12 KALEP
Em i Stap Gut Long God Bilong Em
LONG dispela taim Moses i bin ranawe lusim Isip, tupela marit Israel em ol i wokboi nating i kamapim wanpela pikinini man, nem bilong em Kalep. Dispela pikinini i kamap bikpela na em tu i kamap wokboi nating. Em i stap na lukim lain Israel i lusim kalabus na kamap fri. Kalep i gat 40 krismas samting taim Moses i kam bek long Isip—Jehova i salim em i go bilong helpim ol manmeri bilong Em, lain Israel, long lusim kalabus bilong Isip. Ating Kalep i bin amamas tru long lukim Jehova i soim bikpela strong bilong em long rot bilong 10-pela bikpela hevi, long brukim Solwara Retsi i go tupela hap na kisim bek lain bilong Em long ol Isip.
Kalep i no inap lusim tingting long ol dispela samting i bin kamap we i strongim bilip bilong em. Sampela mun bihain taim ol i kamap long Maunten Sainai, planti Israel i no bilip moa long Jehova na ol i bikhet long em, tasol Kalep i stap gut long Em. I no longtaim bihain, Kalep i kisim wanpela bikpela wok: long go wantaim Josua na 10-pela narapela hetman bilong Israel, bilong spai long Graun Bilong Promis.
Dispela 12-pela man i strongim bel na go insait long Graun Bilong Promis. Ol i stap 40 de na spai long ol taun, ol manmeri, na ol kaikai samting bilong dispela kantri. Ol i kisim sampela kaikai i go bek na tu ol i kisim ol rop wain i gat planti greip, olsem na tupela man i mas karim. Tasol taim ol dispela man i tokim ol Israel long ol samting ol i bin lukim, ating Kalep i mas bel hevi long harim tok ol dispela 10-pela narapela spai i mekim. Baibel i tok: “Ol dispela man i wok long givim ol ripot nogut long ol manmeri bilong Israel.” Ol i komplein olsem ol Kenan i traipela man na ol i gat bikpela strong na ol Israel i no inap daunim ol. Na ol i tok tu olsem ol Kenan i tumbuna pikinini bilong ol Nefilim, tasol tok bilong ol i no stret bikos ol Nefilim i dai long taim bilong Bikpela Tait. Olgeta manmeri i bel hevi, na sampela i toktok long makim nupela lida bilong kisim ol i go bek long Isip.
Kalep na Josua i no lusim bilip bilong ol long Jehova. Ol i traim long strongim ol manmeri em bilip bilong ol i no strong, ol i tok: “Jehova i stap wantaim yumi. Olsem na yupela i no ken pret long ol.” Tasol dispela i skrapim bel bilong ol dispela Israel em bilip bilong ol i no strong. Na ol i toktok long stonim Kalep na Josua na kilim tupela i dai!
Jehova i bel hevi tru. Jehova i bin mekim planti samting bilong helpim ol manmeri bilong em long lusim kalabus long strongpela kantri Isip, tasol nau, hariap tru ol i no bilip moa long em. Maski olsem, God i lukim pasin bilong Kalep na Josua long bilip na strongim bel. Jehova i tok: “Wokman bilong mi, Kalep, em i gat narakain tingting na long bel olgeta em i save bihainim tok bilong mi.” Jehova i tok olsem olgeta Israel husat i no bilip long em bai dai long ples nating.a Tasol Kalep na Josua wantaim sampela narapela bai stap laip i go inap ol i lapun na go insait long Graun Bilong Promis.
Kalep i stap gut long Jehova maski ol narapela Israel i no gat bilip i no mekim olsem na ol i laik kilim em i dai
Insait long dispela 40 yia lain Israel i bin raun long ples nating, Kalep i wok yet long soim olsem em i gat strongpela bilip na strongpela bel. Em i sapotim gut Moses, na bihain long taim Moses i dai em i sapotim gut Josua, taim Jehova i tokim Josua long bringim lain bilong Em i go brukim Wara Jordan na go insait long Graun Bilong Promis. Na maski Kalep i lapun, em i strongim bel na pait long ol birua bilong God long Kenan.
Sikspela yia bihain long lain bilong God i brukim Wara Jordan, ol i pait na kisim pinis planti hap bilong Graun Bilong Promis. Bihain, taim i kamap long Kalep long makim hap graun em i laik sindaun long en. Em i makim Hebron, em ples we 10-pela spai i tok ol i no inap pait na kisim bikos ol traipela man bilong pait i stap long hap. Maski Kalep i gat 85 krismas, em i bilip olsem Jehova bai helpim em, em i tok: “Jehova bai stap wantaim mi na mi bai rausim ol olsem Jehova i bin tok promis.” Na dispela samting i kamap. Kalep i pait na kisim dispela taun, na sindaun long en. Bihain long dispela, Baibel i tok: “Na i no gat pait moa i kamap long dispela graun.”
Planti yia paslain, Moses i bin tokim Kalep: “Yu bin givim bel olgeta long bihainim tok bilong Jehova, God bilong mi.” Yumi save olsem Kalep i wok yet long mekim olsem i go inap long taim em i dai. Na em bai mekim olsem gen taim Jehova i kirapim em bek long Paradais long bihain!
Ritim dispela stori bilong Baibel:
Bilong skelim:
Long wanem ol rot Kalep i soim olsem em i gat strongpela bel?
Mekim Wok Painimaut
1. Tru tru ol greip long Graun Bilong Promis i bikpela tru olsem Namba 13:23 i stori long en? (w06 6/15 16 par. 1-2)
2. Tru tru Graun Bilong Promis i pulap long planti “milk na hani,” olsem Kalep na Josua i tok? (Nam. 14:8; w11 3/1 15) A
Institute of Archaeology/Hebrew University © Tel Rehov Excavations
Piksa A: Ol haus bilong ol bi ol i wokim long graun long Israel bilong yia 1000 B.C.E i go long kirap bilong yia 900 B.C.E.
3. Taim ol Israel i stap long Kades na Moses i salim 12-pela man bilong spai i go, ol Israel i stap klostu olsem wanem long Graun Bilong Promis? (w04 10/15 17 par. 11-12) B
Piksa B
4. Jehova i givim wanem gutpela pe long Kalep long pasin bilong em long bilip na strongim bel? (w06 10/1 18 par. 11)
Tingim Skul Yu Lainim
Kalep i gat strongpela bilip, tasol em i mas raun wantaim olgeta Israel long ples nating. Maski i olsem, em i daunim em yet na wok yet long trastim Jehova. Long wanem sampela hevi i kamap we yumi inap bihainim eksampel bilong Kalep?
Olsem wanem eksampel bilong Kalep i helpim yumi long sakim pasin bilong bihainim tok bilong “planti manmeri?” (Kis. 23:2) C
Piksa C
Long wanem ol narapela rot yu inap bihainim pasin bilong Kalep long strongim bel?
Tingim Tingim Long Bel Ol Bikpela Tok
Dispela stori i skulim mi olsem wanem long Jehova?
Olsem wanem dispela stori i stret wantaim samting Jehova i tingting pinis long mekim long ol manmeri na long graun?
Taim Kalep i kirap bek mi laik givim wanem askim long em?
Kisim Sampela Save Moa
Skelim hau bilip bilong Kalep i wok gut wantaim pasin bilong em long strongim bel.
“Strongim Bel Long Rot Bilong Bilip na Pret Long God” (w06 10/1 16-19 par. 1-12)
Wai na lapun Kalep i gat 85 krismas i mekim dispela tok: “Mi bin givim bel olgeta long bihainim tok bilong Jehova, God bilong mi”? (Jos. 14:8)
a Tok bilong Jehova i no makim ol Livai na ol narapela Israel em krismas bilong ol i aninit long 20 long dispela taim.—Nam. 14:29.