Bringim Ol Nupela Man long Oganaisesen Bilong God
“Givim bel bilong yupela long ol Kristen brata.”—1 PITA 2:17.
1, 2. Ol tisa Kristen i mas lainim ol man long ol bikpela as tok bilong Baibel, tasol ol i mas lainim ol long wanem samting moa?
TISA i gat wok long givim save long man. Tasol gutpela tisa i save lainim man long gutpela pasin tu. Em i helpim sumatin long save, ol tok em i lainim i bikpela samting olsem wanem, na em i soim rot long sumatin bambai em i ken bihainim ol dispela tok. Tisa Kristen i mas mekim tru dispela wok. Em i mas lainim ol man long “tok tru bilong God.” (Rom 1:25) Tasol em i no ken givim save tasol long ol long ol bikpela as tok bilong Baibel. Nogat. Baibel i tok yumi mas lainim ol tu long i stap aninit long Jehova, na mekim gutpela pasin, na yumi mas givim gutpela tingting long ol.—Sam 34:11; 119:66.
2 Na Jisas i kolim sampela samting moa yumi mas lainim ol man long en, em i tok: “Yupela i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” (Matyu 28:19, 20) Wanpela tok bilong dispela “olgeta tok” Jisas i bin givim long yumi, em olsem: Yumi mas autim tok long olgeta hap bilong graun. Olsem na yumi mas lainim ol disaipel long bihainim dispela tok tu. (Matyu 24:14) Na i gat narapela samting yumi mas helpim ol Baibel-stadi bilong yumi long save long en. Em wanem samting? Orait, nau yumi ken skelim ol wok aposel Pol i bin mekim na bai yumi inap save.
Pol i Kamapim Ol Kongrigesen
3. Taim Pol i lainim ol nupela man long Korin, em i mekim wanem?
3 Namba wan taim Pol i go autim tok long Korin, ol Juda i birua long em, tasol planti man i harim tok. Pol i no wok tasol long lainim ol dispela nupela man wan wan. Nogat. Baibel i tok: “Pol i lusim dispela haus lotu [bilong ol Juda], na i go long haus bilong wanpela man, nem bilong en Tisias Jastas. Dispela man i save lotu long God. Na haus bilong em i stap klostu tru long haus lotu bilong ol Juda.” (Aposel 18:7) Dispela haus i kamap olsem ples bilong ol nupela disaipel i ken bung long en na lotu wantaim. Kwiktaim Pol i bungim ol i kamap wanpela kongrigesen.—1 Korin 1:2.
4. Pol i kirap lainim ol man long Efesas na kwiktaim wanem samting i kamap?
4 Bihain Pol i go long Efesas na wankain samting i kamap. Pol i go “long olgeta haus” na lainim ol man wan wan. (Aposel 20:20) Tasol kwiktaim em i stretim rot bambai ol dispela nupela disaipel i ken bung wantaim. Pol i “lusim ol [Juda] na i kisim ol Kristen i go wantaim em. Na long olgeta de em i autim tok insait long haus skul bilong Tiranas.” (Aposel 19:9) Kwiktaim dispela liklik lain Kristen i kamap wanpela kongrigesen na i gat ol elda bilong en.—Aposel 20:17, 18.
5. Ol tisa Kristen bilong pastaim ol i kirapim ol nupela man long mekim wanem?
5 Tru tumas, long taim bilong ol aposel ol i no save larim ol nupela disaipel i stap ol yet tasol. Nogat. Ol i save bungim ol wantaim olsem wanpela kongrigesen. Ol dispela kongrigesen i amamas long kisim ol tok bilong strongim ol em i kam long lain bilong bosim ol Kristen long dispela taim. Ol strongpela brata, olsem Pol na Banabas, ol i lusim bikpela hap taim long lainim ol dispela nupela kongrigesen, na ol i “wok wantaim planti arapela man bilong skulim ol manmeri long tok bilong God na telimautim gutnius bilong Bikpela.” (Aposel 15:30-35) Bilong wanem ol i mekim olsem? Bilong wanem ol i no larim tasol ol dispela nupela disaipel na maus bilong bel bilong ol, em nau tasol ol i lainim, em i ken stiaim tingting bilong ol long stretpela pasin ol i mas bihainim?
Bilong Wanem i Gat Kongrigesen?
6. Bilong wanem ol Kristen bilong pastaim i bung wantaim insait long ol kongrigesen?
6 I gat planti as bilong dispela samting na nau mipela ken stori long sampela. Namba wan em olsem: Taim wanpela man i kamap Kristen, em i no wankain moa olsem ol man bilong dispela graun. (Jon 17:14, 15) Sapos ol narapela Kristen i larim em i stap em yet tasol, bai em i stap wanpis tru. Tasol sapos i gat kongrigesen long hap bilong em na em i ken bung wantaim ol narapela Kristen, ol dispela Kristen inap helpim em long sanap strong na klia long pasin bilong dispela graun. Na Jisas i tok ol disaipel bilong em i mas i stap “wanpela tasol.” (Jon 17:11) Insait long ol kongrigesen ol man inap lukim ol i stap “wanpela tasol.” Na Jisas i tok tu: “Sapos yupela i laikim tru ol brata, orait bambai olgeta man i save, yupela i disaipel bilong mi.” (Jon 13:35) Ol Kristen i mas bung wantaim bambai ol man bilong ausait inap lukim dispela pasin bilong sori i stap namel long ol, em i mak bilong ol Kristen tru. Ol i bung wantaim insait long ol kongrigesen. Insait long ol kongrigesen narapela i sori long narapela na lukautim em long ol samting bilong spirit na bilong skin. (Filipai 2:4) Pol i toktok wantaim Timoti long helpim ol meri man bilong ol i dai pinis, na yumi ken save ol i helpim ol long rot bilong kongrigesen.—1 Timoti 5:3-10.
7. (a) Tok bilong Pol long Hibru 10:24, 25 i bilong mekim wanem? (b) Ol kongrigesen bilong pastaim i gat wanem wok long wok bilong autim tok?
7 Olsem na tok bilong Pol long Hibru 10:24, 25 i bilong strongim ol Kristen long bung wantaim kongrigesen, em i tok: “Yumi mas tingting long ol brata tu, na tingting long kirapim ol long laikim ol manmeri na mekim gutpela pasin. Yumi no ken lusim pasin bilong bung wantaim ol brata, olsem sampela man i save mekim. Nogat. Yupela i save, De bilong Krais em i kam klostu. Olsem na yumi mas wok strong moa long strongim bel bilong ol brata.” Na ol kongrigesen i stretim rot na bosim wok bilong autim dispela gutpela tok bilong Kingdom long taim bilong ol aposel. Ol Kristen i mekim bikpela wok bilong autim tok. (Rom 10:11-15) Olsem na spirit holi i stiaim tingting bilong ol elda long Antiok na ol i salim Pol tupela Banabas i go, olsem misineri, na tupela i autim tok long ol hap ol Kristen i no bin autim tok long en bipo. Na Pol i tingim namba bilong ol elda long Jerusalem long bosim wok na em i bihainim tok bilong ol taim ol i tokim em long ol hap em i mas i go autim tok long en.—Aposel 13:1-3; Galesia 2:8-10.
Ol Kongrigesen long Nau
8, 9. I gat wanem samting na yumi tu mas bringim ol nupela man i kam bung wantaim kongrigesen?
8 Orait, ol dispela samting ol Kristen bilong bipo i mekim i lainim yumi long wanem samting? Olsem : Yumi tu mas bringim ol nupela man i kam bung wantaim kongrigesen. Olsem long taim bilong Pol, olsem tasol long nau, ol man i bihainim lotu Kristen ol i no save stap wanpis. Baibel i toksave olsem: “Man i save stap wanpis, em i save tingting long em yet tasol.” (Provep 18:1) Tasol “man i wokabaut wantaim man i gat gutpela tingting, orait bai em tu i kisim gutpela tingting.” (Provep 13:20) Kongrigesen i save strongim ol nupela man long spirit, na strongim ol long bihainim stretpela pasin, na strongim bel bilong ol. Olsem na ol i mas bung wantaim kongrigesen. Ol i mas pilim sori bilong ol narapela Kristen, na gutpela wok ol elda i mekim. Na ol i mas pilim gutpela pasin bilong wanbel i stap namel long ol brata na i save mekim ol Kristen i amamas.—Sam 133:1.
9 Na long nau tu ol Kristen i save autim tok na ol i no save mekim nabaut; ol kongrigesen i save putim ol bung bilong autim tok na makim ples bilong autim tok samting. (Matyu 24:14) Olsem na taim yumi lainim ol nupela man long wok bilong ol long autim tok, yumi mas bringim ol long kongrigesen na soim ol olsem wanem ol i ken wok gut wantaim kongrigesen long mekim dispela wok.
Bikpela Lain Brata Bilong Ol Narapela Narapela Hap
10. Kolim sampela skripsa i soim yumi ol Kristen bilong pastaim i bilong narapela narapela hap bilong graun, tasol ol i stap wanbel.
10 Pol i bringim ol nupela man long kongrigesen i stap long hap bilong ol, tasol em i tokim ol long samting moa tu. Em i tokim ol Efesas: “I gat wanpela bodi tasol, na i gat wanpela Spirit tasol. Olsem tasol God i singautim yupela bilong yupela i pasim tingting long wetim wanpela samting tasol.” (Efesas 4:4) I gat wanpela “bodi” tasol long olgeta hap bilong graun. I gat ol narapela narapela kongrigesen, tasol ol i no bihainim laik bilong ol yet wan wan. Na Jisas tu i tok long ol manmeri bilong dispela “bodi” ol i stap laip long graun, taim em i tok long wanpela ‘gutpela wokboi’ em bosman bilong em i makim em bilong givim kaikai long “ol arapela wokboi.” (Matyu 24:45-47) Olgeta Kristen wan wan long olgeta hap ol i mas save dispela “wokboi” i gat dispela wok na bai ol i ken kisim kaikai long en. Olsem bai olgeta Kristen bilong ol narapela narapela hap ol i stap olsem wanpela bikpela lain brata.
11. (a) Dispela lain o oganaisesen bilong ol Kristen long olgeta hap, Pita i kolim ol olsem wanem? (b) I gat wanem samting na ol Kristen bilong pastaim i wanbel long bilip? Pol i mekim wanem na yumi save em i bihainim dispela rot bilong stretim ol askim bambai ol i stap wanbel long bilip?
11 Aposel Pita i kolim olgeta Kristen long taim bilong em olsem “ol Kristen brata.” (1 Pita 2:17) Ol i olsem wanpela bikpela lain brata (tok Grik, adelphotes’) i stap long olgeta hap. Ol nupela man i kam insait long kongrigesen i stap long hap bilong ol, na ol i kam insait tu long dispela bikpela kongrigesen o lain brata bilong olgeta hap. Narapela i save long narapela, long wanem i gat ol pas samting i go i kam namel long ol kongrigesen. (Kolosi 4:15, 16) Taim i gat askim long sampela samting bilong bilip, ol Kristen i no bihainim tingting bilong ol yet wan wan. Nogat. Ol i save wetim ol elda long Jerusalem, ol i olsem lain bilong bosim olgeta Kristen long dispela taim bipo, ol i stretim askim na salim tok long ol. (Aposel 15:2, 6-22) Pol yet i save dispela lain i gat wok long stretim ol tok bilong bilip na em i save bihainim tok bilong ol. Krais Jisas yet i bin soim tok i tru long Pol, tasol Pol i save go long dispela lain long Jerusalem na tokim ol long gutnius em i autim, nogut ‘dispela wok nau em i mekim, na bipo tu em i mekim, em i lus nating.’—Galesia 1:11, 12; 2:1, 2, 7-10.
12. 1 gat wanem ol narapela pasin na “ol Kristen brata” i pas gut wantaim?
12 Bilong strongim “ol Kristen brata” long olgeta hap bambai ol i gat wanpela tingting tasol na wanpela wok tasol, ol i save salim sampela wokman Kristen, olsem Timoti na Taitas na Epafrodaitas, i go lukim ol kongrigesen. Na i gat ol pas tu bilong strongim ol, olsem ol pas Pol na Pita na Jems na Jon na Jut i raitim na narapela kongrigesen i givim long narapela kongrigesen. Ol Kristen i stap olsem wanpela bikpela lain brata long olgeta hap, olsem na sampela Kristen i gat planti samting na ol i stap long narapela hap ol i harim tok long hevi i painim ol brata bilong ol long Judia. Na Pol inap soim rot long ol bilong bungim mani na helpim ol dispela brata i sot. Em i mekim dispela wok long rot bilong ol kongrigesen. (1 Korin 16:1-4) Taim ol Kristen i harim tok olsem “ol Kristen brata” bilong ol long olgeta hap ol i bilip na sanap strong, dispela samting i save strongim olgeta wan wan.—1 Pita 5:9.
Tokim Ol Nupela Man long “Ol Kristen Brata” Bilong Olgeta Hap
13. Kolim sampela samting bilong ol brata bilong pastaim i wankain long “ol Kristen brata” long olgeta hap long nau.
13 Olsem wanem? I gat “ol Kristen brata” i stap long olgeta hap long nau na ol i stap olsem wanpela bikpela lain brata? I gat. Na ‘gutpela wokboi’ i stap yet na holim yet wok bilong givim kaikai long “ol arapela wokboi.” (Matyu 24:45-47) Olsem long taim bilong Pol, olsem tasol long nau, i gat wanpela Lain Bilong Bosim ol Kristen ol i olsem maus bilong dispela “wokboi” na ol i lukautim wok bilong autim “dispela gutnius” long olgeta hap bilong graun. Long nau tu i gat ol pas na ol buk na nius samting dispela Lain Bilong Bosim ol Kristen i salim long ol. Dispela samting i strongim ol na ol i stap wanbel olsem ol brata brata long olgeta hap bilong graun. Na i gat ol strongpela tisa tu insait long ol kongrigesen bilong strongim ol na helpim ol i stap wanbel. Olsem na taim man i kisim save long tok i tru em i kam insait long kongrigesen i stap long hap bilong em na em i mas lain tu olsem em i insait long dispela bikpela lain “Kristen brata” i stap long olgeta hap bilong graun. Em wok bilong tisa Kristen long lainim ol Baibel-stadi bilong em long dispela samting. Em i ken mekim olsem wanem?
Helpim Ol Narapela long Laikim Tumas Bikpela Lain Brata i Stap long Olgeta Hap
14. Yu yet yu save bihainim wanem ol gutpela rot bilong tokim ol Baibel-stadi long kongrigesen i stap long hap bilong ol na lain o oganaisesen bilong Jehova i stap long olgeta hap bilong graun?
14 Tisa Kristen i ken tokim Baibel-stadi long kongrigesen na long bikpela lain brata i stap long olgeta hap, na em i ken soim dispela samting long em. Em i ken tokim Baibel-stadi olsem wanem? Sampela gutpela rot ol tisa i gat save pinis ol i bihainim, em olsem: Paslain long stadi o bihain long stadi yu ken stori long kongrigesen na bikpela wok Baibel i makim bilong kongrigesen, na yu ken stori long dispela lain ol i olsem ‘gutpela wokboi’ na wok dispela lain i mekim long nau. Na yu ken stori long Haus Kingdom na ol miting bilong kongrigesen. Toktok wantaim Baibel-stadi long sampela tok yu bin harim long miting. Taim yu beten bilong kirapim stadi o long pinis bilong stadi, kolim sampela tok long kongrigesen na long ol brata i stap long olgeta hap.
15. Yumi ken soim wanem samting long ol man i laik harim tok bambai ol i ken save long kongrigesen na long lain bilong Jehova long olgeta hap?
15 Tasol olsem wanem yu ken soim ol dispela samting long Baibel-stadi? Sampela gutpela rot em olsem : Kwiktaim kisim ol narapela narapela brata sista i go wantaim yu long stadi na bai Baibel-stadi i save long ol na kwiktaim em i gat ol nupela pren. Em bikpela samting, long wanem ol olpela pren bilong em bai lusim em, na em i mas save em i gat planti nupela pren insait long dispela bikpela lain “Kristen brata” i stap long olgeta hap bilong graun. (1 Pita 5:9; Matyu 19:27-29) Wanpela buklet tok Inglis (nem bilong en: Jehovah’s Witnesses in the Twentieth Century) em i gat sampela gutpela piksa long en yumi ken mekim wok long en bilong helpim ol Baibel-stadi long save long oganaisesen bilong ol Witnes Bilong Jehova long nau. Na yumi ken mekim wok long buk Yu Inap i Stap Oltaim long Paradais long Graun. Long sapta 23 i gat ol gutpela piksa bilong sampela ofis bilong Sosaiti, na bilong bikpela kibung, na bilong wanpela miting. Yumi ken mekim wok long dispela bilong lainim ol man long oganaisesen bilong God long nau.
16. (a) Yumi mas mekim kwik wanem samting bilong helpim ol Baibel-stadi bilong yumi? I gat wanem as bilong dispela long Baibel? (b) Wasman sekit o wasman distrik inap helpim ol Baibel-stadi olsem wanem long kam insait long lain bilong God?
16 Na tu, taim Pol i painim pinis sampela man long Efesas ol i laik harim tok, kwiktaim em i kirapim ol miting. Yu tingim? (Aposel 19:9, 10) Em i tokim kongrigesen long Korin, “sapos wanpela man i no bilip, o i no save gut,” em i kam insait long gutpela miting Kristen, “olgeta tok i hait i stap long bel bilong em, dispela bai i kamap ples klia. Na bai em i lindaun long pes bilong en na i litimapim nem bilong God, na i tokaut olsem: ‘Tru tumas, God i stap namel long yupela.’” (1 Korin 14:24, 25) Olsem tasol long nau, sapos kwiktaim Baibel-stadi i kirap bung wantaim kongrigesen, kwiktaim bai em i save tok i tru i stap long wanem lain. Olsem na ol tisa Kristen i save singautim kwik ol Baibel-stadi bilong ol i go long ol miting bilong kongrigesen na long ol kibung. Ol i save go kisim Baibel-stadi, maski em i hatwok, na bringim em i go long miting. Taim wanpela wasman sekit o wasman distrik, olsem Taitas na Epafrodaitas bilong bipo, i kam lukim kongrigesen, ol i save kisim em wantaim meri bilong em i go sekanim ol Baibel-stadi bilong ol, o singautim em i go long stadi wantaim ol.
17. Wanem samting em i bikpela hap wok long wok bilong yumi long lainim ol man na kamapim ol disaipel? (Matyu 28:19, 20) Dispela i save helpim ol Baibel-stadi olsem wanem?
17 Ol manmeri spirit bilong God i bin makim ol, dispela kongrigesen long olgeta hap i olsem “strongpela pos i karim tok tru.” (1 Timoti 3:15) Ol nupela man i mas insait long bikpela lain manmeri ol i gat pasin daun na ol i kam bung wantaim ol dispela manmeri em spirit bilong God i bin makim ol, na bai dispela ‘kongrigesen’ i ken i stap olsem “strongpela pos” bilong strongim ol. (Sekaraia 8:23) Long nau ol dispela man i gat pasin daun ol i stap olsem wanpela bikpela lain brata long olgeta hap bilong graun na ol inap olsem 2 milion hap samting. Ol i bilip long tok i tru, olsem na ol i mas insait long dispela bikpela lain brata bilong olgeta hap. Taim ol i insait long en, dispela i strongim ol na ol i mekim wankain gutpela pasin long ol brata.(Hibru 13:1)Long dispela rot bai ol i insait tu long bikpela lain manmeri bilong olgeta skin na tok ples ol bai winim taim bilong bikpela hevi tru na i stap oltaim wantaim ol brata bilong ol. (Revelesen 7:9-17) Olsem na yu mas lainim ol Baibel-stadi bilong yu long ol tok i tru bilong Baibel, tasol yu mas lainim ol tu long oganaisesen bilong Jehova. Yu mas bringim ol i kam long oganaisesen bilong God na lainim ol long laikim tumas olgeta “Kristen brata” i stap long olgeta hap bilong graun.—1 Pita 2:17.
Yu Tingim?
◻ Pol i mekim wanem long ol nupela disaipel long Efesas na Korin?
◻ Long dispela rot Pol i helpim ol nupela man olsem wanem?
◻ Yumi mas lainim ol Baibel-stadi long ol bikpela as tok bilong Baibel, tasol yumi mas lainim ol long wanem samting moa?
◻ I gat wanem ol rot bilong mekim olsem?
Pinisim “Pasin Longlong Bilong Ol Man”
Dean Rusk, bipo em i Seketeri bilong Stet long gavman bilong Amerika, em i tok: “Taim yumi no bagarapim yet ples antap long pasin longlong bilong ol man, gutpela sapos yumi toktok wantaim na wok long painim rot bambai yumi no ken mekim dispela samting nogut.” Tasol yu ting ol man inap stretim dispela hevi? Long dispela taim nau yumi lukim ol samting i kamap olsem Jisas i bin tok profet long en, em i tok: “Bambai kain kain mak i kamap long san na mun na sta. Na long graun bel bilong olgeta lain man bai i bagarap tru na ol i pret.” Ol dispela samting i makim “kingdom bilong God i kam klostu pinis.” Dispela Kingdom tasol inap pinisim “pasin longlong bilong ol man.”—Luk 21:25, 31; Danyel 2:44.
[Ol piksa long pes 18, 19]
Ol i save sekanim ol nupela man i kam insait long ‘bikpela lain brata bilong olgeta hap’
[Rait long pes 20]
Pinisim “Pasin Longlong Bilong Ol Man”
Dean Rusk, bipo em i Seketeri bilong Stet long gavman bilong Amerika, em i tok: “Taim yumi no bagarapim yet ples antap long pasin longlong bilong ol man, gutpela sapos yumi toktok wantaim na wok long painim rot bambai yumi no ken mekim dispela samting nogut.” Tasol yu ting ol man inap stretim dispela hevi? Long dispela taim nau yumi lukim ol samting i kamap olsem Jisas i bin tok profet long en, em i tok: “Bambai kain kain mak i kamap long san na mun na sta. Na long graun bel bilong olgeta lain man bai i bagarap tru na ol i pret.” Ol dispela samting i makim “kingdom bilong God i kam klostu pinis.” Dispela Kingdom tasol inap pinisim “pasin longlong bilong ol man.”—Luk 21:25, 31; Danyel 2:44.