Gutpela Samting Bai Painim Famili na Ol Pren Bilong Yu i Dai Pinis

1-3. Wanem birua i wok long ronim yumi olgeta? Bilong wanem pasin bilong skelim tok bilong Baibel inap givim bel isi long yumi?

TINGIM olsem yu wok long ranawe long wanpela birua nogut. Em i strong tru na em inap ran hariap, winim yu. Yu save em i no man bilong marimari, long wanem, yu bin lukim em i kilim i dai sampela pren bilong yu. Maski yu ran strong tru bilong lusim em, em i wok long i kam klostu moa long yu. I luk olsem yu no gat rot. Tasol yu kirap nogut long wanpela man i kam sambai long yu. Strong bilong em i winim tru strong bilong birua bilong yu, na em i tok promis long em bai helpim yu. Dispela i givim bikpela bel isi long yu!

² Na i gat wanpela kain birua olsem i wok long ronim yu. Em i mekim olsem long yumi olgeta. Olsem yumi kisim save long en long sapta i kamap paslain long dispela, Baibel i kolim dai olsem birua. I no gat wanpela bilong yumi inap ranawe long en. Planti bilong yumi i lukim dispela birua i kisim laip bilong sampela man yumi laikim ol tru. Tasol Jehova i gat bikpela strong, winim tru strong bilong dai. Em i gutpela Man Bilong Helpim yumi na em i soim pinis olsem em inap daunim dispela birua. Na em i tok promis long em bai pinisim tru dispela birua, em dai. Baibel i tok: “Em i pinisim pinis olgeta arapela birua, orait em bai i pinisim dai tu.” (1 Korin 15:26) Dispela em i wanpela gutpela tok tru!

³ Orait pastaim yumi ken stori long yumi save pilim olsem wanem taim dai i painim wanpela yumi save long em. Dispela bai helpim yumi long kliagut long wanpela samting bilong mekim yumi stap amamas. Jehova i tok promis olsem ol man i dai pinis ol bai stap laip gen. (Aisaia 26:19) Ol bai kirap bek. Dispela tok promis i mekim na yumi gat gutpela samting bilong wetim i kamap.

 4. (a) Olsem wanem bel hevi Jisas i pilim taim wanpela em i laikim tumas i dai i ken lainim yumi long tingting bilong Jehova long dispela samting? (b) Jisas i kamap gutpela pren bilong husat?

⁴ Olsem wanem? Wanpela yu laikim tru em i dai pinis? Ating bel hevi bilong dispela i hatwok tru long karim na yu pilim olsem yu no inap mekim wanpela samting. Long kain taim olsem, yumi mas skelim tok bilong Baibel bilong mekim gut bel bilong yumi. (2 Korin 1:​3, 4) Baibel i helpim yumi long save Jehova na Jisas i ting olsem wanem long dai. Jisas, em i kamapim stret pasin bilong Papa bilong em, em yet i pilim pinis bikpela bel hevi man i kisim taim wanpela i dai. (Jon 14:9) Taim Jisas i stap long Jerusalem, em i save go lukim Lasarus na ol susa bilong em, Maria na Marta, em ol i sindaun long wanpela taun klostu, em Betani. Ol i kamap gutpela pren bilong Jisas. Baibel i tok: “Jisas i laikim tumas Marta wantaim susa bilong en na Lasarus.” (Jon 11:5) Tasol Lasarus i dai, olsem yumi kisim save long en long sapta i kamap paslain long dispela.

5, 6. (a) Jisas i mekim wanem taim em i stap wantaim famili na ol pren bilong Lasarus i krai sori? (b) Bilong wanem bel hevi bilong Jisas i strongim bel bilong yumi?

⁵ Jisas i pilim olsem wanem taim pren bilong em i dai? Baibel i tok Jisas i go bung wantaim ol wanblut na pren bilong Lasarus taim ol i krai sori. Taim Jisas i lukim ol, em i pilim tru dispela hevi. “Bel bilong en i sori tru na em tu i laik krai.” Na olsem Baibel i tok, “Jisas i krai.” (Jon 11:​33, 35) Olsem wanem? Bel hevi bilong Jisas i makim olsem em i no ting gutpela samting inap kamap? Nogat. Jisas i save wanpela gutpela samting i laik kamap. (Jon 11:​3, 4) Tasol maski i olsem, em i pilim bikpela bel hevi dai i save kamapim.

⁶ Yumi ken tok, bel hevi bilong Jisas i strongim bel bilong yumi. Em i soim olsem Jisas na Papa bilong em, Jehova, ol i nolaik tru long ol man i dai. Tasol God Jehova inap pait na daunim dispela birua! Nau yumi ken lukim samting God i givim strong long Jisas long mekim.

7, 8. Bilong wanem ol man inap ting gutpela samting i no inap painim Lasarus? Jisas i mekim wanem?

⁷ Ol i planim Lasarus long hul bilong ston, na Jisas i askim ol long rausim ston i pasim hul. Marta i no laik ol i mekim olsem, long wanem, bodi bilong Lasarus i bin stap inap 4-pela de long matmat na i kirap long sting. (Jon 11:39) Long tingting bilong ol man, gutpela samting i no inap kamap.

⁸ Ol i rausim ston, na Jisas i singaut strong olsem: “Lasarus, yu kam ausait.” Wanem samting i kamap? “Lasarus i kirap bek na i kam ausait.” (Jon 11:​43, 44) Olsem wanem? Yu inap piksaim long tingting amamas bilong ol man i stap long dispela hap? Maski Lasarus em i brata, wanblut, pren, o neiba bilong ol, ol i save em i dai pinis. Tasol em i stap​—dispela seim man ol i laikim​—em i sanap namel long ol. Ating ol i hatwok long bilipim dispela. Planti ol i amamas na holimpas Lasarus. Jisas i daunim tru strong bilong dai!

9, 10. (a) Olsem wanem Jisas i kamapim klia husat i As bilong strong bilong em long kirapim bek Lasarus? (b) Taim yumi ritim ol stori bilong Baibel long ol man i kirap bek, olsem wanem dispela i helpim yumi?

⁹ Jisas i no tok em i bin mekim dispela narakain mirakel long strong bilong em yet. Long beten em i mekim paslain long em i singaut long Lasarus, em i kamapim klia olsem Jehova em i As bilong kirapim bek ol man i dai pinis. (Jon 11:​41, 42) Dispela i no namba wan taim Jehova i yusim strong bilong em long kirapim bek man. Kirap bek bilong Lasarus em i wanpela bilong 9-pela mirakel bilong kirap bek em Baibel i stori long en.a Bai yu amamas tru long ritim na skelim ol dispela stori. Ol dispela stori i lainim yumi olsem God i save mekim wankain pasin long olgeta. Em i bin kirapim bek ol yangpela na lapun, ol man na meri, man bilong lain Israel na bilong narapela lain. Na ol dispela stori i kamapim bikpela amamas ol man i bin pilim! Olsem: Taim Jisas i kirapim bek wanpela yangpela meri i dai pinis, papamama bilong em i amamas nogut tru. (Mak 5:42) Tru tumas, Jehova i mekim na ol i kisim wanpela kain amamas ol i no inap lusim tingting long en.

¹⁰ Tru, ol man Jisas i bin kirapim bek bihain ol i dai gen. Yu ting dispela i makim olsem i no gat as na Jisas i bin kirapim bek ol? I no olsem. Ol dispela stori bilong Baibel i strongim sampela bikpela tok i tru na i helpim yumi long wetim ol gutpela samting.

11. Olsem wanem stori bilong kirap bek bilong Lasarus i strongim tok i tru i stap long Saveman 9:5?

¹¹ Baibel i lainim yumi olsem ol man i dai pinis “ol i no inap save long wanpela samting.” Ol i no stap laip na ol i no gat tingting. Stori bilong Lasarus i kamapim klia dispela. Olsem wanem? Taim Lasarus i kirap bek, em i amamasim ol man na stori long ol samting bilong heven? O em i pretim ol long ol stori nogut long hel em i ples paia? Nogat. Baibel i no tok Lasarus i bin mekim ol kain tok olsem. Insait long dispela 4-pela de em i bin slip long matmat, em i “no inap save long wanpela samting.” (Saveman 9:5) Lasarus i slip i stap tasol long matmat.​—Jon 11:11.

12. Bilong wanem yumi ken bilip olsem Lasarus i bin kirap bek tru?

¹² Stori bilong Lasarus i lainim yumi tu olsem kirap bek em i samting tru, na i no wanpela stori nating tasol. Jisas i kirapim bek Lasarus long ai bilong planti manmeri. Ol bikman bilong lotu husat i nolaik tru long Jisas, ol tu i no inap tok olsem Jisas i no bin wokim dispela mirakel. Ol i tok: “Bai yumi mekim wanem? Dispela man [Jisas] i save wokim planti mirakel.” (Jon 11:47) Planti man i go lukim dispela man i bin kirap bek. Olsem na planti man moa i bilip long Jisas. Ol i luksave olsem samting i painim Lasarus i kamapim klia olsem God i bin salim Jisas i kam. Dispela samting i mekim na sampela bikman bilong lotu Juda ol i toktok long kilim i dai Jisas na Lasarus.​—Jon 11:53; 12:​9-11.

13. I gat wanem as na yumi ken bilip tru olsem Jehova inap kirapim bek ol man i dai pinis?

¹³ Yu ting i gat as na yumi ken bilip olsem kirap bek em i samting tru? Yes i gat as, long wanem, Jisas i tok wanpela taim bai kamap na “olgeta manmeri i stap long matmat” ol bai kirap bek. (Jon 5:28) Jehova em i Man Bilong Wokim olgeta samting i gat laip. Yu ting i hatwok long bilip olsem em inap givim laip gen long ol man? Tru, bilong mekim olsem ol i mas stap long tingting bilong Jehova. Yu ting em inap tingim famili na ol pren bilong yumi i dai pinis? Planti trilion trilion sta i stap long ples antap, tasol God i save long nem bilong olgeta wan wan! (Aisaia 40:26) Olsem na God Jehova inap tingim olgeta samting bilong famili na ol pren bilong yumi i dai pinis, na em inap givim laip gen long ol.

14, 15. Olsem tok bilong Jop i makim, Jehova i ting olsem wanem long wok bilong kirapim bek ol man i dai pinis?

¹⁴ Tasol Jehova i ting olsem wanem long wok bilong kirapim bek ol man i dai pinis? Baibel i tok em i gat laik tru long mekim olsem. Gutpela man Jop i mekim dispela askim: “Sapos wanpela man i dai, em inap kisim laip gen?” Jop i toktok long em bai wet long matmat i go inap long taim God i tingim em. Em i tokim Jehova: “Bai yu singautim mi, na bai mi bekim tok long yu. Bai yu gat bikpela laik tru long ol samting yu bin wokim.”​—Jop 14:​13-15, NW.

¹⁵ Tingim dispela! Jehova i gat bikpela laik tru long kirapim bek ol man i dai pinis. Em i gutpela samting tru long save olsem Jehova i gat dispela kain laik, a? Tasol long kirap bek bai kamap long bihain, husat bai kirap bek, na ol bai kirap bek we?

16. Ol man i dai pinis ol bai kirap bek na stap long wanem kain ples?

¹⁶ Ol stori bilong Baibel long ol manmeri i bin kirap bek i lainim yumi long planti samting bilong kirap bek bai kamap long bihain. Ol dispela manmeri i bin kisim laip gen hia long graun na ol i stap gen wantaim famili na ol pren bilong ol. Kirap bek i kamap bihain em i klostu wankain​—tasol em bai gutpela moa. Olsem yumi lainim long Sapta 3, God bai mekim dispela graun olgeta i kamap wanpela paradais. Olsem na ol man i dai pinis ol bai no kirap bek long graun i pulap long woa, pasin raskol, na ol sik. Ol bai inap i stap oltaim long dispela graun i gat bel isi na amamas long en.

17. Hamas manmeri bai kirap bek?

¹⁷ Husat ol bai kirap bek? Jisas i tok “olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Kamapim Tok Hait 20:13 tu i tok: “Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go.” “Ples bilong ol man i dai pinis” i makim matmat. (Lukim Apendiks, pes 212-13.) Olgeta man i stap long matmat ol bai kam ausait. Olgeta dispela bilion bilion manmeri i slip long en ol bai kisim laip gen. Aposel Pol i tok: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Wanem mining bilong dispela tok?

18. Husat em “ol stretpela manmeri” em ol bai kirap bek? Bilip bilong kirap bek inap mekim wanem long yu?

¹⁸ Planti bilong “ol stretpela man” em ol manmeri yumi ritim stori bilong ol long Baibel em ol i bin stap taim Jisas i no kam daun yet long graun. Ating yu tingim Noa, Abraham, Sara, Moses, Rut, Esta, na planti narapela. Hibru sapta 11 i stori long sampela bilong ol dispela man na meri i gat strongpela bilip. Tasol “ol stretpela man” i makim tu ol wokman bilong Jehova i dai long taim bilong yumi. Bilip bilong kirap bek i mekim na yumi no pret long dai.​—Hibru 2:15.

19. Husat em ol “man nogut”? Jehova i opim wanem rot long ol?

¹⁹ Olsem wanem long ol manmeri husat i no bin mekim wok bilong Jehova o bihainim tok bilong em, long wanem, ol i no bin save long em? Jehova bai no lusim tingting long ol dispela planti bilion “man nogut.” Ol tu bai kirap bek na ol bai inap kisim save long trupela God na mekim wok bilong em. Insait long wan tausen yia, ol man i dai pinis ol bai kirap bek na ol i gat rot long mekim wok bilong Jehova wantaim ol arapela man i stap gut long em. Em bai gutpela taim tru. Baibel i kolim dispela haptaim olsem de God i makim bilong kotim ol manmeri.b

20. Gehena em i wanem samting? Husat i go long en?

²⁰ Olsem wanem? Dispela i makim olsem olgeta man husat i bin stap laip ol bai kirap bek? Nogat. Baibel i tok sampela man i dai pinis ol i stap long Gehena, em Buk Baibel i tanim olsem “hel.” (Luk 12:5) Gehena i kisim nem bilong en long ples pipia i stap ausait long Jerusalem bilong bipo. Ol i bin kukim ol pipia na bodi bilong ol man i dai pinis long dispela hap. Ol i tromoi bodi bilong ol man em ol Juda i ting ol i no gutpela man inap long ol man i planim ol long matmat na long God i kirapim bek ol long bihain. Olsem na Gehena i makim samting i pinis olgeta. Jisas i gat wok long kotim ol man i stap laip na ol man i dai pinis, tasol Jehova em i nambawan Jas. (Aposel 10:42) Em bai no kirapim bek ol man em i skelim olsem ol i man nogut tru na i no laik senisim pasin bilong ol.

21, 22. (a) I gat wanem narapela kirap bek? (b) Husat em i namba wan man long kirap bek olsem spirit?

²¹ Baibel i tok tu long narapela kirap bek, em kirap bek olsem spirit long heven. Baibel i gat wanpela stori tasol long dispela kain kirap bek, em kirap bek bilong Jisas Krais.

²² Bihain long ol i kilim i dai Jisas, Jehova i no larim gutpela Pikinini bilong Em i stap long matmat. (Song 16:10; Aposel 13:34, 35) God i kirapim bek Jisas, tasol em i no stap moa olsem wanpela man. Aposel Pita i tok Krais i “stap man, na ol i kilim em i dai, tasol em i kirap bek na em i stap spirit.” (1 Pita 3:18) Dispela em i wanpela bikpela mirakel tru. Jisas i stap laip gen olsem wanpela strongpela spirit! (1 Korin 15:​3-6) Jisas em i namba wan man long kisim dispela kain gutpela kirap bek. (Jon 3:13) Tasol em i no laspela man long kirap bek olsem.

23, 24. “Liklik lain sipsip” i makim husat? Ol i hamas?

²³ Jisas i save olsem i no longtaim na em bai go bek long heven, olsem na em i tokim ol gutpela disaipel bilong em olsem em bai “redim ples” bilong ol long heven. (Jon 14:2) Jisas i kolim lain i go long heven olsem “liklik lain sipsip.” (Luk 12:32) Hamas manmeri i insait long dispela liklik lain Kristen? Long Kamapim Tok Hait 14:1 aposel Jon i tok: “Mi lukluk gen, na mi lukim Pikinini Sipsip i sanap long maunten Saion, na 144,000 manmeri i sanap wantaim em. Nem bilong Pikinini Sipsip na nem bilong Papa bilong en, dispela nem God i bin raitim long pes bilong ol.”

²⁴ Ol dispela 144,000 Kristen, em ol gutpela aposel bilong Jisas i insait long dispela lain, ol i kirap bek na kisim laip long heven. Kirap bek bilong ol i kamap long wanem taim? Aposel Pol i tok dispela samting bai kamap long taim Krais i kam i stap pinis. (1 Korin 15:23) Olsem yu bai kisim save long en long Sapta 9, nau yumi stap long dispela taim. Olsem na ol manmeri bilong lain 144,000 husat i stap yet long graun na i dai long taim bilong yumi, ol bai kirap bek wantu na kisim laip long heven. (1 Korin 15:​51-55) Tasol bikpela lain manmeri bai kirap bek long bihain na kisim laip long Paradais long graun.

25. Sapta i kamap bihain long dispela bai skelim wanem samting?

²⁵ Yes, Jehova bai daunim tru birua bilong yumi, em dai, na em bai pinis olgeta! (Aisaia 25:8) Tasol ating yu tingting, ‘Ol manmeri i kirap bek na kisim laip long heven ol bai mekim wanem?’ Ol bai insait long wanpela gutpela gavman long heven. Bai yumi kisim sampela save moa long dispela gavman long sapta i kamap bihain long dispela.