Pasin Bilong Ol Japan Long Autim Tok Long Ol Man Bilong Bisnis
KRAIS JISAS i tok lain bilong em i mas autim tok “i go inap long olgeta hap bilong graun,” olsem na ol i mas autim tok long ol man bilong bisnis tu. (Aposel 1:8) Long Japan i hatwok long autim tok long ol man i wok long ofis bilong ol bikpela kampani. Ol pablisa long wanpela kongrigesen i kisim tok orait long tilim magasin long ol wokman long wanpela bikpela haus ofis long belo. Ol pablisa i beten askim Jehova long strongim bel bilong ol, na ol i tingim gut klos ol i laik pasim na pasin ol i mas bihainim, na ol i pasim kat long klos bilong ol, i gat nem bilong ol na i tok ol i Witnes Bilong Jehova.
Taim wanpela Witnes i laik toktok wantaim wanpela wokman, em i save tok olsem: “Yes, mi kisim tok orait long toktok wantaim ol manmeri i wok hia. Inap mi toktok liklik wantaim yu taim yu kaikai?” Ol Witnes i mas bihainim gutpela tingting na mekim ol gutpela tok. (Kolosi 4:6) Namba wan taim ol Witnes i go, ol i tilim 39 magasin. Ol i go 4-pela taim bambai ol inap toktok wantaim olgeta 1,500 manmeri i wok long dispela traipela haus ofis i go antap inap 8-pela plua. Ol i tilim planti magasin, winim 100, na sampela man i laik kisim magasin long olgeta taim, na ol i mekim sampela gobek tu.
Wanpela pablisa i go bek lukim wanpela manesa. Taim pablisa i kaunim sampela tok long Baibel New World Translation, manesa i tok: “I no hatwok long save long tok bilong dispela Baibel. Baibel bilong mi ol i raitim long olpela tok Japan, na i hatwok long kaunim.” Long wik antap, pablisa i kisim wanpela Baibel New World Translation i go givim long dispela manesa.
Olsem wanem? Yu inap autim tok long “olgeta manmeri” long teritori bilong kongrigesen bilong yu, ol man bilong bisnis tu?—Lukim 1 Timoti 2:4.