Tok Bilong God i Gait Laip

Rut i Laikim Lain Bilong God

DISPELA naispela yangpela meri em Rut. Em i bilong ples Moap long hap bilong Det Si. Ol manmeri bilong dispela hap ol i save lotuim ol god giaman, tasol Rut i laik lotuim trupela God, em Jehova. Em i laik bung wantaim lain bilong God Jehova. (Nambas 25:1-5) Taim rot i op bilong em i mekim dispela samting, wantu em i mekim, na dispela i kirapim ol narapela man i lotuim Jehova na ol i laikim em tru, long wanem ol i save em i “gutpela meri.”—Rut 3:11.

Bikpela hangre i kamap long Isrel, na long dispela taim rot i op long Rut i lotuim Jehova. Wanpela famili Isrel ol i lusim ples bilong ol long Betlehem na ol i go long ples Moap. Yu lukim ol long dispela piksa, em Elimelek, na meri bilong em Neomi na tupela pikinini man bilong ol, Malon na Kilion. I no longtaim na Elimelek i dai. Bihain Malon i maritim Rut na Kilion i maritim narapela meri Moap nem bilong em Opa. Man bilong Rut wantaim tambu mama bilong em ol i lotuim Jehova, olsem na Rut i kisim save long trupela God.

Liklik taim bihain na Malon na Kilion i dai. Nau tupela meri wantaim i stap wanpis, ol i no gat man na ol i no gat pikinini. Ol i bel hevi tru. Bai ol i mekim wanem? Neomi i harim tok olsem bikpela hangre i pinis long Isrel. Olsem na em i tok em bai go bek long lain bilong em long Betlehem. Rut na Opa i laikim tru tambu mama bilong ol, olsem na ol i go wantaim em. Ol i wokabaut yet long rot na Neomi i tokim tupela meri, “Yutupela i go bek na i stap long ples wantaim mama bilong Yutupela.” Neomi i givim kis long tupela meri na gutbai long ol, na ol i krai nogut. Ol i tok: “Nogat! Yumi olgeta i go bek long lain bilong yu.” Tasol Neomi i tokim ol: ‘Pikinini bilong mi, mobeta yupela i go bek.’ Olsem na Opa i lusim Neomi na go bek. Tasol Rut i no lusim Neomi.

Neomi i tokim Rut, ‘Brata bilong yu i go bek long lain bilong em, yu go wantaim em.’ Tasol Rut i strong na i tokim Neomi: “Yu no ken tokim mi long lusim yu na yu no ken pasim mi long i go wantaim yu. Olgeta ples yu go long en, mi tu bai mi go. Olgeta ples yu stap long en, mi tu bai mi stap. Lain bilong yu bai i kamap lain bilong mi tu. Na God bilong yu bai i kamap God bilong mi tu.” (Rut 1:1-17) Olsem na Rut i go wantaim Neomi na em i go insait long lain bilong God, em lain Isrel.

Olsem wanem? Yu kain olsem Rut? Yu bin kisim save long God tru, em Jehova, na yu save long dispela lain ol i lotuim Jehova? Sapos olsem, gutpela sapos yu stap gut long lain bilong Jehova long nau, olsem Rut i bin i stap gut long Neomi!

[Mep long pes 26]

(Lukim Wastaua 1985 Volume)

DET SI

MOAP