Maria i No Marit Yet na Em i Kisim Bel

Nau Maria i kisim bel inap 4-pela mun pinis. Taim em i bin kisim bel nupela yet, em i go lukim wanblut bilong em Elisabet long ol ples maunten bilong Judia long hap saut. Tasol nau em i go bek long ples bilong em long Nasaret. I no longtaim, na ol man bai luksave olsem em i kisim bel. Tingim, dispela bai givim bikpela hevi long em!

Samting i nogut moa em olsem, Maria i bin pasim tok long maritim Josep, em wanpela kapenta long dispela hap. Na Maria i save long Lo God i bin givim long ol Israel, olsem meri husat i pasim tok long maritim wanpela man, tasol bihain em i mekim pasin pamuk, orait ol i mas tromoi ston long em na kilim em i dai. (Lo 22:23, 24) Maria i no mekim pasin pamuk, tasol em i tingting planti long hau em bai stori long Josep olsem em i kisim bel, na Josep bai gat wanem tingting long dispela.

Maria i stap wantaim wanblut bilong en Elisabet inap 3-pela mun, olsem na yumi ken ting Josep i laik tru long lukim em. Taim Maria i bungim Josep, ating em i tokim em olsem em i kisim bel, na em i stori gut olsem dispela samting i kamap long rot bilong holi spirit bilong God. Maski i olsem, yumi ken ting olsem i hatwok long Josep i kliagut long tok bilong Maria na bilipim.

Josep i save olsem Maria i gutpela meri na em i gat gutnem. Na em i laikim tru Maria. Tasol i luk olsem long tingting bilong Josep, Maria i kisim bel long narapela man. Maski i olsem, Josep i no laik bai ol man i semim Maria o tromoi ston long em na kilim em i dai, olsem na Josep i tingting long divos long em long pasin hait. Long dispela taim, sapos man na meri i pasim tok long marit, orait long ai bilong ol arapela i olsem ol i marit pinis. Olsem na sapos ol i laik brukim promis ol i mekim bilong marit, ol i mas divos.

Josep i tingting yet long ol dispela samting na em i slip. Tasol ensel bilong Jehova i kamap long em long rot bilong driman na i tok: “Yu no ken pret long kisim meri bilong yu Maria i go long haus. Em i kisim bel long rot bilong holi spirit. Em bai karim wanpela pikinini man, na yu mas kolim em Jisas, long wanem, em bai kisim bek lain bilong en long ol sin bilong ol.”—Matyu 1:20, 21.

Taim Josep i kirap long moning, em i amamas, long wanem, nau em i kliagut long samting i kamap! Kwiktaim em i mekim olsem ensel i tok. Em i kisim Maria i go long haus bilong em. Dispela samting em i mekim long ai bilong ol man i makim olsem tupela i marit. Tasol Josep i no slip wantaim Maria i go inap long taim em i karim Jisas.

Sampela mun bihain, Josep na Maria i redi long lusim ples bilong ol long Nasaret na i go long narapela hap. Long dispela taim, bel bilong Maria i go bikpela, na klostu nau em bai i karim pikinini. Long kain taim olsem, ol i laik go long we?