Taim Jehova i Skulim Ol King

“Olgeta wok bilong em i tru na olgeta pasin bilong em i stret, na ol man i hambak em inap daunim ol.”−DANYEL 4:​37, NW

 1. Tok bilong Ilaihu i kamapim wanem pasin bilong Jehova?

“HARIM! God i save mekim bikpela wok long strong bilong em. Husat em i gutpela tisa kain olsem God? I no gat.” Ilaihu i givim dispela tok long Jop taim Jop i karim hevi na dispela tok i kamapim wanpela pasin bilong God Jehova, olsem: I no gat wanpela man em i gutpela tisa kain olsem Em. God Jehova i save tru long pasin bilong lainim ol man na givim save long ol.−Jop 36:​22, NW.

 2, 3. (a) Sampela taim Jehova i bin mekim save long ol man bambai ol i ken save long wanem samting? (b) Jehova i mekim save olsem long wanem king long taim bilong Moses? Em i mekim long wanem rot? (c) Long Baibel, hamas taim God i tok ol man i mas save em i God Antap Tru na ol i mas daun long em?

₂ I gat planti samting God Jehova i mas skulim ol man long en, na sampela taim em i mas mekim save long ol man na ol lain man bambai ol i ken save, em i Nambawan Bikpela na i stret ol i mas daun long em. Devit i bin raitim wanpela sam i kamapim gut dispela samting. Long Sam 9:​19, 20, Devit i tok: “God, yu kam! Yu no ken larim ol man bilong graun i pes long yu. Yu sanapim ol . . . long kot bilong yu na skelim pasin bilong ol. Bikpela, yu mas mekim ol i pret nogut. Yu mas mekim ol lain manmeri i pilim, ol i samting nating tasol.”

₃ Long taim bilong Moses, God Jehova i bin mekim king bilong Isip i pilim dispela samting. God i kamapim 10-pela hevi long ol Isip na long dispela rot em i mekim save long dispela king na king i save, God Jehova em i Nambawan Bikpela. Na em i tokim dispela hambak king: “Mi bin larim yupela i stap olsem bai mi ken soim bikpela strong bilong mi long yupela, na bai ol manmeri ken autim biknem bilong mi long olgeta hap bilong graun.” (Eksodas 9:16) Na winim 70 taim long Baibel, kirap long Eksodas 6:7 i go inap long Joel 3:​17, Jehova i tok bihain bai em i mekim ol wankain bikpela wok, long wanem ol king, na ol manmeri, na ol lain man i mas save em i Jehova, em i God Antap Tru na em i bosim olgeta hap bilong graun.

 4. Long taim bilong Danyel, Jehova i skulim wanem 3-pela king? Em i skulim ol long wanem rot?

₄ Hap bilong Danyel long Baibel i stori long sampela bikpela wok Jehova i bin mekim bilong skulim ol king. Ol dispela king em Nebukatnesa, na Belsasa, na Darias. Wanem taim em i bin skulim ol? Ating em i bin mekim namel long yia 617 na yia 535 paslain long Krais. Em i skulim ol olsem wanem? Long rot bilong ol driman, na long rot bilong kamapim as bilong ol dispela driman, na long rot bilong sampela wok em i mekim bilong kamapim long ples klia strong bilong em. Jehova i mekim save long ol dispela king bilong graun bambai ol i ken save, em yet em i Nambawan Bikpela bilong heven na graun na ol i samting nating. Ol hetman long nau tu i mas save long dispela samting.

 5. 1 gat wanem tok yumi ken bekim long ol man i ting narapela man i bin raitim ol tok bilong hap bilong Danyel long Baibel?

₅ Tasol long nau sampela man i save skelim skelim ol tok bilong Baibel bambai ol i ken painim hap tok kranki long en, na ol dispela man i tok, Danyel i no bin raitim ol tok bilong hap bilong Danyel long Baibel; narapela man i kamap bihain long Danyel em i bin raitim. Tasol wanpela man em i gat bikpela save long Baibel, em i tok stret olsem: “Ol mirakel bilong dispela hap bilong Baibel na ol tok profet bilong en i makim olsem Danyel i bin i stap long dispela taim na em i bin raitim ol dispela tok. Olsem na ol dispela mirakel i mirakel tru na ol dispela tok profet i tok profet tru, o olgeta dispela tok i giaman tasol.” (Buk Daniel the Prophet, bilong E. B. Pusey, pes 75) Man bilong raitim ol tok bilong hap bilong Danyel em i kolim nem bilong em yet planti taim na yumi ken save em i husat, em i tok: “Mi, Danyel”! (Danyel 8:​15, NW; 9:2; 10:⁠2) Olsem wanem? Yu ting narapela man i bin raitim ol dispela tok na em i giaman na kolim nem bilong Danyel? Nogat. Long wanem, paslain long yia 1700 samting ol Juda na ol Kristen i bilip olsem Danyel i bin raitim ol dispela tok na ol i no gat tupela tingting long dispela samting. Na bikpela samting, winim tingting bilong ol man bilong nau em ol i gat bikpela save long Baibel, em ol tok bilong Baibel yet. Olsem na hap bilong Esikiel long Baibel i kolim nem bilong Danyel 3-pela taim. (Esikiel 14:​14, 20; 28:⁠3) Na bikpela samting tru i helpim yumi long save Danyel i bin raitim ol dispela tok, em tok bilong Jisas, em Pikinini bilong God. Long Matyu 24:​15, 16, Jisas i tok: “ ‘Na bambai yupela i lukim dispela samting nogut tru i save bagarapim ples, bipo profet Danyel i tok long en, na dispela samting bai i sanap long ples holi.’ Man i ritim dispela tok, em i mas tingim gut. ‘Na long dispela taim bai ol manmeri i stap long Judia ol i mas ranawe i go long maunten.’ ”a

Nebukatnesa i Kisim Save long Husat i Trupela God

 6. Ating wanem samting i mekim na King Nebukatnesa bilong Babilon i hambak? Long rait bilong em, em i tok wanem?

₆ Ol tok bilong profet Aisaia i makim olsem ol king bilong Babilon ol i man bilong hambak tru. (Aisaia 14:​4-23) King Nebukatnesa bilong Babilon em i man bilong hambak na man bilong lotu tu. Long ol rait bilong em, em i stori long ‘ol haus samting em i wokim na long bikpela wok em i mekim bilong lotuim ol god bilong hap bilong Babilon.’ Ating em i hambak long wanem em i daunim Jerusalem na olgeta hap bilong Judia na Senakerip i bin lus tru long mekim olsem.

 7. Danyel sapta 1 i stori long wanem samting em inap givim save long Nebukatnesa na bai em i litimapim nem bilong God bilong ol Hibru?

₇ Taim Danyel wantaim tripela poroman Hibru bilong em ol i kam sanap long ai bilong Nebukatnesa, nau i gat as na Nebukatnesa i mas litimapim nem bilong God bilong ol, long wanem “king i givim planti askim long ol bilong traim save bilong ol na king i kisim save olsem: Ol i gat gutpela save na tingting, winim inap 10-pela taim save bilong olgeta glasman na olgeta saveman i stap long olgeta hap em i bosim.” Tru tumas, ol saveman i lotuim God Jehova, save bilong ol i winim tru save bilong olgeta dispela man i lotuim ol narapela god. Dispela samting i kamap ples klia na Nebukatnesa i save long en.−Danyel 1:​20, NW.

 8. Long wanem rot Jehova i kamapim long ples klia olsem ol saveman bilong Babilon i no gat ol narapela kain save?

₈ I gat sampela samting moa Jehova i laik skulim King Nebukatnesa long en. Olsem na Jehova i givim wanpela driman long king na ol samting king i lukim long dispela driman i mekim em i pret nogut tru. Tasol bihain gen God i mekim na Nebukatnesa i no inap tingim moa ol samting em i bin lukim long driman. Danyel sapta 2 i stori long dispela samting. Dispela driman i mekim king bilong Babilon i tingting planti, olsem na em i singautim olgeta saveman bilong em i kam bambai ol i ken tokim em long ol samting em i bin lukim long driman, na ol i ken kamapim as bilong en. Tasol i no gat wanpela em inap mekim olsem. Dispela i kamapim long ples klia olsem ol i no gat ol narapela kain save. King i belhat na em i putim tok long kilim olgeta i dai. Taim ol i tokim Danyel na tripela poroman bilong em long dispela tok bilong king, Danyel i askim ol long givim liklik hap taim long em pastaim, na ol i orait long dispela. Nau em wantaim tripela poroman bilong em ol i beten strong long Jehova, na Jehova i kamapim dispela driman na as bilong en long Danyel−Danyel 2:​16-20.

 9. (a) Husat tasol Em inap kamapim as bilong driman bilong Nebukatnesa? Long rot bilong dispela driman Em i givim wanem save long king? (b) Olsem na king i tok, nau em i save long wanem samting?

₉ Ol i kisim Danyel i go sanap long pes bilong King Nebukatnesa na king i tokim em: “Tru yu inap tokim mi long ol samting mi bin lukim long dispela driman na kamapim as bilong en?” Danyel i tokim dispela hambakman, ol saveman bilong em i no inap kamapim dispela samting i stap hait, na bihain Danyel i tok: “Tasol i gat wanpela God i stap long heven em i Man bilong kamapim long ples klia ol samting i stap hait, na em i givim save long King Nebukatnesa long ol samting i mas kamap long taim bilong bihain tru.” Nau Danyel i stori long draipela piksa king i bin lukim long driman na long as bilong driman. King i kirap nogut na em i tok: “Tru tumas, nau mi save, God bilong yupela em i God i winim olgeta narapela God na em i Bikpela Man i winim olgeta king na em i Man bilong kamapim long ples klia ol samting i stap hait, long wanem yu inap kamapim dispela samting i stap hait.” Long dispela rot Jehova i skulim gut King Nebukatnesa bambai king i ken save, Jehova tasol em i God tru.−Danyel 2:​26, 28, 47, NW.

 10, 11. (a) King Nebukatnesa i hambak tru na em i wokim wanem samting? Na bihain em i tok ol man i mas mekim wanem? (b) Taim tripela Hibru i sakim tok bilong king, i olsem ol i mekim wanem? Na wanem samting i bin kamap?

₁₀ King Nebukatnesa i kirap nogut long bikpela save na gutpela tingting bilong God bilong ol Hibru, tasol i gat planti samting moa em i mas lain long en. Em i hambak na em i laik litimapim nem bilong em yet, olsem na em i tokim ol man long wokim wanpela draipela piksa gol na sanapim long ples Dura. Piksa hia i go antap inap 60 kiubit na em i braitpela inap 6 kiubit. Dispela i kirapim yumi long tingim namba 666 em i olsem mak bilong “wel abus” Seten i bin kamapim na Revelesen 13:18 i stori long en. (Wanpela kiubit em inap olsem wanpela hap mita, olsem na dispela piksa i go antap inap olsem 27 mita na em i braitpela inap 2.7 mita.) King i singautim olgeta bikman “i kam long bung bilong givim dispela piksa long ol god,” na em i tok, taim ol i harim krai bilong biugel samting, olgeta i mas brukim skru na lotuim dispela piksa. Sampela bikman bilong Babilon, em ol i bel nogut long ol Hibru, ol i lukim tripela Hibru i stap long dispela bung ol i no brukim skru, olsem na ol i go tokim king.−Danyel 3:​1, 2, NW.

₁₁ Dispela em i samting nogut tru long ai bilong King Nebukatnesa, long wanem wanpela taim em i bin hambak na tok, em i “man bilong kirapim ol manmeri long litimapim nem bilong ol bikpela god.” Olsem na dispela samting tripela i mekim i daunim nem bilong Nebukatnesa, em i bikpela king, na i daunim bikpela wok em i mekim bilong lotuim ol god. Olsem na dispela hambakman i belhat na em i tokim tripela: “Sapos yupela i no lotuim dispela piksa, wantu bai ol i tromoi yupela i go insait long draipela paia. Na wanem god em inap kisim bek yupela long han bilong mi?” Nebukatnesa i mas save, God bilong ol em inap tru long kisim bek ol wokboi bilong Em long han bilong dispela king em i man nating bilong graun na em i no gat strong. Na Nebukatnesa i mas save, i no gat narapela god em inap helpim ol man olsem God bilong ol Hibru i mekim.−Danyel 3:​15, NW.

Em i Driman na Lukim Diwai

 12, 13. (a) Nebukatnesa i driman na lukim wanpela diwai, na Danyel i tok dispela i makim wanem samting? (b) Tasol Nebukatnesa i mekim wanem na yumi save, em i no pilim ol tok Danyel i autim long em long as bilong driman?

₁₂ Sapos God i skulim yu olsem, bai yu pilim? Tasol King Nebukatnesa i no pilim. Em i no daun long Jehova. Em i hambak yet. Olsem na Jehova i mas mekim save gen long em bambai em i pilim tru. Em i givim narapela driman long Nebukatnesa, na ol saveman bilong Babilon i no inap kamapim as bilong dispela driman tu. Bihain ol i singautim Danyel i kam, na Danyel i kamapim as bilong driman. Em i tokim king, inap 7-pela yia bai king i stap olsem “ol animal bilong bus,” na bihain bai em i kisim bek tingting bilong em.−Danyel 4:​1-37, NW.

₁₃ Ol samting i kamap bihain i makim klia olsem Nebukatnesa i no pilim tru dispela driman na kisim save na tingting. Em i no lukim pasin hambak. Inap olsem wanpela yia bihain em i wokabaut long haus king bilong em na em i hambak na em i tok: “Dispela Bikpela taun Babilon em mi yet mi bin wokim bilong lain king, mi wokim long strong bilong mi yet bilong givim biknem long wok king bilong mi.” Em i hambak tru! Olsem na wantu wanpela maus i kamap long heven na i tokim dispela hambakman, nau bai wok king i tekewe long em na bai em i stap wantaim ol animal long ausait inap 7-pela yia, “inap long taim yu save God Antap Tru em i Bos bilong ol man, na em bai givim wok king long man em i laik givim long em.”−Danyel 4:​30-32, NW.

 14. Olsem wanem ol samting i bin kamap tru em driman bilong diwai i makim? Na dispela i mekim wanem long Nebukatnesa?

₁₄ Nebukatnesa i stap olsem wanpela animal inap 7-pela yia na bihain Jehova i kirapim bek tingting bilong em, na Nebukatnesa i pilim tru na em i tok, ‘I no gat wanpela man inap pasim wok bilong God Antap Tru o tokim em: Yu bin mekim wanem?’ Dispela king bilong Babilon i lain pinis, olsem na em i tok: “Nau mi, Nebukatnesa, mi litimapim nem bilong King bilong heven na givim biknem long em, long wanem olgeta wok bilong em i tru na olgeta pasin bilong em i stret, na ol man i hambak”−olsem king yet i bin mekim−“em inap daunim ol.” Ol dispela samting Jehova i bin mekim bambai ol man i ken save em yet i Nambawan Bikpela, ol dispela samting i kamapim long ples klia tru olsem ol dispela stori i no stori nating i bin kamap long tingting bilong wanpela man. Nogat. Spirit bilong God yet i bin givim tingting long man i raitim ol dispela tok na i stori long ol samting tru i bin kamap long bipo.−Danyel 4:​35, 37, NW.

Belsasa i Lukim Rait i Kamap long Banis

 15. Belsasa i mekim wanem na i olsem em i ting God tru, Jehova, em i samting nating?

₁₅ Belsasa em narapela king Jehova i mas mekim save long em. Taim Nebukatnesa i dai, Nabonidas i kamap king na Belsasa, em pikinini man bilong Nabonidas, em i wok king wantaim papa bilong em. Wanpela taim ol i wokim bikpela kaikai na Belsasa i no pret long tokim ol man long bringim i kam ol kap gol em tumbuna bilong em i bin kisim long haus lotu bilong Jehova long Jerusalem. Belsasa i laik pulimapim wain long ol dispela kap bambai em yet, na ol bikman bilong em, na ol meri bilong em, na ol namba tu meri bilong em, ol i ken dring long en. Olsem na “ol i dring wain, na ol i litimapim nem bilong ol god ol man i bin wokim long gol na silva na bras na ain na diwai na ston.”−Danyel 5:​3, 4, NW.

 16, 17. (a) Long wanem rot Jehova i mekim Belsasa i pret? (b) Danyel i autim as bilong rait i kamap long banis na em i tok, dispela i makim wanem samting? Na wanem samting i bin kamap stret tru olsem dispela tok i makim?

₁₆ Taim i kamap nau bilong God i mas pinisim wok king bilong Babilon. Olsem na em i mekim wanpela han bilong man i kamap na han i raitim sampela narapela kain rait long banis. Dispela mirakel i mekim king i pret nogut tru, na kwiktaim em i singautim olgeta saveman bilong em i kam autim as bilong dispela rait. Tasol i no gat wanpela em inap mekim. Olsem na mama bilong em i tokim em long singautim Danyel i kam, long wanem Danyel i bin kamapim as bilong ol driman bilong Nebukatnesa, na em bai inap autim as bilong dispela rait. (Danyel 5:​10-12) King i singautim Danyel i kam na king i tok, ‘Yu inap kamapim as bilong dispela rait?’ Danyel i kamapim sampela tok bilong kirapim king long tingim ol samting God i bin mekim bilong daunim hambak tumbuna bilong em bambai tumbuna i save, God Antap Tru em i Bos bilong ol man.−Danyel 5:​20, 21.

₁₇ Na Danyel i tok moa long Belsasa, olsem: “Yu no litimapim nem bilong dispela God em i bin givim win bilong laip long yu na makim olgeta rot bilong yu.” (Danyel 5:​23, NW ) Olsem na dispela rait i toksave long king bilong Babilon olsem nau bai wok king bilong em i pinis, na God i bin skelim em na em i sot, na ol Midia na Pesia bai kisim kingdom bilong em. Jehova i mekim save long dispela hambakman, Belsasa, na skulim em long dispela samting, na long dispela nait stret ol i kilim i dai dispela king bilong Babilon.−Danyel 5:⁠30.

 18. Long wanem rot Jehova bai skulim ol hetman bilong nau olsem em i Nambawan Bikpela na em i gat strong bilong kisim bek man?

₁₈ Jehova i bin mekim save long Nebukatnesa na Belsasa, em tupela king i hambak, na ol i kisim save olsem Jehova em i Nambawan Bikpela na em i gat strong bilong kisim bek man. Na olsem tasol long Amagedon bai God i mekim save long olgeta hetman bilong graun na bai ol i save, em yet i Nambawan Bikpela, na em i gat olgeta strong, na em i King bilong heven na graun. Dispela bai mekim sampela samting long i stap bilong yu tu. Olsem wanem? Long wanem long dispela taim bai Jehova i lukautim ol gutpela wokboi bilong em, olsem em i bin lukautim tripela Hibru long draipela paia.−Danyel 3:​26-30.

Darias i Kisim Save long Strong Bilong Jehova long Kisim Bek Man

 19, 20. Wanem samting i kamap long Danyel na dispela i lainim Darias long strong bilong Jehova long kisim bek man?

₁₉ Danyel sapta 6 i stori long narapela taim em God Jehova i skulim wanpela king, em Darias, na king i kisim save long strong bilong God bilong kisim bek man. Sampela man i birua long Danyel na ol i kirapim king long tromoi Danyel long hul bilong ol laion. King i no laik mekim olsem. Em i no hambak na bikhet long trupela God. Em i tokim Danyel, God bilong Danyel bai lukautim em, tasol em i gat tupela tingting na em i no bilip tru olsem God inap lukautim Danyel. Yumi ken save em i no bilip tru, long wanem em i tingting planti na long nait olgeta em i no inap slip. Long tulait em i kirap na hariap i go long hul bilong ol laion. Em i singaut na em i tok: “O Danyel, yu boi bilong God i gat laip, dispela God yu save lotu oltaim long em, em i bin kisim bek yu long maus bilong ol laion o nogat?”−Danyel 6:​18-20, NW.

₂₀ Tru tumas God i bin lukautim Danyel; em inap tru long mekim olsem. King Darias i amamas tru long dispela samting na em i putim tok, olsem: “Long olgeta hap mi bosim, ol manmeri i mas guria na pret long God bilong Danyel. Long wanem em i God i gat laip, na em i Man i stap oltaim, na kingdom bilong em i no ken bagarap, . . . Em i save lukautim man na kisim bek man na wokim mirakel na mekim ol narapela kain samting i kamap long heven na long graun, olsem na em i bin kisim bek Danyel long han bilong ol laion.”−Danyel 6:​26, 27, NW.

 21. (a) Long Danyel sapta 1 i go inap sapta 6 i gat sampela stori i kamapim long ples klia tru wanem samting? (b) Ol dispela stori i mas kirapim yumi long mekim wanem?

₂₁ Long Danyel sapta 1 i go inap sapta 6 i gat sampela stori i kamapim long ples klia tru olsem Jehova i strong long lukautim nem bilong em na em i bin mekim save long ol strongpela king bilong dispela graun bambai ol i save, em yet em i Man i gat olgeta strong, na em i King bilong heven na graun, na em inap daunim ol king i hambak, tasol em i lukautim ol gutpela wokboi bilong em na kisim bek ol bambai ol i no bagarap. Ol dispela stori i mas skulim yumi na kirapim yumi bai yumi pret long mekim pasin God i no laikim, na yumi mas daun long Jehova, em i Nambawan Bikpela na em i gat olgeta strong. Na ol dispela stori long ol samting i bin kamap tru long bipo, em spirit bilong God i kirapim Danyel long raitim, ol dispela stori i mas strongim bilip bilong yumi, long wanem ol i stori long ol gutpela wokboi bilong God Jehova, em ol i strongim bel na bilip tru, olsem tok i kamap bihain long dispela bai stori long en.

[Futnot]

Sampela Askim Bilong Kamapim Gen Ol Bikpela Tok

◻ I gat wanem samting ol hetman bilong graun i mas save long en na Jehova i bin skulim ol long en?

◻ Yumi ken tok wanem long Danyel i bin raitim hap bilong Danyel long Baibel o nogat?

◻ I gat wanem narapela samting Nebukatnesa i mas kisim save long en na bihain em i lusim pasin hambak?

◻ Jehova i bin mekim save long ol dispela king na dispela i mas mekim wanem long yumi?