Yumi Inap Kirap Bek Long Matmat!

SAPOS yumi dai, yu ting God i gat laik long kirapim bek yumi, olsem givim laip gen long yumi?— Gutpela man Jop i bilip olsem God i laik mekim olsem. Olsem na taim Jop i ting em bai i dai, em i tokim God: “Bai yu singautim mi na bai mi lusim dispela ples na kam long yu.” Jop i tok Jehova bai i gat bikpela laik tru long kirapim em bek long matmat.​—Jop 14:​14, 15.

Jisas i olsem Papa bilong em, God Jehova. Jisas i laik helpim yumi. Taim wanpela man i gat sik lepra i tokim Jisas olsem, “sapos yu laik, yu inap long mekim mi i kamap klin,” Jisas i tok: “Mi laik.” Na em i oraitim sik lepra bilong dispela man.​—Mak 1:​40-​42.

Jisas i lain long Papa bilong em long pasin bilong laikim ol pikinini. Long bipo tru, inap tupela taim Jehova i bin yusim ol wokman bilong em long kirapim bek ol pikinini. Elaija i bin askim Jehova long kirapim bek pikinini man bilong wanpela meri i bin mekim gut long em. Na Jehova i bin mekim olsem. Jehova i bin yusim Elisa tu bilong kirapim bek wanpela liklik mangi.​—1 King 17:​17-​24; 2 King 4:​32-​37.

Ating yu amamas tru long save olsem Jehova i laikim tru yumi, a?— Em i no save tingim yumi long taim yumi stap laip tasol, nogat. Em bai tingim tu yumi sapos yumi dai. Jisas i tok, long tingting bilong Papa bilong em, olgeta daiman husat Em i laikim, i olsem ol i stap laip yet! (Luk 20:38) Baibel i tok dai o laip o samting nau i stap o samting bai i kamap bihain i no inap long tekewe yumi long pasin laikim bilong God.​—Rom 8:​38, 39.

Taim Jisas i stap long graun, em i soim olsem Jehova i save tingim tru ol liklik pikinini. Ating yu inap tingim olsem Jisas i bin lusim haptaim long toktok wantaim ol pikinini long God. Tasol yu bin save olsem God i bin givim strong long Jisas long kirapim bek ol pikinini i dai pinis?— Yumi ken stori long Jisas i bin kirapim bek wanpela pikinini meri i gat 12-pela krismas, em pikinini bilong wanpela man nem bilong em Jairus.

Jairus i stap wantaim meri bilong em na dispela wanpela pikinini bilong ol klostu long raunwara Galili. Wanpela taim dispela pikinini meri i sik nogut tru, na Jairus inap luksave olsem em bai i dai. Jairus i tingim Jisas, dispela gutpela man em i bin harim olsem em inap oraitim ol man. Olsem na Jairus i go painim em. Em i painim Jisas long raunwara Galili we em i wok long skulim planti manmeri.

Jairus i wokabaut namel long bikpela lain manmeri na i go kamap long Jisas na brukim skru long lek bilong em. Em i tokim Jisas olsem: ‘Liklik pikinini meri bilong mi i sik nogut tru. Plis, inap yu kam na helpim em? Plis, yu mas kam.’ Kwiktaim Jisas i go wantaim Jairus. Ol manmeri i bin kam long lukim Bikpela Tisa, ol tu i bihainim ol. Tasol taim ol i go inap longpela hap pinis, sampela man long haus bilong Jairus i kam na tok: “Pikinini bilong yu i dai pinis. Maski givim hevi moa long tisa.”

Jisas i harim ol i mekim dispela tok. Em i save olsem Jairus i bel hevi tru long dispela wanpela pikinini bilong em i dai pinis. Olsem na em i tokim Jairus: ‘Yu no ken pret. Yu mas bilip tasol long God, na pikinini bilong yu bai i orait.’ Ol i wokabaut i go yet inap long ol i kamap long haus bilong Jairus. Ol pren bilong famili bilong Jairus ol i krai i stap. Ol i bel hevi, long wanem, liklik pren bilong ol i dai pinis. Tasol Jisas i tokim ol: ‘Yupela i no ken krai. Dispela pikinini em i no i dai. Em i slip tasol.’

Taim Jisas i tok olsem, ol manmeri i lap, long wanem, ol i save dispela liklik meri i dai pinis. Yu ting i gat wanem as na Jisas i tok dispela liklik meri i slip?— Yu ting em i laik skulim ol man long wanem samting?— Em i laik bai ol i save olsem dai i olsem man i slip. Em i laik skulim ol olsem long strong bilong God em inap kirapim bek ol man i dai pinis, wankain olsem yumi inap kirapim ol man i slip.

Jisas i tokim ol arapela long lusim haus na i go ausait, tasol ol aposel bilong em, Pita, Jems, na Jon, na papa na mama bilong pikinini, ol i ken stap. Em i go insait long rum pikinini i slip long en. Em i holim han bilong pikinini na tok: ‘Liklik meri, yu kirap’! Na wantu tasol em i kirap na wokabaut! Papa na mama bilong em i amamas nogut tru.​—Mak 5:​21-​24, 35-​43; Luk 8:​40-​42, 49-​56.

Orait tingim dispela samting. Jisas i bin helpim dispela yangpela meri long kisim laip gen. Yu ting em inap mekim olsem long ol arapela tu?— Yu ting tru tru em bai mekim olsem?— Yes, em bai mekim. Jisas yet i bin tok: “Taim i laik kamap na olgeta manmeri i stap long matmat ol bai i harim maus bilong [mi], na ol bai i lusim matmat na i kam ausait.”​—Jon 5:​28, 29.

Yu ting Jisas i laik kirapim bek ol man?— Narapela stori long Baibel i helpim yumi long bekim dispela askim. Samting i bin kamap klostu long taun Nain i kamapim tingting bilong Jisas long ol man i krai sori long taim bilong planim man.

Wanpela meri i wokabaut wantaim lain i lusim taun Nain na i karim bodi bilong pikinini man bilong em. Sampela taim paslain long dispela, man bilong em i bin i dai, na nau dispela wanpela pikinini tasol bilong em i dai. Em i bel hevi tru! Planti manmeri bilong Nain i bihainim ol i go taim ol man i karim bodi bilong pikinini i go ausait long taun. Meri i wok long krai, na i no gat wanpela samting ol man inap mekim bilong mekim gut bel bilong em.

Long dispela de, Jisas na ol disaipel bilong em i wokabaut i kam long taun Nain. Klostu long dua bilong banis bilong taun, ol i bungim dispela lain i go bilong planim pikinini bilong dispela meri. Taim Jisas i lukim meri ya i krai, em i sori nogut tru long em. Em i pilim tru bikpela bel hevi bilong em. Em i laik helpim dispela meri.

Olsem na long pasin isi, tasol long nek i strong liklik bilong mekim meri i putim yau, em i tok: “Yu no ken krai.” Samting em i mekim i kirapim olgeta long lukluk long em. Taim Jisas i wokabaut i go long bodi bilong pikinini, ating olgeta i laik save long wanem samting em bai mekim. Jisas i tok: “Yangpela man, mi tokim yu, yu kirap.” Wantu tasol man ya i kirap sindaun! Na em i kirap long toktok.​—Luk 7:​11-​17.

Tingim bikpela amamas bilong dispela meri! Yu bai pilim olsem wanem sapos wanpela yu laikim tumas em i kirap bek long matmat?— Dispela i soim olsem Jisas i laikim tru ol man na em i laik helpim ol, a?— Tingim bikpela amamas bilong bungim na tok amamas long ol manmeri i kirap bek long nupela taim God bai kamapim!​—2 Pita 3:​13; KTH 21:​3, 4.

Long dispela taim, sampela bilong ol lain i kirap bek em ol manmeri na ol pikinini tu em yumi save long ol. Yumi bai save long ol, wankain olsem Jairus i save long pikinini bilong em taim Jisas i kirapim em bek. Sampela em ol manmeri i bin i dai planti handet o tausen yia i go pinis. Tasol God bai i no lusim tingting long ol, maski ol i bin stap long bipo tru.

Yumi amamas long save olsem God Jehova na Pikinini bilong em, Jisas, ol i laikim tru yumi, a?— Ol i laik bai yumi stap laip, i no long sampela yia tasol, nogat, ol i laik bai yumi stap inap oltaim oltaim!