HAP FAIV
“Kam Bek Long Wasman Bilong Sipsip, Em Man i Save Lukautim Laip Bilong Yupela”
Olsem wanem? Ol hevi yumi stori long en long dispela buklet i bin painim yu? Planti bilipman bilong God long taim bilong ol man i raitim Baibel na long nau tu i bungim ol wankain hevi olsem bilong yu. Tasol Jehova i bin helpim ol long karim ol dispela hevi, olsem na em bai helpim yu tu.
Jehova bai amamas tru taim yu kam bek long em
YU KEN bilip tru olsem Jehova bai helpim yu sapos yu kam bek long em. Em bai helpim yu long karim ol hevi, mekim gut bel bilong yu, maus bilong bel i no kotim yu, na bai yu stap bel isi. Na dispela bai kirapim yu long mekim gen wok bilong Jehova wantaim ol wanbilip bilong yu. Hevi bilong yu i wankain long hevi i painim ol Kristen long taim bilong ol aposel. Olsem na aposel Pol i tok: “Yupela i olsem ol sipsip i lus nabaut, tasol nau yupela i kam bek long wasman bilong sipsip, em man i save lukautim laip bilong yupela.”—1 Pita 2:25.
Nambawan samting yu ken mekim em long kam bek long Jehova. Bilong wanem yumi tok olsem? Long wanem, dispela bai mekim Jehova i bel gut tru. (Sindaun 27:11) Jehova i save pilim ol samting long bel, olsem na ol disisen bilong yumi inap amamasim em o mekim em i bel hevi. Tasol em i no save fosim yumi long laikim na lotuim em. (Lo 30:19, 20) Wanpela saveman bilong Baibel i tok: “I no gat man i save long tingting tru i stap long bel bilong yu. Olsem na yu yet i mas skelim gut ol samting yu tingting long en.” Sapos yumi laikim tru Jehova na lotuim em, em bai helpim yumi long save gut long tingting tru bilong yumi. Taim yumi mekim olsem, yumi givim gutpela presen tru long God, em pasin bilong yumi long pas gut wantaim em na dispela i givim bikpela amamas long em. Na tu, yumi yet bai amamas long lotuim Jehova.—Aposel 20:35; Revelesen 4:11.
Taim yu go gen long ol miting Kristen, God bai inapim laik bilong yu long kisim save long em. (Matyu 5:3) Wai na yumi tok olsem? Planti man i gat dispela askim, ‘Yumi stap bilong mekim wanem?’ Ol i laik tru long kisim bekim bilong ol askim long yumi stap bilong mekim wanem. Olgeta man i gat dispela laik, long wanem, taim Jehova i wokim ol em i putim dispela tingting long ol. Olsem na taim yumi mekim wok bilong God, yumi yet i stap amamas. Yumi kisim bikpela amamas, long wanem, yumi laikim Jehova na yumi lotuim em.—Song 63:1-5.
I gutpela yu tingim olsem Jehova i laik bai yu kam bek long em. Bilong wanem yumi tok olsem? Tingim: Taim mipela i redim dispela buklet, mipela i beten na skelim gut ol tok. Na ating wanpela elda o wanbilip i kirapim yu long ritim dispela buklet. Na taim yu ritim ol tok bilong en, dispela i kirapim yu long mekim sampela senis. Dispela i kamapim klia olsem Jehova i no lusim tingting long yu, na em i singautim yu long kam bek long em.—Jon 6:44.
Yumi stap bel isi taim yumi kisim save olsem Jehova i tingim ol wokman bilong em i lusim em. Donna em wanpela sista i luksave long dispela, na em i tok: “Isi isi mi lusim tok i tru, tasol planti taim mi tingim tok bilong Song 139:23, 24, em i tok: ‘God, skelim mi gut na bai yu save long olgeta tingting i stap long bel bilong mi. Traim mi, na bai yu save gut long olgeta tingting bilong mi. Skelim mi gut, nogut sampela tok giaman i stap long tingting bilong mi. Na yu mas bringim mi long rot bilong kisim laip bilong i stap gut oltaim oltaim.’ Mi save olsem mi no ken bihainim pasin bilong ol man bilong dispela graun. Na tu, mi mas pas gut wantaim oganaisesen bilong Jehova. Mi luksave olsem Jehova i no lusim mi, mi yet i mas painim rot bilong go bek long Em. Na mi amamas tru long mi mekim olsem!”
“Mi luksave olsem Jehova i no lusim mi, mi yet i mas painim rot bilong go bek long em. Na mi amamas tru long mi mekim olsem!”
Mipela i beten olsem yu tu bai pilim ‘amamas bilong Bikpela.’ (Nehemia 8:10) Na bai yu amamas tru olsem yu bin kam bek long Jehova.