Wanpela Driman i Makim Olsem Las De i Klostu

“JEHOVA em i . . . God i stap laip na em i stap King inap long taim bihain bihain.” (Jeremaia 10:10, NW ) Long olgeta taim Jehova i bin bosim graun na ples antap, tasol Nebukatnesa, em king bilong Babilon long bipo, em i no laik daun long Jehova. Jehova i laik bai Nebukatnesa i mas save “Nambawan Bikpela em i Bos insait long kingdom bilong ol man,” olsem na Jehova i mekim Nebukatnesa i driman na Jehova i givim strong long Danyel bilong kamapim insait bilong dispela driman.—Danyel 4:17, 18, NW.

Long driman Nebukatnesa i bin lukim wanpela bikpela diwai “i go antap inap long heven na ol manmeri i stap long olgeta hap bilong graun ol inap lukim.” God i tok na ol i katim diwai na i pundaun, tasol as bilong en i stap na ol i pasim long ain na bras. Dispela ain na bras i mas i stap inap long “7-pela hap taim” i go pinis, na nau diwai i ken kru gen.—Danyel 4:10-17, NW.

Danyel i tok: “Dispela diwai yu lukim, . . . em yu tasol, O king, . . . yu bosim olgeta hap graun.” Nebukatnesa, olsem dispela diwai, em i mas pundaun. Kingdom bilong em i mas tekewe long em, na save bilong em tu, na em i mas raun long bus olsem animal i wail, na i stap olsem inap “7-pela hap taim.” Bihain long dispela, ol i ken lusim ‘ain na bras,’ na king i ken kisim bek save bilong em na wok king bilong em.—Danyel 4:20-27, NW.

“Olgeta dispela samting i painim Nebukatnesa,” olsem Danyel i tok profet pinis. (Danyel 4:28, NW ) Wanpela Baibel (olsem Lexicon Linguae Aramaicae Veteris Testamenti) i tok dispela “7-pela hap taim” bilong driman bilong Nebukatnesa i makim 7-pela yia. Nebukatnesa i bin i stap king inap 43 yia (624-581 B.C.E.), olsem na tok bilong dispela Baibel i stret.

Dispela Ol Samting i Mekim Wanem long Yumi?

Long olgeta taim bipo Jehova i bin bihainim laik bilong em yet na bosim ol samting long heven na long graun. Bipo, inap sampela yia, em i mekim dispela wok long graun long rot bilong lain Isrel, na Baibel i tok ol bikman bilong dispela lain ol i “sindaun long sia king bilong Jehova.” (1 Kronikel 29:23, NW ) Tasol taim lain Isrel i kamap bikhet, Jehova i larim ol narapela lain i daunim ol king bilong ol, em ol i tumbuna pikinini bilong King Devit.

God i larim King Nebukatnesa i bagarapim dispela kingdom bilong God long graun em i olsem piksa na i makim kingdom tru bilong God, na bihain liklik God i mekim wanpela samting na bai Nebukatnesa i ken save, God i stap bos yet, maski Nebukatnesa i daunim dispela kingdom bilong God. I stret God i mekim olsem. Em bikpela samting. Nebukatnesa na ol man bilong ol arapela lain em bihain bai ol i krungutim dispela kingdom bilong God long graun, olgeta i mas save, God i larim ol i mekim olsem inap liklik taim tasol!

Olsem na taim Nebukatnesa i bin kisim dispela driman, na dispela man God i bin givim driman long em, na insait bilong ol dispela samting, olsem God tasol i king tru, dispela 3-pela samting i makim ol samting bai kamap bihain, na i no ol samting i bin kamap long taim bilong Nebukatnesa tasol. Ol i makim olsem: God i bin bosim ol samting na pastaim kingdom bilong em olsem i stap long Jerusalem, dispela i bagarap olsem wanpela diwai ol i katim na i pundaun na ain na bras i pasim as bilong en, tasol bihain long “7-pela hap taim” ain na bras bai tekewe na kingdom bilong God bai kirap gen. Na long dispela taim bai Jehova i givim Kingdom bilong em long King em i makim, em Krais. Baibel i kolim Krais olsem “dispela man i gat pasin daun, i no gat narapela man i gat pasin daun olsem.” Ol disaipel bilong Jisas i laik save, wanem taim God bai mekim dispela samting, na ol i askim Jisas long kolim wanpela mak.—Danyel 4:17, NW; Matyu 24:3.

Na i gat ol narapela samting tu na yumi ken save, dispela driman bilong Nebukatnesa i makim ol samting bai kamap bihain. Tok profet i stap long Danyel 9:24-27 i makim yia stret em Krais i mas kamap, em 500 yia bihain.a Orait, sapos Baibel i makim stret yia em Krais i kamap man long graun, Baibel i mas makim stret yia em i kam wantaim strong bilong Kingdom na i no inap ol man i lukim, a? Husat inap mekim tok profet na makim dispela taim? I stret Danyel i ken mekim, a? Taim Danyel i raitim pinis stori bilong ol samting em i lukim olsem piksa na bilong ol tok profet em i bin driman long en na bilong driman bilong Nebukatnesa na bikpela diwai, God i tokim em: “Yu mas haitim dispela tok na pasim buk inap long taim bilong pinis.” Bilong wanem dispela samting i mas i stap hait inap long “taim bilong pinis”? Long wanem long dispela taim “bai stretpela save i kamap planti.” Ol dispela rait bilong Danyel i mas i stap hait inap long “taim bilong pinis,” olsem na long “taim bilong pinis,” olsem long nau, ol dispela tok profet bilong Danyel em i bikpela samting bilong yumi mas tingim, a?—Danyel 12:4, NW.

Dispela “7-pela Hap Taim”—Em i Kirap long Wanem Taim na Pinis long Wanem Taim?

Taim Jisas i stori long mak bilong em, em i kolim dispela “7-pela hap taim” olsem taim bilong “ol man bilong ol arapela lain.” Em i tok: “Lek bilong ol man bilong ol arapela lain bai i krungutim Jerusalem, inap [taim bilong ol] i pinis.” (Luk 21:24) Wanpela Baibel (Oxford NIV Scofield Study Bible bilong 1984) i tok, dispela taim bilong “ol man bilong ol arapela lain,” em “i kirap long taim Nebukatnesa i kalabusim ol Juda. . . . Long dispela taim na i kam inap nau lek bilong ol man bilong ol arapela lain i bin krungutim Jerusalem, olsem Krais i tok.”

Dispela “7-pela hap taim” o taim bilong “ol man bilong ol arapela lain,” em i mas i stap inap hamas yia? I no 7-pela yia tasol. Em i mas i stap planti yia. Baibel i makim olsem yia i gat 360 de, na 7-pela yia i olsem 2,520 de, na olgeta wan wan de i makim wanpela yia. (Lukim Nambas 14:34; Esikiel 4:6; skelim wantaim Revelesen 12:6, 14.) Olsem na dispela “7-pela hap taim” i kamap olsem 2,520 yia. Dispela “7-pela hap taim” o 2,520 yia i kirap long taim Jerusalem i bagarap long yia 607 B.C.E., olsem na i pinis long yia 1914.

Inap 30 yia samting paslain long yia 1914 ol Witnes Bilong Jehova i tokaut long yia 1914 em i bikpela yia. Eugenia Nomikos na Robert C. North i raitim ol tok bilong wanpela buk (International Crisis, 1976) na ol i tok, ‘i olsem i no gat sampela kros namel long ol kantri paslain long yia 1914, na long pinis bilong yia 1913 na kirap bilong yia 1914 ol bikpela gavman i no birua birua; ol i pren gut.’ Tasol 70 yia i go pinis na nau yumi tingting bek long 1914 na yumi save, long 1914 bikpela senis i bin kamap. Wanpela buk bilong Jemani (Meyers Enzyklopädisches Lexikon) i tok, Namba Wan Pait i mekim na ol samting i senis, na klostu olgeta man bilong graun i pilim dispela senis; ol i kisim hevi long mani, na long sindaun bilong ol, na long wok politik bilong ol.

Planti man i save ol samting i bin senis long yia 1914. Sindaun bilong ol man i senis, na Virginia Cowle i stori long dispela long buk bilong em (1913: An End and a Beginning) na em i tok, pasin bilong ol man i senis long yia 1913. Na Ashby Bladen, em presiden bilong wanpela kampani long Amerika, em i tok, paslain long yia 1914 ol samting bilong mani i wok i orait, tasol bihain long Ogas 1914 narapela kain pasin i kamap, na ol samting bilong mani i no wok gut olsem bilong bipo; long yia 1914 ol samting i kirap long bagarap.

Nau Taim i Laik Pinis, o Olsem Wanem?

Ol samting bilong dispela mak Jisas i kolim, nau ol i wok long kamap ples klia wankain olsem ol stori i kamap long ol nius na long televisen. Olsem na yumi ken save, ol samting Nebukatnesa i driman long en i stret wantaim ol samting i wok long kamap long yia 1914. Nau yumi stap long yia 1987, na 73 yia bilong “taim bilong pinis” i go pinis. Jisas i tok promis olsem lain i bin lukim ol samting i bin kamap long yia 1914, sampela bai stap laip yet na ol bai lukim dispela bikpela hevi, em bai pinisim pinis “taim bilong pinis.”—Matyu 24:34.

Dispela save i ken kirapim yumi na yumi tingting strong long ol dispela tok na yumi ken save, taim i laik pinis! Yumi no ken les long wetim ol samting bai kamap, na nogut yumi laik hariapim taim bilong ol samting i mas kamap, na sapos em i no kamap hariap bai yumi bel hevi! Tasol yumi no ken ting ol samting i no ken kamap tu, na nau yumi no bilip tumas. Sapos olsem, bai yumi lus! Sapos yumi laik kisim balus samting na yumi kam bihaintaim na balus i go pinis, em i no bikpela samting, tasol sapos yumi no redi gut long wetim pinis bilong “taim bilong pinis,” em i bikpela samting, nogut yumi lus, na yumi no inap i stap oltaim long nupela taim God bai kamapim. Dispela nupela taim em i wanpela gutpela samting tru!

[Futnot]

[Sat long pes 6]

(Bilong save ol dispela rait i stap we long pes, lukim buk o magasin)

607 B.C.E. 33 C.E 1914 C.E. 1987 C.E.

Jerusalem Ol i “Taim bilong pinis” 73 yia bilong

long graun “Krungutim” i kirap “taim bilong pinis”

i bagarap yet “Jerusalem” (Danyel 12:4) i go pinis

(Luk 21:24) (Matyu 24:3,12, 22

[Ol Piksa long pes 7]

Driman bilong Nebukatnesa i makim sampela samting i kamap long nau, olsem na yu mas tingim!