Sapta 16
‘Holim Strong Pasin Bilong Laikim Tru Ol Brata’
1. Planti taim ol nupela man i pilim wanem samting long miting bilong ol Witnes Bilong Jehova?
TAIM ol nupela man i kam long ol miting bilong ol Witnes Bilong Jehova, ol i pilim tru pasin bilong ol long laikim tru narapela narapela. Ol i luksave long dispela taim ol narapela i sekanim ol na gutpela pasin pren i stap namel long ol Witnes. Ol nupela man i kam long ol kibung bilong yumi ol tu i lukim dispela pasin bilong laikim ol narapela. Wanpela niusman i stori long wanpela kibung olsem: ‘No gat man i spak long dring o long drak. No gat bikmaus o singaut. No gat man i subim narapela man. No gat tok swea. No gat tok pilai nogut o tok doti. No gat smok. No gat stil. No gat man i tromoi pipia samting long graun. Em i narapela kain tru.’ Olgeta dispela samting i kamapim klia olsem ol i gat pasin bilong laikim ol narapela, em man i gat dispela kain pasin ‘em i no save bikhet nabaut o tingting tumas long em yet.’—1 Korin 13:4-8.
2. (a) Pasin bilong yumi long laikim tru ol narapela i mas wok long kamap ples klia moa yet olsem wanem? (b) Bilong bihainim pasin bilong Krais, yumi mas wok long kisim wanem kain pasin?
2 Pasin bilong laikim tru ol brata em i wanpela mak bilong ol Kristen tru. ( Jon 13:35) Taim yumi wok long kamap strong long spirit, yumi lain long kamapim moa yet dispela pasin. Aposel Pol i beten na bai pasin bilong ol wanbilip Kristen long laikim ol narapela i ken “kamap strong moa.” (Filipai 1:9) Aposel Jon i soim olsem yumi mas daunim laik bilong yumi yet na laikim ol narapela. Em i tok: “Jisas i lusim laip bilong em yet na i dai bilong helpim yumi, na dispela pasin bilong en i soim yumi pinis long pasin bilong laikim tru ol arapela. Na yumi tu yumi mas lusim laip bilong yumi bilong helpim ol Kristen brata.” (1 Jon 3:16; Jon 15:12, 13) Olsem wanem? Yumi redi long givim laip bilong yumi yet bilong helpim ol brata? Ating yumi no gat wok long i dai bilong helpim narapela, tasol olsem wanem? Yumi save wok strong tru bilong helpim ol long nau, maski dispela i putim hevi liklik long yumi?
3. (a) Long wanem rot yumi ken kamapim moa yet pasin bilong laikim tru ol narapela? (b) Bilong wanem em i bikpela samting long yumi mas laikim tru ol brata long nau?
3 Tru, ol samting yumi mekim i mas soim olsem yumi gat pasin bilong daunim laik bilong yumi yet, na tu, yumi mas i gat pasin bilong laikim tru ol brata. Baibel i tok: “Yupela i mas givim bel bilong yupela long ol arapela manmeri bilong God.” (Rom 12:10) Yumi olgeta i save laikim sampela manmeri. Tasol olsem wanem? Yumi inap laikim tru sampela brata moa? Pasin bilong dispela graun i laik pinis, olsem na em i bikpela samting long yumi mas pas gut moa wantaim ol wanbilip Kristen. Baibel i tok: “Taim bilong olgeta samting i laik pinis em i klostu nau. . . . Yupela i mas holim strong pasin bilong laikim tru ol arapela manmeri bilong God, long wanem, pasin bilong laikim tru ol arapela, em i save karamapim planti sin.”—1 Pita 4:7, 8.
Taim Ol Hevi i Kamap
4. (a) Bilong wanem ol hevi inap kamap namel long ol brata sista insait long kongrigesen? (b) Ating sampela taim yumi no laik bihainim tok bilong Baibel, tasol wanem gutpela samting bai kamap sapos yumi bihainim?
4 Tasol yumi stap sinman yet, olsem na sampela taim bai yumi mekim ol samting i bagarapim bel bilong ol narapela. Ol brata bilong yumi tu inap mekim kain kain samting i rongim yumi. (1 Jon 1:8) Sapos kain samting olsem i kamap long yu, yu mas mekim wanem? Baibel i soim rot long yumi, tasol ating sampela tok bilong en i pait wantaim ol samting yumi ol sinman i laik mekim. (Rom 7:21-23) Tasol pasin bilong yumi long wok strong long bihainim tok bilong Baibel bai soim olsem yumi gat laik tru long bihainim tok bilong Jehova. Taim yumi mekim olsem, pasin bilong yumi long laikim ol narapela bai i kamap gutpela moa.
5. Sapos wanpela man i mekim yumi bel hevi, bilong wanem yumi no ken bekim?
5 Taim ol man i bel hevi long samting narapela i mekim long ol, sampela i save painim rot bilong bekim pasin nogut bilong dispela man. Tasol dispela bai mekim na hevi i go bikpela moa. Sapos i gat wok long bekim pe nogut, yumi mas larim God i mekim. (Sindaun 24:29; Rom 12:17-21) Sampela ol i no laik toktok moa wantaim man i rongim ol, tasol yumi no ken mekim olsem long ol wanlotu. Bilong God i ken orait long ol pasin yumi mekim bilong lotuim em, yumi mas laikim tru ol brata bilong yumi. (1 Jon 4:20) Olsem na Pol i tok: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” (Kolosi 3:13) Yu inap mekim olsem?
6. (a) Hamas taim yumi mas lusim rong bilong brata bilong yumi? (b) Yumi mas save long wanem samting na dispela bai helpim yumi taim brata i rongim yumi?
6 Olsem wanem sapos planti taim wanpela man i rongim yumi, tasol em i no mekim bikpela rong kongrigesen inap rausim em long en? Long ol liklik rong olsem, aposel Pita i tok yumi mas lusim dispela kain rong inap “7-pela taim.” Tasol Jisas i tok: “Mi no tok long yu mas lusim rong bilong en inap 7-pela taim tasol. Nogat. Mi tok, yu mas lusim inap 70 taims 7-pela taim.” Jisas i kamapim klia olsem yumi rongim God planti taim, winim tru ol rong narapela man i mekim long yumi. (Matyu 18:21-35) Long olgeta de yumi mekim kain kain rong long God—yumi tingim tumas laik bilong yumi yet, o yumi mekim tok kranki o tingting kranki, o yumi no mekim sampela samting yumi mas mekim—na ating yumi no save yumi bin mekim pasin i no stret. (Rom 3:23) Tasol God i wok long marimari long yumi. (Song 103:10-14; 130:3, 4) Em i tok yumi mas mekim wankain pasin long ol narapela man. (Matyu 6:14, 15; Efesus 4:1-3) Taim yumi mekim olsem yumi bihainim dispela pasin bilong laikim tru ol narapela i ‘no save tingim rong narapela i mekim.’—1 Korin 13:4, 5; 1 Pita 3:8, 9.
7. Yumi mas mekim wanem sapos wanpela brata i gat tok long yumi?
7 Tasol ating sampela taim yumi no gat tok long brata, tasol yumi pilim olsem em i gat tok long yumi. Yumi ken larim ‘pasin bilong laikim tru narapela i karamapim dispela,’ olsem 1 Pita 4:8 i tokim yumi long mekim. O yumi ken go pas na toktok wantaim em na traim long kamap wanbel gen wantaim em.—Matyu 5:23, 24.
8. Sapos wanpela wanbilip i mekim sampela samting yumi bel hevi long en, yumi inap mekim wanem?
8 Tasol ating wanpela brata i mekim sampela samting yu bel hevi long en, na ol narapela tu i bel hevi long en. Yu ting i gutpela long toktok wantaim em long dispela samting? Ating olsem. Sapos yu yet i toktok wantaim em long gutpela pasin, ating gutpela samting bai kamap. Tasol pastaim askim yu yet: ‘Em i mekim sampela samting i no stret wantaim tok bilong Baibel? O mi bel hevi, long wanem, pasin bilong ples, famili na skul bilong mi i narapela kain long em?’ Yu no ken kamapim sampela lo bilong yu yet na skelim ol brata long dispela. ( Jems 4:11, 12) Jehova i save laikim ol man bilong kain kain ples na sindaun, na em i save isi long ol na wetim ol i kamap strong long spirit.
9. (a) Sapos wanpela insait long kongrigesen i mekim bikpela rong, husat i mas stretim? (b) Long wanem taim man em narapela i bin rongim, em yet i mas kirap long stretim hevi? Em i gat wanem laik taim em i mekim olsem?
9 Sapos wanpela long kongrigesen i mekim bikpela rong, olsem pasin pamuk, orait ol i mas stretim hariap. Husat i mas stretim? Ol elda. ( Jems 5:14, 15) Tasol sapos wanpela i rongim narapela long samting bilong wok bisnis o em i mekim tok i bagarapim o nogutim tru nem bilong narapela, orait pastaim brata yet i mas i go toktok wantaim dispela brata o sista i bin rongim em. (Matyu 18:15) Sapos dispela i no stretim hevi, brata i mas mekim sampela narapela samting, olsem Matyu 18:16, 17 i kamapim. Pasin bilong laikim tru brata i bin mekim rong na laik bilong yumi long “kisim bek” em bai helpim yumi long stretim dispela hevi long gutpela pasin em bai pilim long bel.—Sindaun 16:23.
10. Taim hevi i kamap, wanem samting bai helpim yumi long kisim stretpela tingting long dispela?
10 Taim hevi i kamap, maski em i bikpela o liklik hevi, em bai helpim yumi sapos yumi traim long kisim tingting bilong Jehova long dispela samting. Em i no orait long sin, maski em i wanem kain sin, na long taim em yet i makim em bai rausim long oganaisesen bilong em ol man i save mekim bikpela rong na i no tanim bel. Tasol yumi no ken lusim tingting olsem yumi olgeta i save mekim sin na God i mas isi na marimari long yumi. Olsem na Jehova i stap olsem gutpela piksa yumi mas bihainim taim narapela i rongim yumi. Taim yumi marimari long narapela, yumi bihainim pasin bilong em long laikim tru ol narapela.—Efesus 5:1, 2.
Painim Rot Bilong Mekim “Moa Yet”
11. Bilong wanem Pol i kirapim ol Korin long givim bel “moa yet” long ol narapela?
11 Aposel Pol i stap planti mun long Korin, Grik, bilong strongim kongrigesen. Em i wok strong long helpim ol brata long Korin, na em i laikim ol tru. Tasol sampela ol i no laikim em tumas. Ol i toktok planti long ol samting em i mekim. Em i kirapim ol long givim bel “moa yet” long ol narapela. (2 Korin 6:11-13; 12:15) Gutpela sapos yumi olgeta i skelim pasin bilong yumi long laikim tru ol narapela na painim rot bilong mekim moa yet.—1 Jon 3:14.
12. Yumi ken mekim wanem na bai yumi ken laikim olgeta long kongrigesen?
12 Olsem wanem? I gat sampela long kongrigesen yumi save hatwok long pren gut wantaim ol? Sapos yumi wok strong long lusim tingting long ol liklik pasin kranki bilong ol—olsem yumi laik bai ol i mekim long yumi—dispela inap helpim yumi long pren gut wantaim ol. Na sapos yumi wok long tingim ol gutpela pasin bilong ol, dispela tu inap helpim yumi long pren gut wantaim ol. Dispela samting bai helpim yumi long laikim ol moa yet.—Luk 6:32, 33, 36.
13. Yumi ken mekim wanem bilong laikim moa yet ol brata sista long kongrigesen bilong yumi?
13 Tru, yumi no inap mekim gut long olgeta man. Ating yumi no inap tok gude long olgeta brata sista long olgeta miting. Yumi no inap singautim olgeta man taim yumi singautim ol pren i kam kaikai wantaim yumi. Tasol olsem wanem? Yumi inap mekim moa gutpela pasin pren na lusim sampela minit bilong toktok gut wantaim sampela long kongrigesen? O sampela taim yumi inap singautim wanpela yumi no save gut long em long wok wantaim yumi long wok autim tok?
14. Taim yumi bung wantaim ol brata yumi no save long ol, yumi ken mekim wanem bilong soim olsem yumi laikim tru ol brata?
14 Long ol kibung Kristen yumi inap kamapim moa yet pasin bilong laikim tru ol narapela. Ating planti tausen i kam bung. Tru, yumi no inap sekanim olgeta, tasol yumi ken mekim gutpela pasin i soim olsem yumi tingim ol na yumi no tingim tumas laik bilong yumi yet. Na long belo samting yumi ken sekanim sampela na toktok wantaim ol. Bihain olgeta manmeri i stap long graun ol bai i stap olsem ol brata sista, na bai ol i wanbel long lotuim God tru na Papa bilong olgeta man. Bai yumi amamas tru long kisim save long olgeta wan wan! Pasin bilong laikim tru ol narapela bai kirapim yumi long mekim olsem. Gutpela sapos nau yumi kirap mekim olsem, a?
Stori Gen Long Ol Dispela Tok
• Taim ol hevi i kamap namel long ol Kristen, ol i mas stretim olsem wanem? Bilong wanem ol i mas mekim olsem?
• Taim yumi wok long kamap strong long spirit, yumi mas mekim wanem bilong kamapim moa yet pasin bilong laikim tru ol narapela?
• Yumi ken mekim wanem bilong soim olsem yumi laikim ol narapela brata tu, na yumi no laikim tasol ol brata yumi pren gut wantaim ol?
[Piksa long pes 148]
Pasin Kristen bilong laikim tru ol narapela i kamap klia long planti rot, olsem long ol miting bilong kongrigesen