I Stap na Wok Bilong Jisas

Strong Long Mekim Wok Bilong Jehova

JISAS i go long marit long ples Kena na bihain em i go long Kapaneam, em wanpela taun i stap klostu long Raunwara Galili. Ol disaipel bilong em, na mama bilong em, na ol brata bilong em, em Jems na Josep na Saimon na Judas ol i go wantaim em. Tasol paslain long taim ol i go long Kapaneam, ating ol i go long Nasaret, ples bilong Jisas, bambai famili bilong Jisas i ken bungim sampela samting bilong kisim i go wantaim ol.

Tasol bilong wanem Jisas i go long Kapaneam? Bilong wanem em i no i stap long Kena o Nasaret, o long wanpela ples long ol maunten long hap bilong Galili? Long wanem, Kapaneam em i wanpela biktaun na em i stap namel long ol narapela taun. Na ol dispela man nau tasol ol i kamap disaipel bilong Jisas, ol i bilong Kapaneam o ol liklik taun i stap klostu. Sapos Jisas i go long Kapaneam, ol dispela nupela disaipel i no gat hatwok long lusim ples bilong ol bambai Jisas i ken lainim ol.

Taim Jisas i stap long Kapaneam, em i wokim planti mirakel o strongpela wok, na bihain em yet i bin stori long ol dispela samting em i mekim. Tasol liklik taim bihain, Jisas wantaim ol disaipel bilong em ol i lusim dispela ples. Ol i go long Jerusalem bilong mekim Pasova long yia 30 C.E. Taim ol i stap long Jerusalem, ol disaipel i lukim Jisas i mekim wanpela samting ol i no bin lukim em i mekim bipo.

Lo bilong God i tok ol Isrel i mas kisim ol animal na wokim ofa long God. Olsem na sampela man long Jerusalem ol i mekim wok bisnis long salim ol animal na pisin samting long ol man bilong wokim ofa. Tasol ol i mekim wok bisnis insait long tempel yet, na ol i giamanim ol manmeri na singaut long bikpela pe tru long ol dispela animal na pisin ol i laik salim.

Bel bilong Jisas i hat, olsem na Jisas i kisim wanpela wip ol i bin wokim long rop na rausim long tempel olgeta dispela man bilong wok bisnis. Em i kapsaitim mani bilong ol man i senisim mani, wantaim tebol bilong ol. Na em i tokim ol man i wok long salim pisin: “Kisim dispela samting i go. Yupela i no ken mekim haus bilong Papa bilong mi em i kamap olsem haus stua.”

Taim ol disaipel i lukim dispela samting Jisas i mekim, ol i tingim wanpela tok profet i stori long Pikinini bilong God, olsem: “Mi hat tru long mekim haus bilong yu i stap gut.” Tasol ol Juda i askim Jisas: “Yu soim wanem mirakel long mipela na mipela i ken save, yu gat namba bilong mekim olsem?” Jisas i tokim ol: “Yupela i brukim dispela tempel, na bihain long tripela de bai mi kirapim gen.”

Ol Juda i ting Jisas i toktok long tempel tru, Tasol dispela tempel Jisas i stori long en, em bodi bilong em yet. Na tripela yia bihain, taim Jisas i kirap bek, ol disaipel bilong Jisas i tingim dispela tok Jisas i bin mekim. Jon 2:​12-22; Matyu 13:55; Luk 4:⁠23.

◆ Jisas i go long marit long Kena na bihain em i go long wanem ol narapela ples?

◆ Bilong wanem Jisas i belhat? Na em i mekim wanem?

◆ Taim ol disaipel bilong Jisas i lukim ol samting em i mekim, ol i tingim wanem samting?

◆ Jisas i tok wanem long “dispela tempel”? Wanem insait bilong dispela tok bilong Jisas?