Sapta 16
Rot Bilong Go Klostu Long God
1. Planti lotu i mekim wanem ol pasin i olsem i wankain?
WANPELA turis i go long wanpela kantri long Esia na em i kirap nogut long sampela pasin bilong lotu em i lukim ol manmeri bilong lotu Buda i mekim long haus lotu bilong ol. Tru, ol i no gat piksa bilong Maria o Krais, tasol planti pasin bilong lotu ol i mekim i olsem i wankain long pasin ol manmeri i mekim long haus lotu em i go long en long kantri bilong em. Em i lukim ol i kaunim bis korona na kolim kolim nating ol beten. Sampela man moa ol tu i lukim olsem pasin bilong ol man bilong i go klostu long God na ol samting ol i lotu long en i olsem wankain long hap bilong Is na Wes.
2. Wanpela buk i stori olsem wanem long beten? Planti man i gat wanem tingting na ol i beten?
2 Planti man i wok long i go klostu long God long rot bilong beten. Wanpela buk i tok, beten em i olsem “pasin bilong ol man long toktok wantaim samting i holi, olsem God, o ol god, o heven, o ol spirit.” (The New Encyclopædia Britannica) Tasol sampela man i tingting tasol long kisim samting bilong helpim ol na ol i beten long God. Olsem: Wanpela man i bin askim wanpela Witnes Bilong Jehova: “Sapos yu mekim beten bilong helpim mi, bai dispela i pinisim olgeta hevi bilong mi long famili, na long ples wok, na pinisim sik bilong mi?” Em i ting beten inap helpim em olsem. Tasol planti man i save beten na hevi bilong ol i stap yet. Olsem na yumi laik save, ‘Bilong wanem yumi mas beten long God?’
I GAT WANEM AS NA YUMI MAS GO KLOSTU LONG GOD
3. Yumi mas beten long husat? Bilong wanem yumi mas beten long em tasol?
3 Beten i no wanpela pasin nating bilong lotu, na em i no rot bilong kisim samting tasol. Wanpela bikpela as na yumi mas go klostu long God long rot bilong beten em olsem: Dispela bai helpim yumi long pas gut wantaim God. Olsem na yumi mas beten long God Jehova yet. Devit i raitim Song na em i tok: “Ol manmeri i save bel tru na i singaut long [God], em i save stap klostu long ol.” (Song 145:18) Jehova i singautim yumi long kamap wanbel wantaim em. (Aisaia 1:18) Ol man i mekim olsem ol i wanbel long tok bilong man i raitim Song: “Mi stap klostu long [God] na dispela i gutpela tru.” Bilong wanem i gutpela tru? Long wanem, ol man i go klostu long God Jehova ol i stap amamas tru na bel na tingting bilong ol i stap isi.—Song 73:28.
4, 5. (a) Bilong wanem i bikpela samting yumi mas beten long God? (b) Yumi ken i stap olsem wanem long God long rot bilong beten?
4 Tasol ‘taim yumi no opim maus yet, God i save long ol samting yumi sot long en,’ olsem na bilong wanem yumi mas beten askim God long helpim yumi? (Matyu 6:8; Song 139:4) Taim yumi beten, dispela i makim olsem yumi bilip long God na yumi tingim em i As bilong “olgeta gutpela samting yumi save kisim na olgeta presen i gutpela tru.” (Jems 1:17; Hibru 11:6) Jehova i save amamas long ol beten bilong yumi. (Sindaun 15:8) Em i amamas long harim ol gutpela tok yumi mekim bilong tenkyu long em na litimapim nem bilong em, olsem papa i amamas long harim liklik pikinini bilong em i tok tenkyu long em, na bel bilong em yet i kirapim em long tok tenkyu. (Song 119:108) Sapos papa na pikinini i pas gut wantaim, tupela bai toktok gut wantaim. Sapos pikinini i save papa i laikim em tumas, em i laik toktok wantaim papa. Na i wankain long yumi taim yumi pas gut wantaim God. Sapos yumi kisim save long God Jehova na pilim tru pasin sori em i bin mekim long yumi, bai yumi gat strongpela laik long beten toktok wantaim em.—1 Jon 4:16-18.
5 Taim yumi laik beten long God Antap Tru, yumi mas mekim long gutpela pasin daun, tasol yumi no ken tingting planti long wanem kain tok bai yumi kolim. (Hibru 4:16) Long olgeta taim rot i op long beten long Jehova. Yumi ken beten na kamapim “olgeta tingting” bilong yumi long em. Em gutpela blesing tru! (Song 62:8) Sapos yumi pilim tru gutpela pasin bilong Jehova bai yumi pas gut wantaim em, olsem bilipman Abraham i pas wantaim em na i stap pren bilong em. (Jems 2:23) Tasol taim yumi laik beten long Nambawan Bikpela King bilong heven na graun, i gat sampela samting yumi mas mekim olsem em i makim pinis bilong i go klostu long em.
OL SAMTING YUMI MAS MEKIM BILONG GO KLOSTU LONG GOD
6, 7. God i no singaut long pe bilong harim beten bilong yumi, tasol em i tok yumi mas mekim wanem taim yumi beten long em?
6 Yu ting yu mas i gat mani na bai yu ken beten long God? Planti man i save baim ol pris pasto bilong mekim ol beten bilong helpim ol. Sampela i ting sapos ol i givim liklik mani tasol, God bai harim liklik tasol, na sapos ol i givim bikpela mani, bai God i harim gut beten bilong ol. Tasol Baibel i no tok yumi mas tromoi sampela mani bambai yumi ken i go klostu long God long rot bilong beten. Olgeta samting bilong spirit em i givim long yumi, na blesing bilong pas wantaim em long rot bilong beten, em yumi no ken baim; i no gat pe bilong en.—Aisaia 55:1, 2.
7 Orait, yumi mas mekim wanem? Yumi mas i gat stretpela tingting na laik long bel. (2 Stori 6:29, 30; Sindaun 15:11) Long bel yumi mas bilip olsem God Jehova i save “harim beten” na em i “save mekim gut tru long ol man i wok long painim em.” (Song 65:2; Hibru 11:6) Na yumi mas mekim pasin daun. (2 King 22:19; Song 51:17) Long wanpela tok piksa, Krais Jisas i stori long wanpela man bilong kisim takis i gat pasin daun, na taim em i beten long God na daunim em yet em i kamapim klia olsem em i stretpela man long ai bilong God, winim wanpela Farisi i gat pasin antap na em i beten long God. (Luk 18:10-14) Taim yumi beten, yumi no ken lusim tingting olsem Jehova “i no laikim tru ol man i save hambak na litimapim nem bilong ol yet.”—Sindaun 16:5.
8. Sapos yumi laik bai God i harim beten bilong yumi, yumi mas lusim wanem ol pasin na kamap klin?
8 Sapos yumi laik bai God i harim beten bilong yumi na helpim yumi, yumi mas lusim olgeta pasin nogut na kamap klin. Disaipel Jems i kirapim ol man long i go klostu long God na em i tok: “Yupela man bilong sin, bel bilong yupela i mas kamap klin, olsem man i wasim han bilong en na i kamap klin. Yupela man i gat tupela tingting, yupela i mas rausim dispela tingting nogut long bel bilong yupela.” (Jems 4:8) Ol man i mekim rong ol tu inap kamap wanbel wantaim God sapos ol i tanim bel na lusim pasin nogut bipo ol i mekim. (Sindaun 28:13) Yumi no inap i go klostu long Jehova long rot bilong beten sapos yumi giaman tasol long lusim pasin nogut. Baibel i tok: “Bikpela i save lukautim ol stretpela manmeri, na em i save putim yau long ol beten bilong ol. Tasol Bikpela i no save laikim ol manmeri nogut.”—1 Pita 3:12.
9. Yumi mas beten long Jehova long rot bilong husat? Bilong wanem yumi mas beten long rot bilong em?
9 Baibel i tok: “I no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.” (Saveman 7:20) Olsem na ating yu laik save, ‘Olsem wanem yumi inap i go klostu long God Jehova?’ Baibel i tok: “Sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta.” (1 Jon 2:1) Tru yumi sinman, tasol yumi ken beten long God na yumi no ken pret, long wanem, Krais Jisas i bin mekim ofa bilong baim bek yumi. (Matyu 20:28) Krais Jisas tasol em i rot bilong i go klostu long God Jehova. (Jon 14:6) Tasol nogut yumi mekim ol sin long laik bilong yumi na yumi ting ofa bilong Jisas bai karamapim ol dispela sin. (Hibru 10:26) Tasol sapos yumi wok strong long sakim ol pasin nogut, maski sampela taim yumi popaia na mekim sin, yumi ken tanim bel na askim God long lusim sin bilong yumi. Taim yumi daunim yumi yet na yumi go long em long rot bilong beten, em i save harim beten bilong yumi.—Luk 11:4.
OL TAIM BILONG BETEN
10. Taim yumi beten, olsem wanem yumi ken bihainim pasin bilong Jisas? Wanem sampela taim yumi yet i ken beten?
10 Krais Jisas i ting i gutpela samting tru long em inap pas gut wantaim Jehova. Olsem na em i save wokim rot bambai em i gat taim bilong em yet i ken beten toktok wantaim God. (Mak 1:35; Luk 22:40-46) Gutpela sapos yumi bihainim pasin bilong Jisas na beten long God long olgeta taim. (Rom 12:12) I stret yumi ken beten taim yumi kirap long moningtaim; na long nait, taim yumi laik slip, i stret yumi ken tenkyu long Jehova long ol wok yumi bin mekim long dispela de. Long san yumi ken wok long “prea oltaim.” (Efesus 6:18) Yumi ken beten long bel, na yumi ken save Jehova inap harim beten bilong yumi. Sapos yumi yet i beten long God, dispela i helpim yumi long pas gut wantaim em, na sapos yumi beten long olgeta de, oltaim bai yumi wok long i go klostu moa long em.
11. (a) Bilong wanem famili i mas beten wantaim? (b) Taim yu tok “Amen” long pinis bilong beten, wanem insait bilong dispela tok?
11 Jehova i save harim tu ol beten man i mekim bilong wanpela lain. (1 King 8:22-53) Papa i ken mekim beten bilong famili na dispela bai helpim famili long i go klostu long God. Dispela pasin i save strongim famili na helpim ol long pas gut wantaim, na taim ol pikinini i harim papamama i beten long God long pasin daun, dispela i helpim ol pikinini long bilip tru olsem God i stap. Olsem wanem sapos wanpela man i mekim beten bilong bikpela lain, olsem long wanpela miting bilong ol Witnes Bilong Jehova? Sapos yumi stap insait long dispela lain, yumi mas putim gut yau long ol tok em i mekim, na long pinis bilong beten bai yumi inap givim bel long tok “Amen,” em olsem “I tru.”—1 Korin 14:16.
OL BETEN JEHOVA I SAVE HARIM
12. (a) Bilong wanem God i no save harim sampela beten? (b) Taim yumi beten, bilong wanem yumi no ken askim God long ol samting bilong yumi yet tasol?
12 Sampela i pilim olsem God i no save harim beten bilong ol, maski ol i beten long em long rot bilong Krais. Tasol aposel Jon i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.” (1 Jon 5:14) Olsem na yumi mas beten askim God long ol samting i stret long laik bilong em. God i laik bai yumi stap gutpela long ol samting bilong spirit, olsem na i stret yumi ken beten askim em long olgeta samting inap helpim yumi long samting bilong spirit. Nogut yumi beten oltaim long ol samting bilong skin. Olsem: Taim yumi gat sik, i stret yumi ken beten askim God long givim gutpela tingting na strong long yumi bilong helpim yumi long karim dispela hevi, tasol nogut yumi tingting tasol long sik bilong yumi na yumi no tingim ol samting bilong spirit. (Song 41:1-3) Wanpela meri Kristen i save em i tingim tumas sik bilong em na em i beten askim Jehova long helpim em long kisim stretpela tingting long en. Dispela i helpim em na em i no tingting tumas long sik bilong em olsem pastaim em i mekim, na em i pilim olsem God i givim strong long em. (2 Korin 4:7) Laik bilong em long helpim ol narapela long ol samting bilong spirit i kamap strong na em i kirap autim tok bilong Kingdom long olgeta de.
13. Wanem sampela samting i stret yumi ken beten askim God long en, olsem Matyu 6:9-13 i makim?
13 Yumi ken beten askim Jehova long wanem ol samting na bai em i amamas long harim beten bilong yumi? Krais Jisas i lainim ol disaipel bilong em long pasin bilong beten. Long beten bilong em long Matyu 6:9-13, em i makim ol samting i stret yumi ken beten askim God long en. Wanem samting i mas i stap nambawan bikpela samting long ol beten bilong yumi? Em nem bilong God Jehova na Kingdom bilong em. I stret yumi ken askim God long helpim yumi long ol samting bilong skin tu. Na i bikpela samting yumi mas askim God long lusim ol rong bilong yumi na helpim yumi long sakim ol traim, na sakim man nogut, Satan. Jisas i no laik bai yumi kolim nating dispela beten, mekim mekim planti taim na yumi no pilim ol tok bilong en. Nogat. (Matyu 6:7) Taim pikinini i toktok wantaim papa bilong em, sapos pikinini i mekim wankain tok tasol long olgeta taim, yu ting em bai pas gut wantaim papa?
14. Yumi ken beten askim God long helpim yumi na yumi ken mekim wanem ol narapela beten tu?
14 Yumi ken beten askim God long helpim yumi na singaut long em, tasol yumi mas mekim beten bilong litimapim nem bilong em tu na tenkyu long em. (Song 34:1; 92:1; 1 Tesalonaika 5:18) Na yumi ken beten bilong helpim ol narapela. Sapos ol man i mekim nogut long ol brata sista bilong spirit, na yumi beten askim God long helpim ol, dispela i makim olsem yumi tingim ol, na bai Jehova i amamas long harim beten bilong yumi. (Luk 22:32; Jon 17:20; 1 Tesalonaika 5:25) Aposel Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em . . . bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.”—Filipai 4:6, 7.
BETEN LONG OLGETA TAIM
15. Sapos i olsem God i no harim beten bilong yumi, yumi mas save long wanem samting?
15 Yu wok long kisim save long God, tasol ating yu pilim olsem sampela taim God i no harim beten bilong yu. Samting olsem inap kamap sapos i no taim bilong God long mekim samting olsem yu bin beten long en. (Saveman 3:1-9) Jehova inap larim wanpela hevi i stap pastaim, tasol em i save harim ol beten na em i save long taim tru bilong helpim man.—2 Korin 12:7-9.
16. Bilong wanem yumi mas beten oltaim? Sapos yumi mekim olsem, dispela bai helpim yumi long i stap olsem wanem wantaim God?
16 Sapos yumi beten long olgeta taim na yumi no les long mekim, dispela i kamapim klia olsem yumi tingim tru samting yumi askim God long en. (Luk 18:1-8) Olsem: Ating yumi beten askim Jehova long helpim yumi long lusim wanpela pasin kranki yumi save mekim. Sapos yumi beten oltaim long dispela na mekim ol samting i stret long dispela beten, yumi kamapim klia olsem yumi laik tru long lusim dispela pasin. Taim yumi beten askim God long wanpela samting, yumi mas kolim stret dispela samting na yumi no ken giaman. Taim wanpela traim i painim yumi, i bikpela samting long yumi mas beten strong. (Matyu 6:13) Taim yumi wok long beten na askim Jehova long daunim ol laik nogut bilong skin bilong yumi, bai yumi lukim olsem Jehova i helpim yumi. Dispela bai strongim bilip bilong yumi na helpim yumi long pas gut moa yet wantaim em.—1 Korin 10:13; Filipai 4:13.
17. Sapos yumi beten taim yumi mekim wok bilong God, dispela bai helpim yumi olsem wanem?
17 Sapos yumi beten taim yumi mekim wok bilong God Jehova, dispela bai helpim yumi long save yumi no mekim dispela wok long strong bilong yumi yet—Jehova i givim strong long yumi na yumi mekim. (1 Korin 4:7) Dispela tingting bai helpim yumi long mekim pasin daun na bai yumi pas gut wantaim em. (1 Pita 5:5, 6) Tru tumas, i gat planti as na yumi ken beten long olgeta taim. Pasin bilong beten strong, na ol save yumi kisim long pasin bilong go klostu long gutpela Papa bilong yumi long heven, dispela bai helpim yumi long i stap amamas tru.
YUMI TOKTOK LONG JEHOVA NA EM I TOKTOK LONG YUMI
18. Olsem wanem yumi ken harim tok bilong God?
18 Sapos yumi laik bai God i harim beten bilong yumi, yumi mas harim tok bilong em. (Sekaraia 7:13) Long nau em i no save givim tok long yumi long maus bilong ol profet; na em i no ken tru givim tok long yumi long maus bilong wailis bilong ol spirit. (Lo 18:10-12) Tasol yumi ken harim tok bilong God taim yumi stadi long Baibel, em Tok bilong em. (Rom 15:4; 2 Timoti 3:16, 17) Yumi mas lain long laikim gutpela kaikai bilong strongim skin bilong yumi, na olsem tasol yumi mas lain long “laikim tumas long kisim gutpela susu i kam long God, na i no gat samting nogut i stap long en.” Yu ken lain long laikim tumas ol kaikai bilong spirit sapos yu kaunim Baibel long olgeta de.—1 Pita 2:2, 3; Aposel 17:11.
19. Sapos yu tingim gut long bel ol tok yu kaunim long Baibel, dispela bai helpim yu olsem wanem?
19 Tingim gut long bel ol tok yu kaunim long Baibel. (Song 1:1-3; 77:11, 12) Em i olsem yu mas tingim tingim ol dispela tok. I kain olsem long taim yumi kisim kaikai bilong skin na bel i wok long kisim ol gutpela samting bilong en. Na i olsem tu long taim yumi kisim ol kaikai bilong spirit. Yumi inap kisim ol gutpela samting bilong en taim yumi wok long skelim wantaim save yumi kisim pinis. Tingim ol samting ol dispela tok i mekim long wokabaut bilong yu, na em i lainim yu long wanem ol pasin na wok bilong Jehova. Olsem na taim yu yet yu stadi, yu inap kisim gut ol kaikai bilong spirit Jehova i givim long yumi. Dispela bai helpim yu long go klostu moa long God na karim ol hevi i save painim yu long olgeta de.
20. Pasin bilong i go long ol miting Kristen, olsem wanem dispela i helpim yumi long i go klostu long God?
20 Na sapos yu putim gut yau long ol tok bilong God ol i toktok long en long ol miting Kristen, dispela tu bai helpim yu long i go klostu long God. Ol Israel i bin mekim olsem. Taim ol i bung wantaim bilong harim ol tok bilong God ol man i kaunim long ol, ol i save putim gut yau. Taim ol tisa bilong ol Israel i save kaunim Lo long ol, ol i save kamapim as bilong en. Long dispela rot ol i helpim ol man i harim dispela tok long kisim gut as bilong en na dispela i kirapim ol long bihainim ol dispela tok. Bikpela amamas i kamap long dispela rot. (Nehemia 8:8, 12) Olsem na yu mas kisim pasin bilong go oltaim long ol miting bilong ol Witnes Bilong Jehova. (Hibru 10:24, 25) Dispela bai helpim yu long save gut long God na bihainim dispela save long olgeta samting yu mekim, na bai yu stap amamas. Taim yu insait long lain brata Kristen i stap long olgeta hap bilong graun, dispela bai helpim yu long i stap klostu long Jehova. Na yu inap i stap gut tru namel long ol, olsem nau bai yumi stori.
TRAIM SAVE BILONG YU
Bilong wanem yu mas wok long i go klostu long Jehova?
Wanem sampela samting yu mas mekim bambai yu inap i go klostu long God?
Wanem sampela samting yu ken beten askim God long en?
Bilong wanem yu mas beten long olgeta taim na yu no ken les?
Olsem wanem yu inap harim tok bilong Jehova long nau?
[Piksa i karamapim pes olgeta long pes 157]