I Stap na Wok Bilong Jisas

Long Pati Bilong Betde Ol i Kilim Man i Dai

JISAS i givim sampela tok long ol aposel bilong em, na bihain em i salim ol i go tupela tupela. Ating Pita na brata bilong em Andru i go wantaim, na Jems wantaim brata bilong em Jon, na Filip wantaim Bartolomyu, na Tomas wantaim Matyu, na Jems wantaim Tadius, na Saimon wantaim Judas Iskariot. Dispela 6-pela lain i go nabaut, na long olgeta hap ol i go long en ol i autim gutpela tok bilong Kingdom na oraitim sik bilong man.

Jon Bilong Baptais i stap yet long kalabus. Em i bin i stap long kalabus klostu tupela yia. Ating yu save, Jon i bin tokaut klia olsem samting Herot i bin mekim i no stret; Herot i bin maritim Herodias, em meri bilong Filip, brata bilong Herot. Herot i tok em i bihainim Lo bilong Moses, olsem na Jon i tokaut strong olsem Herot i brukim lo bilong marit na mekim pasin pamuk. Em nau, Herot i holimpas Jon na putim em long haus kalabus; ating Herodias i bin kirapim Herot long mekim dispela samting.

Herot i save Jon em i gutpela na stretpela man, na em i save amamas long harim tok bilong Jon. Olsem na nau em i no save em bai mekim wanem long Jon. Tasol Herodias em i bel nogut tru long Jon, na em i wok long painim rot bilong kilim em i dai. Bihain rot i op long em i mekim dispela samting.

Paslain liklik long Pasova long yia 32, Herot i wokim wanpela bikpela pati bilong tingim de mama i karim em. Herot i singautim ol bikman bilong gavman na ol namba wan ofisa bilong ami na ol bikman bilong distrik Galili. Ol i pati i stap, na yangpela pikinini meri bilong Herodias na Filip, em Salome, i kam insait na danis. Ol man i sindaun lukim na ol i amamas tru long dispela danis.

Herot i amamas tru long Salome, na em i tok: “Mi bai givim yu wanem samting yu laikim. Yu tokim mi tasol, na bai mi givim yu.” Na em i mekim strongpela tok promis, olsem: “Tru antap, wanem samting yu askim long mi, em bai mi givim yu. Sapos yu tok long mi mas brukim kantri bilong mi long tupela hap na givim wanpela hap long yu, orait bai mi mekim.”

Salome i no bekim kwik tok. Em i go askim mama bilong em pastaim, olsem: “Bai mi tokim em long givim wanem samting long mi?”

Em nau, Herodias i painim pinis rot bilong kilim Jon i dai. Em i kirap tokim Salome, “Yu tokim em long kisim het bilong Jon Bilong Baptais na givim yu.”

Salome i hariap i go bek long Herot na i tokim em: “Nau tasol mi laik bai yu putim het bilong Jon Bilong Baptais long wanpela plet, na givim long mi.”

Herot i bel hevi tru. Tasol ol manmeri i sindaun kaikai wantaim em ol i bin harim dispela strongpela tok promis em i bin mekim, na em i no laik kisim sem long ai bilong ol, olsem na em i orait long dispela samting, maski em i mas kilim i dai wanpela man i no gat rong. Orait kwiktaim king i salim wanpela soldia i go long haus kalabus bilong katim nek bilong Jon. Soldia i mekim pinis dispela wok, na em i putim het bilong Jon long wanpela plet na kisim i kam givim long Salome. Na Salome i go givim long mama bilong em. Taim ol disaipel bilong Jon i harim tok long dispela samting, ol i kam kisim bodi bilong Jon na karim i go planim long matmat, na bihain ol i tokim Jisas long dispela samting.

Bihain Herot i harim tok long Jisas i wok long oraitim sik bilong ol man na rausim spirit nogut long ol, na em i pret na tingting planti, long wanem em i ting Jisas em Jon i kirap bek long matmat. Olsem na em i laik tru long lukim Jisas, bambai em i ken save, tru Jisas em i Jon o nogat? Matyu 10:1-5; 11:1; 14:1-12; Mak 6:14-29; Luk 9:7-9.

◆ Bilong wanem Jon i stap long kalabus? Bilong wanem Herot i no laik kilim em i dai?

◆ Wanem samting i kamap na nau Herodias i gat rot bilong kilim i dai Jon?

◆ Taim Jon i dai pinis, bilong wanem Herot i laik lukim Jisas?

[Piksa i karamapim pes olgeta long pes 9]