wantaim o wok wantaim ol spirit nogut, olsem man yet i mekim o em i mekim long rot bilong wanpela wailis. Ol dispela pasin i helpim ol spirit nogut long pulim ol man i go insait long umben bilong ol, wankain olsem samting ol man bilong painim abus i mekim bilong pulim abus i go insait long umben. Man bilong painim abus i save putim kain kain samting bilong giamanim abus na pulim i kam, na olsem tasol ol spirit nogut i gat kain kain pasin bilong giamanim ol man na pulim ol i kam mekim wok bilong ol, na bai ol man i stap aninit long strong bilong ol. (Skelim wantaim Song 119:110.) Sampela pasin olsem em olkain pasin bilong glasman, majik, lukim sampela mak bilong kisim save long samting i stap hait, posin, marila, singautim wailis bilong ol spirit, toktok wantaim ol man i dai pinis.
7. Planti man i mekim wok bilong ol spirit nogut o olsem wanem? Olsem wanem na dispela wok i kamap strong long ol kantri i gat nem Kristen tu?
7 Ol dispela wok bilong ol spirit nogut i save pulim planti man long olgeta hap long kam insait long umben bilong ol. Long ol liklik ples long bus, ol man i save go lukim ol posinman long helpim ol, na long ol biktaun ol man i wok long ofis ol i save go lukim ol man bilong lukluk long ol sta. Long ol kantri i gat nem Kristen tu, wok bilong ol spirit nogut i kamap strong. Ol i bin skelim na kisim save olsem long Amerika i gat olsem 30 nius i stori long olkain wok bilong ol spirit nogut, na ol man i save baim 10,000,000 samting. Ol Brasil i save tromoi 500 milion kina samting long olgeta yia bilong baim ol samting bilong mekim olkain wok bilong ol spirit nogut. Tasol inap 80 pesen bilong ol man long dispela kantri ol i baptais pinis long lotu Katolik na ol i save go long Misa tu. Sampela pris pasto i save insait long wok bilong ol spirit nogut, olsem na planti man bilong lotu i ting sapos ol tu i mekim, God bai orait long en. Tasol yu ting God i orait long en?
BILONG WANEM BAIBEL I TAMBUIM?
8. Baibel i tok wanem long wok bilong ol spirit nogut?
8 Sapos ol i bin lainim yu olsem long rot bilong ol glasman samting yu inap toktok wantaim ol gutpela spirit tu, ating yu bai kirap nogut long tok bilong Baibel long ol dispela kain pasin. Jehova i toksave long lain bilong em olsem: “Yupela i no ken i go askim ol man i save toktok wantaim tewel bilong ol man i dai pinis, long kisim tingting long ol tewel na givim long yupela. Sapos yupela i mekim olsem bai yupela i kamap doti tru long ai bilong mi.” (Wok Pris 19:31; 20:6, 27) Buk Kamapim Tok Hait long Baibel i toksave olsem “ol man i wokim posin” bai ol i go long “bikpela hul i gat hatpela paia i lait long ol ston salfa. Dispela em i namba 2 dai [bilong oltaim oltaim].” (KTH 21:8; 22:15) God Jehova i no orait long olgeta kain pasin bilong glasman na marila posin samting. (Lo 18:10-12) Bilong wanem em i no laikim?
9. Ol tok ol man i kisim long ples spirit long nau, olsem wanem yumi ken save ol dispela tok i no kam long Jehova?
9 Jehova i bin salim ol gutpela spirit, olsem ol gutpela ensel, i go toktok wantaim sampela man na givim tingting bilong em long ol long taim ol man i no pinis yet long raitim Baibel. Tasol taim ol i raitim pinis, nau Baibel i soim rot long ol man bambai ol inap lotuim God long pasin em i laikim. (2 Timoti 3:16, 17; Hibru 1:1, 2) God i no save abrusim Baibel na givim tok long sampela wailis bilong ol spirit. Olgeta dispela tok ol man i kisim long ples spirit long nau i save kam long ol spirit nogut tasol. Sapos man i mekim wok bilong ol spirit nogut, ol inap mekim nogut long em o bosim em. Olsem na God i mekim pasin sori na givim toksave long yumi long yumi no ken mekim wok bilong ol spirit nogut. (Lo 18:14; Galesia 5:19-21) Na sapos yumi save pinis long tingting bilong Jehova long ol dispela pasin, tasol yumi mekim yet, bai yumi helpim ol spirit nogut i save bikhet long God, na yumi kamap birua bilong God.—1 Samuel 15:23; 1 Stori 10:13, 14; Song 5:4.
10. Pasin bilong glasman em wanem kain pasin? Bilong wanem yumi mas klia long en?
10 Wanpela wok bilong ol spirit nogut em planti man i save laikim, em wanpela kain pasin bilong glasman—ol i laik kisim save long samting bai i kamap bihain o samting i stap hait na ol i askim ol spirit long helpim ol. Ol i wok long kisim dispela save long rot bilong lukluk long ol sta, lukluk long bal glas, kamapim as bilong driman, lukim mak long han, lukim kas ol i kolim tarot. Planti man i ting ol dispela kain pasin i bilong amamas nating tasol, tasol Baibel i kamapim klia olsem ol man i save mekim wok bilong tokaut long ol samting bai kamap bihain ol i save wok wantaim ol spirit nogut. Olsem: Aposel 16:16-19 i stori long wanpela meri i gat spirit nogut i stap long em na em inap “tokaut long ol samting bai i kamap bihain.” Tasol taim ol i rausim dispela spirit nogut long em, em i no inap mekim moa dispela wok. Tru tumas, olkain pasin bilong glasman em samting ol spirit nogut i mekim wok long en bilong pulim ol man i kam insait long umben bilong ol.
11. Ol pasin bilong toktok wantaim man i dai pinis, olsem wanem dispela inap pulim man i go insait long umben bilong Satan?
11 Sapos wanpela long famili bilong yu o wanpela gutpela pren i dai na yu bel hevi i stap, i no hatwok long ol spirit nogut i pulim yu long narapela rot. Wanpela wailis bilong ol spirit inap givim narapela kain save long yu o mekim toktok long nek i olsem bilong dispela man i dai pinis. Tasol lukaut! Taim man i laik toktok wantaim man i dai pinis, dispela inap pulim em i go insait long umben. I gat wanem as na yumi tok olsem? Ating yu tingim yet tok bilong Baibel i tokaut klia olsem man i dai pinis “em i tanim i kamap graun gen; long dispela de tingting bilong em i pinis olgeta.” Ol man i dai pinis “ol i no inap save long wanpela samting.” (Song 146:4, NW; Saveman 9:5, 10) Em ol spirit nogut yet i bin makim nek bilong man i dai pinis na givim sampela save long wailis long ol samting bilong dispela man i dai pinis. (1 Samuel 28:3-19) Olsem na man i laik ‘toktok wantaim ol man i dai pinis,’ ol spirit nogut i giamanim em na em i mekim pasin nogut long ai bilong God Jehova.—Lo 18:11, 12; Aisaia 8:19.
PULIM OL NA MEKIM NOGUT LONG OL
12, 13. Wanem ol samting i kamapim klia olsem ol spirit nogut i wok yet long pulim ol man na mekim nogut long ol?
12 Taim yu bihainim tok bilong Baibel long wok bilong ol spirit nogut, yu sakim samting ol spirit nogut i mekim bilong pulim yu i go insait long umben bilong ol. (Skelim wantaim Song 141:9, 10; Rom 12:9.) Orait, sapos yu sakim ol spirit nogut, yu ting ol i no ken strong moa long kalabusim yu? Nogat tru! Satan i traim Jisas 3-pela taim pinis, orait “em i lusim Jisas na i wetim narapela taim.” (Luk 4:13) Long nau tu ol spirit nogut i strong long mekim olsem. Ol i wok long pulim ol man, na ol i save mekim nogut long ol tu.
13 Tingim ol samting nogut Satan i bin mekim long wokboi bilong God, Jop, em yumi bin stori long en. Satan i mekim na olgeta animal na planti wokboi bilong Jop i dai. Na Satan i kilim i dai ol pikinini bilong Jop. Bihain em i givim wanpela sik nogut tru long Jop yet. Tasol Jop i stap gut long God na em i kisim planti blesing. (Jop 1:7-19; 2:7, 8; 42:12) Kirap long dispela taim na i kam inap nau, ol spirit nogut i bin mekim sampela man i kamap mauspas o aipas, na ol i save amamas tru long pen na hevi ol man i karim. (Matyu 9:32, 33; 12:22; Mak 5:2-5) Long nau, ol spirit nogut ol i mekim pasin sem long sampela, na mekim sampela i kamap longlong. Na ol i kirapim sampela long kilim i dai narapela man o kilim i dai skin bilong ol yet, em tupela pasin i gat rong long ai bilong God. (Lo 5:17; 1 Jon 3:15) Tasol planti tausen manmeri bipo ol spirit nogut i kalabusim ol, ol i lusim pinis kalabus. Olsem wanem ol inap mekim olsem? I gat sampela bikpela samting ol i bin mekim.
ROT BILONG SAKIM OL SPIRIT NOGUT
14. Yu mas mekim wanem bilong sakim ol spirit nogut, olsem ol Kristen bilong pastaim long Efesus i bin mekim?
14 Orait, wanem wanpela samting yu ken mekim bilong sakim ol spirit nogut na lukautim yu yet wantaim famili bilong yu na ol i no ken pulim yu i go insait long umben bilong ol? Sampela Kristen bilong pastaim long Efesus ol i bin mekim wok bilong ol spirit nogut taim ol i no kamap Kristen yet. Tasol ol i mekim sampela samting bilong lusim kalabus bilong ol spirit nogut. Baibel i tok, “planti manmeri i bin wokim posin na marila samting, ol i bungim ol buk bilong ol i gat tok long pasin bilong wokim ol dispela samting, na ol i kukim long paia long ai bilong olgeta manmeri.” (Aposel 19:19) Na maski yu no bin mekim sampela wok bilong ol spirit nogut, yu mas rausim olgeta samting bilong yu em ol spirit nogut inap mekim wok long en bilong pulim yu, olsem ol buk, nius, video, piksa, kaset, na ol samting bilong wokim marila posin samting. Yu mas rausim tu ol samting i olsem god giaman, na ol paspas na ol narapela samting yu bin pasim long skin bilong lukautim yu, na ol samting ol man bilong mekim wok bilong ol spirit nogut i bin givim long yu olsem presen. (Lo 7:25, 26; 1 Korin 10:21) Tingim stori bilong tupela marit long Tailan em longtaim pinis ol spirit nogut i bin mekim nogut long ol. Bihain tupela i rausim olgeta samting bilong mekim wok bilong ol spirit nogut. Orait, wanem samting i kamap? Ol i no kisim hevi moa long han bilong ol spirit nogut, na ol i kamap strong long wok bilong God.
15. Wanem narapela samting yu mas mekim bilong sakim ol spirit nogut?
15 Narapela samting yu mas mekim bilong sakim ol spirit nogut em olsem: Yu mas bihainim tok bilong aposel Pol na pasim olgeta klos pait bilong spirit em God i givim long yumi. (Efesus 6:11-17) Ol Kristen i mas mekim ol samting bambai ol inap sanap strong na sakim ol spirit nogut. Wanem wanpela samting ol i mas mekim? Pol i tok, ol i mas “kisim tu pasin bilong bilip, na holim strong olsem hap plang,” na bai ol inap “mekim i dai olgeta spia paia dispela man nogut Satan i save sutim i kam” long ol. Tru tumas, sapos bilip bilong yu i strong bai yu inap sanap strong na sakim ol spirit nogut.—Matyu 17:14-20.
16. Yu ken mekim wanem bilong strongim bilip bilong yu?
16 Yu ken mekim wanem bilong strongim bilip bilong yu? Yu mas stadi gut long ol tok bilong Baibel na bihainim long olgeta taim. Sapos bilip bilong yu i gat strongpela as bilong en, olsem yu save gut long God, orait bilip bilong yu bai strong. Stretpela save yu bin kisim na tingim gut taim yu stadi long Baibel, dispela i bin strongim bilip bilong yu, a? (Rom 10:10, 17) Olsem na taim yu stadi yet long Baibel na yu go oltaim long ol miting bilong ol Witnes Bilong Jehova, bai bilip bilong yu i kamap strong moa. (Rom 1:11, 12; Kolosi 2:6, 7) Bai em i kamap olsem strongpela banis bilong lukautim yu, na bai yu inap sakim ol spirit nogut.—1 Jon 5:5.
17. I gat wanem samting moa yu mas mekim bambai yu inap sakim ol spirit nogut?
17 Orait, man i strong long sakim ol spirit nogut em i ken mekim wanem samting moa? Ol Kristen bilong Efesus i mas mekim samting bilong lukautim ol, long wanem, ol spirit nogut i pulap long dispela taun ol i stap long en. Olsem na Pol i tokim ol: “Long strong bilong Holi Spirit yupela i mas prea oltaim.” (Efesus 6:18) Ol spirit nogut i pulap long dispela graun yumi stap long en, olsem na i bikpela samting yumi mas beten strong oltaim na askim God long lukautim yumi bambai yumi inap sakim ol. (Matyu 6:13) Na narapela samting bilong strongim yumi long sakim ol spirit nogut, em wok bilong ol elda long kongrigesen Kristen bilong helpim yumi, na beten bilong ol.—Jems 5:13-15.
WOK STRONG YET LONG SAKIM OL SPIRIT NOGUT
18, 19. Sapos ol spirit nogut i kirap gen long givim hevi long wanpela man, em i ken mekim wanem?
18 Sampela i mekim ol dispela samting, tasol ol spirit nogut i givim hevi yet long ol. Olsem wanpela man long kantri Kot Diwa. Ol Witnes Bilong Jehova i skulim em long Baibel na em i rausim ol paspas samting em i holim bilong lukautim em. Bihain em i kamap strong long spirit, na dediket long Jehova, na kisim baptais. Em i baptais pinis na wanpela wik bihain ol spirit nogut i kirap gen long givim hevi long em; em i harim ol nek i tokim em long lusim nupela bilip bilong em. Sapos kain samting olsem i kamap long yu, yu ting i olsem Jehova i no lukautim yu moa? Ating nogat.
19 Krais Jisas em i gutpela man olgeta na God i lukautim em, tasol em i harim nek bilong spirit nogut Satan i toktok long em. Jisas i makim samting yumi mas mekim sapos kain samting olsem i kamap long yumi. Jisas i tokim Satan: “Yu klia.” (Matyu 4:3-10) Yu tu yu ken mekim olsem. Yu mas sakim ol spirit nogut i laik toktok long yu. Singaut long Jehova na askim em long helpim yu. Yu ken beten long maus, na kolim nem bilong God. Sindaun 18:10 i tok: “Nem bilong Jehova i olsem strongpela haus. Ol stretpela man i ran i go insait long en na i stap gutpela.” (NW) Dispela Kristen long Kot Diwa i mekim olsem, na ol spirit nogut i lusim em.—Song 124:8; 145:18.
20. Orait, yu mas mekim wanem bilong sakim ol spirit nogut?
20 Jehova i larim ol spirit nogut i stap, tasol em i save kamapim strong bilong em bilong helpim lain bilong em, na ol i tokaut long nem bilong em long olgeta hap bilong graun. (Kisim Bek 9:16) Sapos yu stap klostu long God, yu no ken pret long ol spirit nogut. (Namba 23:21, 23; Jems 4:7, 8; 2 Pita 2:9) Ol i gat hap strong tasol. Ol i bin kisim strafe long taim bilong Noa, na i no longtaim i go pinis na ol i raus long heven, na nau ol i wetim de bilong bikpela kot bilong God. (Jut 6; KTH 12:9; 20:1-3, 7-10, 14) Ol i tingim bagarap bai painim ol na ol i guria. (Jems 2:19) Olsem na maski ol spirit nogut i wok strong long pulim yu o mekim nogut long yu, yu inap sakim ol. (2 Korin 2:11) Sakim olgeta pasin i olsem wok bilong ol spirit nogut; bihainim ol tok bilong Baibel; wok long mekim ol pasin Jehova i laikim. Kirap kwik na mekim—yu no ken lusim taim. Yu mas sakim ol spirit nogut bambai yu inap abrusim bagarap na i stap laip!
TRAIM SAVE BILONG YU
Wanem rot bilong ol spirit nogut long giamanim ol man?
Bilong wanem Baibel i tambuim wok bilong ol spirit nogut?
Man i ken mekim wanem bilong lusim kalabus bilong ol spirit nogut?
Bilong wanem yu mas wok long sakim ol spirit nogut?
[Piksa long pes 110]
Yu ting olsem wanem long ol kain kain wok bilong ol spirit nogut?