Redi i Stap Bilong Abrusim Bagarap na i Stap Long Taim Bilong Wan Tausen Yia
“Bai i gat wanpela lain sipsip tasol na wanpela wasman tasol bilong ol sipsip.”—JON 10:16.
1. God i stap oltaim oltaim, olsem na long tingting bilong em 1,000 yia i olsem wanem?
JEHOVA em i Man bilong kamapim ol samting bilong makim ol de na ol yia bilong ol man. Em yet em i stap oltaim oltaim na em i no inap i dai, olsem na long tingting bilong em 1,000 yia i olsem wanpela de tasol, na dispela taim i go pinis kwiktaim tumas, olsem asde tasol, na i olsem sotpela taim ol soldia i save was long nait.—Buk Song 90:4; 2 Pita 3:8.
2. Dispela ‘de’ God i makim bilong givim blesing long olgeta manmeri em inap hamas yia?
2 God i makim wanpela ‘de’ na dispela ‘de’ i olsem piksa na i makim bikpela hap taim inap olsem 1,000 yia. Na long dispela ‘de’ bai God i givim blesing long olgeta famili bilong graun. (Stat 12:3; 22:17, 18; Aposel 17:31) Ol dispela famili em ol famili i dai pinis na ol famili i stap laip yet. God bai mekim olsem wanem? Em bai mekim long rot bilong Kingdom bilong em i stap long han bilong Krais Jisas, em ‘pikinini’ bilong dispela ‘meri bilong God,’ em Baibel i tok piksa long em.—Stat 3:15.
3. (a) Wanem samting i kamap na i olsem Satan i kaikaim lek bilong Pikinini bilong meri bilong God? Tasol God i mekim wanem bilong oraitim bek em? (b) Long pinis bilong 1,000 yia bilong Krais Jisas i stap king, em bai mekim wanem long snek?
3 Taim ol birua i kilim i dai Krais Jisas long yia 33 na em i stap long matmat inap olsem 3-pela de, long dispela taim i olsem Satan i kaikaim lek bilong dispela Pikinini bilong meri bilong God (em lain bilong God long heven). Tasol long namba 3 de, God I Gat Olgeta Strong, em Bikpela Man Bilong Givim Laip, em i bin oraitim bek Pikinini bilong em—em i kirapim bek dispela gutpela Pikinini na givim laip long em long heven na em i no inap i dai. (1 Pita 3:18) Nau Jisas i no ken i dai gen, olsem na em inap i stap King na bosim ol manmeri inap 1,000 yia na “krungutim” het bilong snek, na taim dispela 1,000 yia i pinis bai Jisas i pinisim em olgeta. Em gutpela blesing tru bai painim ol manmeri i stap gut long God na ol i kamap gutpela pinis!
4. God i kirapim lain bilong em long mekim wanem?
4 Long yia 1914 taim bilong ol manmeri bilong ol arapela lain i pinis na las taim bilong ‘pasin bilong dispela graun’ i kirap. Nau long las taim lain bilong Jehova long graun ol i bin mekim bikpela wok bilong stretim ol samting long oganaisesen bilong ol. (Matyu 24:3; Luk 21:24) God Jehova yet em i no save mekim nabaut, olsem na em i kirapim lain bilong em long stretim gut ol wok. Ol i bihainim laik bilong em na em yet i stiaim tingting bilong ol na ol i redi gut bilong mekim ol wok paslain long Taim Bilong 1,000 Yia. Long yia 1914, long rot bilong meri bilong God, em lain bilong em long heven, God i bin kamapim Kingdom bilong em, olsem em i promis pinis, na em i putim Krais Jisas i stap King bilong dispela Kingdom. Yumi ken save long dispela samting sapos yumi skelim ol samting i bin kamap olsem Baibel i tok profet long en.
5. Kamapim Tok Hait 12:5 i stori long wanem samting i kamap nupela? Wanem namba wan taim Wastaua (tok Inglis) i kamapim as bilong dispela tok?
5 Long dispela rot gutpela truim bilong ol tok bilong Kamapim Tok Hait 12:5 i bin kamap, em i tok: “Na meri i karim pikinini man, em pikinini God i makim bilong holim stik ain na bosim strong olgeta lain manmeri. Meri i karim pikinini pinis, orait kwiktaim ol i kisim pikinini i go antap, na ol i bringim em i go long God na long sia king bilong em.” Dispela tok long meri bilong God i karim pikinini, em i tok piksa na i makim Kingdom bilong Jehova long han bilong Krais i kamap nupela long heven. Nius Wastaua (tok Inglis) bilong Mas 1, 1925 i kamapim insait bilong dispela tok piksa long namba wan taim. Dispela Kingdom bilong Krais i kamap nupela long heven long yia 1914, na dispela i narapela kain long ‘ol pikinini’ o ‘lain’ bilong Saion i kamap nupela long graun long yia 1919.—Aisaia 66:7, 8.
6. (a) Taim Kingdom i kamap nupela, em taim bilong mekim wanem wok em Jisas i bin tok profet long en? (b) Lain bilong Jehova i mas mekim wanem na bai ol inap mekim dispela wok? Nau ol i stap olsem wanem?
6 Long rot bilong Kingdom bai Jehova i stretim bek nem bilong em na kamapim long ples klia olsem em i King tru bilong heven na bilong graun, olsem na taim dispela Kingdom i kamap nupela long heven, em nau, em bikpela samting tru inap long ol i mas tokaut long dispela samting long olgeta hap bilong graun! Em taim bilong mekim dispela wok Jisas i bin tok profet long en taim em i kolim ol samting i mas kamap long graun bilong makim olsem em i stap king pinis long heven, em i bin tok: “Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:3, 14) Lain bilong Jehova ol i mas stretim gut ol wok samting bilong ol bambai ol inap i stap wanbel na wok gut wantaim long autim tok long olgeta hap bilong graun. Presiden bilong Sosaiti Was Taua long dispela taim bipo, em J. F. Rutherford, em i laik bai ol i mekim olsem. Olsem na bihain long taim bilong pait, olsem kirap long yia 1919, lain bilong Jehova i wok strong long stretim ol samting na redim gut ol manmeri i stap gut long Sosaiti, na ol i beten askim Nambawan Bikpela Man bilong bosim gut ol samting, em God Jehova, long soim rot long ol na blesim ol samting ol i mekim. Long taim bilong Namba 2 Pait Bilong Olgeta Hap, planti lain politik, olsem ol Fasis, na lain bilong Hitler, na ol man nating bilong lotu Katolik ol i strong long helpim misin, ol i birua tru long ol Witnes Bilong Jehova, tasol ol Witnes long olgeta hap bilong graun ol i stap wanbel na sanap strong.
7. (a) Lain bilong Jehova ol i mas stap olsem wanem na ol i ken bilip olsem bai ol inap abrusim bagarap long taim bilong bikpela hevi tru? (b) Ol manmeri i abrusim bagarap long taim bilong Bikpela Tait Wara, ol i bin mekim wanem na ol i no bagarap? Ol i olsem piksa na i makim husat?
7 Ol Witnes Bilong Jehova, em liklik lain remnan God i bin makim long spirit holi na ‘bikpela lain,’ ol i stap wanpela lain tasol na ol i stap wanbel na Nambawan Bikpela Man bilong bosim gut ol samting em i lukautim ol, olsem na ol tasol i ken bilip olsem bai ol inap abrusim bagarap, olsem Baibel i tok, taim dispela pasin Satan i bosim em i bagarap. (Kamapim Tok Hait 7:9-17; 2 Korin 4:4) Bai ol i kamap olsem ol manmeri em Jisas i tok bai ol i no ken lus long taim bilong bikpela hevi tru i winim olgeta hevi i bin kamap long bipo na i no gat kain hevi olsem bai i kamap gen. Jisas i tok, pasin olsem i bin kamap long taim bilong Noa, wankain pasin tasol bai i kamap long taim Em i kamap ples klia. Long taim bilong Noa 8-pela manmeri tasol i bin redi gut wantaim long wokim sip na ol i abrusim bagarap long Bikpela Tait Wara i karamapim olgeta hap bilong graun. Dispela wanpela lain tasol, em ol i pas gut wantaim na i stap wanbel, ol i abrusim bagarap. (Matyu 24:22, 37-39; Luk 17:26-30) Meri bilong Noa i olsem piksa na em i makim lain bilong Krais ol bai kamap olsem meri bilong em. Na ol pikinini man bilong Noa wantaim meri bilong ol i olsem piksa bilong ol “arapela sipsip” bilong Jisas long nau, em lain bilong ol i wok long kamap bikpela bikpela na yumi no save bai ol inap hamas long las de. (Jon 10:16) Bilong abrusim bagarap na i stap long Taim Bilong 1,000 Yia, ol dispela “arapela sipsip” i mas bihainim dispela Man, em Noa i piksa bilong em na em i winim Noa, em Krais Jisas. Na ol i mas wok gut wantaim “ol manmeri [God] i makim pinis,” olsem lain remnan, em God bai tingim ol na sotim taim bilong “bikpela hevi tru.”—Matyu 24:21, 22.
Abrusim Bagarap na i Stap long Taim Bilong 1,000 Yia
8. Jisas i mekim tok profet long em i kamap king na bihain em i mekim wanem tok piksa? Na wanem bikpela samting i kamap long Jun 1, 1935 na i helpim yumi long save long as bilong dispela tok piksa?
8 Gutnius Matyu i Raitim i tok, Jisas i mekim tok profet long mak bilong taim em i kam bek pinis na i stap king, na bihain em i mekim wanpela tok piksa. Em tok piksa bilong ol sipsip na ol meme. Dispela tok piksa i makim dispela taim nau, em taim bilong pinis, em dispela taim i kirap long yia 1914; long dispela yia taim bilong ol manmeri bilong ol arapela lain i pinis. (Matyu 25:31-46) Long Sarere, Jun 1, long yia 1935 wanpela samting i kamap em i bikpela samting bilong helpim yumi long save, ol sipsip long dispela tok piksa bilong Jisas i makim ol manmeri bilong bikpela lain. Long dispela de, long wanpela kibung bilong ol Witnes Bilong Jehova long Wosington, long Amerika, 840 manmeri i bin kisim baptais bilong makim olsem ol i dediket o givim ol yet long God Jehova long rot bilong Krais Jisas. Planti bilong ol i kirap mekim olsem, long wanem ol i laik bihainim kwik wanpela tok J. F. Rutherford i bin mekim long as bilong ol tok bilong Kamapim Tok Hait 7:9-17. Ol i laik insait long bikpela lain arapela sipsip bilong Gutpela Wasman bambai ol inap abrusim bagarap long taim bilong bikpela hevi tru em bai pinisim dispela taim nau, na bai ol inap i stap long taim Wasman na King Krais Jisas i bosim graun inap 1,000 yia. Na bihain tru bai ol inap i stap oltaim long paradais long graun.—Matyu 25:46; Luk 23:43.
9. Bilong wanem King i singautim ol sipsip long i kam “kisim kingdom Papa i bin redim na makim bilong [ol]”? Olsem wanem ol inap tru long helpim ol brata bilong King?
9 Ol dispela manmeri i kain olsem sipsip, bilong wanem King Krais Jisas i singautim ol i kam “kisim kingdom Papa i bin redim na makim bilong [ol] pinis, long taim graun i kamap nupela yet”? King i mekim olsem, long wanem ol i bin mekim gut long ol “brata” bilong em, na long dispela rot i olsem ol i mekim gut long em. Taim King i tok long ol “brata” bilong em, em i tok long liklik hap lain brata spirit bilong em ol i stap yet long graun nau long las taim, em lain remnan. Ol manmeri i kain olsem sipsip ol i kamap wanpela lain sipsip tasol wantaim ol dispela brata bilong Wasman na King Krais Jisas, olsem na ol i poroman gut wantaim ol na dispela inap helpim ol tru. Long ol samting bilong skin tu ol i mas helpim ol brata bilong Jisas long autim tok bilong dispela Kingdom long olgeta hap bilong graun, na bihain bai las de i kamap. Na ol sipsip i mas pilim tru dispela gutpela wok ol inap mekim, olsem ol inap wok wantaim lain remnan na pas gut wantaim ol olsem wanpela lain sipsip tasol bilong wanpela Wasman tasol.
10. Ol sipsip bai kisim wanem samting na bai i olsem ol i “kisim kingdom Papa i bin redim na makim bilong [ol], long taim graun i kamap nupela yet”?
10 Ol i kisim “kingdom Papa i bin redim” bilong ol, tasol i no olsem ol dispela sipsip bai mekim wok king wantaim Krais Jisas na ol brata bilong em long heven inap 1,000 yia. Nogat. Tasol taim dispela 1,000 yia i kirap, long dispela taim bai ol i kisim dispela graun em Kingdom i bosim. Ol i lain bilong Adam tupela Iv, olsem na dispela graun ol i kisim em God i bin redim bilong ol “taim graun [olsem ol manmeri God inap baim bek ol] i kamap nupela yet.” Na tu, ol dispela sipsip i kamap pikinini bilong King long graun, em dispela King i kamap “Papa” bilong ol “bilong i stap oltaim oltaim.” Olsem na ol i kisim dispela hap em Kingdom bilong God bai bosim, em dispela graun.—Aisaia 9:6, 7.
11. Ol sipsip i mekim wanem na ol i kamapim klia olsem ol i givim bel long Kingdom? Olsem na ol i kisim wanem blesing?
11 Ol manmeri i olsem sipsip ol i narapela kain tru long ol manmeri i olsem meme. Ol sipsip i kamapim long ples klia olsem ol i givim bel long Kingdom. Ol i mekim olsem wanem? Ol i no tok tasol ol i laikim Kingdom bilong God. Nogat. Ol i mekim ol wok tu i kamapim dispela samting. Ol i no inap mekim gut long King yet bilong helpim Kingdom bilong em, long wanem em i stap long heven na ol i no inap lukim em. Olsem na ol i mekim gut long ol brata spirit bilong em ol i stap yet long graun. Maski dispela samting i kirapim ol meme long bel nogut long ol na birua long ol na mekim nogut long ol, ol sipsip i mekim gutpela wok, olsem na King i tokim ol, “Yupela i gat blesing bilong Papa bilong mi.”
12. Ol sipsip i abrusim bagarap bai ol inap sekanim husat? Bipo ol manmeri bilong lain remnan i gat wanem tingting long dispela?
12 Bikpela lain sipsip ol i mekim gut long ol brata spirit bilong King, bai ol i kisim gutpela blesing—bai ol inap abrusim bagarap na i stap long Taim Bilong 1,000 Yia. Bihain bai ol inap sekanim ol manmeri i lusim matmat na kirap bek. (Jon 5:28, 29; 11:23-25) Sampela bilong ol dispela manmeri em ol bilipman bilong bipo, olsem Abraham na Aisak na Jekop na ol profet, ol i bin karim bikpela pen na hevi bambai ol i ken litimapim nem bilong Jehova, em Nambawan Bikpela King, na bai ol i ken kisim dispela kain kirap bek i “gutpela moa,” olsem ating bai ol i kirap bek paslain liklik. (Hibru 11:35) Jon Bilong Baptais tu bai insait long dispela lain bilipman na meri ol i kirap bek, em Hibru sapta 11 i kolim nem bilong sampela. (Matyu 11:11) Sampela bilong lain remnan ol i bin ting bai ol tu i stap long graun inap long dispela taim bambai ol i ken sekanim ol dispela bilipman i kirap bek, em ol i bin dai paslain long de Pentikos long yia 33. Tasol ol dispela manmeri God i bin makim long spirit holi, olsem lain remnan, bai ol i kisim dispela gutpela wok o nogat?
13. Olsem wanem na i no gat wok long lain remnan i mas i stap bilong sekanim na lukautim ol manmeri i kirap bek long matmat na i stap long graun?
13 I no gat wok long ol i stap long graun inap long dispela taim. Bai i gat bikpela lain manmeri ol i bin abrusim bagarap long taim bilong bikpela hevi tru na ol inap mekim dispela wok na lainim ol manmeri i kirap bek long ol samting bilong “nupela graun” i stap aninit long “nupela skai.” (2 Pita 3:13) Ol manmeri bilong bikpela lain ol i redi nau bilong mekim dispela wok. Long nau lain brata spirit bilong Jisas long graun i wok long i go liklik na i no winim 9,000. Olsem na ol wan wan i abrusim bagarap long taim bilong bikpela hevi tru bai ol i liklik lain tumas bilong lukautim wok bilong redim ol samting bilong ol planti manmeri ol bai i kirap bek. (Esekiel 39:8-16) Tasol ol manmeri bilong bikpela lain bai ol inap olsem planti milion, olsem na bai ol inap mekim gut dispela wok. Na ating God i laik givim dispela gutpela wok long ol.
14. (a) Planti long bikpela lain ol i lain long mekim wanem wok? Bilong wanem nau sampela bilong ol i mas kisim bikpela wok? (b) Wanem ol samting i mas kamap klostu nau? Na bai i gat wanem wok ol arapela sipsip i mas mekim?
14 Long nau planti bilong bikpela lain ol i lain long mekim ol wok bilong lukautim ol kongrigesen. Na ol i insait long ol wok em oganaisesen bilong God i mekim long olgeta hap bilong sanapim ol haus samting, na dispela tu i lainim ol. Na yumi mas amamas long lukim sampela man bilong bikpela lain, em ol i strong long spirit, ol i kisim bikpela wok moa insait long dispela oganaisesen Jehova i bin kamapim long nau na i wok i stap. Ol manmeri God i bin makim ol long spirit holi na ol i stap yet long graun ol i go lapun na ol i no inap moa long mekim bikpela wok. Ol dispela brata bilong King i amamas long gutpela wok ol strongpela elda na ol wokman bilong kongrigesen, em ol i bilong lain arapela sipsip, ol i mekim bilong helpim ol. Klostu nau bai Bikpela Babilon i pinis olgeta long graun. Dispela samting i kamap pinis, orait nau bai Pikinini Sipsip i maritim meri bilong em, em olgeta 144,000, olsem Kamapim Tok Hait 19:1-8 i makim. Na ol arapela sipsip i stap olsem nupela graun aninit long nupela skai bai ol i mekim wok bilong King long graun, na bai ol i insait long bikpela wok bilong stretim bek ol samting long graun na mekim i kamap gutpela ples paradais i gat ol manmeri i stap long en, na dispela samting bai litimapim nem bilong Jehova.—Aisaia 65:17; lukim tu Aisaia 61:4-6.
15. Ol manmeri bilong bikpela lain ol i wetim wanem ol samting i kamap long Taim Bilong 1,000 Yia?
15 Taim Krais i stap King na em i bosim graun inap 1,000 yia na ol manmeri God i baim bek ol ol i kirap bek, orait ol manmeri bilong bikpela lain, em ol i bin abrusim bagarap na ol i stap long dispela taim, bai ol i kisim sampela bikpela na gutpela wok. Bai ol i kamap ol pikinini man na pikinini meri bilong King. Na sampela bilong ol dispela pikinini man bai ol inap kisim wok hetman, olsem ol pikinini man bilong King Devit i bin stap hetman na mekim kain kain wok.a Dispela samting i kirapim tingting bilong yumi na yumi tingim ol tok bilong Buk Song 45 em i stori long “king” em Jehova i makim.
16. Ol tok bilong Buk Song 45 i makim husat tru? Olsem wanem yumi inap save long dispela samting?
16 Dispela king long Buk Song 45 em i husat tru? Em Krais Jisas! Yumi inap save long dispela samting, long wanem Hibru 1:9 i kolim tok bilong Buk Song 45:7 na i makim olsem. Hibru 1:9 i tok: “Yu save laikim stretpela pasin, na yu no laikim tru pasin nogut. Olsem na God bilong yu yet em i bin kapsaitim wel long yu, bilong makim yu olsem man i gat biknem. Na dispela i mekim yu i amamas moa yet. Ol poroman bilong yu ol i no inap amamas olsem yu.” Olsem na tok bilong Buk Song 45:16 i makim Krais Jisas taim em i kisim biknem pinis long heven. Dispela ves i tok: “Na yu, king, bai yu gat planti pikinini man, na bai ol i senisim ol tumbuna bilong yu. Bai yu givim bikpela namba long ol, na bai ol i bosim ol manmeri long olgeta hap bilong graun.”
17. King Krais Jisas i gat bikpela tingting long wanem samting? Na em i tingim tru husat?
17 Jisas i no tingim tumas taim em i bin stap long graun. I stret em i tingim moa yet taim em bai stap King na bosim dispela graun. Tru, em i no lusim tingting long ol samting em i bin mekim taim em i stap long graun, na em i no lusim tingting long ol tumbuna bilong em ol i insait long tok promis bilong Jehova long blesim olgeta famili bilong graun long rot bilong Pikinini Bilong Abraham. Tasol nau em i gat bikpela tingting long ol samting God Jehova i laik mekim klostu nau, em God Jehova i Man bilong putim em i stap King. Olsem na nau Jisas i tingim ol pikinini bilong em long graun, na em i tingim moa yet ol pikinini man namel long ol, em ol inap mekim wok hetman aninit long em hia long graun. Em i gat bikpela tingting moa long dispela lain, na em i no gat bikpela tingting olsem long ol tumbuna bilong em ol i bin i stap long graun long bipo.
18. Sampela Baibel i tanim tok bilong Buk Song 45:16 olsem wanem na dispela i helpim yumi long save, Jisas i tingim moa yet ol pikinini man bilong em ol bai kamap hetman, na em i no gat bikpela tingting olsem long ol tumbuna papa bilong em?
18 Sampela Baibel i kamapim klia olsem em i tingim moa yet ol pikinini bilong em ol bai kamap hetman long graun na em i no gat bikpela tingting olsem long ol tumbuna bilong em. Sampela Baibel i tanim tok bilong Buk Song 45:16 olsem: “Ol pikinini man bilong yu bai senisim ol tumbuna papa bilong yu, na bai ol i kamap hetman na bosim olgeta hap bilong graun.” (Baibel Moffatt) “Wok bilong ol tumbuna papa bilong yu bai ol pikinini man bilong yu i kisim; na bai yu putim ol i stap hetman long olgeta hap bilong graun.” (Ves 17, The New American Bible) “Ol pikinini bilong yu i kamap olsem senis bilong ol tumbuna papa bilong yu: na bai yu mekim ol i kamap hetman bilong bosim olgeta hap bilong graun.”—Baibel The Septuagint Version, em kampani Samuel Bagster and Sons i wokim.
19. Sampela man bilong bikpela lain long nau ol i gat wanem wok insait long kongrigesen? Na long Taim Bilong 1,000 Yia bai King Krais Jisas i makim ol bilong mekim wanem wok?
19 Yumi amamas tru, long wanem ol dispela man ol inap kamap hetman long bihain ol i stap namel long yumi long nau. Ol i stap long lain arapela sipsip em ol i save harim maus bilong Gutpela Wasman, em Krais Jisas. Kirap long yia 1935 ol i bin putim yau moa yet long ol tok bilong em. Long dispela yia, long wanpela kibung bilong ol Witnes Bilong Jehova long Wosington, long Amerika, ol i bin kisim save long insait bilong tok bilong Kamapim Tok Hait 7:9-17. Long nau planti tausen long dispela bikpela lain arapela sipsip ol i mekim wok elda long ol 60,192 kongrigesen bilong ol Witnes Bilong Jehova long 212 kantri. Ol dispela man i redi i stap na ol i wok gut wantaim lain remnan, em liklik hap lain bilong ol brata spirit bilong Jisas ol i stap yet long graun, olsem na bai King Krais Jisas inap kisim ol i stap pikinini bilong em long graun long Taim Bilong 1,000 Yia. (2 Pita 3:13) Taim ol i kamap pikinini bilong em, bai ol inap kisim wok hetman long nupela graun.
20. (a) King bai i gat wanem tingting long ol dispela hetman em i makim long graun? (b) Bikpela lain bai sekanim husat? Wanem ol gutpela samting inap painim ol dispela manmeri i kirap bek?
20 King Krais Jisas bai amamas long ol dispela nupela hetman, olsem em i save amamas long wok wasman bilong ol gutpela arapela sipsip long ol kongrigesen bilong ol Witnes Bilong Jehova long nau. Olgeta manmeri long bikpela lain arapela sipsip—ol man na ol meri tu—bai ol inap sekanim olgeta manmeri i harim maus bilong Jisas na ol i kirap bek long matmat na ol inap kamap gutpela olgeta na i stap long gutpela ples paradais i kamap long olgeta hap bilong graun. (Jon 5:28, 29) Ol dispela manmeri em God i mekim gut long ol na em i kirapim bek ol, sampela em ol tumbuna papa bilong Jisas, em God i baim bek ol; ol dispela bilipman bilong bipo ol i bin givim bel tru long Jehova na ol i redi long i dai tu bilong i stap gut long Em, bambai ol inap kisim dispela kain kirap bek i “gutpela moa.” (Hibru 11:35) Long taim Bilong 1,000 Yia, bai King na man bilong baim bek ol, em Krais Jisas, em i helpim ol na bai tingting na skin bilong ol i kamap gutpela olgeta. Na i no dispela samting tasol—i gat planti gutpela samting moa bai painim ol. Sapos ol i pas gut wantaim na redi i stap aninit long God Jehova long taim bilong laspela traim i painim ol long pinis bilong dispela 1,000 yia, orait dispela bai i kamapim long ples klia olsem i stret ol inap kisim laip oltaim long Paradais olsem lain bilong Jehova long graun.—Matyu 25:31-46; Kamapim Tok Hait 20:1-21:1.
[Futnot]
a Lukim 1 Stori 18:17.
Bai Yu Bekim Wanem Tok?
◻ Jehova i makim hamas yia bilong givim blesing long olgeta manmeri?
◻ Yumi mas i stap olsem wanem na bai yumi inap abrusim bagarap long taim bilong bikpela hevi tru?
◻ Ol sipsip bai kisim wanem samting na bai i olsem ol i ‘kisim kingdom God i redim bilong ol long taim graun i kamap nupela yet’?
◻ Long Taim Bilong 1,000 Yia, bai bikpela lain inap insait long wanem ol gutpela wok?