Kingdom Bilong God ‘i Kam’​—long Wanem Taim?

 1. (a) Bilong wanem yumi mas “tingim na wetim i stap” pinis bilong dispela taim nau? (b) Yumi mas mekim wanem na bai yumi ‘amamas long dispela wok na yumi mekim’? Na yumi ken save long wanem samting?

TASOL wanem taim ol samting bai kamap olsem ol dispela tok promis bilong Kingdom i makim? Sampela brata sista ol i bin mekim wok bilong Jehova inap 20 o 30 o 40 o moa yia, na ating ol i pilim olsem “pinis” i no kamap kwik. Tasol yumi mas tingim tok bilong profet Habakak, em i tok: “Sapos em i no kamap kwik, yu mas tingim na wetim i stap; long wanem, em bai kamap tru. Em i no ken i kam bihaintaim.” (Habakak 2:3) Tru, yumi no save long “dispela de na dispela aua” taim bilong “bikpela hevi tru” bai kirap, tasol em i no bikpela samting. Bikpela samting em olsem: Yumi gat wok yumi mas mekim na yumi mas ‘amamas long dispela wok na yumi mekim.’ Yumi mas wok strong long autim gutpela tok bilong dispela kingdom i kamap pinis long heven. Na yumi ken save, taim yumi autim tok inap pinis olsem Jehova i laikim, orait, long dispela taim tasol “bai las de i kamap.”—Matyu 24:14, 21, 36, NT; Rom 11:13.

 2. (a) I gat wanem samting yumi mas tingim long ol taim Jehova i makim? (b) Wanem taim “las taim” bilong ol Juda i kirap? Wanem samting i kamap na dispela “las taim” i kirap?

² I gat wanpela samting yumi mas tingim long ol taim Jehova i makim, em olsem: God i bin tokaut pastaim long taim tupela bikpela taim bilong ol man bai kirap. Wanem dispela tupela taim? Em tupela taim bilong kot. Namba wan em “las de o las taim” bilong ol lo na pasin samting ol Juda i bin kamapim. Dispela taim i kirap taim Jisas i bin kisim baptais na God i makim em i Mesaia o Krais. (Joel 1:15; 2:28-32; Aposel 2:17, NT) Inap 500 yia paslain long dispela taim, long maus bilong profet Danyel, God i makim yia 29 CE olsem taim bilong “las taim” bilong ol Juda i mas kirap. Olsem wanem em i makim?

“Las Taim” Bilong Ol Juda

 3, 4. (a) Wanem dispela taim bilong “seventi wik”? Wanem taim dispela taim i kirap? Wanem taim em i pinis? (b) Wanem ol bikpela samting i kamap laspela “wik”?

³ Danyel 9:24-27 i stori long wanpela bilong “seventi wik,” em ol dispela “wik i no olsem 490 de; nogat; i olsem 490 yia. Dispela taim bilong “seventi wik” i kirap “taim ol i putim tok long stretim na wokim gen Jerusalem.”a Wanem taim dispela samting i kamap? Long Niemaia 2:1-7 Baibel i tok, “long namba twenti yia bilong Atakseksis em i king” bilong Pesia, king yet i tokim bosboi bilong wain, em wanpela Juda nem bilong em Niemaia, em i mas go bek long biktaun bilong ol tumbuna bilong em na “wokim gen.”Ol buk bilong ol man i stori long ol samting i bin kamap long bipo, ol i makim yia 455 BCE em i “namba twenti yia long Atakseksis em i king.” Sapos yumi skruim 490 yia moa long dispela yia, yumi kamap long yia 36 CE. Danyel i tok, laspela wik bilong dispela “seventi wik” em i bikpela taim. Dispela laspela “wik” em i 7-pela yia, kirap long yia 29 CE na pinis long yia 36 CE. Olsem wanem na dispela taim em i bikpela taim?

⁴ Long wanem “taim ol i putim tok long stretim na wokim gen Jerusalem inap long taim Hetman Mesaia i kam, em inap olsem 7-pela wik, na 62 wik.” Olsem na Mesaia o Krais i mas kam long kirap bilong namba 70 wik. Taim em i kam, “las taim” bilong ol Juda i kirap, na inap 7-pela yia em i mas truim kontrak bilong Ebraham wantaim ol Juda ol i bilip long em. “Long hap bilong dispela wik” o 7-pela yia, olsem long yia 33 CE, bai ol i “kilim”i dai Mesaia o Krais. Em i givim bikpela ofa bilong tekewe sin, olsem na ol sakrifais na ofa lo bilong Isrel i makim i “tekewe” o i pinis; i no gat wok moa long ol dispela ofa.—Hibru 10:12, 18.

 5. (a) Olsem wanem yumi ken save, ol Juda i save gut long dispela taim bilong “seventi wik”? (b) Olsem wanem na ol samting i no kamap olsem ol Juda i ting i mas kamap? (c) Tasol ol samting i kamap tru olsem Danyel i tok profet o nogat?

⁵ Ol Juda i save long dispela taim bilong “seventi wik,” long wanem Luk i tok, long dispela taim tingting bilong ol “i kirap strong, na olgeta ol i tingting nabaut long bel bilong ol olsem, ‘Ating Jon em i Krais o nogat?’” (Luk 3:15, NT) Olsem na yumi save ol i wetim Krais i kam. Tasol ol i wetim wanpela man i kam em i gat biknem tru long graun na em i stap king na em bai go paslain long ol na helpim ol long winim pait na daunim ol man i bosim ol, em ol Rom. Ol i no bilip olsem Mesaia o Krais i mas i dai long yia 33 CE. Na ol i no bilip long tok bilong profet Danyel i tok, Jerusalem wantaim lain bilong en ol i mas ‘bagarap.’ Tasol olgeta samting i kamap olsem Danyel i tok pinis. Long yia 70 CE ol ami bilong Rom aninit long Jeneral Taitas ol i bagarapim Jerusalem!

“Las Taim” Bilong Olgeta Hap-Wanem Taim?

 6. Jehova i tokaut pastaim long wanem narapela taim tu? Na long dispela yia wanem taim i kirap?

⁶ Orait, wanem dispela narapela taim bilong kot Jehova i bin mekim pasin marimari na tokaut pastaim long en? Em “las taim” bilong olgeta samting Seten i bin kamapim long graun. (2 Timoti 3:1-5, NT) Dispela taim bilong “planti hevi nogut tru” i kirap long yia 1914 CE.

 7, 8. (a) Kirap long 1880 na i kam inap long nau, ol manmeri i givim bel long lainim tok bilong Baibel ol i ting olsem wanem long dispela yia 1914? (b) Sampela man ol i gat save long dispela samting ol tu i tok wanem long yia 1914?

⁷ Inap 34 yia paslain long yia 1914 ol man bilong lainim tok bilong Baibel ol i wetim dispela yia i kamap. Kirap long yia 1880, planti taim Wastaua (tok Inglis) i tokaut long dispela bikpela yia bai kamap. Nau, 69 yia bihain long yia 1914, yumi tingim ol samting i bin kamap long dispela yia na yumi save, em i bikpela yia tru. Planti narapela man tu i tok, 1914 em i bikpela yia. Wanpela man em i gat save long dispela samting em i tok, long yia 1914 “pasin bilong ol man i senis na i kamap narapela kain; pasin bilong bipo i dai pinis.”b Na wanpela man i tok, yia 1914 i kirapim “taim bilong nau, na olgeta manmeri i save … taim dispela taim i pinis ating olgeta manmeri bai bagarap.”

⁸ Inap 50 samting yia bihain long 1914, wanpela man bilong mekim wok gavman long Jemani, em Konrad Adenauer, em i tok: ‘Mi tingting bek long taim bipo … mi tingim gutpela taim i stap paslain long yia 1914, em taim bilong bel isi na i no gat samting bilong bagarapim sindaun bilong ol man. Long dispela taim bipo, mipela i no save pret. Tasol bihain long 1914 dispela gutpela taim i pinis olgeta long graun.’ Na long yia 1980, wanpela man bilong mekim wok gavman long Englan, em Harold Macmillan, em i winim 86 krismas na em i tingim ol samting i bin kamap taim em i stap laip long graun, em i tok: ‘Bipo [long taim bilong Kwin Viktoria] ol man i ting olgeta samting bai kamap gutpela gutpela tasol. Mama i karim mi long dispela taim. Tasol wantu , long wanpela taim ol man i no tingim, long wanpela moningtaim long yia 1914, dispela gutpela taim i pinis.’

 9. (a) Ol manmeri bilong lainim tok bilong Baibel, olsem wanem na paslain long yia 1914 ol i save dispela yia em i bikpela yia? (b) Wanem insait bilong ol tok bilong Danyel sapta 4 na ol i gat dispela tingting?

⁹ Ol manmeri i givim bel long lainim tok bilong Baibel, em Ol Witnes Bilong Jehova, olsem wanem na 34 yia paslain ol inap save bikpela senis bai kamap long yia 1914? Long wanem “wokboi i gat gutpela tingting, na i save lukaut gut long wok bilong en” (Matyu 24:45-47, NT), em ol Kristen spirit holi i mekim wok bilong Bikpela bilong ol, Krais Jisas, ol i ‘bilip strong long tok bilong ol profet,’ olsem 2 Pita 1:19 i tok. Ol i lukim tok profet bilong Danyel sapta 4 na ol i save, taim ol birua i daunim lain kain bilong Jerusalem, em lain bilong King Devit, long yia 607 BCE, dispela samting i no pinisim wok king bilong Jehova long graun inap oltaim. Nogat. Dispela “diwai” i makim wok king bilong Jehova em i mas kru gen. Danyel i tok “7-pela yia,” em dispela 7-pela yia i makim bikpela hap taim inap olsem 2,520 yia, i mas lus pastaim, em taim bilong “ol arapela lain” long bosim graun, na bihain bai olgeta man i save “Nambawan Bikpela em i Bos insait long kingdom bilong ol man, na long laik bilong em yet em i givim dispela kingdom long wanpela man, na em i kisim dispela man i gat pasin daun, i no gat narapela man i gat pasin daun olsem, na em i putim em i bos bilong dispela kingdom.”—Danyel 4:14-17.

10. Taim Krais i kam long 1914, olsem wanem i narapela kain long taim em i kam long pastaim?

¹⁰ Dispela “man i gat pasin daun” pastaim em i kam olsem Mesaia o Krais na ol man i kilim em i dai, em i kam bek long dispela bikpela yia 1914. Tasol taim Krais i kam bek ol man i no inap lukim em. Em i spirit na em i kisim biknem bilong heven. Em i kam olsem king na ol ensel i kam wantaim em na em “sindaun long sia king bilong en.”—Danyel 9:26; Matyu 25:31, NT.

Lain Bilong 1914

11. (a) Ol manmeri bilong wanem “taim” ol i no ken “i dai pinis” na bai ol samting i kamap olsem Jisas i tok long en? (b) Ol manmeri bilong “dispela taim” ol i stap yet bai ol inap lukim wanem samting i kamap?

¹¹ Taim Krais i kam bek i stap olsem king (parousia), ai bilong ol man i no inap lukim em. Tasol ol manmeri i stap long taim bilong yia 1914 ol inap lukim ol samting i kamap long graun i makim Krais i kam bek pinis i stap na “pen” i mas painim ol manmeri! (Matyu 24:8, NT) Sampela manmeri bilong dispela taim, olsem lain bilong 1914, ol i stap yet na ol i save stori yet long ol samting i bin kamap long yia 1914. Sampela bai wok long toktok long dispela samting i go inap long taim “bikpela hevi tru” i kirap na pinisim olgeta samting nogut Seten i bin kamapim long dispela graun. Long wanem Krais Jisas yet i tok: “Mi tok tru long yupela: Ol manmeri bilong dispela taim [ol manmeri i lukim taim bilong “pen” i kirap long 1914] ol i no i dai pinis yet, na bai dispela olgeta samting i kamap. Skai wantaim graun bambai i pinis, tasol tok bilong mi bai i no pinis.”—Matyu 24:3, 8, 34, 35, NT.

12. (a) Wanem ol samting i kirap long kamap long yia 1914 na yumi ken save, ol samting i kamap tru olsem tok profet bilong Baibel i makim? (b) Tasol wanem as tru bilong bilip bilong yumi?(c) Dispela “gutnius” i stori long wanem samting?

¹² Ol hevi Baibel i tok bai kirap long yia 1914, wantu tasol i kamap na ol manmeri i kirap nogut. Na ol dispela hevi i stap yet! Ol i olsem “mak” na yumi ken save tru, long yia 1914 taim bilong pinis bilong dispela pasin bilong nau em i kirap. Tasol yumi no save tingim wanpela de o yia na yumi bilip. Nogat. Dispela samting i no as bilong bilip bilong yumi. Yumi bilip long olgeta tok bilong God, na long dispela “gutnius” Jisas na ol disaipel i bin autim long pastaim na long ol samting i kamap tru olsem ol tok profet bilong Baibel i makim bilong taim bilong yumi na i makim dispela lain olsem “gutpela wokboi” na ol poroman bilong ol. Dispela “gutnius bilong kingdom,” em olgeta tok bilong Baibel, em i as bilong bilip bilong yumi. Yumi bilip long ol dispela tok i stori long krais Jisas, em Pikinini Bilong God, na God i bin salim em i kam long graun bilong baim bek ol man, na nau em i stap king pinis long kingdom bilong heven. (Matyu 24:3, 14, 45-47, NT; 25:31-33; Revelesen 19:10) Yumi bilip, olsem na yumi inap save olsem wanem dispela kingdom bai kam bilong kisim bek olgeta manmeri i laikim tumas stretpela pasin na ol i bihainim stretpela pasin. Kingdom bai kam olsem wanem bilong mekim dispela wok?

[Ol Futnot]

[Blok long pes 20]

“SEVENTI WIK” (Danyel 9:24-27)

KIRAP long taim king bilong Pesia i “putim tok” long Niemaia long yia 456 B.C.E.

455 - 1 B.C.E. = 454 yia

1 B.C.E. - 1 C.E. = 1 yia

1 C.E. - 36 C.E. = 35 yia

455 B.C.E. - 36 C.E. = 490 yia

Ol i kilim Mesaia long “hap bilong dispela wik,” long Epril 33 C.E.

I GO INAP long taim God lusim lain Juda long 36 C.E. na lain bilong Konilias i tanim bel

[Blok long pes 21]

TAIM BILONG “OL ARAPELA LAIN” (Danyel 4:14-25; Luk 21:24-26)

Taim bilong ol arapela lain i kirap long 607 B.C.E. na “pasim” Wok King bilong Jehova

“7-PELA YIA” = 7x360 = 2,520 yia

(Lukim Revelesen 12:6, 14; Esikiel 4:6 namba tu hap)

607 - 1 B.C.E. = 606 yia

1 B.C.E. - 1 C.E. = 1 yia

1 C.E. - 1914 C.E. = 1,913 yia

607 B.C.E. - 1914 C.E. = 2,520 yia

Wok King Bilong Jehova i kirap gen long Kingdom bilong Krais long 1914