Amagedon—Sampela Tingting Kranki Long En

Yu laik i go long wanpela hap i stap klostu long Haifa. Bikpela san i stap na ka i spid i go bihainim Wara Kison long hap bilong saut. Yu stap long ples daun namel long ol bikpela maunten bilong Kamel na ol liklik maunten bilong Galili. Liklik rot i stap namel long ol maunten na yu bihainim i go na nau yu lukim bikpela ples stret i stap long ai bilong yu—em ples stret bilong Esdrelon. Yu raun long ka long hap bilong saut na nau yu lukim wanpela maunten i stap em i narapela kain. Em i no gat sap bilong en, antap bilong en i stret tasol olsem wanpela plet. Em, yu kam bilong lukim dispela maunten! Em maunten Megido, as bilong dispela nem Amagedon.

AMAGEDON—Em i olsem wanpela tok i stap hait na i gat kain kain tingting kranki long en Ol man i gat planti kain kain tingting long Amagedon. Ol i kisim dispela tok Amagedon long tok Har-Magedon o Maunten Bilong Megiddo.a Dispela tok em i wanpela tok bilong Baibel. Em i stap long Revelesen 16:16. Dispela ves i tok: “Na ol spirit nogut ol i bungim ol king long dispela hap, long tok Hibru ol i kolim Amagedon.”

Husat ol i bung long Amagedon? Bilong wanem ol i bung? Revelesen 16:14 i bekim tok olsem: “Ol king bilong olgeta man bilong graun” ol i bung “bilong kirapim pait long dispela bikpela de bilong God I Gat Olgeta Strong.”

Yumi tingim dispela tok na yumi gat planti narapela askim, olsem: “Ol king” i pait wantaim husat? Bilong wanem ol i pait? Bai ol i pait we? Bai ol i mekim wok long ol bom nogut bilong nuklia? I gat rot bilong pasim dispela pait? Amagedon em i wanem samting tru?

Em i No Wanpela Ples long Graun

Amagedon em i no wanpela ples long graun. No gat wanpela maunten i stap i gat dispela nem Amagedon—tasol i gat wanpela liklik maunten i stap yet, em i no wanpela maunten tru, nem bilong en Megido. Ol pait i bin kamap long hap bilong Megido long bipo i olsem piksa na i makim insait tru bilong dispela tok Amagedon.

Planti bikpela pait nogut i bin kamap long hap bilong Megido long bipo na long nau tu. Ol dispela pait i kirap 1,500 samting yia paslain long taim bilong Krais. Long dispela taim king bilong Isip (em Thutmose III) em i winim pait. Em i daunim tru ol king bilong Palestain na Siria. Na long taim bilong yumi, long 1918, bikpela kepten bilong ami bilong Englan, em Vaikaun Allenby, em i daunim ol ami bilong Teki long dispela hap.

Tasol ol man bilong lainim tok bilong Baibel ol i save tingim bikpela pait bilong ol Isrel i bin kamap long hap bilong Megido. Jas Barak i kisim ol ami bilong Isrel i go pait wantaim ami bilong King Jebin, em ami bilong ol Kenan na Sisera i kepten bilong ol. God Jehova i helpim ol Isrel na ol i winim pait.—Hetman 4:7, 12-16, 23; 5:19-21.

Olsem na nau yumi save, Amagedon i makim wanpela bikpela pait na i gat wanpela lain tasol i winim pait.

Em i No Wanpela Pait Bilong Ol Lain Bilong Graun

As bilong pait bilong Amagedon i olsem: Husat i mas bosim graun? Na dispela samting i as bilong ol kros na pait i kamap long graun long nau. I gat tupela bikpela gavman long nau ol i resis long bosim graun. Tasol Amagedon i no wanpela pait bilong ol dispela lain. Nogat. Tru, long nau ol i resis long hipim planti bom nogut na ol i tromoi bikpela mani tru long dispela, olsem na wanpela nius (India Today) i tok: “olgeta dispela samting i subim dispela graun i go long Amagedon—em bikpela pait bilong ol lain bilong graun.” Tasol Revelesen 16:14 i tok: “Ol king bilong olgeta man bilong graun” ol i wok wantaim na “kirapim pait long dispela bikpela de bilong God I Gat olgeta Strong.”

Olsem na Amagedon em i no wanpela pait i kamap namel long ol lain bilong graun. Em i no wanpela pait bilong ol man. Nogat. Em i pait bilong God. Long Amagedon bai olgeta lain man i pait wantaim “ol ami bilong heven” na Krais, em ‘King i winim olgeta narapela king na Bikpela Man i winim olgeta narapela bikpela man,’ em i kepten bilong ol dispela ami bilong heven. I stret Krais i mas bosim dispela graun, long wanem God i “putim olgeta samting i go aninit long Krais.”—Revelesen 19:14, 16; Efesas 1:22.

Em i No Wanpela Pait Nuklia

Planti man i no laik tingim pait nuklia. Ol i pret. Long 1983 inap 40 saveman bilong saiens i skelim ol samting bai kamap sapos ol man i pait na tromoi ol bom nogut bilong nuklia na ol i tok, planti man tru (inap 33 pesen o 50 pesen) bai ol i dai wantu tasol. Ol i raitim ripot long dispela samting long wanpela nius (Science) na ol i stori long ol samting nogut bai painim ol man ol i no i dai. Ol i tok: “Sapos ol bikpela gavman i pait na ol i tromoi ol bom nuklia, dispela samting bai bagarapim win na wara na graun na klostu olgeta diwai na animal bai pinis long graun. Na bai ol man tu i bagarap na pinis long graun.”

Tasol yu ting Jehova, em God I Gat Olgeta Strong, em bai larim kain samting nogut tru olsem i kamap? Nogat tru! Em i no wokim dispela graun bilong “i stap nating,” em i wokim bilong “man i ken i stap long en.” (Aisaia 45:18, NW) Long Amagedon God bai “bagarapim ol man i bin bagarapim graun!” Em i no ken larim ol bom nuklia i kukim na bagarapim.—Revelesen 11:18.

Em i No Wanpela Pait i Stap Oltaim Namel long Gutpela Samting na Samting Nogut

Sampela bikman bilong lotu ol i tok, Amagedon i olsem wanpela pait i stap oltaim namel long gutpela samting na samting nogut. Ol i tok dispela pait inap kamap long olgeta hap bilong graun o insait long tingting bilong wanpela man tasol. Wanpela buk i stori long Baibel em i tok: “Amagedon i save kamap long sampela hap bilong graun long olgeta de.” Tasol Baibel i no tok olsem, a? Baibel i tok, wantu tasol bai Amagedon i pinisim olgeta lain nogut na man nogut. Long Amagedon, Krais, dispela King God i bin makim, em bai “bosim ol long strongpela han bilong [em]. Na bai [em i] brukim ol liklik liklik, olsem man i brukim wanpela sospen graun.”—Sam 2:9; lukim tu Provep 2:21, 22; Revelesen 19:11-21.

Em i No Wanpela Hevi Bilong Mani

Planti bikpela gavman i pret. Ol i ting ol kantri i no gat planti wok bisnis long en na ol i stap rabis bai ol i no inap bekim dinau bilong ol, na bai planti wok bisnis i bagarap na mani i no gat strong moa.Ol i ting wanpela bikpela hevi bilong mani bai kamap na wanpela nius (Business Life) i kolim dispela hevi olsem “Amagedon Bilong Mani.” Sapos wok bilong ol beng i bagarap, bai bikpela hevi tru i kamap, tasol em i no Amagedon. Amagedon bilong Baibel i makim wanpela samting bai kamap long olgeta hap bilong graun, tasol em i no makim samting bilong bisnis na mani. Nogat. Profet Jeremaia i stori gut long en, olsem: “Jehova i gat kros long ol lain man. Na em yet em i mas skelim olgeta manmeri. Na bainat bilong em bai painim ol man nogut.”—Jeremaia 25:31, NW

Em i No Wanpela Pait Bilong Midel-Is

Evanselis Billy Graham i save tok: “Wanpela taim bihain bai laspela pait i kamap na em bai kamap long hap bilong Midel-Is.” Planti narapela man bilong lotu ol tu i gat dispela^: tingting. Na Graham i ting yumi inap mekim sampela samting na bai yumi surikim taim bilong Amagedon na i no ken kamap kwik. Em i tok: “Mi ting ol lain man i wokabaut i go long Amagedon na Sapos yumi no kirap na tanim bel i go long God, Amagedon bai kamap nau long taim bilong yumi.”

Hap bilong Megido i no bikpela hap inap long “ol king bilong graun, wantaim ol ami bilong ol” i ken pulap long en. (Revelesen 19:19) Olsem na Amagedon i no wanpela pait bilong olgeta lain em ol i go pulap long dispela ples Megido, a? Ples Megido i liklik tumas. Profet Jeremaia i tok, dispela pait bai kamap long “ol longwe longwe hap bilong graun,” na skin bilong ol man i bagarap long pait “bai stap nabaut long olgeta hap bilong graun.”—Jeremaia 25:32, 33, NW.

Amagedon em i pait bilong “bikpela de bilong God I Gat Olgeta Strong,” olsem na i no gat wanpela man inap pasim na bai i no kamap. Jehova i makim pinis taim bilong kirapim pait na i no ken i kam “bihaintaim.”—Revelesen 16:14; 11:18; Habakak 2:3, NW.

As Bilong Wetim Gutpela Samting i Kamap

Tasol ol manmeri i lainim tumas stretpela pasin, ol i no pret long Amagedon. Ol i tingim na ol i wetim gutpela samting i kamap. Baibel i tok: “Mi lukim heven i op, na wanpela waitpela hos i stap. Man i sindaun long en, nem bilong en i olsem: ‘Man i lukautim gut wok bilong en,’ na ‘Man i save mekim pasin tru tasol.’ Sapos em i skelim manmeri long kot, na sapos em i kirapim pait, orait em i save bihainim stretpela pasin tasol na i mekim.” (Revelesen 19:11) Pait bilong Amagedon bai pinisim olgeta samting nogut long graun na bai stretpela pasin inap kamap.—Aisaia 11:4, 5.

Winim 100 yia pinis ol Witnes Bilong Jehova i bin tokaut long dispela taim God bai daunim ol bos nogut bilong dispela graun. Kirap long yia 1925 ol i save gut long Amagedon na ol i mas tokaut long en; ol i no ken pasim maus. Ol i laik helpim ol man bambai ol i no ken bagarap long Amagedon, ol i ken winim dispela taim na i stap laip. Olsem na ol i wok strong long tokim olgeta man i harim tok olsem ol i mas bihainim tok bilong Joel 2:31, 32 (NW) i toktok long “bikpela de bilong Jehova bai i kam,” na i tok: “Olgeta man i kolim nem bilong Jehova na i singaut long em, ol i no ken bagarap.”

Tasol ating sampela i gat askim yet. Ating ol i laik save: Tru, Amagedon em i pait bilong olgeta hap bilong graun, tasol em bai kirap long Midel-Is o nogat? Wanpela God i gat pasin sori, olsem wanem em inap larim wanpela Amagedon i kamap? Taim Amagedon i pinis, bihain bai i gat gutaim tru i kamap long graun? Orait, sampela Wastaua i kamap bihain long dispela Wastaua bai stori long ol dispela askim.

[Ol Futnot]

[Blok long pes 6]

Amagedon Em Wanem Samting?

Amagedon EM I NO . . .

◆ wanpela ples long graun

◆ wanpela pait bilong ol lain bilong graun

◆ wanpela pait nuklia

◆ wanpela hevi bilong mani

◆ wanpela pait namel long gutpela samting na samting nogut

◆ wanpela pait bilong Midel-Is

Amagedon EM I . . .

◆ samting i kamap long olgeta hap na olgeta lain man i pait wantaim Pikinini Bilong God, em Krais Jisas, wantaim ol ami bilong heven, em ol ensel; em pait bilong “bikpela de bilong God I Gat Olgeta Strong”

[Piksa long pes 7]

Long Amagedon, dispela King God i bin makim, em Krais Jisas, em bai holim stik ain na ‘brukim olgeta lain nogut liklik liklik, olsem man i brukim wanpela sospen graun.’—Sam 2:9.