STADI 11

Givim Bel Long Mekim Tok

Rom 12:11

OL BIKPELA TOK: Givim bel long mekim tok na dispela bai mekim na ol man bai i gat laik long harim tok bilong yu.

Pilim tru long bel tok yu bai mekim. Taim yu redim tok bilong yu, yu mas tingim gut olsem wanem tok bilong yu i bikpela samting. Yu mas kisim save gut long samting yu laik stori long en, na bai yu inap long pilim tru long bel ol tok yu bai kamapim.
Tingim ol man i harim tok bilong yu. Tingim tingim long bel olsem wanem tok yu laik ritim o skulim ol man bai helpim ol. Skelim gut ol rot em yu ken kamapim tok we ol man bai pilim tru ol gutpela samting bilong dispela tok.
Kamapim pasin bilong givim bel taim yu mekim tok. Givim bel tru taim yu mekim tok. Wokim han na pes bilong kamapim olsem yu pilim tru long bel tok yu mekim.

Was gut na bai yu no pulim tingting bilong ol man i harim tok bilong yu long rot bilong wokim han planti taim. Wokim han taim i stret long mekim. Taim yu kamapim ol bikpela tok, givim bel na mekim na kirapim ol man i harim tok long mekim samting. No ken kolim olgeta tok long pasin olsem bel bilong yu i kirap tru i go inap long pinis bilong tok, ol man bai les.