Bikpela Babilon i Pundaun na i Kot Pinis

“BIKPELA taun Babilon em i bagarap pinis! Yes, em i bagarap pinis! Dispela taun Babilon tasol em i bin mekim olgeta lain manmeri ol i bihainim strongpela pasin pamuk bilong em. Dispela em i olsem em i givim strongpela wain long ol na ol i dringim.” “Bikpela taun Babilon em i bagarap pinis! Em i bagarap pinis! Nau em i kamap ples bilong ol spirit nogut ol i stap long en. Ol spirit nogut, na ol pisin doti, na ol pisin nogut tru, ol tu i stap long en.”−Revelesen 14:8; 18:⁠2.

Em bikpela tok profet tru! “Bikpela taun Babilon em i bagarap pinis!” Inap planti handet yia ol sumatin bilong Baibel i bin tingting long dispela tok. Olsem wanem na yu tu yu mas tingim? Long wanem, ol tok profet long Baibel i tok, wanpela samting bai painim Bikpela Babilon, na olgeta man bilong graun bai pilim. Wastaua bilong Julai na Ogas i bin kamapim long ples klia olsem dispela strongpela pamukmeri i makim olgeta lotu giaman wantaim, em ol i bilong Seten.a

Tasol em i pundaun olsem wanem? Wanem taim em i bin pundaun?

Babilon i Pundaun, Tasol Em i No Bagarap

Sapos yumi laik save Bikpela Babilon i pundaun olsem wanem, pastaim yumi mas save, olpela Babilon bilong bipo em i pundaun olsem wanem long yia 539 paslain long Krais. Long dispela taim ol Isrel, em lain bilong God, ol i bin i stap kalabus inap 70 yia, na nau ol i tingim kalabus bilong ol bai pinis, olsem ol profet bilong ol i bin tok.(Jeremaia 25:​11, 12; 29:10) Ating ol i amamas tru taim Sairas bilong Pesia i daunim Babilon na lusim ol Juda na bai ol i ken i go bek long Jerusalem, em taun holi bilong ol!−Aisaia 45:​1-4.

Tasol olpela Babilon i no pinis, maski em i no bosim moa ol Juda. Wanpela meri, em Joan Oates, em i bin raitim wanpela buk (Babylon) i stori long ol samting bilong bipo na em i tok, ‘Sairas i daunim taun Babilon na em i go insait, na em i tambuim ol man long kisim ol samting, na em i makim wanpela man bilong Pesia bilong bosim ples Babilon, na ol i no bagarapim ol samting; ol samting bilong lotu bilong ol Babilon na ol haus samting bilong gavman bilong ol, ol Pesia i larim i stap; na ol man bilong Babilon ol i stap yet, tasol nau ol Pesia i bosim ol; ol i bihainim yet lotu bilong ol na ol bisnis i kamap strong.’ Tru, Babilon i pundaun, tasol em i stap yet−tasol nau em i no kalabusim moa lain bilong God−ol i go bek long Jerusalem bilong kirapim bek lotu i tru.

Wanpela bikman bilong Grik, ol i kolim Bikpela Aleksanda, em i go insait long Babilon long yia 331 paslain long Krais, na ol man i mekim gut long em. Em i tingting long makim taun Babilon olsem biktaun bilong em long hap bilong Is, tasol em i dai pinis na em i no mekim dispela samting. Olsem na yumi ken save, Babilon i bin i stap inap long dispela taim.

Olsem na taim Babilon i pundaun long yia 539 paslain long Krais, i no olsem em i bagarap. Em i stap inap planti handet yia moa. Truim bilong ol tok profet bilong Baibel long Bikpela Babilon i wok long kamap long nau, na olsem wanem ol samting i bin painim olpela taun Babilon i makim ol samting i painim Bikpela Babilon long nau?

Bikpela Babilon i Pundaun

Pundaun bilong olpela Babilon i makim pundaun bilong narapela Babilon, em Bikpela Babilon, em olsem olgeta lotu giaman. Paslain long yia 1919 ol i kolim ol Witnes Bilong Jehova olsem Ol Sumatin Bilong Baibel, na long dispela taim ol i stap olsem kalabus long sampela tingting na pasin bilong lotu giaman. Tru ol i no pas moa long ol bilip giaman olsem God Triwan, na ol i no bilip moa long man i gat tewel na dispela tewel i no inap i dai, tasol sampela pasin bilong Babilon i stap yet long ol. Sampela i litimapim nem bilong ol narapela na bilong ol yet. Ol i laik bai ol i gat gutnem long ai bilong ol narapela, na ol i laik litimapim nem bilong Charles T. Russell, em namba wan presiden bilong Sosaiti Was Taua. Na ol i bihainim pasin bilong betde na Krismas, maski dispela i no gat as bilong en long Baibel. Na ol i bilip tu long kruse. Na sampela i pasim long klos bilong ol wanpela piksa bilong hat king i gat kruse. Na sampela i wok long kisim biknem long ai bilong ol lotu ol i kolim Kristen. Orait, Russell i dai pinis, na bihain liklik, olsem long yia 1917, bikpela senis i wok long kamap.

Long yia 1917 Sosaiti Was Taua i wokim wanpela buk (The Finished Mystery) em i stori long ol tok bilong Revelesen, na em i kamapim long ples klia pasin nogut bilong ol lotu ol i kolim Kristen, em ol i insait long Bikpela Pait i bin stap long Yurop long dispela taim. Ol lotu Talatala i bilong Bikpela Babilon, na sampela pasto bilong ol i tokim ol pren bilong ol insait long gavman bilong Kanada long sampela tok bilong dispela buk na ol i kotim ol Sumatin Bilong Baibel; olsem na long Februeri 12, 1918, gavman i putim tambu long ol Sumatin Bilong Baibel long Kanada.

Na ol misin long Amerika i bihainim dispela pasin bilong ol misin long Kanada. Long biktaun Los Anjeles long hap bilong Kalifonia long Amerika, kwiktaim gavman i kisim ol buk bilong Sosaiti Was Taua. Na long Me 1918 gavman i salim kotpepa long J. F. Rutherford, em nupela presiden bilong Sosaiti Was Taua, na ol i mekim olsem long 7-pela man moa bilong Sosaiti. Long mun Jun, kwiktaim gavman i kisim ol dispela man i go long kot na kot i makim 20 yia kalabus bilong ol; wanpela i kisim 10-pela yia. Nau ol misin i mekim wanem? Wanpela man, em Martin Marty, em i mekim wanpela tok long buk bilong em (Modern American Religion: The Irony of It All) na i tok, ‘Ol misin i biruaim lain bilong Russell [em ol Witnes Bilong Jehova] na ol i ure na amamas taim ol i harim ol dispela bikman bilong ol Witnes i mas kalabus inap 20 yia.’ Ol bos bilong Bikpela Babilon i lap nogut. Tasol ol i no tingim wanpela samting olsem: Man i lap pastaim, amamas bilong em bai pinis, tasol man i lap bihain, em bai amamas tru.

Olsem na long yia 1918 sampela lain bilong Jehova i kalabus tru. Nau ol man i kirap mekim nogut long ol Sumatin Bilong Baibel long Amerika na Kanada na sampela kantri moa. Ol misin i helpim ol gavman na ol i raunim ol Sumatin Bilong Baibel na rausim ol long ol taun. Ol i penim kolta long skin bilong ol na putim ol gras bilong kakaruk long dispela kolta, na ol i paitim ol long hap diwai. Ol man i mekim dispela pasin nogut ol i mas sem long dispela samting ol i bin mekim long dispela liklik lain gutpela Kristen.

Tasol long yia 1919 senis i kamap. Bikpela Pait i pinis long Novemba 1918. Ol dispela man bilong Sosaiti Was Taua ol i apil−ol i tok, kot i no bin bihainim pasin i stret. Olsem na Rutherford na ol poroman bilong em i lusim kalabus, na ol misin i bel nogut long dispela. Marty i tok, ‘Ol lain bilong ol misin ol i no ure na amamas taim ol Witnes i lusim kalabus.’ Gavman i no gat tok moa long ol. Wanpela jas Katolik, em Martin T. Manton, em i bin bel nogut long ol Witnes long dispela taim. Pop Pius Namba 11 i givim bikpela namba long em (knight of the order of St. Gregory the Great). Dispela man Manton i bin pasim rot na bai dispela 8-pela Witnes i no ken baim kot. Manton i as na ol dispela brata i bin kalabus inap 9-pela mun. Tasol bihain ol rong bilong Manton i kamap ples klia−long 1939 em yet i kalabus, long wanem em i bin grisim ol man long givim mani long em, olsem baim em na bai em i ken isi long ol taim ol i sanap long ai bilong em long kot!

Rutherford wantaim ol dispela poroman bilong em i lusim kalabus long yia 1919 na ol i go bek long namba wan ofis bilong Sosaiti Was Taua long Bruklin. Ol i kirap long stretim rot na bai bikpela wok i ken kirap long autim tok bilong Kingdom, winim olgeta wok bilong autim tok i bin kamap bipo. Nau ol Sumatin Bilong Baibel i no pret moa long ol man; nau ol i save pinis long ol lotu giaman na ol i no ken larim dispela samting i kalabusim ol moa. Bikpela Babilon i birua bilong ol na ol i mas kamapim em olsem em i lus na i pundaun. Lotu i tru i mas kamap bek long ol lain man.

Ol dispela strongpela Kristen i wok strong moa long autim tok long ol haus. Na ol i raitim tok long strongpela pepa na ol i karim raun na bai ol man i ken lukim na kaunim. Rait i tok: “Lotu i Olsem Trap Bilong Giamanim Yu” na “Mekim Wok Bilong God na Krais, Em King.” Lotu giaman i stap yet olsem long taim bilong olpela Babilon, tasol em i no antap moa long ol Witnes Bilong Jehova−long ai bilong ol i olsem Bikpela Babilon i pundaun long yia 1919. Ol i klia olgeta long en na em i no pasim o pretim o kalabusim ol moa!

Strong Bilong Babilon i Wok long Pinis

Nau 70 yia i go pinis, na long olgeta hap yumi lukim Bikpela Babilon i no gat strong moa. Tru, long Amerika lotu giaman i gat liklik strong yet−em sampela pasto samting bilong ol i save mekim tok long televisen na ol i grisim ol man na kirapim bel bilong ol na pulim ol. Ol dispela pasto i pulim bikpela mani long ol man. Sampela i bin mekim bikpela rong na dispela i kamap ples klia na i semim ol. Na lotu giaman i olsem i gat strong yet long hap bilong Saut Korea; ol lotu i giaman na kolim Kristen ol i insait tru long ol wok politik long dispela hap. Tru, Bikpela Babilon i pundaun, tasol em i wok yet i stap.

Ol bikpela pait i bin bagarapim strong bilong ol lotu giaman long sampela kantri olsem Jemani na Denmak na Swiden na Englan. Na long sampela kantri, olsem Itali na Spen na Frans, bipo lotu Katolik i strong, tasol long nau ol man i no givim bel moa long sampela pasin bilong lotu Katolik, olsem konpesio na Misa. Na nau i no planti man i laik lain long kamap pris. Pop bilong nau i save raun long olgeta hap na ol pop bilong bipo nogat, na dispela tu i makim olsem lotu bilong ol i laik bagarap.

Bihain long yia 1917 planti kantri i gat gavman olsem komyunis samting ol i daunim ol lotu na pasim ol na bai ol i no ken insait moa long wok politik olsem bipo ol i mekim. Long olgeta hap ol lotu giaman i as yet bilong planti pasin birua na pait, olsem na planti man i gat save ol i lusim olgeta lotu, maski em lotu ol i kolim Kristen o em i lotu haiden. Baibel i tok, Bikpela Babilon i sindaun antap long ol wara, olsem ol lain man, na em i bosim ol, tasol dispela wara i laik drai, olsem draiwara. Bikpela Babilon i stap long kot, na liklik taim em bai kisim strafe.−Revelesen 16:12; 17:​1, 15.

Bilong Wanem Babilon i Gat Kot?

I gat wanem as na Jehova i putim long kot olgeta lotu giaman? Ating sampela man i ting Jehova i mas orait long sampela wok bilong ol misin bilong putim ol skul na haus sik na sampela samting moa bilong helpim ol man. Tasol olsem wanem sapos yumi skelim dispela wok wantaim ol rong Jehova i tok ol lotu bilong graun i bin mekim? Yumi ken stori nau long dispela samting na long ol wok ol lotu i bin mekim.

“Wanpela ensel namel long ol 7-pela i holim dispela 7-pela dis, em i kam na i tokim mi olsem: ‘Yu kam! Dispela pamukmeri i sindaun antap long bikpela wara, em i laik kisim pe nogut bilong en. Mi laik soim dispela long yu. Ol king bilong graun ol i bin mekim planti pasin pamuk wantaim dispela meri. Na olgeta man bilong graun ol tu i bin mekim pasin pamuk wantaim em, na ol i kamap longlong, olsem man i spak.’ ” (Revelesen 17:​1, 2) Wastaua bilong Julai na Ogas, 1989 i bin stori long ol lotu i insait long wok politik wantaim “ol king bilong graun,” na dispela i mekim nogut long ol man inap longpela taim, na dispela pasin i wankain olsem bilong wanpela meri pamuk em i mekim ol samting bilong helpim em yet. Tasol Jehova i gat sampela tok moa long Bikpela Babilon.

“Dispela meri em i bin kilim i dai ol manmeri bilong God na ol man i bilip long Jisas na i autim nem bilong em. Na mi lukim dispela meri em i dringim blut bilong ol na i kamap longlong.” “Na God i lukim dispela taun i gat asua bilong kilim i dai ol profet na ol manmeri bilong em. Na olgeta man long graun ol birua i bin kilim ol i dai, asua bilong dispela tu em i stap long Babilon tasol.” (Revelesen 17:6; 18:24) Inap planti handet yia Bikpela Babilon i bin kilim i dai ol Kristen tru; sampela i bin tanim Baibel i go long tok ples bilong ol man na sampela i bin holim na kaunim Baibel, na long dispela as Bikpela Babilon i bin kilim ol i dai. Olsem na Bikpela Babilon i gat asua long dispela samting. Na em i gat asua tu long ol Kristen tru bilong nau, em ol man i bin kilim ol i dai insait long ol banis kalabus nogut bilong gavman Natsi na Fasis samting. Olsem Baibel i tok, Bikpela Babilon i gat asua long “olgeta man long graun ol birua i bin kilim ol i dai”−planti milion milion man i bin i dai long ol pait bilong bipo, na ol man i bin mekim ol dispela bikpela pait ol i tok ol i man bilong lotu.−Lukim Matyu 23:​34-36; 2 Timoti 3:⁠5.

Na God i gat tok long Bikpela Babilon long narapela samting tu. Baibel i kolim dispela rong bilong en olsem: “Yu bin giamanim olgeta lain man long kain kain posin bilong yu.” (Revelesen 18:23) Long tok Grik ol i kolim dispela tok “posin” olsem pharÌmaÌkiʹa, na wanpela buk (Expository Dictionary of New Testament Words, Volyum 4, pes 51, 52, bilong W. E. Vine) i tok, insait bilong dispela tok Grik i olsem: ‘ol marasin na drak na marila na posin na sanguma.’ Ol lotu giaman i bin bagarapim ol man, olsem posinim ol na giamanim ol, na nau ol i no save gut long ol samting bilong spirit; ol i bilip long ol god giaman na ol bilip giaman, na dispela i pasim ol na ol i no tingim Jehova o dispela bikpela tok long husat i king tru bilong olgeta hap. Na lotu giaman i paulim ol man tu long dispela bilip giaman olsem man i gat tewel na dispela tewel i no save dai, na dispela i as bilong ol wok marila na posin na sanguma samting na pasin bilong pret long ol man i dai pinis na pasin bilong lotuim ol tumbuna i dai pinis. I stret God i laik strafim Bikpela Babilon. Jon i tok: “Sin bilong en i olsem bikpela hip tru, na i kamap inap long heven. Na God i tingim olgeta pasin nogut bilong dispela ples.”−Revelesen 18:⁠5.

Yumi Mas Mekim Wanem?

Bikpela Babilon i pundaun pinis na God i makim em bilong kisim strafe, olsem na ol man i save laikim tok i tru ol i mas mekim wanem long nau? Tok profet bilong Aisaia i bin toktok long Babilon bilong bipo, tasol em i moa makim ol lotu giaman bilong nau. Em i tok: “Yupela klia long dispela hap; yupela lusim; no ken holim wanpela samting i tambu long holim; klia long en na lusim em; yupela ol man i karim ol samting bilong haus bilong Jehova yupela i mas i stap klin.” (Aisaia 52:​11, NW ) Dispela strongpela toksave i wankain olsem Revelesen 18:4 i tok: “Na mi harim narapela maus i kamap long heven, na em i tok, ‘Ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long sin bilong en. Na nogut bai yupela i poroman wantaim em long kisim pe nogut bilong sin.’ ”

Tru tumas, yumi mas lusim olgeta samting bilong ol lotu giaman. Tasol sapos yumi lusim Bikpela Babilon bai yumi mekim wanem? Yumi mas go insait long lotu tru bilong Jehova na lotu wantaim ol witnes bilong em. Planti milion man long olgeta lain long graun ol i wok long i kam “long maunten bilong Jehova.” Ol Witnes Bilong Jehova i laik stadi wantaim yu tu, na ol i laik bai yu bung wantaim ol long dispela lotu tru.−Aisaia 2:​2-4, NW, 43:​10-12.

Orait, nau yumi laik save, sapos Bikpela Babilon i pundaun pinis na God i skelim em pinis long kot, wanem samting moa God bai mekim? Wanem samting bai painim olgeta lotu giaman bilong Seten? Long Wastaua bilong Novemba bai yumi stori long ol tok profet bilong dispela samting.

[Futnot]

[Blok long pes 6]

Lotu na Gavman Bilong Hitler

‘Hitler i makim wanpela Katolik bilong helpim em, em Franz von Papen, na taim Hitler i kirapim gavman bilong em, dispela man von Papen i wok long grisim ol Katolik long helpim dispela nupela gavman na em i tokim ol strong long bihainim tok bilong Hitler.’

‘Long yia 1933 [Franz] von Papen i bosim wanpela lain Katolik long Jemani, na dispela lain i mekim wanpela tokaut olsem: “Mipela ol Katolik bilong Jemani bai givim bel olgeta long helpim Adolf Hitler na gavman bilong em. Mipela tingting long em, em i gat bikpela laik long Kantri Jemani, na em i save wok strong na em i gat gutpela tingting na save. Ol Katolik bilong Jemani i mas givim bel long strongim dispela gavman.” ’

‘Franz von Papen i mekim bikpela wok long kamapim dispela kontrak em gavman bilong Hitler i bin wokim wantaim pop long Rom. Ol i raitim nem bilong ol long pepa bilong kontrak long Julai 20, 1933. Wanpela man nem bilong em Pacelli em i wanpela kadinel bilong Misin Katolik na em i holim bikpela wok insait long gavman [bihain em i kamap Pop Pius Namba 12]. Ol i mekim wanpela tokaut olsem: ‘Nau Pacelli i givim bikpela namba long von Papen (Grand Cross of the Order of Pius), na von Papen i givim presen long Kadinel Pacelli, em wanpela piksa bilong Maria, olsem presen i kam long gavman bilong Hitler. Ol dispela presen i gat wanpela rait long ol, olsem: “Dispela presen i bilong tingim Kontrak em Gavman bilong Jemani i wokim long 1933.” ’−Ol dispela tok hia i stap long wanpela buk (Franz von Papen−His Life and Times), bilong H. W. Blood-Ryan.

[Piksa long pes 7]

Tru Babilon i pundaun long yia 539 paslain long Krais, tasol em i stap yet olsem wanpela biktaun inap planti handet yia moa